Read LUKA 1

LUKA1zaj_pbt

¹Mkulu Teofilo, wanhu bwando waiyoha kwandika mumnhongo mbuli zija zivikizwe mmwetu.²Wandika kamba vija vuzikalile zisimulilwa na waja wazonile na meso gao songela haichanduso, awo wakalile wozipeta.³Avo na nie, Mkulu, avija vunizilolile goya mbuli zino zose songela ichanduso chake, nivigesa vinoga nikwandikile vinogile.⁴Notenda vino giladi na gweye uitange ikweli ya mbuli zija zuufundizigwe.

Mvumbuka ya Yohana M'batiza Yohokoligwa

⁵Kipigiti Helode Mkulu vayakalile mndewa wa Yudea,kukala na mkulu wa nhambiko imwe twaga jake Zakalia, yakalile wa dale da watambika dikemigwa Abiya. Mtwanzi wake kakala yokemigwa Elizabeti, na heyo kakala wa lukolo lwa mtambika Haloni.⁶Wose wabili wakala womnogela Mulungu na wawinza ndagizi zose za Mndewa bila kusigaza.⁷Zakalia na Elizabeti wakala wabule wana, kwavija Elizabeti kakala bule sambo, na hewo wose wabili wakala wavyele ng'hani.⁸Zua dimwe Zakalia kakala yosang'hana sang'hano za watambika Mng'anda ya Mulungu, kwavija dale jake da watambika dikala mzamu.⁹Kamba viwazoele kutenda watambika, kula imgwila Zakalia yachole kufusha ubane kuna ikilingo cha kulavila nhosa. Avo kengila Mng'anda ya Mndewa,¹⁰wanhu wose wakala wakiilundize hanze wotambika kipigiti hicho cha kufusha ubane.¹¹Msenga wa Mndewa wa kuulanga kamulawilila, kema ng'ambu ya ukulume ya ikilingo cha kufushila ubane.¹²Zakalia viyamuwene, kasinhuka, bwembwe dimwingila.¹³Msenga wa Mulungu wa kuulanga kamulongela, “Zakalia, sambiudumbe kwavija Mulungu kazihulika nhambiko zako, avo Elizabeti mtwanzi wako kokulelela mwana mbigalo, na gweye umgwelele twaga dikemigwa Yohana.¹⁴Kosekelela na kudeng'ha ng'hani, na wanhu bwando woitoela ng'henze mvumbuka yake!¹⁵Kowa mkulu hameso ga Mndewa. Hang'wa ugimbi ama kinhu chochose cha kukola. Komemezigwa Loho wa Mulungu songela mmunda mwa mamaake.¹⁶Kowabweza wanhu bwando wa Islaeli kuli Mndewa Mulungu wao.¹⁷Kochola haulongozi wa Mndewa na mhiko na loho ya Eliya, kowaduganyiza tena watata na wana zao, kowatenda wanhu wadulu wawe wende avo yamtandile Mndewa wanhu zake.”¹⁸Zakalia kamuuza msenga wa Mulungu wa kuulanga, “Novitangaze kamba mbuli zino zowa avo? Kwavija nie na mtwanzi wangu tose twa wavyele.”¹⁹Msenga wa Mulungu wa kuulanga kamwidika, “Nie iyo Gabulieli, mtumigwa nimaga haulongozi wa Mulungu, nitumigwa nikugalile usenga uno unogile.²⁰Ila kwavija huzitogole mbuli zangu zondazivikile mumsimu wake, kowa bubui, hudaha kulonga mbaka zua dija gano gose ganikulongele vondagalawilile.”²¹Kipigiti hicho wanhu wakala wom'beta Zakalia kuno wokanganya habali kokawa muja Mng'anda ya Mulungu.²²Viyalawile hanze, kakala hadaha kulonga nao, avo wavitanga kamba kakala yonile nzozi Mng'anda ya Mulungu. Kakala hadaha kulonga, kakala yolonga mkulagusa na makono.²³Kipigiti chake cha kusang'hanika Muing'anda ya Mulungu vukimalile, kabwela ukae.²⁴Mkipigiti kiguhi mtwanzi wake kapata inda, avo kakala hakae yake milenge mitano.²⁵Kalonga, “Hakimambukizo, Mndewa kanyonela bazi, kanisegezela kinyala changu mwa wanhu.”

