MASMUR
119
/
yva_tbl
Kove ngkov irati vatano ubeta ananyao AMISY rai mai
1
Kove ngkov irati vatano are nawirati ugwambe ayao kakai rai jewene mai,
muno ubeto irati anaparatot AMISY rai.
2
Kove ngkov irati vatano are nawirati usayae matuve Apa ananyao rai mai,
muno manuga ntenami wo AMISY akani.
3
Kove ngkov irati vatano utavon irati AMISY Apa unanui rai mai,
muno wo ana ngkakai rave jewen.
4
AMISY, Winyirati Nyo Nya anaparatote raugaje reansai,
indamu reambeto rai tugaeve.
5
Ribeker syare ritindimu sya ana dave rai,
indamu syo Nya anaparatote raijaro matuve.
6
Ranivara ribeto mavabe Nya ananyao rai,
weamo risya samane intai ramu.
7
Ranivara syo Nya patimu moyare ranyao,
wea umba syo kove raura seo Naijo inanuga nsarokire rai.
8
Syare indati riteto matuve Nya anaparatote rai,
weti vemo winaneme mpaya rinaijo intai jinya.
9
Arikainy kamurame inta be tai ruimaisy, indamu vemo gwambe no AMISY Amune rai nora?
Weamo po apa ana dave rayaranande mamaisyo Nya ayao rai.
10
Inanuga ntenami syo winakani,
weti vemo Nyo inapayamo syusyo marambe Nya ananyao rai jinya.
11
Nya ayao mamo syo raugasyo ntonamo inanuga so rai,
indamu vemo syo ayao kakaije rave no winamune rai jinya.
12
Sya AMISY, syo winararimbe,
Syare Nyo inanyao irati Nya anaparatote rai.
13
Nya anaparatoto ndaunande mamo,
syo raura tetebe inawa so rai.
14
Inanayanambe ibeto irati Nya ananyao rai,
maisyare vatano tuna ananuge vone rai ti anayanambe rave wemaisy.
15
Syare syo Nya anaparatote ratantona tutir,
muno inami ntamijo Nya unanui ngkove rai.
16
Nya anaparatote mo anayanambe raugavo rinai,
weti Nya ayao mamo rinanimari raije ramu.
17
Risyamo syanapatambe Nai, syare wimbekobe rinai,
indamu rijayaisy tutir muno ibeto Nya ayao rai.
18
Syare Nyo inami raneka indamu syo ana raen,
indamu syo Nya ananyao mbe anaanibe raen no Nya anaparatote rai.
19
Risyamo rino no mine vone so maisyare vatano maran ta de inta amaisy,
weti syare Nyo Nya ananyao rarorono rinai.
20
Inanuga so ntove rave,
ntove rave Nya ayao mamaisye rai.
21
Nyo vatano mararine mansanenen,
muno Nyo kakai ratande vatano wusya akirive Nya ananyao raije mai.
22
Syare Nyo inapaya irati awa ana wo rinaura tantunawi muno wo inakaajiane rai,
weye risyamo beto Nya ananyao rai.
23
Akari mamune wanyinyaube kai ware umarovave rinai,
weramu Nya anaparatote obo mirati syo ratantona no inanuga, weye risyamo syanapatambe irati Nai.
24
Nya ananyao obo mirati mo anayanambe raugavo inanuga rai,
muno mo rinanyao ana ratantona ngkove rai.
25
Risyamo kavintare wene mo rinaugav,
weti syare Nyo kovo wanyine raugav akare rinai mamaisyo Nya ayao rai.
26
Sya ana dave mamo syo raura kakavimbe Nai, umba Nyo ayaowe rasakinavo rinai.
Syare Nyo rinanyao Nya anaparatote rai.
27
Syare Nyo inaveramu inanto irati Nya anaparatote rai,
weamo syo Nya ana ndave mbe anaanibe ratantona tutir.
28
Inanuga mpatimu rave weye inanimaumbe ntapekano rinai,
weti syare Nyo vambunine raugaje rinai mamaisyo Nya ayao rai.
29
Syare Nyo aarurijate raveto marambe irati inawa so rai,
muno wimbekobe rinai, Nyo rinanyao Nya anaparatote rai.
30
Syo rapatimu to indamu ibeto Winai,
muno Nya anaparatote mamo inaemendi rai tutir.
