1Ptonke go' xis yalkeꞌlazoꞌ, nde pchal go' re jwan' nda'la's Mbi Nayon, per jwan' mas pchal go' nak ptej go' lo re men jwan' ni Dios lo go'.2Tak xaꞌ ta ni diꞌs naꞌyenta men, naꞌnakta xaꞌ ni lo re men, leꞌ xaꞌ ni lo Dios; nde ngen cho yen jwanꞌ ndyodiꞌs xaꞌ, tak Mbi Nayon ndli sa ndyodiꞌs xaꞌ re jwanꞌ nzo nagaꞌs.3Mbay xaꞌ ndej jwan' ne Dios lo xaꞌ, jwanꞌna ndli nxyen men lo xkiꞌs Dios, ntoxuꞌta men nde ngo ney lazo' men.4Leꞌ xaꞌ jwanꞌ ni diꞌs naꞌyenta men leꞌga xa' ndoxen, per xaꞌ ndej jwan' ne Dios lo xa', jwanꞌna ndli nxyen re men yodo'.5Jwin toza tezka reta goꞌ ni diꞌs naꞌyenta men, per mas wen naka tej go' jwan' ne Dios, tak jwanꞌ reꞌ mas nakinꞌ ke lo jwanꞌ ta ni xaꞌ diꞌs naꞌyenta men, tez ngaka yo ti xaꞌ koꞌxkan diꞌs ya zyasa tli sinꞌna sa xyen dib yodo' lo xkiꞌs Dios.6Leꞌ naya, wes na, ptan na, tez na reꞌ, sin na lo goꞌ nde todiꞌs na diꞌs naꞌyenta men, ¿Cho sinꞌ li jwanꞌna lo goꞌ sa? Mbay tez tej na lo goꞌ ti jwanꞌ mbloꞌ Dios lon, tej na ti jwanꞌ liga nak yalnchak, tej na jwanꞌ mni Dios lon, o tej na ti jwanꞌ ncholas na teꞌd goꞌ, jwanꞌna liga tli sinꞌ lo goꞌ.7Ta xa re yi'b ta nkeꞌ men diba, tez ti flaut nde ti biwel thita ndyesa, ¿Xomod takbeꞌ men cho di ndryo'y?8Nde tez ti trompet ta'y xaꞌla bi, ¿Xomod tyosaꞌ men sa ya men lo byo?9Taxa naka kon goꞌ, senꞌ ni goꞌ diꞌs naꞌyenta men, ¿Xomod yen men xkiꞌs goꞌ sa? xaja men ndoni lo mbiba nak jwan'na.10Naꞌr toz ned diꞌs nzo lo izyo re' nde retay tak ryo'xkan.11Per tez nzo xaꞌ ni lon nde naꞌyenta na xkiꞌs xaꞌ, zyasa ndoyak na men tedib lad lo xaꞌ nde tagaꞌ men thiblad nak xaꞌ ya lon.12Jwanꞌ nasa, re goꞌ ta ndyen toz re jwan' nda'la's Mbi Nayon, pchal goꞌ li go' gana sa masra' liy nxyen re men yodo'.13Jwanꞌ nasa, tez cho goꞌ ni diꞌs naꞌyenta men, mnaꞌb goꞌ lo Dios sa toyal koꞌxkan goꞌ diꞌs ya.14Tak tez na, todiꞌsnon Dios kon diꞌs naꞌyenta men, zyasa benꞌ xbin na jwanꞌ ndyodiꞌsno Dios, leꞌ na ngen kwan nchen na.15¿Cho kwan lin sa? Todiꞌsnon Dios kon xbin na, per noga nakin' todi'snon Dios kon di's jwan' nchen na. Gol na lo Dios kon di's nchol' xbin na, per noga nakin' gol na lo Dios kon di's nchen na.16Tak tez benꞌ kon xbin la li leꞌy la Dios, nde tya ndo ti xaꞌ kub ndo yona, ¿Xomod gab xaꞌ, Ta aka, lo diꞌs ta ndonia ya? Tak naꞌmbyenta xaꞌ diꞌs jwanꞌ nchab la.17Tak liga nawe toz ndaꞌa dyux lo Dios, per xaꞌ jwanꞌ nchona na'xyenta xaꞌ.18Ndan dyux lo Dios tak na jwan' mas ndyodiꞌs diꞌs naꞌyenta men ke lo reta goꞌ;19per lo senꞌ ndon lo re men yodoꞌ, mas jwin nin gayꞌ lan diꞌs jwanꞌ nchen men, sa te'd xa', nde ke nin siꞌ mil diꞌs jwanꞌ naꞌyenta men.20Wes na, ptan na, naꞌakta xgab goꞌ xa nak xgab or bix, gok goꞌ xa nak or bix, per lo re jwanꞌ naraxa, cheꞌla leꞌ goꞌ pkeno xgab