1AMISY, reama tame mamo mamaisyo raijaseo titive jewen,yara Winya tame omirati mamaisyo raijaseo titive,weye Winya muinye no tawan muno winteto Nya urairije rai tutir.2Veanimaibe susye kotare wo reansaura ware:‘‘Weapamo wapa Amisye noa e?’’3Wama Amisye opamo no ivae, no no Manunggara,muno anakotar tenambe beker pare Po rave, omamo Po rave kobe ti mamaisy.4Yara awa yare omainyamo wo emasije muno peraki veano ranari,muno taune wo ranarijo mansaneme rai.5Awa yare mamo mawa no mai, weramu wayaove kakai,mamije no mai, weramu wo nuge raene jewen.6Mamarikoame no mai, weramu wo ana ranaune ramu,muno mansatume no mai, weramu wo ana ranu jewen.7Maneme no mai, weramu ana raijare omamo wo ranaune jewen,muno majoe no mai, weramu taune wanya kakai,muno mansanamote inta ngkin no awa isyisye jewen tavon.8Vatano wo yare ranari muno vatano wanave rai,wenawamo indati awa vambunine meweno mai maisyare awa yare ramaisy.9Inya, Israel, wapanaveo AMISY Ai!Wepi Po wasayaranande Apa vambunine rai muno darino wasaoramaisyare naite apa vakano po raijaro aora ramaisy.10Inya, syeno Harun apa susye weap, wapanaveo AMISY Ai!Wepi Po wasayaranande Apa vambunine rai muno darino wasaoramaisyare naite apa vakano po raijaro aora ramaisy.11Inya, vatan tenambe wapo AMISY asyanive weap, wapanaveo Ai!Wepi Po wasayaranande Apa vambunine rai muno darino wasaoramaisyare naite apa vakano po raijaro aora ramaisy.12AMISY Opirati aemeno wansai, muno indati Po kove raugaje wansai:Opirati indati Po kove raugaje kawasae Israel wansai,Opirati indati Po kove raugaje syeno Harun apa susye mansai tenambe.13AMISY indati Po kove raugaje vatano wo asyanive mansai,umba vatano awa tame ntiti mansai muno awa tame ntiti jewene mansai tenambe.14Syare AMISY Po kovo manakoe raugaje wasai,muno nde irati wapa susyo wadampame mai.15Syare AMISY Po kove raugaje wasai,Opirati Po naume muno mine so ranarijo ama anakotare rautan tenambe.16Naume omamo AMISY apave rai,yara munije so, wemi Po raugaje vatane wansai.17Vatano ugwenene wenawirati wo AMISY ararimbea jewen,vatano nanawirati wasya no aipapo rai nawamo anamainitu mai vayave.18Yara wamirati ta wangkov, wamirati wangkangkamambe Ai tutir,unumeso muno ntoa nuge nuganui.AMISY ararimbe!