31
Sya AMISY, syo Nya ananyao raijaro matuve indamu ritavondi rai,
weti vemo winaneme mpaya rinai mo risamane inya.
32
Sya AMISY, rinamune mayar dave ritavondi irati Nya ananyao rai,
weye Winyo inanuga so raneka ti rinanto irati rai tugaeve.
33
Sya AMISY, syare Nyo rinanyao indamu ritavondi Nya anaparatote rai tugaeve,
indamu syo raijaro matuvea ntoa rikakai.
34
Syare Nyo inaveramu inanto irati Nya anaparatote rai, indamu syo raijaro matuve,
muno ribeto rai inanuga ntenami rautan.
35
Syare Nyo sya unanui anya no mine vone so raugav mamaisyo Nya ananyao rai,
weye omirati rinanayanambe rai.
36
Syare Nyo inanuga so raveramu mbekero Nya ananyao obo rai,
mo taune sya bekero ananugo mine so rai rakivan.
37
Syare Nyo inansopi indamu vemo syo anakotaro ama ine mewen dai rakani inya,
yara syare Nyo kovo wanyine raugakare rinai mamaisyo Nya ayao obo rai.
38
Risyamo syanapatambe Winai, weti syare Nyo Nya urairi raveramu mamaisyo rinai,
namirati Nyo raunanto irati vatano wo nasyanive mai wem.
39
Sya marova wo inaura tantunawi ti rijaniv, weti syare Nyo raveto marambe,
weye Nya anaparatote mirati ngkov.
40
Syare Nyo kovo wanyine raugakare rinai mamaisyo Nya moyare rai,
weye ribeker ibeto irati Nya anaparatote rai.
41
Sya AMISY, syare Nyo Nya muinyo no tawane rarorono rinai,
muno Nyo rinapaya kakai rai mamaisyo Nya urairi rai.
42
Wirati indamu syo ayao rasakinavo vatano wo inaura tantunawi mai,
weye syanave irati Nya ayao rai.
43
Nya ayao tugae mamo vemo Nyo rapaya inawa so rai nora,
weye risyamo inanaveano Nya patimu moyare ramen.
44
Nya anaparatote mamo syare syo raijar tutir
ntoa nuge nuganui.
45
Weti sya marova wo rinansosobe akato ramu,
weye ribekero itavondi irati Nya anaparatote rai.
46
Risyamo indati risamane intai ramu
arono syo Nya ananyao ravovo akari titi mai.
47
Weye Nya ananyao wemirati inanuga no rai,
weti rinananibe ibeto rai.
48
Nya ananyao mamo syo raura titive muno inanuga no rai rave,
muno Nya anaparatote mamo syo ratantonave tutir.
49
Risyamo syanapatambe Nai, syare naemeno Nya ayao Nyo raura rinai to rai,
namirati Nyo raurairive ti inanaveano ramene wem.
50
Nya urairi mo inayove no sya siuri ama uga rai,
weye tugae, wemirati mo kovo wanyine raugavo rinai.
51
Vatano umararine wo rinaura tantunawi,
weramu risyamo rinakirive Nya anaparatote rai ramu.
52
Sya AMISY, rinaemendi tutir irati Nya anaparatoto ntami no wusyin to rai,
weamo mo inanuga so rayove.
53
Ripari mangkebe irati vatano mamune mai,
weye wenawamo wo Nya anaparatote ravakambe.
54
Rino no rui rui vayave no mine so,
Nya anaparatote wemirati sya ransyerano kangkamane mije.
55
Arono namane yasyin syo AMISY winatantonave,
weti syo Nya anaparatote raijaro matuve.
56
Ribeto Nya anaparatote rai tutir,
weti Nyo kove raugaje rinai.
57
Sya AMISY, Wibuiny irati ribekero Nai,
syurairive syare ibeto Nya ayao rai.
58
Nde irati inanuga ntenami rautan, syo Amisy Nya mbekobe ranajo,
syare naemeno rinai, mamaisyo Nya urairi rai.
59
Arono syo sya ana dave ratantonave,
syo patimu rave syakare irati Nya ananyao rai.
60
Rimaneai akatoe ramu yara risyavave
inda ibeto irati Nya ananyao rai.
61
Vatano mamune wo avirije ratugar mo inaman,
weramu risyamo inanimarijo Nya anaparatote rai jewen.
62
Namane yasyin riseo syo kove raura ore Amisye Winai,
weye Winya anaparatote mamo moyar.
