Lee Owera kobodorouti 14

Owera kobodorouti14

Pauro ra Banabasi ra ro Ikoniam sabowa urubia gimowauti-rido

¹Pauro ra Banabasi ra beda tanaro to irowatiti-do ata sabowa to kou ato, neitiro Iu urubia karadabu moto to aise kimobodiai-ma ie, taie neitiro ro urubia iato kimowauti ie owera Iesu sapuwo to. Ina neitiro ro idaibo tanaro nou gisioidiro-rido Ikoniam sabowa to na-gorowateai-rido, Iu urubia edi karadabu moto ro neito aise gimobodiai-ma. Ina urubia sirio ito ta-garadabuti-rimo Iu owera karo tato urubia Iu urubia mutu, taie Iesu sapuwo to neitiro ro nedi owera ro neito gimowauti-rido. Iesu sapuwo to neitiro ro urubia pupuwo ia to gimowauti-rido ina nou rie urubia sirio aise gimibiria-rimo.²Kaupoti amia Iu urubia imibiria pua, ina neio ro Iu owera karo tato urubia ubauba kimaragoidiro iato gimio-rimo kimibiria urubia sapuwo to.³Pauro ra Banabasi ra nou ri gomidiro-rido tuturu tau to Ikoniam sabowa ato. Neitiro ro Abera Naramu sapuwo to ata tere tato irowautititi-do. Neitiro woko edi pupuwo to gisioidiro-rido Iesu aboudo gou-ro, neitiro ro awawo korosa tanaro nou mabu ato gisioidiro-rido. Neitiro ro edi awawo korosa tanaro ro na-gisioidiro-rido, Abera Naramu ro neito gowapotaidiro-ro ibo, neitiro ro edi owera gimowauti-rido Godi edi wisa tato nirimagare ro na-gaiwai-ro nou sapuwo to io morobise ie.⁴Imese urubia sirio iedi sabowa ro iato na-gorowomidiro neio turi ato aise gorohodowa-rimo. Arua neio Iu urubia aboudo goi-rimo, ina arua neio kitiodorai-ma dubu teibo aboudo goi-rimo. Arua Iu urubia, arua Iu owera karo tato urubia simara awawo urubia mutu, owera iato gisioidiro-rimo.

⁵Neio ro Pauro ra Banabasi ra iato gimediai-marimo ubauba mino to iworohuti-mari ina nadi to ibo-mari.⁶Ina neitiro ro nedi owera ro na-girorowai-rido neitiro iato tuturu tau to omidiro pua, Ikoniam sabowa aise gemeserai-rido imese gorowadau-rido Raikonia duriomoro to. Ina Raikonia duriomoro ato sabowa teibo iato giamo-ma Risitira ra Debe ra neitiro ito gorowadau-rido. Ina arua sabowa kainakaina gomo ato na-giamo⁷Pauro ra Banabasi ra ro Iesu sapuwo to mea owera urubia iato ta-gimowauti-rido.

Pauro ra Banabasi ra Risitira urubia ro mea se iebimai-ma pua

⁸Risitira sabowa ato neitiro ro urubia sirio iato gimowauti-rido. Iedi sabowa ro nato ata togiri dubu iato imidirotiti, nu mamu ro ibose to goroto.⁹Pauro ro owera na-giwasoro Iesu sapuwo to togiri dubu ro Pauro owera gare se gemedea-ro. Pauro idomari teibo edi dubu ro nou ato se giwotoi-ma. Ina nu ta-geremasibai ibo togiri dubu ta-imibiria ibo ‘Pauro ro iedi owera ro na-waro-die Godi sapuwo to mo nou ro meana anama-owai-ri.’¹⁰Pauro ro auna se ioudo gemaia-ro iedi dubu ro, ‘Urubia dubu, deribua!’
Iedi dubu ro aise geribidiro, imese goroho simara sairo to.

¹¹Urubia sirio ro na-gowea-rimo edi tanaro ro Pauro ro na-gosioidiro, neio Raikonia owera to auna se iato giaiauti-rimo. Neio ro ibo, ‘Abora orora dubu teibo paea dubu teibo to aratigi-do, neitiro ro isioidiro-do idaibo pupuwo korosa tanaro.’

¹²Taie neio ro neitiro masiro iato gimia-marimo, Banabasi neio simara orora masiro Seusi neito gomia-rimo, Pauro Hemesi to gomia-rimo, mabu owamo ibo Hemesi arua orora sapuwo to nou ro kimowauti dubu e, ina Pauro Hemesi sosoro ie auna owera karo dubu e.¹³Seusi asaso daimo ato itoititi sabowa gomo ato, ina nou turi dubu ro burumukau amia sowio namabu mutu iato giwou-ro sabowa kodouti magere damo to. Nou urubia mutu ubi ie Banabasi ra Pauro ra burumukau dao imamatowo-mari, nedi tanaro ro nou mabu rido gisioidiro-rimo.

¹⁴Kaupoti neitiro umoro na-goi-rido auna masawe ro girobai-ma, namabu aise gerewekekiouti-rido, iato aise gorowatea-rido urubia dubu patu maumo to. Neitiro ro urubia iato gimaia-rido,¹⁵‘Nio ro etou mabu rido isioidiro-dumo idaibo tanaro? Nio paea urubia beda sosoro ra neitiro ibo ie, urubia dubu teibo ie! Modobo pua nio idaibo tanaro na-wosioidiro-dumo neitiro aboto! Nio neitiro ro mea owera nimowauti-do nedi dorogora namabu ro imeserai ri morobise Godi aboto erewesegerai rie. Godi ia ro gisioidiro toboro, oromo, nedi sopu duriomoro gebari ro, ibose beda mutu namabu sirio ro iamo nato.¹⁶Keba se erere duriomoro urubia Godi ro idomari to ta-iaurititi-ro simara ubi tanaro na-isioidirotiti-mo.¹⁷Kaupoti nou nirimagare rido ie toboro rido daroho nou ri emeiriotiti-die, pari namabu na-isuwoduti-dumo nou ro iwoubuatiti-die nio ro iho na. Nio niro turi ato kamade na-iamotiti nou ro imaremotiti-die, nou ro idaibo mino to nio aboto irowapotaidirotiti-die. Modobo ie nou se kemowabu!’

¹⁸Neitiro ro urubia auna se gimadowere-rido nedi owera ro neito, neio auna ubi ro giamo neitiro sapuwo to burumukau dao kimamatowo-ma.

¹⁹Taie arua Iu urubia Entioko ra Ikoniam ra sabowa teibo rido na-gou-rimo, neio ro owera nato gisaubuti-rimo Pauro sapuwo to, ina Risitira sabowa urubia ubauba kimaragoidiro neio ro gimio-rimo. Pauro sabowa urubia ro nadi gohi to iato gobo-rimo, sabowa goro rido aise gomudo-rimo amede daimo to. Neio ro a-gimaragoidiro-rimo, ‘Pauro nimo ro ta-nopia-mo, ta-waraburai.’

²⁰Kaupoti kimibiria urubia iato ta-gorowotoi nu neio ro na-gemowaperai-rimo, iedi tau ro nato nou aise geribua-ro, sabowa to imese godoro.
Ata saiki Pauro Banabasi mutu iedi sabowa ro aise gemeserai-rido imese gou-rido Debe sabowa to.

Pauro ra Banabasi ra amia sabowa neito gorowameai-rido

²¹Pauro ra Banabasi ra Debe sabowa urubia na-imowautiti-do, sirio urubia iato na-gorowomidiro neio neitiro ro Iesu kowasoro aboto aise giwasaudai-rido. Ina neitiro Debe sabowa rido na-gorowameai-rido, Risitira sabowa to aise gou-rido, ina ioudo gorowameai-rido Ikoniam sabowa to, ina ioudo Entioko sabowa to.²²Taie neitiro ro kimibiria urubia sirio pupuwo iato giwaititi-rido. Neitiro ro kowasoro urubia kimibiria pupuwo imowaititi-do ibo, ‘Kimibiria tanaro koko se ba-dorobidiro-mo! Godi edi kiwaboi tanaro ro nimo neito na-nodouti-dioumo, sirio koko tau nimo aboto amadidime-erereihuti-ri.’

²³Neitiro ibo irowatiti-do ata sabowa to kou ato, ohona kiho tato obo kidio tato Godi iato kararatoro ie. Ina Iesu patu urubia sabowa gabogabo ato na-gorowomidiro, neio aboudo neitiro ro Iesu urubia kemeauri urubia idaibo mino to giaubo-rido. Nedi kemeauri urubia ro Abera Naramu sapuwo to ta-gimibiriauti-rimo, ina Pauro ra Banabasi ra ro Iesu tu to neio aise kiedea ie.

²⁴Taie Pisidia duriomoro neitiro ro aise gemeserai-rido imese giodori-maro Pampiria duriomoro to,²⁵neitiro ro iato urubia imese gimowauti-rido Pega sabowa ato. Pega sabowa ato kimowauti na-goroporeai taie imese giodori-maro Ataria sabowa to.

²⁶Taie Ataria rido neitiro sawa pe to giora-rido imese gorowameai-rido, neitiro beda sabowa rido gitiodorai-marimo Entioko sabowa neito gorowameai-rido. Iesu edi patu urubia ro neitiro neio ro keba se ta-giedea-marimo Godi edi nirimagare maumo ro neito, nedi woko ro nou osioidiro ri. Ina nedi woko ro neitiro ro na-gosioidiro-rido nedi tau ro nato goporeai-rido.²⁷Taie neitiro ito na-gorowateai-rido Entioko sabowa to, Iesu patu urubia aise gidabuai-rido. Godi ro neitiro abato beda tanaro gisioidiro, ina ibose Iu owera karo tato urubia kimibiria gabo Godi ro beda sosoro gimodobura, Entioko kimibiria urubia neitiro ro neito gimowauti-rido.²⁸Taie neitiro Entioko sabowa ato tuturu tau to iato aise imidirotiti-do borubi kowasoro urubia mutu.