Read San Lujc 22

San Lujc22zas_wyi

Bayaꞌn reeman diidx xhienaag guiniaaz reeman Jesús

¹Chi ma zidyob lanij pascw, chi raw reeman guiadxtil ni ad yuꞌt levadur.²Bixhioz rniabee ree bixhioz con ree mextr rajc ley, raguiil reeman mod xhienaag gugüjt reeman Jesús guial rdxeb reeman bejn ree.³Dxel guyu xindxab luxdoo tijb ree xi apóstoles Jesús, bén la Judas Iscariote.⁴Judas guin bigneenë bixhioz rniabee ree bixhioz con ree bén rniabee bén rajp ree yadooroꞌ Jerusalén, abiꞌ benëman laa reeman diidx xhienaag yayüman Jesús loj reeman.⁵Dád babaa reeman abiꞌ rëb reeman guial gudëëd reeman milia lojman.⁶Zianz cwëjbaman, dxel guzuloj raguiilaman mod xhienaag yayüman Jesús, guial ad zagbeet ree bejn.

Gudawnë ree xbejn Jesús xche

⁷Chi bidxin lanij pascw, tijbgaj yu raw ree bejn guiadxtil ni ad yuꞌt levadur rugüjt tëë reeman tijb xiil,⁸dxel guxhaal Jesús Bëd con Waj, rëbaman loj reeman: ―Gol biguieen ni yadaaw ree guxhin pascw.⁹Abiꞌ gunabdiidx reeman lojman rëb reeman: ―¿Ban guin rënl yuguieenan laan?¹⁰Zianz rëb Jesús loj reeman: ―Chi chuꞌdi luguiedx guin, guguiaadi tijb xinguiaaw caꞌx tijb re yuꞌ nijs. Gol chinalix xt lod yayux,¹¹gol güjdx loj bén na̱j lidxan: “Na mextr: ¿Con lënü gawnë ree xbejnman guxhin pascw?”¹²Dxel gulüüman lëjt tijb lënü ni rarojp pijs, ma najcchaaw lënü guin. Yagaj gol been ni yadaaw ree xche.¹³Zianz wej reeman abiꞌ bidxaagloj reeman gra ziꞌcgajczi rëb Jesús loj reeman. Dxel been reeman guialraw guin ni gaw reeman guxhin pascw.¹⁴Chi bidxin hor, Jesús con ree bén na̱j apóstoles gurej reeman xan mex.¹⁵Dxel rëbaman loj reeman: ―¡Diizd gocli rënan gawnëꞌn lëjt pascw guie, chi gad dxej guidxin gazaagdiajn abiꞌ guiëtan!¹⁶Din naj rni lëjt guial ad yuꞌtri dxej gawnëꞌn lëjt, xt chi ma canabee Dios guidiblagaa.¹⁷Dxel cwaꞌman tijb cojp yuꞌ vin, chi gulox badëëman quixtëë loj Dios, rëbaman loj reeman: ―Gol cwaꞌ vin guie, gol gudiꞌsan loj gradi.¹⁸Din diidxli rnin lëjt, ad yuꞌtri dxej guiëꞌn vin xt chi ma canabee Dios guidiblagaa.¹⁹Dxel cwaꞌman guiadxtil badëëman quixtëë loj Dios, zianz gulaꞌman laan, gudiꞌsaman laan loj reeman, rëbgajman: ―Guiadxtil guie na̱j da cuerpan ni ma bayün din guiëtan por lëjt. Chi güündi zian, gol been zian guial rusaaladxidi naj.²⁰Abiꞌ ziangajc beenman con cojp ni yuꞌ vin guin, chi gulox gudawaman xche, rëbaman: ―Vin guie na̱j da rejnan ni gaxhieꞌn chi guiëtan din guixal tijb nejz cüb xhienaag gap ree bejn perdon loj Dios.²¹’Per yan bén yayü naj, laa yaaman xoob loj mex lod xoob gajc yan.²²Per Bén guxhaal Dios, na̱j sagdiajman abiꞌ guiëtaman. Per ¡probza bén yayü laaman!²³Dxel guzuloj rniabdiidx loj lasaꞌ reeman chu reeman yayü laaman.