63
Risyamo imanivuvive irati vatan tenambe wo Amisy winasyanive matavon,
muno ribe arakobe irati vatano ubeta irati Nya anaparatote raije matavon.
64
Sya AMISY, mine tename so ntairi irati Nya muinyo no tawane rai,
weti syare Nyo rinanyao irati Nya anaparatote rai.
65
Sya AMISY, risyamo syanapatambe Nai,
Nya kove mamo Nyo rarorono rinai to,
mamaisyo Nya urairije rai.
66
Syare Nyo rinanyao irati ana ratantona ngkove rai muno ana ratantona ntiti rai,
weye risyamo syanave Nya ananyao rai.
67
Arono risyanya akirive, weamo Amisy Nyo ana nsosobe raude irati rinai.
Weramu soamo risyo Nya ananyao raijaro matuve akato to.
68
Winyi ngko dave muno Nya ana ndave ngkov,
syare Nyo rinanyao irati Nya anaparatote rai.
69
Vatano umararine wo rinampami,
weramu risyamo inanuga so ntenami ibeto irati Nya anaparatote rai.
70
Onawamo manuga matu, weti wo ana ngkove, ngkakai raene ramu,
yara risyamo inananibe ibeto irati Nya anaparatote rai.
71
Mangke Amisye Winyo raude rinai mamo ngkovo rinai,
indamu rinanto Nya anaparatote rai tugaeve.
72
Nya anaparatoto Nyo raugaje mamo ngkovo rinai,
mo emasi muno peraki ama manui nseo rave rakivan.
73
Winyirati Nyo inanarijo naneme rai,
syare Nyo ana ratantona raugaje rinai indamu syo Nya ananyao ranyao mavabe.
74
Vatano wo Amisy nasyanive manayanambe,
weye wo rinaen risyamo inanaveano Winya ayao obo ramen.
75
Tugae sya AMISY, arono syo ayao kakaije rave, syo raen mangkeo Nyo rapatimu mamo moyar,
Nyo mangke raude rinai weye winteto Nya urairi rai.
info
76
Risyamo syanapatambe Nai,
koveamo Winya muinyo no tawane wemi mo inanuga so rayove,
mamaisyo Nya urairijo ndaura nande rinai rai.
77
Syare naemen irati rinai, indamu rijayaisy tutir,
weye Nya anaparatote mo anayanambe raugavo inanuga so rai.
78
Koveamo vatano umararine mavera usamane,
weye wo aarurijate raker ti nande rinai,
yara risyamo Nya anaparatote omirati syo ratantonave.
79
Kovato vatano wo AMISY nasyanive ude no rinai,
nanawirati unanta Nya ananyao rai nao.
80
Syare Nyo inanuga so raveramu nsarokir ribeto Nya anaparatote rai,
indamu vemo risamane inya.
81
Rinanuga so mbeke dave syare AMISY Winyo rinapaya irati kakai rai.
Risyamo inanaveano Nya ayao obo ramen.
82
Syo nanyuto Nyo Nya urairi raveti mamaisye raija marudi, ti inami njoram to,
weti syo raura syare: ‘‘Nandui rati umba Nyo rinayove?’’
83
Weye risyamo sya ana intai akatoe ramu,
maisyare karoa ugamijo rata kijao rai ti ngkanena mpoopove wemaisy,
weramu Nya anaparatote mamo rinanimari raije ramu.
84
AMISY, risyamo syanapatambe Nai, risyo winanyuta ntoa nanduija?
Ntoa nanduija umba Winyo mangke raugaje irati vatano wo rinawatane mai?
85
Vatano mararine wo ateme rawae ti mo inaman,
nanawirati wonae ubeta Nya anaparatote rai nao.
86
Nya ananyao mainy tenambe, omamo ntindimu ti anave rai.
Syare naemeno rinai! Weye vatano angkarije ntapekano mai wo rinawatan bayave.
87
Kavintare umba wo rinaubaisy bayave kobe,
weramu risyamo syo Nya anaparatote rapaya ra ntami ramu.
88
Syare Nyo kovo wanyine raugakare rinai mamaisyo Nya muinyo no tawane rai,
indamu ribeto Nya ananyao ndaugaje rai.
89
Sya AMISY, Nya ayao mamo ntindimu
no munijo ntiti ntoa nuge nuganui.
90
Winyamo nteto Nya urairi rai tawano susyo miridi nto mai,
Winyo muni so ranteto matuve ti no tawan.
