Ɛfɛso3
1Nɔ kə bɛ luu-i nɔ, ndə mbəŋ-ɔŋ Bɔɔ, ndə mɔ bɛ wo-njaa-chaŋ bʉʼka Klai Jiso, tʉʼ gháaNyii tʉ bii, ndə bii gòʼ təmə bɛ bʉə-Juu fɛ.2Mɔ nɔ kwɔ̀ʼtə mbɔ mbəŋ-yii nɔ kínə fɔ̀ʼ ndə Nyii nɔʼ kə kɔ́ kəghɔ-mɔ ndə məshyíi bii nə buuŋjyu ndə ɔ kie tʉ bii ndə bii gòʼ təmə bɛ bʉə-Juu fɛ.3Nyii nɔʼ kɛ̀ʼ nukə tʉ mɔ, ndə ɔ nɔʼ kə shʉ̀tə bəshʉ bɔŋ lə̀ŋ, haʼ ndə mɔ nɔʼ kə fəŋ nyɔ̀ʼ tʉ bii məniʼ.4Kaʼ bii tíi nukə ndə mɔ kə nyɔ̀ʼ, bii bu kínə ntyʉʉ ndə mɔ nɔʼ kínə te nukə ndə Nyii kə lə̀ŋ yie-Klai.5Nyii nɔ nə lə̀ŋ nukə-ɔ̄ŋ kəghɔ-bʉə bəshʉ, bɔŋ nɔʼ kɛ̀ʼ laa tʉ bəlɔntəŋ-bi ndə bɔ̂ŋ bɛ ŋkʉʉ ghɔŋbə bʉəyʉkəŋgieNyii-bi tíŋ hə ndəŋ Lyʉʉhəkə-i.6Mbʉ kənu ndə Nyii kə lə̀ŋ nɔ bɛ mbɔ tíŋ hə bɔ̌ŋ ntəŋjyujyu ndə bʉə ndə bɔ̂ŋ bɛ́ŋ ndə bɔ̂ŋ gòʼ təmə bɛ bʉə-Juu fɛ, nɔʼ bɛ njuhə, bìa bʉə-Juu ndə məbɛ lɔŋkə imɔʼ, bɔ̂ŋ bənchəŋ bu kie biʼkə ndə Nyii nɔʼ kə kɔ̀ʼnə mbɔ Klai Jiso yi gwè nə yɔŋ.7Nyii nɔʼ kə chìi mɔ ndə məbɛ wofɔ̀ʼ-ɛ ndə ntəŋjyujyu-ɔ̄ ndə bɛ kɔ-buuŋjyu-kə-i. Ɔ nɔ nə fɔ̀ʼ yɔ̄ŋ-yə nə ghʉəʼkə-i.8Ndə mbəŋ-ɔŋ, mɔ nɔ bɛ ndyiʼtə-wo-kə mu bʉə-bi bənchəŋ bɔŋ ɔ dʉ̀ʼ buuŋjyu-ɔ̄ tʉ mɔ, ndə məlɔ̀ʼ tʉ bʉə ndə bɔ̂ŋ gòʼ təmə bɛ bʉə-Juu fɛ, fʉʼkə ndə i bɛ mu Klai chàa ghʉəʼ-woməsʉʉ-kə ndə məkínə,9ndə məchìi bʉə bənchəŋ kínə mbʉ kənu ndə Nyii nɔʼ kə shʉ̀tə bɔŋ lə̀ŋ kəghɔ-bʉə ŋgʉʼŋgʉʼhə, kə bɛ Nyii ndə ɔ chìi fɔbə inchəŋ.10Mbɔ tíŋ hə bɔ̌ŋ chɔshi bʉəntəŋNyii ghɔŋbə lyʉʉhəbʉəbʉəbə ndə bɔ̂ŋ tʉʼ sɔ́ʼ nə bəfɔŋ bɔŋleʼ kə́ bɛ bəntəŋbəshʉ ndə njəŋ-yuo-hə yi kínə ntɛ-mukətʉ-súunə-hə ndə Nyii kie inchəŋ.11Nɔ nukə nɔ ndə ɔ nə kie mu fyii-ɔ təmə nchʉʉhə-i byuunɔ liʼ-i bɛ ghɔ fɛ, ɔ bɔŋ fɔ̀ʼ nduɔ tíŋ hə bɔ̌ŋ Klai Jiso Tiekətʉ-yʉʼʉ.12Mu Klai, bʉʼʉ nɔ kie fyii tə̀ŋnə leʼnə fyii shʉ́əshʉ́ə ndə mətə́nə bəshʉ-Nyii tíŋ hə bɔ̌ŋ məmɔʼfyiihə-ʉʼʉ ndəŋ ɔŋ.13Nɔ, mɔ nɔ tʉʼ fʉ̀ʉtə bii mbɔ kə ŋgʉəʼ ndə mɔ bɛ muŋgɔ mə kə́ chɔ́ŋhə bii fɛ, mɔ nɔ tʉʼ nyíɛ yie-bii bɔŋ kə́ bɛ məgʉə-yii.14Bʉʼka nubə-ɔ̄ŋ, mɔ nɔ tʉʼ bè kweʼtəbə-ɔŋ sê bəshʉ-Nyii, mbʉ Tie,15ndə tʉʼ tyú ɔ tyú yietə tʉ chu-fu-tə inchəŋ ndə i bɛ yuo ghɔŋbə chisêkə.16Mbɔ tíŋ hə bɔ̌ŋ fɔŋ məgʉə-e ndə i yɔ́ŋ daa, ɔ chʉʼ kɔ́ bii nə ghʉəʼkə tíŋ hə bɔ̌ŋ Lyʉʉhəkə-i mbɔ bii chʉʼ kie fyii shʉ́əshʉ́ə mu mbʉə-bii.17Mbɔ Klai chʉʼ shʉ̀tə yəŋ-chí-kə-i mu fyiihə-ii tíŋ hə bɔ̌ŋ məmɔʼfyiihə-ii ndəŋ ɔŋ, mbɔ ŋkʉ̂ʉ-Nyii bɔŋleʼ dùhə ghûutə-i, i yá sê mu fyii-bii,18bii chʉʼ kie ghʉəʼkə biibə bʉə-Nyii bənchəŋ ndə məkínə ghʉə-e, tyʉ-i, mədəʼ-ɛ leʼnə mədɔŋnə-iŋ,19bɔŋleʼ kínə ŋkʉ̂ʉ-Klai ndə i chàa ndaa mbɔ məchímbi ghɔŋbə ghʉəʼkə chʉʼ lə́ŋ mu mbʉə-bii ndə i gwè hə kəghɔ-Nyii.20Nduɔ, tə mbəŋ-ɛŋ ndə bəkɔ ɔ chìi i yɔ́ŋ tíŋ ntyʉʉ-i ndə bʉʼʉ tʉʼ bíʼtə bɔŋ-kə́-leʼ kwɔ̀ʼtə, tíŋ hə bɔ̌ŋ ghʉəʼkə ndə i tʉʼ fɔ̀ʼ mu mbʉə-bʉʼʉ,21tə məgʉ́ə bɛ tʉ ɔŋ mu chɔshi ghɔŋbə Klai Jiso ndə kwinə-bʉə-bə inchəŋ təmə liʼ-i bɛ ghɔ fɛ. Ï bɛ haʼ nɔ.
Wycliffe Bible Translators, Inc.