Chu mazri zojbloj

²⁴Dxel guzuloj reeman cadildiidx reeman chu loj gra reeman na̱j mazri bén zojbloj.²⁵Per rëb Jesús loj reeman: ―Bén na̱j ree rey loj guidxliuj guie rniabee reeman bén ladx reeman ziꞌctzi rën reeman, abiꞌ ree bén rniabee, rëb reeman guial rüjn reeman ni zagdxe.²⁶Per lëjt ad rayalt güündi zian, bén mazri zojbloj lojdi rayal güün laagajcaman ziꞌc tijb bén ad zojblojt. Guiáad bén rniabee lojdi rayal güün laagajcaman ziꞌc tijb mojs.²⁷¿Chu na̱j mazri bén zojbloj loj guidxliuj guie? ¿Bén rbej xan mex par gaw ya o bén rbeꞌc guialraw? ¿Nid bén rbej xan mex guin na̱j mazri bén zojbloj ya? Guiáad naj zaꞌn lojdi ziꞌc tijb bén rbeꞌc guialraw.²⁸’Lëjtczi zaꞌnë naj loj ree dxej cazaagdiajn.²⁹Zeel gunen guialrniabee lojdi ziꞌc banee da Dadanan lon,³⁰abiꞌ gawidi loj da mexan lod ganabeen cwe tëëdi loj ree yagxhil lod güündi guialguxtis loj gra ree bén za loj guidxiptioꞌp xdiaa Israel.

Rëb Jesús guial guiëb Bëd ad nünbeetaman laaman

³¹Rëb tëë Jesús: ―Simón, Simón, ma gunab xindxab lëjt din güünx lëjt prueb ziꞌc rbijb bejn trigo.³²Per naj ma guredx gunaaban Dios por lüj chitëë cwëz chililadxil naj. Guiáad lüj chi yazudxiꞌchil loj ni rliladxil naj zatijb, gognë ree lasaꞌl din sudxiꞌch reeman loj ni rliladx reeman naj.³³Dxel rëb Bëd lojman: ―Dad, ad zaroꞌnladxtan lüj majsi gayuꞌnëꞌn lüj ladxguiib o xt guiëtnëꞌn lüj.³⁴Abiꞌ rëb Jesús: ―Naj rni lüj Bëd, yan guxhin gajc chi gad gui̱d cwidxaꞌ, choon volt mal rëbil ad nünbeetil naj.

Zidyob dxej sagdiaj Jesús

³⁵Dxel gunabdiidx Jesús loj ree xbejnman rëbaman: ―Chi guxhalan lëjt sin bols, sin milia, në sin gurëch, ¿yuꞌ ni biaadxidi ya? Badxiꞌ reeman laan rëb reeman: ―Achet.³⁶Dxel rëbaman loj reeman: ―Saꞌn yan bén rajp milia në bols, gol cwaꞌn. Guiáad bén ad rajpt espad, gol batoꞌ xabidi din siidi tijban.³⁷Din naj rni guial rüjn naguiejn gac ziꞌc rëb loj xtiidx Dios por naj, lod rëb: “Abiꞌ nayabaman loj ree benmal.” Gra ni ca loj xtiidx Dios por naj, na̱j gacan cumplid.³⁸Dxel rëb reeman lojman: ―Dad, guie nacaꞌn tioꞌp espad. Badxiꞌman laan rëbaman: ―Zajquican.

Rbejdx rniab Jesús Dios lod la Getsemaní

³⁹Dxel brii Jesús ziꞌc na̱j xcostumbraman zëman ruguiaꞌ Olivos, abiꞌ binal ree xbejnman laaman.⁴⁰Chi bidxin reeman yagaj, rëbaman loj reeman: ―Gol gurejdx gunab Dios, chitëë güün xindxab lëjt gan.⁴¹Abiꞌ wejman zijt ziꞌct lod rucaa bejn tijb guiaj, zianz bazuxibaman gurejdx gunabaman Dios,⁴²rëbaman: ―Dad, bal tiëbil, babëë naj loj ni gazaagdiajn per ad gac ziꞌc rënan, rayal gac ziꞌc rënl.⁴³Dxel balüüloj tijb anjl guza xanyabaa lojman persi badëëman laaman gojl.⁴⁴Abiꞌ chi cazagdiaj daꞌtaman, mazri con gan cabejdx canabaman Dios ryajb tëë ree xnijs ragneeyaman luyuj ziꞌc rejn.⁴⁵Chi bisuman lod cabejdx canabaman Dios, bignaj ree xbejnman abiꞌ chi badxinman cwëꞌ reeman laa reeman nagaꞌyëjs, guial yuꞌnaya reeman.⁴⁶Zianz rëbaman loj reeman: ―¿Chexc zeel nagaꞌyëjsidi? Gol bixche, gol gurejdx gunab Dios chitëë güün xindxab lëjt gan.

