Danieli12
Lagumuhóun dan
1—Lídanme oura ligía, ábame lachülaagun Migeli, ánheli le óunigirubaliña lumutuniña Wabungiute.«Ábanbei dan lánina idiheri dan ligía, aban dan le úagili libe lúmagiñe ñein hamá gürigia ubouagu. Danme lachülürün dan ligía, hesefuruba sun lílana ageiraü ha bürüwañubei hiri tidan líburu.2Saragubaña hádangiñe ha hilaguaañabaña ásaarutiña: Híbirime lun habagaridun lun sun dan, híbiri lun hasufurirun lun sun dan.3Wügüriña chu tau ha adundehabaña saragu gürigia lidoun üma le surubei, hámirihaba kei límirin sielu; hámirihaba lun sun dan kei waruguma!4—Gama lumoun buguya, Danieli, aramudabéi katei le, ábame bafurarunu líburu darí lachülürün lagumuhóun dan. Saragubaña gürigia éibugutiña yagüroun yaroun áluaha laganwoundun hasubudin.5Au Danieli, ábaya narihin biámaya wügüriña rara, aban luéigiñe kada louba duna.6Aba lariñagun aban hádangiñe lun wügüri le taubei daüguaü linu, le lóugiñebei duna:
—Ídaba san lagumucha lanarime burí katei le?7Aba liñuruni wügüri le taubei daüguaü linu lúhabu sielun, aba láfiñurun lidan liri Wabungiute le wínwanbei, lariñaga:
—Lidan ǘrüwa irumu dimí, danme lásurun lagünrinchawagun habafu lumutuniña Wabungiute, ligíaba lagumuchun burí katei le.8Aganba numuti le lariñagubei, gama lumoun úati gunfuranda nan ni kata. Ábati nariñagun lun:
—Nabureme, kaba san asusereda lárigiñe sun le?9Lariñaga nun:
—Beibaméme luagu bémeri Danieli. Gasu lerederun katei le aramudañu darime lachülürün lagumuhóun dan.10Saragubaña ásügürütiña lídangiñe asufuriruni le buga uágubei lariñawagúa, gama lumoun háfuriduba lídangiñe harumañu, aranseñu. Ha wuribabaña hasigiruba adaagua wuribani, úouga gunfuranda hamani le asuseredubei, ánhañati wügüriña ha chu tau, gunfuranda habéi sun katei.11Lásügürüba milu bián san gádürü-wein-diisi weyu lúmagiñe lagumuchun adagaragüdüni le ságüti weyu luma líchugun lanufuna guáriua tidoun lani Wabureme ténpulu.12Fuleseiwati le agurabahabei lau emenigini darime sügühali milu-ǘrüwa-san-darandi-seingü weyu.13Gama lumoun buguya Danieli, béibuga dagá lumoun lagumuhóun, emeraaguabá, ladüga lídanme lagumuhóun dan, básaaruba lun bibihini bafayeiruaha.
Bible Society of Honduras