gol xajka men goxa.21Lo ley chanꞌ Dios ngeni: “Xaꞌla diꞌs nde xaꞌla ro men li rsin na nin lo yez reꞌ, nde nekla tamod naꞌgonta xaꞌ xkiꞌs na, tamod ne Xaꞌ Nyebeꞌ.”22Jwanꞌ nasa, lo ta ni men diꞌs naꞌyenta men, jwan'na nak ti beꞌ lo re xaꞌ ta naꞌndlid lazonꞌ Dios, nde naꞌnakte par re men jwanꞌ ndlila lazonꞌ Dios. Per ta tej men jwan' ne Dios, jwan'na nak beꞌ lo re men ndlila lazonꞌ Dios nde naꞌnakte par re men na'ndlid lazonꞌ Dios.23Tak, tez re goꞌ ta ndli lazonꞌ Dios thita nzidop goꞌ, nde reta goꞌ ni diꞌs naꞌyenta men, nde tya nzi pla xaꞌ jwanꞌ naꞌnchenta o xaꞌ naꞌndlid lazonꞌ Dios, ¿Cho naꞌgapta xaꞌ ngosa' yek goꞌ?24Per tez reta goꞌba tej jwan' ne Dios lo goꞌ, nde zin pla xaꞌ jwanꞌ naꞌndlid lazonꞌ Dios nde xaꞌ naꞌnchenta, re xaꞌ ya tlayek xaꞌ nak xaꞌ men nzoꞌb xkenꞌ nde leꞌga xaꞌ yolo xaꞌ xken xaꞌ, lo gon xaꞌ jwanꞌ tej goꞌ.25Tak reta jwanꞌ nagaꞌs nzo lazoꞌ xaꞌ troxo'ba nde tamod tyoxub xaꞌ taꞌ xaꞌ dyux lo Dios nde gab xaꞌ liga ndo Dios xij goꞌ.26Jwanꞌ nasa, wes na, ptan na, ¿Cho kwan ndablo linꞌ sa? Senꞌ lo ndyopbe goꞌ, nzo goꞌ ndeno ti di, nzo goꞌ toteꞌd men, nzo goꞌ ni diꞌs naꞌyenta men, nzo goꞌ koꞌxkan diꞌs ya, nde nzo goꞌ loꞌ jwanꞌ mbloꞌ Dios lo goꞌ. Reta jwanꞌ reꞌ bli goꞌy sa xyen re men.27Tez nzo goꞌ ni diꞌs naꞌyenta men, benꞌta chop goꞌ o jwanꞌ tozka son goꞌ bliy nde thib thiba goꞌ todiꞌs nde yo ti men koꞌxkana.28Per tez naꞌngenta men koꞌxkana, mas jwin xeta ptob goꞌ lenꞌ yodoꞌ, nde lenꞌ lazoꞌta goꞌ mni goꞌ nde mni goꞌ lo Dios.29Nde tagaꞌ re goꞌ ta nak profet, nakinꞌ benꞌta chopta goꞌ o jwanꞌ tozka son goꞌ ni, nde tipla xaꞌ gona nyen' cho gal' naka.30Mbay tez ti xaꞌ ta ndoba, loꞌ Dios ti jwanꞌ lo xaꞌ, zyasa xaꞌ ta ndoni neraꞌ nakinꞌ naꞌtodiꞌstra xaꞌ.31Tak re goꞌ ta ni Dios lonꞌ, thib thiba goꞌ todiꞌs, sa reta goꞌ teꞌd nde reta goꞌ yone lazonꞌ.32Nde re xa' ta nak profet ndablo nye cho or ndablo ni xa',33tak Dios, naꞌndokanta Xa' men, cheꞌla nabe'z nak Xa'. Lin' xa ndliga re men jwan' nak yodoꞌ nayon chanꞌ Dios,34re men got go' na'todi'sta xaꞌ lenꞌ yodoꞌ, tak naꞌndabloda todiꞌs xaꞌ. Nakinꞌ xoꞌbyek ngol, jwanꞌ xa nyebeꞌ ley chanꞌ Dios.35Tez nzo kwan ncholasꞌ ngol teꞌd ngol, liz ngol tya nyabdiꞌs ngol lo salꞌ ngol; tak naꞌwenta ndloꞌy ni ngol lenꞌ yodoꞌ.36¿Cho xij goꞌ ba mdobte xkiꞌs Dios ndyak goꞌ, o benꞌta lo goꞌ mzin xkiꞌs Dios ndyak goꞌ?37Tez nzo xaꞌ ndyak nak xaꞌ profet o nzo xaꞌ ndyak nak xaꞌ men ni Mbi Nayon lonꞌ, ndablo nye xaꞌ leꞌ re jwanꞌ ta ngekeꞌn lo goꞌ reꞌ, Xaꞌ Nyebeꞌ mnabeꞌy.38Men jwan' naꞌnchola'sta li lazon' jwanꞌ reꞌ, naꞌlid lazo' xaꞌy.39Jwanꞌ nasa, wes na, ptan na, pchal goꞌ tej goꞌ jwanꞌ ne Dios, nde naꞌkwesked goꞌ lo xaꞌ ta ni diꞌs naꞌyenta men;40per reta lo ned jwan' nabe'zta nde naxuꞌta bli go'y.