Přečtěte si ရှင်မာကုကျမ်းစာအုပ် 14

ရှင်မာကုကျမ်းစာအုပ်14

¹ရာအချိန်ငေါ် ပသခါပွဲတော်နောက် တဆေးမဲ့မုန့်ပွဲတော်ကျင်းပလောတီမ် ကယ်ရာပ်နိုက်ပန်း လိုလောစောန်းငါး။ ပုရောဟိတ်အကြီးအကဲလာပ်နောက် ကျမ်းထောကား ဆရာလာပ်ရီး ကိုယ်တော်ယေရှုလည် လင်ကဲ့အယ် ကတ်ရှီးရင်ဟပ်ကားကာ နည်းလမ်းနယ် သမ်ကဲ့အယ်လင်းဟီးမာ့။²အင်းညယ်ငေါဝမ်ရီ ပွဲတော်ကာလလည် ကိုယ်တော်လည် လင်မန်းနော နံတင်းငါးကာ တီတ်ဆာပရိတ်သတ်ဖူမ်ငေါ် ဒေါသထွက်သောကအယ် ဟီမ်နာပ်တယ် တိုက်ခိုက်သောထောကတန်မာ့ ပွဲတော်ကာလပါအာ အလင်ကွန်နယ် အချန်းချန်းတပေါက်ချီးမာ့။

³အင်းမာစီးရာပ်သော် ကိုယ်ယေရှုကော ဗေသနိထိန်ပါအာ အနာတုန်ရောဂါလည် ကုလောကဲ့အယ် အီရီမာန်ငါးကာ့ ရှိမုန်ရယ် ကော်ကားကာ ဟီမ်ငါကျဉ်းမားထောင်းကဲ့အယ် ရောက်တီမ်ဖူမ်ရောက်ကဲ့လင်းငါးကာ အချိန်နယ် ယာပ်ရှီဟော်ဝါကော နာဒုနောက် အောမ်ပေးကားကာ တအားတန်ဖိုးငါကဲ့အယ် အနံ့တူမ်းငါးကာ ဆလော စာမ်းပေးကားကာ သလောင်ဆီနောက် အောမ်ပေးကား ပုလင်းဟူပ်အာလည် အောမ်းကဲ့အယ် ကိုယ်တော်ပါအာ ထုတ်အီမာ့။ အင်းမာစီးရာပ်သော် အင်းမာယာပ်ရှီကော အင်းမာပုလင်းနယ်အောက်ကဲ့အယ် ကိုယ်တော်ယေရှုကာ ဟလာမ်းဟူပ်အာ လော့ပ်အာမ်မာ့။⁴အင်းမာချိန်နယ် အင်းမာနေရား ငါကားကာ့ တီတ်ဆာကြအာကော ရှေရှောကဲ့အယ် “အင်းမာယာပ်ရှီကော မဟာအောမ်ကယ် အင်းကာညယ် တန်ဖိုးငါတင်းငါးကာ အနံ့တူမ်းငါးကာ ဆလောလည် ဖြုန်းနောကားသယ်။⁵အင်းမာ အနံ့တူမ်းငါးကာ ဆလော တန်ဖိုးကော အလုပ်သမားဟော်ဝါကာ ပီးနူန်စာအလုပ်အောမ်ငါးကာ လုပ်အားခ ထက်သယ်ဟာမ် ကျော်လောမာ့။ အင်းသယ် အင်းမာ အနံ့တူမ်းငါးကာ ဆလောလည် ငဟေကယ်အယ် အပေါ်ဟာကားကာ့ ဟီမ်နာပ်သယ်ဟာ လှူလောသင့်နောမာ့” ငေါကဲ့အယ် အချန်းချန်း ငေါဟီးကဲ့အယ် အင်းမာ ယာပ်ရှီလည် အပြင်းအထန်ရယ် အပြစ်သာမ်ဟီးမာ့။⁶အင်းညယ်ငေါဝမ်ညီ ကိုယ်တော်ကော “အင်းစာန်နိတ်၊ ဟီမ်နယ် နှောက်ယှက်သောဟီးရာပ် ၊ဟီမ်ငေါ ငါကာအပေါ်ဝါ ကလန်ငါကာလည်ဟာ အောမ်ကဲ့လင်းငါး ထာမာ့။⁷ဆင်းရဲလောကားဟီမ်နာပ်ကော နီမ်နောက်အမြဲတမ်း ငါကဲ့အယ်လင်းဟပ်ကာသယ်မာ့ နီမ်လှူလောကာပ်ကာ အချိန်တိုင်း နီမ်လှူလောရင်နာ့။ အင်းညယ်ငေါဝမ်ညီ ငါကော နီမ်နောက်တူတူ နောက်ထပ် မာပ်ဆီမာပ်လုံညယ် ငါရင်စောမ်းဟပ်ကာယို။⁸အင်းမာယာပ်ရှီကော ဟီမ်တတ်နိင်နော်ကာအရာလည် ငါနန်း အောမ်ကဲ့အီကား