Gunaaz reeman Jesús

⁴⁷Sta caneenë Jesús bén na̱j ree xbejnman chi bidxin ree benzien. Në bén brii laj Judas, bén goc tijb ree xbejn Jesús, nedaman loj ree bén guin abiꞌ bibigaman loj Jesús gudawaman laaman xid.⁴⁸Dxel rëb Jesús lojman: ―Judas, ¿wen con tijb xid rayül Bén guxhaal Dios ya?⁴⁹Chi baguiaa ree bén zaꞌnë Jesús ni cayajc, rëb reeman lojman: ―Dad, ¿zalëë dux espadan ya?⁵⁰Abiꞌ tijb xbejnman gudiilguijdxaman xmojs bixhioz rniabee gra ree bixhioz, gutüꞌman guidiajg ladbeeman.⁵¹Per rëb Jesús loj reeman: ―Guzujr ree bénan. Ma gojczi. Dxel baquiꞌ Jesús guidiajg mojs guin abiꞌ bayüjnman laan.⁵²Zianz rëb Jesús loj ree bixhioz rniabee ree bixhioz, con ree bén rniabee ree bén rajp yadooroꞌ Jerusalén con xguxtis ree bén Israel, bén bidxin ree par chinë laaman: ―¿Chexc zeel zëëdidi con espad con yag din chinëdi naj ziꞌc tijb xingubaan?⁵³Guixie guixie guzunëꞌn lëjt lën yadooroꞌ Jerusalén abiꞌ ad gunaaztidi naj. Per yan ma bidxin xihoridi, hor ni nabee xindxab.

Rëb Bëd ad nünbeetaman Jesús

⁵⁴Dxel gunaaz reeman Jesús zinë reeman laaman lidx bixhioz rniabee gra ree bixhioz, binal Bëd laaman zijt zijt.⁵⁵Yagaj guleꞌc ree bén guin guij galay luleꞌ, abiꞌ gurej reeman rudëj guin. Në Bëd gurejnë laa reeman.⁵⁶Per tijb béngunaa rüjn dxiin yagaj, chi baguiaaman Bëd zojbaman rudëj guin, baguiaaman lojman, abiꞌ rëbaman: ―Në bén guin zaꞌnë Jesús.⁵⁷Per gurexuu Bëd, abiꞌ rëbaman loj bén guin: ―Ad nünbeetan laax.⁵⁸Ad gojct xchej chi baguiaa zatijb bejn laaman, rëbaman lojman: ―Në lüj na̱j xbejn Jesús. Badxiꞌ Bëdan rëbaman: ―Yajqui dad, ad xbejntix naj.⁵⁹Gudëd cost tib hor, dxel rëb zatijb bejn: ―Nëczi bén guie zaꞌnë laaman din nëman na̱j bén Galilea.⁶⁰Zianz rëb Bëd: ―Ad ragbeetan xhienin rnieel. Hor ni canee gajc Bëd zian guridxaꞌ tijb gui̱d.⁶¹Dxel badxiꞌ loj Jesús baguiaaman loj Bëd, abiꞌ basaaladx Bëd guial rëb Jesús lojman: “Yan guxhin gajc chi gad gui̱d cwidxaꞌ, choon volt mal rëbil ad nünbeetil naj.”⁶²Dxel barii Bëd yagaj, abiꞌ dád naya biinman.

Bazeꞌ reeman Jesús gudijn tëë reeman laaman

⁶³Bén cayajp ree Jesús, bazeꞌ reeman laaman gudijn tëë reeman laaman.⁶⁴Guxhii reeman lojman abiꞌ gudijn reeman laaman, dxel rëb reeman lojman: ―¡Guneeyaꞌ chu gudin lüj!⁶⁵Abiꞌ zien ree diidxguijdx rëb reeman lojman.

Zaꞌ Jesús loj ree guxtis Israel

⁶⁶Chi bareguiaal, badxajg lasaꞌ ree guxtis Israel, në ree bixhioz rniabee ree bixhioz con ree mextr rajc ley, abiꞌ binë reeman Jesús lod radxaag lasaꞌ gra ree xguxtis reeman, dxel rëb reeman lojman:⁶⁷―Guna du lojn, ¿lüj na̱j Cristo ya? Badxiꞌman laan rëbaman: ―Bal ganinan ad zaliladxtidi.⁶⁸Abiꞌ bal xhie ganabdiidxan lojdi, ad zadxiꞌtidan.⁶⁹Per diizd yan, Bén guxhaal Dios cweman xladbee Dios, bén caꞌ gra guialrniabee.⁷⁰Dxel rëb gra reeman lojman: ―¿Lüjn na̱j Xiꞌn Dios ya? Badxiꞌman laan, rëbaman: ―Waliquidi najcan.⁷¹Zianz rëb reeman: ―¿Xhie mazri rüjn naguiejn yadiil ree testiw? Dunuj gajc ree ma baguiejn ni nax con quijb xtiidxix.

San Lujc 22 / zas_wyi