1 Timoteo6zpq_tbl

1Na' beṉe' ca' chesejnilaže' Criston', beṉe' zjanac esclavos, cheyaḻa' yesacbe'ede' beṉe' ca' zjanaque' x̱an žin c̱hegaquen' zjazaque' cont yosozenague' c̱hegaque'. Cheyaḻa' yesape' ḻegaque' bala'aṉ cont nono ṉe yeḻa' ya' c̱he Diosen', ṉeca no ṉe c̱he dan' chzejni'ichon'.2Beṉe' ca' zjanac esclavos, še x̱angaque' ḻecze chesejnilaže' Criston', bi cheyaḻa' yesone' xbab bi yosozenague' c̱hegaque' ṉec̱he zjanaque' txen chesonxene' Criston', san nachle cheyaḻa' yesone' žinṉa' do laže'che' na' cheyaḻa' yesacde' x̱an žin ca' ca beṉe' biše', lagüe zjanaque' txen chesejnilaže' Criston'. Bzejni'i da' ca' ba gwnia' cheyaḻa' yesone' na' gwṉeyoe beṉe' yosozenague' c̱hen.

Cheyaḻa' soacho mbalaz len da' de c̱hecho

3Nita' beṉe' chosozejni'ide' xbab c̱hegacze' na' bi chososed chosolo'ede' diža' ḻi c̱he X̱ancho Jesucriston' dan' ba blo'eda' le', na' chosozejni'ide' clele, chesene' bi chonen byen soacho goncho can' chazlaže' Diosen'.4Beṉe' ca' chosozejni'ide' dan' zej clele chesonxen cuingaque', chesacde' zjaṉezde' da' zan, ḻen bibi chesejni'ide'. Chosošaše' c̱he no diža' o c̱he bichle da' bi naquen da' zaque', chesacxi'e ḻježe', chesacyože' len ḻježe', chesezi'diža' ḻježe', na' chesacde' chesacxi'a beṉe' ḻegaque'.5Con bi cheyož chedo chesediḻ chosošaše', ḻe ba yo'o da' malen' ḻo' yic̱hjlažda'ogüe' na' bi zjanombi'e diža' ḻi c̱he Diosen'. Con chesacde' yososed yosolo'ede' xtiža' Diosen' cont yesaque' beṉe' gwṉi'a. Bi gono' txen len ben' cheson ca'.6Da' ḻi zoachguacho binḻo cate' choncho can' chazlaže' Diosen' na' cate' zoacho mbalaz len bi da' dao' de c̱hecho.7Ga'alcho bla'cho yežlion' na' ga'alcho cate' yeza'cho.8Na' še de da' che'ej chagwcho na' še de xaḻana'cho da' chyažjecho, cheyaḻa' soacho mba len da' ca'.9Beṉe' ca' chesezelaže' yesaque' beṉe' gwṉi'a chosozenague' c̱he da' malen' na' cheselažoe' ḻo na' gwxiyen'. Chesezelaže' da' zan da' gata' c̱hegaque' da' yesede c̱hen, na' da' ca' chesezelaže' chesonen mal len ḻegaque' na' žin ža yesebiaye'e.10Beṉe' chzelaže' mechw nach chzenague' c̱he bite'teze da' mal. Na' nita' beṉe' ba gosebejyic̱hje' diža' ḻi c̱he Diosen' dan' chesezelaže' mechon', na' da' zan dan' chosožaglaochgüe' yeḻa' güen da' mal c̱hegaque'na'.