Mvumbuka ya Yesu Yohokoligwa

²⁶Muna umulenge wa sita wa inda ya Elizabeti, Mulungu kamulagiza msenga wake wa kuulanga, yokemigwa Gabulieli, hakiwambo cha Galilaya, kikemigwa Nazaleti.²⁷Kakala na usenga wa mndele imwe mhambe, mkasano wa munhu imwe twaga jake Usufu kulawa mulukolo lwa Mndewa Daudi. Twaga jake Maliamu.²⁸Msenga wa Mulungu wa kuulanga kamcholela kamulongela, “Nokulamsa! Mndewa ka hamoja nagwe na kakumoteza ng'hani!”²⁹Maliamu kazanywa ng'hani sama ya mbuli zija za msenga wa Mulungu wa kuulanga na kugelegeza choni nhegulo ya mbuli zija.³⁰Msenga wa Mulungu wa kuulanga kamulongela, “Sambiudumbe, Maliamu, kwavija Mulungu kanogelwa nagwe.³¹Kopata inda, komulela mwana mbigalo, na gweye kolondigwa umgwelele twaga dikemigwa Yesu.³²Heyo kowa mkulu na kokemigwa Mwana wa Mulungu Mkulu Ng'hani. Mndewa Mulungu komgwelela kigoda cha undewa kamba tataake Daudi.³³Avo kowa Mndewa wa lukolo lwa Yakobo milongo yose, Undewa wake hauziga!”³⁴Maliamu kedika kalonga, “Nie na mhambe. Yodahikaze mbuli ino?”³⁵Msenga wa Mulungu wa kuulanga kedika kalonga, “Loho wa Mulungu kokuhumulukila, na mhiko za Mulungu Mkulu Ng'hani zokugubika. Avo mwana yondayavumbuke kowa mwana yang'alile, kokemigwa Mwana wa Mulungu.³⁶Mgelegeze lumbu jako Elizabeti wamulongile kabule sambo, ila sambi kana inda ya milenge sita hamoja na uvyele wake.³⁷Kwavija haduhu mbuli haidahika ha Mulungu.”³⁸Maliamu kedika kalonga, “Nie na mtumigwa wa Mndewa, na nhendelwe kamba vuulongile.” Abaho, ija msenga wa Mulungu wa kuulanga kahalawa.

Maliamu Komtembelela Elizabeti

³⁹Kipigiti kidodo hamwande Maliamu kaisasala, hima kachola kuna ikiwambo kili muisi ya vigongovigongo ya Yudea.⁴⁰Kengila muna ing'anda ya Zakalia, kamulamsa Elizabeti.⁴¹Elizabeti viyahulike ndamsa ya Maliamu, chana king'hele kizumha mkudeng'ha muinda ya Elizabeti. Na Elizabeti kamemezigwaLoho wa Mulungu,⁴²na kenula dizwi kalonga, “Kumota gweye kubanza watwanzi wose, na imwana yondaumulele kamota!⁴³Vilihi mbuli zino ng'hulu zindawilile nie, hata mama wa Mndewa wangu yeze kumwangu?⁴⁴Mhunde vinihulike ndamsa yako, chana king'hele muinda yangu kizumha mkudeng'ha.⁴⁵Kumota gweye utogole kamba gaja gayalongile Mndewa kumwako golawilila!”