91
Anakotaro no ti nde somamo mamaisyo Nya patimuge rai,
weti wemainyamo manapatambe Winai.
92
Ranivara ibekero Nya anaparatote rai jewen datire,
somaisyamo rikakai no sya siuri ama uga rai to.
93
Nya anaparatote mamo inanimari rai jewen ntoa nuge nuganui,
weye wemi mbewar Winyo kovo wanyine raugav akare rinai.
94
Winyi Nya ura rinai, weti syare Nyo inapaya kakai rai,
weye Nya anaparatote mirati ibeto rai mavabe.
95
Vatano mamune wo inaman indamu ware wo rinaubaisy,
weramu Nya ananyao obo mirati syo ratantonave.
96
Anakotaro ngkov dave no mine somamo inta no tawane ramu,
yara Nya ananyao obo mirati no tawan.
97
Wakoe, inanuga no Nya anaparatote rai rave!
Syo ratantona tutiro masyote anteter.
98
Nya ananyao omirati no rinai tawan tutir,
weti mo ana ratantona ntiti raunande rinai, mo sya marova awa ana udatantona rakivan.
99
Sya ana datantona ngkov mo kuruno wo rinanyao awa rakivan,
weye risyo Nya ananyao ratantonave tutir.
100
Sya ana datantona mo vatano awa akoe matu to awa ana udatantona rakivan,
weye syo Nya anaparatote raijaro matuve.
101
Unanui ngkakainoanive mamo syonaeyo tavono raiji,
indamu syo Nya ayao obo raijaro matuve.
102
Winya anaparatote mamo idapaya ra ntami jewen,
weye Winyirati Nyo rinanyao rai.
103
Wakoe! Nya ananyao mamo manavan dave no rinaunane rai,
ama manavane mo anyaune ama poke rakivan.
104
Nya anaparatote wemirati mo rinanyao ti syo kove, kakai raen,
weti ana raveti musyo marambe mamo syonaeyo rai.
105
Amisy, Nya ayao mi mbe yawaimbe inawanto rije rai,
muno mbar irati sya unanui rai.
106
Nya anaparatote mamo moyar,
weti syurairive patimuve, syare syo raijaro matuve.
107
Sya AMISY, risiuri rave,
syare Nyo kovo wanyine raugav akare rinai mamaisyo Nya urairi rai.
108
AMISY, syare winanayanambe sya kangkaman idaura ore so rai,
omamo maisyare anakotaro rameseo Nai ramaisy,
muno syare Nyo rinanyao irati Nya anaparatote rai.
109
Risya kove somamo ito no wene ama usye rai to, weti kavintare kakai,
weramu Nya anaparatote mamo inanimari raije ramu.
110
Vatano mamune wo avirije ratugar mo inaman,
weramu risyamo susyo marambe Nya anaparatote rai ramu.
111
Nya ananyao wemirati romano sya ura raija ntoa nuge nuganui,
omirati mo anayanambe raugavere inanuga so rai.
112
Inanuga so ama mbeke dave mamo ritavono Nya anaparatote rai,
ntoa sya matam akarije rai.
113
Vatano anuga mbe jirumbe pamo syonaeyo ai,
yara Nya anaparatote obo mirati inanuga no rai.
114
Winyirati rikokaibe no nanem ate rai indamu wino rinaora,
maisyare naite apa vakane wemaisy,
muno risyamo inanaveano Nya ayao obo ramen.
115
Inya, vatano mamune weap, wata ramu wagwaravainyo rinai,
indamu syo sya Amisye Apa ananyao obo raijaro matuve.
116
Rinanaveano winamen, weti vemo naneme mpaya rinai mo risamane nora,
yara Nyo sopambe rinai mamaisyo Nya urairi rai indamu rijayaisy tutir.
117
Nyo sopambe rinai indamu ripaya irati marova aneme rai,
weti Nya anaparatote mamo ibeke dai tutir.
118
Vatano wusya akirive Nya anaparatote rai nawamo Nyo mavakano marambe,
weye onawamo anapamponae umamaisye jewene naowa.
119
Vatano mamun mine so nawamo Amisye Nyo mansaena maisyare anaingkainyo rauvata,
omi mbewar risyamo inanuga no Nya ananyao obo rai.
120
Risyamo syo Amisye winasyaniv weti inanakea uga nsayae,
rinanuga so ntutar dave irati Nya mangke ndaugaje rai.
