Rɔmɛn10yre_wbt

1'An "bʋɩ Zozinɔn, 'an 'nanman wɩ a -tʋwli, ɛn 'wɩ nɛn maan laabo Bali lɔ Zuif 'nɔn 'le vɛ -a bɛ e ya -tʋwli. 'Wɩ zɩɛ -nyrɛn 'nan Bali 'e Zuif 'nɔn 'si 'wɩ 'ji.2'Wɩ 'kpa, maan ve o man 'nan, o ya 'o kɔaladɩ Bali man 'kpa tɩglɩ. 'Pian wa'a 'wɩ 'tɔdɩ paa "va "dɩ.3Kɔɔ 'wɩ nɛn Bali -a drɛ 'nan -e 'e blamin 'sia min tɩglɩ 'a 'e 'lɛ bɛ, wɛɛ -fɔla 'o "trɔɛn -sru. 'Wɩ zɩɛ wa'a -ci maan "fo "dɩ, ɛn waa -wɛɛman tian 'nan 'o dra 'o 'bɔ 'le 'plɛblɛ 'a -e 'o -kɔn min tɩglɩ 'a Bali 'lɛ.4'Pian -kaa -tɔa 'nan, 'ta wʋladɩ -pei -tɔ wɩnun da -e Bali 'e min 'sia min tɩglɩ 'a 'e 'lɛ bɛ, Crizi -a yi -ka. E Bali -le -pei -tɔ wɩnun 'lɛ sɔɔ, -yee "wɛan 'bɛ nɛn 'gʋɛ, yi -tɛradɩ Crizi 'bɔ da man nɛn Bali min "siala 'e 'lɛ min tɩglɩ 'a.5'Wɩ nɛn Moizi -a 'vɩ bɛ, 'ka 'ci "nrɔn "da "tʋ! 'Ta wʋladɩ -pei -tɔ wɩnun da -e Bali 'e min 'sia min tɩglɩ 'a 'e 'lɛ bɛ, Moizi -a 'wɩ crɛn -tɛ. Yaa crɛn -tɛ 'nan:«Min nɛn e 'ta 'wʋla -pei -tɔ wɩnun da,ɛn ya'a -a -tʋwli "cɛ "srɛlɛ dɩɛ,e 'belidɩ ye.»6Ɛn min -tʋdʋ pɛɛnɔn nɛn Bali o 'sia 'e 'lɛ min tɩglɩ 'a 'wee yi -tɛradɩ 'e da man bɛ, -wee vɛ a "yi. Kɔɔ Moizi -a crɛn -tɛ "nyian 'nan:«Te 'i 'ci "nrɔn 'nan,-tɩɛ -taa "kʋlɛ laji-e 'e 'ta min 'sizan 'wɩ 'ji -a dɩ?»7«Ɛn te 'i 'ci "nrɔn "nyian 'nan,-tɩɛ -taa "kʋlɛ -yremo fla-e 'e min 'sizan 'wɩ 'ji wluan -kanɔn 'va dɩ?»8'Pian -wee vɛ nɛn 'gʋ. E ya 'e 'crɛn -tɛdɩ 'nan:«Bali wei a 'e -plidɩ 'ka man -kogo.E ya 'ka 'bɔ 'le,ɛn e ya 'ka souba ji.»'Wɩ zɩɛ e ya yi -tɛradɩ Bali da 'wɩ nɛn kʋa ve 'cɛɛ bɛ -a.9-Nyrɛn 'nan, min oo min nɛn yaa ve 'e 'le 'nan, Zozi a Minsan -a, ɛn e yi -tɛala "da 'nan, Bali -a wluan -kanɔn 'va bɛ, min zɩɛ Bali -taa -a 'silɛ 'wɩ 'ji.10Kɔɔ -te min yi -tɛala Crizi da 'e 'bli pɛɛnɔn 'a, ɛn yaa ve 'e 'le 'nan, -yɛɛ cɩ Minsan -a bɛ, min zɩɛ Bali -taa -a 'silɛa min tɩglɩ 'a 'e 'lɛ, ɛn yaa "sia 'wɩ 'ji.11'Wɩ zɩɛ e ya 'e 'crɛn -tɛdɩ Bali -le 'fluba 'ji. Kɔɔ e ya 'e 'crɛn -tɛdɩ 'nan:«Min oo min nɛne yi -tɛra Minsan da bɛ,-a -pɛ 'ka 'sɛanla 'e "tun "dɩ.»12'Wɩ nɛn 'e 'crɛn -tɛdɩ zɩɛ e ya blamin -tʋdʋ pɛɛnɔn 'le vɛ -a. -Te min a Zuif min -a oo, ɛn -te min a 'lɛglɔn 'pee -ji min -a oo, o san a -tʋwli. Ɛn e "yi "dra min -tʋdʋ pɛɛnɔn nɛn waa trʋ "baa bɛ -wlɛ.13Kɔɔ e ya 'e 'crɛn -tɛdɩ 'nan:«Min oo min nɛne Minsan trʋ "baa bɛ,Bali -taa -a 'silɛ 'wɩ 'ji.»