ထာမာ့။ ငါလည် သင်္ဂြိုလ်လော်တီမ် ငါကာကိုယ်ဝါး အနဲ့တူမ်းငါးကာ ဆလော ကြိုလောကဲ့အယ် လောက်စာပ်ကဲ့အယ် အီကား ထာမာ့။⁹နီမ်နယ် ငါအမှန်ငေါထော်ဝမ်နော် နောင်တစ်ချိန်ငါ ကမ္ဘာတစ်ဝှမ်းနား မင်္ဂလာသတင်းကလန်ဖူမ်နယ် ဟောပြောလောကားနေရာတိုင်းငါး အင်းကာယာပ်ရှီ အောမ်မီကားလည် သတိလူကားအနေနဲ့အယ် ပြန်နောကဲ့အယ် သပေါက်ချိကာ” ငေါကဲ့အယ် မိန့်နောမာ့။¹⁰အင်းမာစီးရာပ်သော် သာဝကတပည့် ဆယ့်နှစ်ယောက်ပါအာမာ့ ဟော်ဝါ ထာကာကာ့ ယုဒရှကာရုတ်ကော ဂျူးပုရောဟိတ်အကြီးအကဲလာပ်ပါအာ လာမ်ကဲ့အယ် “ကိုယ်တော်ယေရှုလည် လင်(မ်)တီမ် ငါကူညီလောကာပ်မာ” ငေါကဲ့အယ် လျှောက်သာမ်မာ့။¹¹ယုဒရှကာရုတ် ငေါရီကာလည် သပ်မူဝမ်စန်းနော် အင်းမာဟီမ်နာပ်ကော တအား ဝမ်းသာလော်တင်ကယ်အယ် အင်းညယ်အောမ်မန်းနော ဖူးအီနာပ် ငေါကဲအယ် ကတိအီဟီးမာ့။ အင်းသယ် ယုဒရှကာရုတ်ကော လာမ်ဟာမ်းကဲ့အယ် ကိုယ်တော်ယေရှုလည် လင်(မ်)တီမ် နည်းလမ်းသာမ်ကဲ့လင်းမာ့။

¹²တဆေးမဲ့မုန်းပွဲတော်ကာ့ ပထမဆုံးမာန်းရာပ် ထာကာကာ့ ပသခါသိုးဆဟာလည် ပူဇော်လောထော်ကာမာန်းရာပ်သယ် တပည့်တော်လာပ်ကော "အရှင် ပသခါနန်ကြည်စာ ရောက်တီမ် အလေကော် တမာနေရား လာမ်ကဲ့အယ် ပြင်ဆင်နောကဲ့အီစီမ်းဂါက်သယ်" ငေါကဲ့အယ် ကိုယ်တော်လည် လျှောက်သောဟီးမာ့။¹³အင်းမာချိန်နယ် ကိုယ်တော်ကော တပည့်ကယ်ဟောလည် “နီမ်ကယ်ဟောကော ဂျေရုဆလင်မြို့ပါအာ လာမ်နိတ်၊ ဝေးတိတ်ဆီ ဖေးကဲ့အယ် လီကားတီတ်ဆာဟော်ဝါလည် နီဟော့ပ်တော့ဝမ်းနော ဟီမ်ငါနောက်အားလာပ်တိတ်။¹⁴အင်းမာဟီမ် ကျဉ်းကျဉ်မာပါအာ ဆာမ်ငါမ်ငါးချိန်နယ် အင်းမာကျဉ်းရှိတ်သယ် 'ဆရာကော် တပည့်တော်လာပ်နောက်တူတူ ပသခါရောက်တီမ်ဖူမ်နယ် ရောက်တီမ် ပြင်ဆင်နောထော်ပ်ကားအခန်းငေါ တပါသယ် ငေါကဲ့အယ် စီမ်ညူစီမ်းမာ့' ရယ် ငေါလိတ်။¹⁵အင်းမာချိန်နယ် ကျဉ်းရှိတ်ကော် စုတ်ထပ်လား အရာမ်သင့် ပြင်ဆင်နောစီးကား အခန်းတုန်း ပြလော့ပ်ကာ။ အင်းမာအခန်းနား ပသခါရောက်တီမ်ဖူမ်နယ် ပြင်ဆင်နောဟီးလိတ်” ငေါကဲ့အယ် မိန့်နောကဲ့အယ် သာပ်လာမ်မာ့။¹⁶စီးရာပ်သော် တပည့်ကယ်ဟောကော ကိုယ်တော်ပါအာအယ် ပူပေးရီကယ်အယ် မြို့နားဆာမ်ဟီးရာမ်စန်နော် ကိုယ်တော်ယေရှု မိန့်နီကာအတိုင်း အားလုံးနယ် ဟော့ပ်တောကယ်မာ့ အင်းမာနေရားဟာ ပသခါရောက်တီမ်ဖူမ်နယ် ပြာန်နောဟီးရာမ်မာ့။¹⁷နာန်ကြည်ဟန်ထုတ်အာမ်စန်းနော