121
Risyamo syo ana mamaisye muno moyare obo rave to,
weti vemo Nyo rinaunanto vatano maneme nsoowate mai jinya.
122
Risyamo syanapatambe Nai,
weti syare Nyo urairive rinai paep, nyare Winyi Nyo rinakum ti rikov,
vemo winaneme mpaya rinai mo vatano mararine wo rinataka doyadi nora.
123
Risyo winanyuto Nyo inapaya kakai rai raija marudi ti inami njoram to,
risyo Nya urairijo ngkov dave ratunao Nyo ravera mamaisyo rinaiji.
124
Risyamo syanapatambe Nai,
syare wimbekobe irati rinai mamaisyo Nya muinyo no tawane rai,
muno Nyo rinanyao irati Nya anaparatote rai.
125
Risyamo syanapatambe Nai,
syare Nyo sya ana datantona raneka
indamu rinanto Nya ananyao rai, wirati syo raen tugaive.
126
AMISY, masyote ndea mamai to, weti syare winseo Nyo mangke rapatimu!
Weye vatane wo Nya anaparatote rakanyoandi.
127
Risyamo inanuga nto Nya ananyao rai,
mo rinanuga nto emasi rai rakivan,
tugae, mo inanuga nto emasi kakui rai rakivan dave.
128
Wemirati mbewar ritavondi Nya anaparatote rai inanuga nsarokire rai,
muno ana raveti musyo marambe mamo syonaeyo rai.
129
Nya ananyao mbe anaanibe rave,
wemi mbewar ribeto rai mavabe.
130
Nya ayao mamo ranivara ama ine raura kakavimbe, weamo mo vare raunande reansai,
muno mo ana ratantona ngkove raugavo vatano wananepabe mai.
131
Inawa so ntavaeya no muno inanawayo ntove,
weye inanuga ntove rave Nya ananyao rai.
132
Syare namumbe de rinai, muno naemeno rinai,
maisyare wimbekobe vatano mansanuga no Winai maive wemaisy.
133
Syare Nyo rinaugavo sya unanui syanya rai, mamaisyo Nya urairi rai,
vemo winaneme mpaya rinai mo ayao kakai mbe akarive rinai nora.
134
Syare Nyo rinapaya irati vatano wo rinatawanto mai,
indamu syo Nya anaparatote raijaro matuve.
135
Risyamo syanapatambe Nai, syare Nya kove mbaro rinai,
muno Nyo rinanyao irati Nya anaparatote rai.
136
Inami ngkaru so njam maisyare mana we,
weye vatane ubeto Nya anaparatote rai jewen.
137
Sya AMISY, Winyirati moyar,
muno Nya ana ndapatimu mamo mamai dave.
138
Nya ananyao Nyo raugaje omirati moyar,
muno mamai dave ti anave rai.
139
Sya pari mo rinantutup dave,
weye sya marova manimari irati Nya ayao rai.
140
Nya urairi wemi ntindimu muno anave rai,
weti risy, Nya vatano syanapatambe Nai, rinanuga no rai.
141
Risyamo vatano sya tame maje muno vatane wo inaura tantunawi,
weramu Nya anaparatote mamo inanimari rai ramu.
142
Winyamo moyar muno Nya moyare ntoa nuge nuganui,
muno Nya anaparatote omamo ayao tugae.
143
Anakotaro nsosobe muno mangke mo inakikipi,
weramu Nya ananyao wemi mo anayanambe raugavo inanuga so rai.
144
Nya ananyao mamo moyar ntoa nuge nuganui,
syare Nyo inaveramu inanto rai indamu rijayaisy tutir.
145
Sya AMISY, rinanuga ntenami syo winawain,
syare Nyo sya ana danajo ravera mamaisyo rinai,
weamo ibeto irati Nya anaparatote rai.
146
Syo winawain syare Nyo rinapaya irati kakai rai,
indamu syo Nya ananyao raijaro matuve.
147
Ribeseo awatan ngkobe, syo winanonae indamu naemeno rinai,
risyamo inanaveano Nya ayao obo ramen.
148
Namane mamo riniki jewen,
indamu syo Nya urairi ratantonave tutir.
149
Sya AMISY, syare Nyo sya ana danajo ore so raraniv mamaisyo Nya muinyo no tawane rai,
syare Nyo kovo wanyine raugakare rinai mamaisyo Nya patimu moyare rai.
150
Vatano wo kakai ratantona rinai wo inawatana wararai jirati rinai to,
onawamo ugwaravainyo Winai, ubeta Nya anaparatote rai jewen bayave.
151
Weramu sya AMISY, Winyamo nyararai jirati rinai rave,
muno Nya ananyao mainyamo ayao tugae.
152
Nya ananyao mainyamo Nyo raveti no tawana nuge nuganui,
omamo syo raeno rai no arono wusyinoe.
153
Sya Amisy, syare Nyo sya siurije so raen muno Nyo rapaya rinai,
weye risyamo inanimarijo Nya anaparatote rai jewen.
154
Sya Amisy, syare Nyo marimbe rinai muno Nyo inapaya irati sya marova mai,
syare Nyo kovo wanyine raugakare rinai mamaisyo Nya urairi rai.
155
Vatano mamune nanawamo Nyo mapaya kakaije rai ramu,
weye onawamo ubekero Nya anaparatote rai jewen.
156
Sya AMISY, winaemeno rinai mamo manakoe rave,
syare Nyo kovo wanyine raugakare rinai mamaisyo Nya patimu moyare rai.
157
Vatano umarovave rinai muno wo rinawatane wanui rave,
weramu risyamo syusyo marambe Nya ananyao rai ramu.
158
Syo vatano ubeta Amisye Winai jakato jewene mansaenamo inanuga mamuno mansai rave,
weye onawamo utavono Nya ananyao rai jakato ramu.
159
Sya AMISY, syare Nyo rinaen, risyamo inanuga no Nya anaparatote rai rave,
syare Nyo kovo wanyine raugakare rinai mamaisyo Nya muinyo no tawane rai.
160
Nya ayao mainy tenambe omamo tugae,
muno Nya ana ndapatimu moyare mamo no tawana ntoa nuge nuganui.
161
Akari akokoe wo rinawatan bayave ayao mamaisye jewene rai,
weramu Nya ayao bo mi syo rasyaniv.
162
Inananibe irati Nya urairije rai,
maisyare vatano ananibe romano po raugav no marova rai wemaisy.
163
Risyamo syonae daveo ayao aarurijate rai,
yara Nya anaparatote obo mirati inanuga no rai.
164
Masyote intabo rikangkamambe Naije kaururum,
weye Nya patimu mamo moyar dave.
165
Vatano manuga no Nya anaparatote rai nawamo una irati kovo saumane rai,
unanta irati ana nsosobe inta rai jewen.
166
Sya AMISY, syo winanyuto Nyo inapaya irati kakai raiji,
muno Nya ananyao mamo ibeto irati rai.
167
Nya ananyao omirati syo raijaro matuve,
muno inanuga no rai rave.
168
Nya anaparatote muno Nya ananyao mamo syo raijaro matuve,
weye sya ana dave mainy tenambe, omamo Nyo raen to.
169
Sya AMISY, syare sya ana idawaine so more no Winui:
syare Nyo ana ratantona ngkove raude rinai mamaisyo Nya ayao rai.
170
Syare sya ana idanajo so more no Winui:
Nyo inapaya kakai rai, mamaisyo Nya urairi rai.
171
Koveamo inawa so mpaato kangkamane bo raijo Winai tutir,
weye Nyo rinanyao irati Nya anaparatote rai.
172
Koveamo inaunane so ngkiny irati Nya urairije rai,
weye Nya ananyao mainy tenambe, omamo moyar dave.
173
Syare Nyo rinasopan irati naneme rai,
weye Nya anaparatote mirati syo patimu rave ritavondi rai.
174
Sya AMISY, ribeke dave syare Nyo rinapaya irati kakai rai,
muno Nya anaparatote mirati mo anayanambe raugavo rinanuga so rai.
175
Koveamo Nyo inayaranande indamu rijayaisy tutir, wirati rikangkamambe Nai,
muno Nya anaparatote omirati mo sopambe rinai.
176
Risyamo vatano syanapatambe Nai, weramu syusyo marambe to,
maisyare domba aumandi wemaisy.
Weti sya Amisy, syare winde Nyo rinakani,
weye Nya ananyao mamo rinanimarijo rai ramu.
Powered by Seed Bible API
expand_more
Search
All books
Old Testament
New Testament
chevron_left
Previous Chapter
Books
search
Search
explore
Discover
share
Share
chevron_right
Next Chapter