Izraɛl 'nɔn 'le toba wei "ka "dɩ

14-Kaa -tɔa 'nan, -te minnun 'ka yi tɛala Minsan da dɩɛ, wa'a -kɔlaman -e 'o trʋ 'ba dɩ. Ɛn -te minnun 'ka Minsan -le 'wɩ manlɛ dɩɛ, wa'a -kɔlaman -e 'o yi -tɛra "da "dɩ. Ɛn -kaa -tɔa "nyian 'nan, -te min 'ka Minsan -le 'wɩ vɩlɛ minnun lɛ dɩɛ, wa'a -kɔlaman -e 'o man dɩ.15Ɛn min -tʋ "ka -e 'e Minsan -le 'wɩ vɩ minnun lɛ, te Minsan 'ka -a 'palɛ -sia dɩ. 'Pian 'wɩ zɩɛ Bali -a drɛ Izraɛl 'nɔn "le "lɛ. 'Wɩ nɛn 'e 'crɛn -tɛdɩ Bali -le 'fluba 'ji 'e 'cɛn bɛ, -a da wɩ 'bɛ drɛ -wee vɛ -a. Kɔɔ e ya 'e 'crɛn -tɛdɩ 'nan:«E drɛ 'wɩ "yi "a,ɛn minnun nɛno 'wɩ 'nɔnnɔn ve bɛ o -ta.»16'Pian Izraɛl 'nɔn "kaga 'ka 'ta wʋlɛa 'wɩ 'nɔnnɔn zɩɛ -a da dɩ. 'Wɩ 'bɔ nɛn waa drɛ zɩɛ Bali 'lewei vɩzan Ezai nɛn 'li bɛ yaa 'vɩ -a -nan 'mɔn. Kɔɔ yaa crɛn -tɛ Bali -le 'fluba 'ji 'nan:«Minsan, min "kaga 'ka yi -tɛlɛa 'yie 'wɩ nɛnkʋa 'vɩ bɛ -a da dɩ.»17Maan ve 'cɛɛ 'nan, yi -tɛradɩ Bali da bɛ -a pou 'sia 'wɩ nɛn min -a maan "bɛ -a va. Ɛn 'wɩ zɩɛ 'wɩ 'pee "cɛɛ dɩ, Crizi -le 'wɩ nɛn.18-Yee "wɛan maan laabo "mɛn 'nan, 'wɩ zɩɛ -a 'bɔ nɛn Izraɛl 'nɔn 'ka "o "manlɛ dʋʋ? -Cɛjɛ, -njɛɛ dɩ. Waa 'man -goezee. Kɔɔ e ya 'e 'crɛn -tɛdɩ Bali -le 'fluba 'ji 'nan:«Minsan -le 'pasianɔn 'kʋ'trɛda fɛ pɛɛnɔn 'nan,ɛn o wei fuilaman 'trɛda "fo.»19-Te 'bɛ "cɛɛ dɩɛ, 'wɩ nɛn waa 'man bɛ -a 'bɔ nɛn wa'a -ci manlɛ dʋʋ? -Cɛjɛ, -njɛɛ dɩ. Waa -ci 'man -goezee. Moizi -wee 'wɩ 'vɩ 'e 'cɛn. Kɔɔ yaa crɛn -tɛ o man 'nan:«Bali "e 'nan,an -taa -a drɛlɛ-e 'ka man bʋ minnun nɛnwa'a 'kɔan paan 'mɛn minnun -a dɩɛ o va.Ɛn an -taa 'bli 'fɔlɛ 'ka 'ji minnun nɛnwa'a paan 'an 'tɔa dɩɛ o man.»20Ɛn Ezai "e 'wɩ zɩɛ -a 'vɩ "nyian. Kɔɔ yaa crɛn -tɛ 'nan:«Bali "e 'nan,minnun nɛn o 'ka paan 'an -wɛɛnan dɩɛ waan 'yɩ.Ɛn minnun nