1AMISY ararimbe!Kove raura seo irati AMISY Ai, weye Wepi kov dave!Apa muinyo no tawane mamo ntoa nuge nuganui.2Vatane inta mamaisyo po AMISY Apa ana dave makokoive ratore kakai,muno bambunin da kangkamambe Ai ti mamai dave jewen.3Kove ngkov irati vatano are nawirati utavondi moyare raije mai,muno awa ana udave mamaisyo Amisye Apa ananyao rai.4Sya AMISY, naemeno rinai tavon arono wimbekobe irati Nya kawasae mai,muno arono Nyo mapaya awa marova mai, syare Nyo rinapaya tavon.5Ribeker syare syo Nya kovo no irati vatano Nyo matayao maije raen;syare ritavondi Nya kawasae mananibe matavon;syare syo nararimbe tavon irati Nya vatano Winya ura terave mai matavon.6Reamo ayao kakai rave tavon to, maisyare reama anene mansamaisy,reama ana ndave musyo marambe, reama ana ndave ngkakainoanive.7Arono reama anene una no Mesir,anainamo Amisy Nyo rarorone mamo wo ratantona kobe jewen.Wenawamo uparandeno Nya muinyo manakoe no tawane rai,muno no Mayano Kolsum ama tuga, wonae ubeta Amisy Ntiti rave Winai.8Weramu Po mapaya irati ana nsosobe ama uga rai, wirati Apa tame raijaseo titive,indamu Po Apa vambunino manakoe raroron kakavimbe.9Amisye soowato Mayano Kolsum rai, weti mparikisy,umba Po Apa kawasae maugav ti wanya mayane ama yasyine raito maisyare wanya no anoko kanene rai wemaisy.10Maisyare omaisy, Po mapaya irati vatano manuga mamuno mai maneme rai,muno Po mapaya irati vambunino marova rai.11Awa marova nanawamo mayane mo matatuv asyo,weti vatane inta kov akatoe ramu.12Arono naije umba vatano Israel wanave Amisy Apa ayao rai,umba ukinyo ransyeran kangkamane raijo Amisye Ai.13Weramu nugoenta jewen manimari akato irati Amisye Apa anakotaro dave rai,muno matawandi wo Apa ananyao raranive jewen.14Umba nai anoko kanen, manuga wisyisy ntipu mai,muno wo Amisye atopan no we.15Po awa ana wo ranajo raunande mai,weramu Po wanene raunande irati mai tavon.16Arono una no anoko kanen, manuga mamuno Musa ai,muno Harun ai tavon, vatano AMISY Po atayao terave indamu be syembe.17Wetiva kopa mporar mo Datan aunto,muno mo Abirama pe apa arakove nanawe matatuv tenambe.18Amisye Po tanamo mbadurure raugaje vatano kaijo utavondi maije mai,mo vatano mamune manen ti mangkur.19Nai unato Sinai, wo emasi ranari sapi tuvane rainyi,umba ubeaje yaro emasi umaso rai.20Wo awa Amisy Wepi titi rave apaya vayave,yara wo anigwano yaro sapi po insumai raisye obo ai.21Manimari irati Amisy Ai, Wepi rati Po mapaya awa ana nsosobe maije rai,napirati Apa ana dave makokoive rarorono mai no Mesir wep.22Tugae, Po anapaporainye rave no munijo Ham,Apa anainamo mbe anaanibe no Mayano Kolsum ama tuga rai.23Weti Amisye Po raura pare Po Apa kawasae umaso mao,weramu Musa, vatano Amisye Po atayao terave amarome so, teto yasyimbe mai,weti umba po Amisye Apa parije umaso rapamo.24Umba ware wonae munijo ngkov dave raurairive mai we rai,weye wanave Amisye Apa urairije we rai akato jewen.25Wenawamo wo nuge rapanan no awa randumo utantuna ri,muno wonae wo AMISY Apa ayao raranivi.26Weti Po urairive panaamatambe,pare Po mansao bintabo no anoko kanen,27umba Po awa arikainye, ajavije mampusyek ti uta na susye kotare marijat,muno uta una muni kaije raito.28Umba nai Peor ubeaje irati yaro Baal rai,muno wo anaisyo rameseo vatano ugwenene maije raisy tavon.29Awa ana udave taije maisye mo AMISY aveti pari mai rave,weti Po waneno mangke raugaje mai.30Weramu Peneas beseo kobe po mangke raugaje vatano yo ayao kakai rave yai,weti umba Amisye Po waneno mangke umaso ransopi.31Muno Peneas apa ana dave umasom Amisye Po raen pare omamo mamai no Amune rai,weti vatano Israel maemendi rai tutira ntoa nugoenta.32Nai mana ami Meriba rai vatano Israel wo AMISY aveti pari mai,awa ana wo rave mbewar ana nsosobe nande Musa ai.33Weye wo Musa aveti anuga mamuno mai,weti po ayao kove jewene rator.34AMISY Po Apa ananyao raugaje Israel mai, pare wo susye kotaro una no Kanaan maubaisy.Weramu wo maubaisye ramu,35yara uta maijaro matavon,muno utavondi awa ana udave rai tavon kobe.36Vatano Israel ubeaje irati susye kotare umaso awa yare rai,wemirati mo matopan weti makirive Amisye Ai.37Muno wo awa arikainyo anya muno wanya mansaotar,wo mansamer nanto irati anawayo kakai mai.38Wo vatano ayao kakaije meweno maije awa mavu raveti nsopat,omamo taune awa arikainyo anya muno wanya nanawirati wo maotare awa mavu mije,indamu wo ramer nanto irati vatano Kanaan awa yare mai.Weti wo munijo we raveti nggwambe irati mavuge rai.39Awa ana wo rave taije maisye mo maveti ugwambe no Amisye Amune rai,muno makirive Ai jirati awa ana udaveti ngkakainoanive rai.40Weti AMISY pari mangkebe irati Apa kawasae Israel mai,muno anuga mamuno Apa vatano Po matayao terave amarome mai.41Weti Po maunanto irati susye kotaro wanave jewene maneme rai,indamu vatano manuga mamuno Israel mai ube akarive irati mai.42Umba awa marova wo matawanto,muno wo mapinaje no manem ate rai.43Amisye Po Israel mapaya ana nsosobe maije rai mamo manui to,weramu wenawamo wo patimu rave ware wonae wo aranivi,weti awa ayao kakai mbewar Amisye Po mapaya ti utataopon.44Weramu AMISY Po mansaen arono una ana nsosobe ama uga rai,Po mansanaun arono wo awain.45Opamo aemendi Apa urairijo Po raokaisy nanto irati maije rai,muno aemeno mai mamaisyo Apa muinyo manakoe no tawane rai.46Po maveti awa marova ubekobe mai,nanawirati wo maijaro arove nanao.47AMISY, reama Amisy, reamare Nyo reansapaya irati reama marova aneme rai jakato,reamare Nyo reansanugan akare susye kotaro wanave jewene maora.Indamu reamo Nya tamo ndandinite rawain,reamo kove raura seo Nai muno reamo nararimbe.48AMISY ararimbe, Wepirati Amisy vatano Israel ubeaje Ai,nai nugo pitawar ntoa nuge nuganui.Muno syare vatan tenambe wo raura ware: ‘‘Tugae!’’AMISY ararimbe!