ကိုယ်တော်ယေရှုကော သာဝကတစ်ဆယ့်နှစ်ယောက်နောက်တူတူ ပသခါပွဲအောမ်တီမ် အင်းမာကျဉ်းမာ လီဟီးမာ့။¹⁸စီးရာပ်သော် စပွဲရား အတူတူ ထောင်းမောက်ကဲ့အယ် ရောက်ကဲ့လင်းဟီးကား အချိန်နယ် ကိုယ်တော်ယေရှုကော “နီမ်နယ် ငါအမှန်ငေါထော်ဝမ်နော်၊ ငါနောက်တူတူရောက်မောက်ကား နီမ်ပါအာမာ့ ‌ဟော်ဝါကော ငါလည် သစ္စာဖောက်သော့ကာ” ငေါကဲ့အယ် မိန့်နောမာ။¹⁹တပည့်လာပ်ကော် စိတ်လင်းရားကဲ့အယ် ကိုယ်တော်လည် “ငါဆူဟီပ်အို ယိုလေး” ငေါကဲ့အယ် ‌ဟော်ဝါစီးဟော်ဝါ ငေါဟီးမာ့။²⁰အင်းမာချိန်နယ် ကိုယ်တော်ကော “အင်းမာတီတ်ဆာကော ငါနောက် ဆပါတ်ခွက်လာပ်လည် တူတူ ရောက်မောက်ကားကာ နီမ်တစ်ဆယ့်နှစ်ယောက်ပါအာမာ့ ဟော်ဝါထာမာ့။²¹တီတ်ဆာကာ့ဆာကော ကျမ်းစာပါအာ ဟီမ်ငါအကြောင်း ရေးလောပေးကားအတိုင်းညယ် ရှီးထော်ပ်ကား။ အင်းညယ်ငေါဝမ်ညီ တီတ်ဆာကာ ဆာလည် သစ္စာဖောက်သောကား တီတ်ဆာကော တအားဒုက္ခရောက်သော့ကာ။ ဟီမ်အင်းကာညယ် ခံနောထော်ပ်ကားအစား ဟီမ်ငေါ အဟဲရယ် လင်းမီကာဟာမ်း ဟီမ်ဟနန်း ပိုလောကဲ့အယ် မီးဟန်မာ” ငေါကဲ့အယ် မိန့်နောမာ့။

²²အင်းမာညယ် အတူတူ ရောက်ကဲ့လင်းဟီးကားကာ့အချိန်နယ် ကိုယ်တော်ယေရှုကော ပေါင်မုန့်ဟူပ်အာလည် လာကဲ့အယ် ဘုရားရှင်ငါ ကျေးဇူးတော်လည် ချီးမွမ်းနောစီးရာမ်စန်နော် ဟမူမ်နယ် ဆိတ်ကဲ့အယ် တပည့်လာပ်သယ် “လာဟီလိတ်။ အင်းကာ ပေါင်မုန့်ငေါ ငါကာ ခန္ဓာကိုယ် ထာမာ့” ရယ် မိန့်နောကဲ့အယ် အီရာမ်မာ့။²³စီးရာပ်သော် စပျစ်ဝိုင် ပါလောကား ခွက်သယ် လာကဲ့အယ် ဘုရားရှင်ငါ ကျေးဇူးတော်လည် ချီးမွမ်းနောစီးရာပ်သော် တပည့်တော်လာပ်ခန်း အီရာမ်စန်းနော တပည့်တော်အားလုံးငေါ စပျစ်ဝိုင်ခွက်သယ် လာကဲ့အယ် အူဟီးရာမ်မာ့။²⁴စီးရာပ်သော် ကိုယ်တော်ကော “အင်းကာ စပျစ်ဝိုင်ငေါ တီတ်ဆာဖူမ်ဟနန်း သဘောတူညီချက်ညား အနေနယ်အယ် လောက်လက်ကားကာ ငါကာရှေ ထာမာ့။²⁵နီမ်နယ် ငါအမှန်ငေါထော်ဝမ်နော် ဘုရားရှင်ငါ သာသနာတော်ပါအာ စပျစ်ဝိုင်ညားနယ် အူဟပ်ကား မာန်းရာပ်အထုတ်ကြီစ်အထိ အင်းကာ့ စပျစ်ရှီစ်ရှီပါအာအယ် ပူရီကားကာ မဟာဝေးလည်ဟာမ် ထာဂါက်ထာ တိုက်မာဟာမ်း ငါအူစောမ်းဟပ်ကာယို” ငေါကဲ့အယ် မိန့်နောမာ့။²⁶အင်းမာနောက်သယ် ကိုယ်တော်ယေရှုနောက် တပည့်လာပ်ကော် ဘုရားရှင်နယ် ချီးမွမ်းနောကားကာ့ သီချာန်းနယ် ကြေကဲ့အယ် သံလွင်တောင်စုတ်အား ဟေဟီးရာမ်မာ့။