Cheyaḻa' cuec yic̱hj Timoteon' gone' xšin Criston'

11Na' ca nac le' Timoteo, bi gono' can' cheson beṉe' ca', ḻe Diosen' gwleje' le' cont gono' xšinen'. Cuec yic̱hjo' gono' da' zej to ḻicha, ben con can' chazlaže' Diosen', soac̱hac̱ho' šejnilažo'ne', goque beṉe', byo bchejlaže' cate' de da' saca'zi'o, na' goc beṉe' šagüe'.12Gwlec yic̱hjo' ben con ga zelao saquedo' cont gono' yogo' dan' chazlaže' Diosen'. Na' bebe dan' šjayzo' len Diosen' toḻi tocaṉe, ḻe Diosen' gwleje' le' šjayzo' len ḻe', na' ba bi'o diža' lao beṉe' zan žo' chejnilažo'ne'.13Dios ben' chnežjo yeḻa' mban c̱he yogo' beṉac̱hen', c̱he beyix̱e' ca' na' c̱he bica'chle da' zjamban, na' Jesucristw ben' be' diža' ḻi lao Poncio Pilato, gwne' Diosen' gwseḻe'ne', ḻegaque' zjaṉezde' chona' mandadw14gwzenago' c̱he yogo' dan' ba gwnia' le', na' bi go'o latje ten ca'ze, cont bi gono' da' zaca' no tiḻe le'. Bzenag c̱he yogo' dan' bena' mandadw gono' žinte ža yid X̱ancho Jesucriston' da' yoble.15Ḻe cate' žin ža gwžia bia' Diosen', nach yide' da' yoble. Toz Dios nan' chnabi'e doxen na' zoachgüe' mba. Ḻen' naque' Rey ben' chnabi'e yezica'chle rey ca', na' naque' X̱ancho ben' chnabi'e yezica'chle beṉe' gwnabia'.16Totec Dios nan' bi ṉacho žin ža gate'. Na' catec yo'ochgua be'ni' gan' zoen', nono gac bigue' gaḻa'ze gan' zoe'na'. Nono zoa yežlio nga beṉe' ba ble'ede' Diosen' na' nono gac le'e ḻe'. Cheyaḻa' gonxenchone' ḻe chnabi'e toḻi tocaṉe. Na' can' gonšcaczcho.17Na' ca nac beṉe' ca' chesejnilaže' Criston', beṉe' zjanac beṉe' gwṉi'a ḻo yežlio nga, gože' bi yesaque' beṉe' ya'laže'. Na' yo'o ḻegaque' bi yesone' xbab yesenite' mba lagüe zjanaque' beṉe' gwṉi'a, ḻe yob te c̱he bite'tez da' de c̱hegaque'. Yo'o ḻegaque' yesezoe' lez yesenite' mbalaz len Dios ben' zoe' toḻi tocaṉe. Toga ḻe' choṉe' chio' yogo' da' güen da' chyažjecho na' da' chbecho.18Na' yo'one' yesenite' yesonchgüe' da' güen, yesone' yogo' cuen da' güen can' chazlaže' Diosen', nach ḻecze yo'one' yesezande' da' de c̱hegaque' cont yesaclene' beṉe' na' yesebede' yesone' ca'.19Še yesone' ca', na' gaquen ca to yeḻa' gwṉi'a da' bi te c̱hen, ḻe Diosen' chaclaže' yesaclene' beṉe', na' gone' cont yesenite' mba cate' šjasyenite' len ḻe' toḻi tocaṉe še yesone' ca'.

Pablon' chzože' carten'

20Timoteo, gwlecchgua yic̱hjo' c̱he yogo' dan' ba bzejni'i Diosen' le'. Bi gwzenago' c̱he beṉe' chosošaḻj diža' da' bibi zaca', ṉe c̱he dan' cheseṉe beṉe' dan' bi zej lebe len diža' ḻi c̱he Diosen'. Chesonḻaže' chesene' cheso'e diža' sina'.21Beṉe' bosozenague' c̱he dižan' nac ca' ba gosebejyic̱hje' diža' ḻi c̱he Diosen' da' chejḻe'cho na' bich chesejnilaže'ne'. Chṉabšca' gaclen Diosen' le'. Da' na'zen' chzoja'.
expand_more
Search