Maliamu Komtogola Mulungu

⁴⁶Na Maliamu kalonga,“Moyo wangu womuyenzi Mulungu.⁴⁷Loho yangu yomdeng'helela Mulungu Mkombola wangu.⁴⁸Kwavija kamgelegeza nyakadala wake imwende!Avo kusongela lelo wanhu wa milelo yose wong'hema yamotile,⁴⁹mmbuli zija ng'hulu Mulungu Mkulu zayanitendele.Twaga jake ding'ala.⁵⁰Kulawa wanhu wa mulelo umwe mbaka mulelo uyagwekowonela bazi awo womdumba heyo.⁵¹Kaugolosa mkono wake mkuluna kawapwililisa awo woitopela ngelegeza zao.⁵²Kawahumulusa wandewa wali na mhiko walawe muna ivigoda vao va undewa,na kawenula iwakumbulu.⁵³Wali nzala kawegutiza vinhu vinogile,na wagoli kawaleka wachole bila kinhu.⁵⁴Kakigoga kilagano chayailagane na wahenga zetu,avo keza kumtaza mtumigwa wake Islaeli.⁵⁵Kakumbukila kumonela bazi Ablahamna lukolo lake lose milongo yose kamba viwailagane na wahenga zetu!”⁵⁶Maliamu kakala na Elizabeti kamba milenge midatu vino, abaho, kabwela ukae yake.

Mvumbuka ya Yohana M'batiza

⁵⁷Kipigiti cha Elizabeti kulela kivika, kamulela mwana mbigalo.⁵⁸Wanhu wa mmambwegambwega na walawile mulukolo lwake viwahulike mbuli zija zinogile za mkanganyo Mndewa ziyamtendele, wose wadeng'helela hamoja na heyo.⁵⁹Zua da nane weza kumwingiza kumbi imwana, walonda kumgwaa twaga da tataake, Zakalia.⁶⁰Mamaake kalonga, “Ndema! Twaga jake dokemigwa Yohana.”⁶¹Wanhu wamulongela, “Ila mulukolo lwenu haduhu munhu yali na twaga hijo.”⁶²Abaho, wamuuza tataake mkumulagusila na makono, womuuza kamba twaga dilihi doyolonda yagweleligwe mwanage.⁶³Kawapula kibanzi cha kwandikila, kandika vino, “Twaga jake Yohana.” Wanhu wose wakanganya.⁶⁴Baho mulomo na lulimi lwake Zakalia vifunguligwa, kasonga kulonga, kamuyenzi Mulungu.⁶⁵Bwembwe diwengila wanhu wose wa mmambwegambwega na mbuli hizo zisimulilwa ng'ambu zose za isi ya vigongovigongo ya Yudea.⁶⁶Wose wahulike mbuli hizo wagelegeza mmioyo yao, wolonga, “Mwana ino kowa munhu wa vilihi? Kwavija mhiko za Mndewa za hamoja na heyo.”

Zakalia Kohokola

⁶⁷Zakalia tataake imwana kamemezwa Loho wa Mulungu, na kulonga usenga uno wa Mulungu,⁶⁸“Yayenzigwe Mndewa, Mulungu wa Islaeli!Kwavija keza kuwataza wanhu zake na kuwakombola.⁶⁹Katugwelela Mkombola mkulu,wa lukolo lwa mtumigwa wake Daudi,⁷⁰kamba vija vayailagane na wahokozi zake wang'alile umwaka,⁷¹kamba kotukombola tulawe mmakono ga wadumuka,na kulawa mmakono ga wose watwihile.⁷²Kalonga kowonela bazi wahenga zetuna kudikumbukila lagano jake ding'alile.⁷³Kamduilila Ablaham tata wetu,⁷⁴kailagana na heyo kamba kotukombola kulawa mmakono ga wadumuka,na kututenda tweye tumsang'hanikile heyo bila bwembwe,⁷⁵giladi tuwe wanhu wang'alile na tulibule uzenzeleganye haulongozi wake,mazua gose ga ugima wetu.

⁷⁶“Na gweye, mwanangu, kokwiza kukemigwa muhokozi wa Mulungu Mkulu Ng'hani.Kolongola haulongozi wa Mndewakumtandila nzila yake,⁷⁷kowalongela wanhu zake avija vondawakomboligwemkusegezelwa vilozo vao.⁷⁸Mulungu wetu kogatenda higo sama ya bazi jake kulu,na ukombola wake kulawa kuulanga wotuhumulukila kamba zua da imitondo⁷⁹na kuwamulikila wose wokala mdiziza na awo wakala mdisisila da kudanganhika,na kugalongoza magulu getu muna inzila ya tindiwalo.”⁸⁰Mwana ija kakula na kuwa na mhiko muloho. Kakala muluwala mbaka zua dija viyalawilile mwa wanhu wose wa Islaeli.