²⁷အင်းမာညယ် လာမ်ကဲ့လင်းငါးကာ့ အချိန်နယ် ကိုယ်တော်ယေရှုကော တပည့်လာပ်သယ် "ကျမ်းစာပါအာ 'ငါကော သိုးထိန်းနယ် ကတ်ရှီးကိုက်ပန်း ထာကယ်အယ် သိုးဖူမ်ငေါ် တစ်ကွဲတစ်ပြားစီ လင်းဟီးရာမ်ကား' ရယ် ရေးလောပေးကယ်ညယ် နီမ်ငေါ ငါလည် သက်ပေးကဲ့အယ် ကတ်ပူဟီးရာမ်ကား။²⁸အင်းညယ်ငေါဝမ်ညီ ငါကောရှီးပါအာအယ် အဆာဒ်ဆိုင်းဟာမ်းစီးရာပ်သော် နီမ်နဲ့အယ် ဟော့ပ်တော့တီမ် ဂါလိလဲပြည်ပါအာ နီမ်ငါထက်သယ် အရာမ်လာမ်ဖာန်းကာ ထာမာ့" ငေါကဲ့အယ် မိန့်နောမာ့။²⁹အင်းမာချိန်နယ် ပေတရုကော “ကိုယ်တော်လည် တခြားတီတ်ဆာလာပ်အားလုံး သက်ပေးရာမ်မာ့ဟာမ်ငေါရီး ငါဆူကော အင်းမာညယ် တိုက်မာဟာမ်း သက်ပေးရီပ်ကားယို” ငေါကဲ့အယ် လျှောက်တင်နော်မာ့။³⁰ကိုယ်တော်ယေရှုကော “နာန်နယ် ငါအမှန်နယ် ငေါနာပ်။ ရာ့မာ နန်ကြည် အူကယ်ခါ အကြေကြီစ်ရယ် ဆွန်းကြိမ်တိုင်တိုင် ငါလည်မီမ်းဟို ငေါကဲ့အယ် နာန်ငြင်းနောပ်ကာ” ငေါကဲ့အယ် မိန့်နောမာ့။³¹အင်းညယ်ငေါဝမ်ညီ ပေတရုကော “ကိုယ်တော်နောက် တူတူ ရှီးထော်ပ်ကား ငေါဝမ်ညီ ကိုယ်တော်လည် မီမ်းဟို ငေါကဲ့အယ် တိုက်မာဟာမ်း ညာမ်းနောပ်ကာယို” ငေါကဲ့အယ် အခိုင်မာငေါမာ့။ တခြားတပည့်ဖူမ်ညီ အင်းမာအတိုင်းညယ် သပေါက်ချီးမာ့။

³²စီးရာပ်သော် ကိုယ်တော်နောက် တပည့်ဖူမ်ငေါ် ဂေသရှေမန် ငေါကဲ့အယ် ကော်ကားကာ့ အရပ်လာ ထုတ်အာမ်စန်းနော ကိုယ်တော်ကော “ငါဆုစိမ်ကဲ့လင်းငါးကာ့ အချိန်နယ် နီမ်ငေါ အင်းကာနေရား ထောင်းဟီးလိတ်” ငေါကဲ့အယ် မိန့်နောမာ့။³³စီးရာပ်သော် ကိုယ်တော်ကော ပေတရု၊ ယာကုပ်နောက် ယောဟန်နာပ်သယ် ဟီမ်နောက်တူတူ ကော်ဝမ်ကဲ့အယ် ကိုယ်တော်ကော တအား ဝမ်းနည်းပူဆွေးလောကဲ့လင်းမာ့။³⁴ကိုယ်တော်ကော တပည့်လာပ်သယ် “ငါကော ရှီးဟပ်စာပ်အာမ်ကွန်းနယ် တအားဝမ်းနည်းလောရှီးရာပ်။ အင်းကာနေရား သတိနောက် လေးကဲ့လင်းဟီးလိတ်” ငေါကဲ့အယ် မိန့်နောမာ့။³⁵စီးရာပ်သော် ကိုယ်တော်ကော နည်းနည်းဟာ စာကားနေရား လာမ်ကဲ့အယ် ကာစုတ်အား ဝပ်သောစီးရာမ်စန်နော် ဟီမ် ခံစားလောထော်ပ်ကားကာ ဒုက္ခဆင်းရဲဖူမ်နယ် ဖြစ်သောရင်မန်နော် အထုတ်အီရယ် လင်းကွန်းနယ် ဘုရားရှင်ပါအာ ဆုစိမ်မာ့။³⁶အင်းမာနောက်သယ် ကိုယ်တော်ကော "အဝါဘုရားရှင်၊ အဝါဘုရားရှင်နန်း ထာရင်နိုး ငေါကားကောအပို။ ငါဆူ ခံစားလောထော်ပ်ကား ဒုက္ခဆင်းရဲဖူမ်နယ် ဖယ်လောကဲ့အီစာမ်းဆွမ်။ အင်းညယ်ငေါဝမ်ညီ ငါဆူကာ ဆန္ဒအတိုင်းအဟီပ်ရယ် အဝါဘုရားရှင် ဆန္ဒအတိုင်းညယ် အောမ်မာန်နိတ်ဆွမ်" ငေါကဲ့အယ် ဆုစိမ်မာ့။³⁷ကိုယတော်ယေရှုကော ဟီမ်ငါ တပည့်ဆွန်းဟောလည် လီဟာမ်းငါးကာ ဟီမ်ငါတပည့်လာပ်ကော် အက်လီးကဲ့လင်းငါးကာလည် ယူပ်မူဝမ်စန်းနော ပေတရုလည် “ရှိမုန်၊ နာန်ငေါအက်လီးကဲ့လင်းတူမ်းနေး။ တစ်နာရီဟာဟာမ်း သတိနောက် လင်းရင်နိုလေး။³⁸ဖြားယောင်းသွေးဆောင်နော်ကာ အခံနော်ထော်ကွန်နယ် နိုးနိုးကြားကြားရယ် ဆုစိမ်ကဲ့အယ် လင်းဟီးလိတ်။ နီမ်ငါ စိတ်နှလုံးငါးအယ် ဆန္ဒငါမာ့ငေါရီး နီမ်ငါ ခန္ဓာကိုယ်ကော အားနည်းလောဟီးမာ့” ငေါကဲ့အယ် မိန့်နောမာ့။³⁹အင်းမာနောက်သယ် ကိုယ်တော်ကော ရာကာပ်ဝါ့ လာမ်ပေးဟာမ်းကဲ့အယ် မာ့နားကာအတိုင်းညယ် ကာပ်ဝါ့ ဆုစိမ်ဟာမ်းမာ့။⁴⁰ကိုယ်တော်ကော ရာ့ကာပ်ဝါ့ ထုတ်ထေစာန်ညီ ဟီမ်ငါတပည့်လာပ်ကော် အက်ဆူမ်ကယ်မာ့ မီပ်တူဖူမ် နီပ်ကယ်အယ် ရာကာပ်ဝါ့အက်လီးကဲ့လင်းငါးကာလည် ယူပ်မူဟာမ်းမာ့။ ဟီမ်နာပ် မင်နီစန်းနော ကိုယ်တော်လည် မညယ်လျှောက်သောထော်ပ်ကားငေါကားလည် အမီမ်းဟော်ရယ် လင်းဟီးမာ့။⁴¹အင်းမာနောက်သယ် ကိုယ်တော်ကော တတိယအကြိမ် ဆုစိမ်ကဲ့အယ် လီဟာမ်းငါးကာ့အချိန်နယ် ဟီမ်ငါတပည့်လာပ်သယ် “နီမ်ငေါ အက်ကဲ့အယ် နားလောကဲ့လင်းဟီးတူမ်းနေး။ အင်းကာနောက်ချာ လုံလောက်သောဝါပ်။ သာပ်ချီးလိတ်။ တီတ်ဆာကာ့ဆာလည် အပြစ်ဒုစရိုက်သားလာပ်ကာ ထော်ဝါး အပ်သောကား ခံနောထော်ပ်ကားအချိန် ထုတ်ပီပ်။⁴²ယုတ်ကဲ့အယ် လာမ်ဟီးမယ်။ ငါလည် သစ္စာဖောက်သောကားဟီမ်ငေါ အင်းကာနေရား လီရန်း” ငေါကဲ့အယ် မိန့်နောမာ့။

⁴³ကိုယ်တော်ယေရှု အင်းညယ်မိန့်နောကဲ့လင်းငါးကာ အချိန်နယ် သာဝကတပည့် ဆယ့်နှစ်ယောက်ပါအာမာ့ ‌ဟော်ဝါ ထာကာကာ့ ယုဒရှကာရုတ် အင်းမာနေရား ထုတ်အီမာ့။ ဟီမ်နောက်တူတူ ပုရောဟိတ်အကြီးအကဲဖူမ်၊ ကျမ်းထောကား ဆရာဖူမ်၊ ဂျူးလူမျိုးခေါင်းဆောင်ဖူမ် သာပ်လီကားကာ့ တီတ်ဆာဖူမ်ညီး ဟမ်းတုတ်ကာတုန်ဖူမ်၊ တာမ်ဖူမ်နယ် အောမ်းကဲ့အယ် လီရာပ်ချီးမာ့။⁴⁴ကိုယ်တော်လည် သစ္စာဖောက်သောကားကာ့ ယုဒရှကာရုတ်ကော အင်းမာတီတ်ဆာသာမ်းဖူမ်နယ် “ငါ မန်းတူမ်ကယ်အယ် နှုတ်ဆက်သောကားကာဟီမ်ငေါ နီမ်လင်(မ်)ထော်ပ်ကားဟီမ် ထာမာ့။ အင်းမာဟီမ်နယ် လင်(မ်)ကဲ့အယ် စာပါအာ လုံလုံခြုံခြုံညယ် ကော်ဟီးရာမ်နိတ်” ငေါကဲ့အယ် ကြိုလောကဲ့အယ် ငေါပေးစီးကားထာမာ့။⁴⁵အင်းသယ်မာ့ ယုဒရှကာရုတ်ကော ကိုယ်တော်ယေရှု ငါကားနေရား ထုတ်အီကဲ့အယ် ကိုယ်တော်ပါအာ လာမ်ကဲ့အယ် ကိုယ်တော်လည် “ဆရာ” ရယ် ကော်ကဲ့အယ် မန်းတူမ်ကယ်အယ် နှုတ်ဆက်သောမာ့။⁴⁶အင်းမာချိန်နယ် ဟီမ်နာပ်ကော ကိုယ်တော်ယေရှုလည် လင်(မ်)ကဲ့အယ် ချုပ်သောပေးဟီးရာမ်မာ။⁴⁷အင်းမာချိန်ငါ ကိုယ်တော်နောက် ထံပါအာ စာပ်ကဲ့လင်းမာပ်ချီးကားကာ့ တီတ်ဆာဖူမ်ပါအာမာ့ ဟော်ဝါကော တာမ်နယ်လာပူကဲ့အယ် တုန်းဟန်ဆုံး ပုရောဟိတ်ကာ ဆူလည် ဝမ်းနာန်စန်နော် အင်းမာဆူကာ့ ကနားတူစ်လက်လာမ်မာ့။⁴⁸အင်းမာချိန်နယ် ကိုယ်တော်ယေရှုကော အင်းမာတီတ်ဆာဖူမ်နယ် “ငါလည် လင်(မ်)တီမ် ဟမ်းတုတ်ကာတုန်ဖူမ်နောက် တာမ်ဖူမ်နယ် လာကဲ့အယ် လီထော်စာပ်ရာမ်ကွန်းနယ်ကော် ငါကောသူခိုးဓမြနာန်။⁴⁹ငါကော မာန်းရာပ်တိုင်း ဗိမာန်တော်ဝါမ်းငါး ဟောပြောသွန်သင်နောကဲ့လင်းငါးအချိန်နယ် နီမ်နောက် အတူတူ ငါကဲ့လင်းစာပ်သယ် မဟာအောမ်ကယ် လီကဲ့အယ် အလင်(မ်)ဟီရီကာသယ်။ အင်းညယ်ငေါဝမ်ညီ အင်းကာညယ် ထာရီထော်ကားကော ကျမ်းစာပါအာ ရေးလောပေးကာကာ့ အကြောင်းဖူမ်နယ် ပြည့်စုံနော်စီမ်တီမ် ထာမာ့” ငေါကဲ့အယ် မိန့်နောမာ့။⁵⁰အင်းမာနောက်သယ် ကိုယ်တော်ကာ တပည့်တော်အားလုံးနာပ်ရီ ကိုယ်တော်လည် သက်ပေးကဲ့အယ် ကာပ်ပူပေးဟီးရာမ်မာ့။⁵¹အင်းမာတီတ်ဆာလာပ်ကော ကိုယ်တော်ကာနောက်အား လီရာပ်ကားကာ ပိတ်ချောထည် တူဝါဟာလည်ဟာ ဖူမ်ပေးကားကာ့ တီတ်ဆာဆဟာ ဟော်ဝါလည် လင်(မ်)တီမ် ဆွဲလောပေးရာမ်စန်နော်၊⁵²အင်းမာ တီတ်ဆာဆဟာကော ဟီမ်ဖူမ်ပေးကားပိတ်ချောထည်လည် အင်းမားဟီမ်နာပ်ကာ့ထော်ဝါး သက်ပေးကဲအယ် အဝတ်အပါလော်ရယ် ကာပ်ပူပေးရာမ်မာ့။

⁵³အင်းမာနောက်သယ် ဟီမ်နာပ်ကော ကိုယ်တော်ယေရှုလည် တုန်းဟန်ဆုံး ပုရောဟိတ်ကာကျဉ်းမား လင်(မ်)ကဲ့အယ် ကော်ဟီးရာမ်မာ့။ ပုရောဟိတ်အကြီးအကဲဖူမ်ရယ် ဂျူးလူမျိုးခေါင်းဆောင်ဖူမ်နောက် ကျမ်းထောကား ဆရာလာပ်အားလုံးနာပ်ကော် အင်းမာကျဉ်းမာ လီကဲ့အယ် စုလောဟီးရီမာ့။⁵⁴ပေတရုရီး ကိုယ်တော်ယေရှုကာ နောက်အား နည်းနည်းဟာ ထံထံရယ် လီရာပ်ကဲ့အယ် တုန်းဟန်ဆုံး ပုရောဟိတ်ကာ ကျဉ်းဝါမ်းငါး ဆာမ်ကဲ့အယ် အစောင့်ဖူမ်နောက်တူတူ ဝမ်ဖူပေးကားကာ့ နဘေးရား ထောင်းကဲ့အယ် ဝမ်ကော့ပ်ကဲ့လင်းမာ့။⁵⁵ဂျူးပုရောဟိတ်အကြီးအကဲဖူမ်နောက် တရားလွှတ်တော် အဖွဲ့ဝင်ဖူမ်ငေါ ကိုယ်တော်ယေရှုလည် သေဒဏ်အီတီမ် သက်သေဖူမ် သမ်ဟီးရီး မဟာဟာမ်း သမ်ကဲ့အယ် လူဟီယို။⁵⁶တီတ်ဆာဖူမ်ငေါ ကိုယ်တော်လည် အမှန်နော်ကာကာ့ သက်သေဖူမ်နောက် ထွက်ဆိုလော်ဟီရီ အင်းမာဟီမ်နာပ် ထွက်ဆိုလော်ကာဖူမ်ငေါ ဟော်ဝါနောက်ဟော်ဝါ အကိုက်သောဟာရယ် လင်းဟီးမာ့။⁵⁷အင်းမာနောက်သယ် တီတ်ဆာကြအာကော ယုတ်ကဲ့အယ် ကိုယ်တော်ကာအကြောင်းနယ် အင်းကာညယ် ပက်သော်ကယ်အယ် ထွက်ဆိုလော်ဟီမာ့။⁵⁸အင်းမာဟီမ်နာပ်ကော "'ငါကော တီတ်ဆာလာပ် စာပေးကားကာ အင်းကာ့ဗိမာန်တော်လည် ဖျက်ဆီးလောကဲ့အယ် ဆွန်းရာပ်အတွင်း တီတ်ဆာလာပ်ကာ စာပေးကား အဟီပ်ကာကာ ရာကာပ်ဝါ့ ဗိမာန်တော်ညားလည် စာကဲ့ပြလောနာပ်' ငေါကဲ့အယ် အင်းကာတီတ်ဆာ ငေါကားလည် အလေ သာပ်မူသမ်မာန်မာ့' ငေါကဲ့အယ် ထွက်ဆိုလောဟီးမာ့။⁵⁹အင်းညယ်ငေါဝမ်ညီ အင်းမာဟီမ်နာပ်ကာ သက်သေထွက်ဆိုချက်ဖူမ်ငေါ် ကိုက်ညီလို။⁶⁰အင်းသယ် တုန်းဟန်ဆုံး ပုရောဟိတ်ကော တီတ်ဆာအားလုံးငါမန်းနား စာပ်ကဲ့အယ် ကိုယ်တော်ယေရှုလည် “နာန်ငေါ မဟာဟာမ်း ငေါဟာမ်းစောမ်းမန်းနေး။ အင်းကာတီတ်ဆာဖူမ်ငေါ နာန်ငါအကြောင်း သက်သေထွက်ဆို‌လော်ဟီကာလည် မညယ် ငေါဟာမ်းကာပ်သယ်” ငေါကဲအယ် စီမ်ညူဝမ်မာ့။⁶¹အင်းညယ်ငေါဝမ်ညီ ကိုယ်တော်ကော မဟာဟာမ်း အသပေါက်အာပ်ထာမ်ညယ် ဆီမ်ရှင်းရှင်း လင်းမာန်မာ့။ အင်းသယ် တုန်းဟန်ဆုံး ပုရောဟိတ်ကော ကိုယ်တော်ယေရှုလည် “နာန်ငေါ ဘုရားရှင်ငါဆာ ကယ်တင်ရှင်ထာကာကာ့ မေရှိယ ဟီပ်နေး” ငေါကဲ့အယ် ထပ်သောကဲ့အယ် စီမ်ညူမာ့။⁶²အင်းမာချိန်နယ် ကိုယ်တော်ကော “မှန်နောမာ့။ တီတ်ဆာကာ့ဆာကော တန်ခိုးကြီးလောဟန်ဆုံး ဘုရားရှင်ငါ လက်ယာဘက်လာထောင်းကဲ့အယ် လင်းငါးလည်ဟာမ်းထာဂါက်ထာ၊ ရွှေမြို့တော်ပါအာအယ် ဟလာမ်းဟီစ်တုန်ဖူမ်နောက်တူတူ ကြွဟေကာလည်ဟာမ်း ထာဂါက်ထာ နီမ်ယူပ်မူဟီးမုကား” ငေါကဲ့အယ် ဖြေလောဟာမ်းမာ့။⁶³အင်းမာချိန်ငါ တုန်းဟန်ဆုံး ပုရောဟိတ်ကော ဟီမ်ငါ အပေါ်ထပ် ဝတ်ရုံနယ် လာဆိတ်ကဲ့အယ် “အလေကော် နောက်ထပ် မဟာသက်သေဟာမ်း လိုလောစောမ်းဟပ်ကာယို။⁶⁴အင်းကာဟီမ်ငေါ ဘုရားရှင်နယ် စော်ကားလောကဲ့အယ် သပေါက်ကားကာလည် နီမ်သပ်မူစီရာပ်။ နီမ်မညယ် မသပ်ချီးသယ်” ငေါကဲ့အယ် စီမ်ညူမာ့။ အင်းမာချိန်နယ် တရားလွှတ်တော်အဖွဲ့ဝင်အားလုံးဖူမ်ရီ ကိုယ်တော်ယေရှုလည် အပြစ်ငါကယ်မာ့ သေဒဏ်အီသင့်နောမာ့ရယ် သဘောတူလောဟီးရာမ်မာ့။⁶⁵အင်းမာနောက်သယ် တီတ်ဆာကြအာကော ကိုယ်တော်လည် အာပ်ဝေးနောက် ထောက်စာပ်ချီးမာ့။ ဟီမ်နာပ်ကော ကိုယ်တော်ကာ မီပ်တူလည် ဟူမ်နောက် ပတ်သောစီးရာမ်စန်နော် သမ်းကနာကယ်အယ် ဟီမ်နယ် “နာန်ငေါ ပရောဖက်ထာမာငေါက်သော နာန်နယ် ဟင်သမ်းငါး ငေါကာလည် ဆောမ်းနိတ်” ငေါကဲ့အယ် သပေါက်ချီးမာ့။ အင်းမာနောက်သယ် အစောင့်ဖူမ်ညီ ကိုယ်တော်လည် ကော်ဝမ်ကဲ့အယ် သမ်းကနာဟီမာ့။

⁶⁶တုန်းဟန်ဆုံး ပုရောဟိတ်ကာ ကျဉ်းခြံဝါမ်းငါး ပေတရု ငါကဲ့လင်းငါးအချိန်နယ် တုန်းဟန်ဆုံး ပုရောဟိတ်ကာ ဆူ ယာပ်ရှီဟောဝါကော ပေတရုငါကားနေရား ထုတ်အီမာ့။⁶⁷အင်းမာဆူယာပ်ရှီကော ပေတရု ဝမ်ကော်ပ်ကဲ့လင်းငါးကာလည် ယူပ်မူဝမ်စန်းနော ဟီမ်နယ် ယူစာပ်စာပ်ရယ် ယူကဲ့အယ် “နာန်ငေါ နာဇရက်မြို့သား ယေရှုနောက်တူတူ ငါမောက်ကားဟီမ် ဟီပ်မာယိုလေး” ရယ် ငေါဝမ်မာ့။⁶⁸အင်းမာချိန်နယ် ပေတရုကော “နာန်ငေါကားကာလည် ငါမီမ်းညီးမီမ်းဟို နားရီးနားလည်လို” ငေါကဲ့အယ် ညာမ်းနောမာ့။ အင်းမာနောက်သယ် အင်းမာနေရားအယ် ပူရီကဲ့အယ် ကျဉ်းဝါမ်း ကဖာန်ပေါက်အား လာမ်စန်းနော အူကြေကားလည် သပ်မူဝမ်မာ့။ ⁶⁹အင်းညယ်ငေါရီး အင်းမာဆူယာပ်ရှီကော ပေတရုလည် ရာကာပ်ဝါ ယူပ်မူဟာမ်းစန်နော် နဘေးရား စာပ်ကဲ့အယ် လင်းငါးကာ တီတ်ဆာလာပ်သယ် “အင်းကာဟီမ်ငေါ ယေရှုကာ နောက်လိုက်ဖူမ်ပါအာမာ့ ဟော်ဝါထာမာ့” ငေါကဲ့အယ် ထပ်သောကဲ့အယ် သပေါက်မာ့။⁷⁰ပေတရုရီး ထပ်သောကဲ့အယ် ညာမ်းနောဟာမ်းမာ့။ အမာပ်စာပ်ရယ် နဘေးရား စာပ်ကဲ့လင်းမာပ်ချီးကားကာ့ တီတ်ဆာလာပ်ကော ပေတရုလည် “နာန်ငေါ ဂါလိလဲပြည်ပါအာအယ် လီကားသယ်မာ့ အမှန်တကယ်ဟာမ် ကိုယ်တော်ယေရှုကာ တပည့်ဖူမ်ပါအာမာ့ ဟော်ဝါ သေချာပေါက် ထာရင်နာ့” ရယ် သပေါက်ချီးမာ့။⁷¹အင်းမာနောက်သယ် ပေတရုကော “ငါအမှန်တိုင်းရယ် ငေါမာ့ ငေါကားလည် ငါကျိန်နောမာ့။ ငါ ပက်သော်ညာပ်မာ့ငေါက်သော် ဘုရားရှင် ငါလည်အပြစ်အီစာန်နိတ်။ နီမ်ငေါကားကာ တီတ်ဆာလည်း ငါအမီမ်းဟို” ရယ် ငေါမာ့။⁷²ချက်ချင်း ဒုတိယအကြိမ် အူကြေဟာမ်းမာ့။ အင်းမာချိန်နယ် ပေတရုကော ဟီမ်နယ် ကိုယ်တော်မိန့်နောပေးရီကာ “အင်းကာနန်ကြည် အူကယ်ခါ အကြေကြီစ်သယ် နာန်ငေါ ငါလည်မီမ်းဟို ငေါကဲ့အယ် ဆွန်းကြိမ်တိုင်တိုင် ညာမ်းနော့ကာ” ငေါကဲ့အယ် ငေါပေးကားလည် သတိလူဟာမ်းစန်နော် ကိုယ်ကာနောက်ကိုယ် အထိန်းနောရင်ညယ် ဟပ်ကဲ့အယ် လင်းမာန်မာ့။

Empower Asia Bible Translation Movement

https://app.library.bible/content/cd06723a13a74b61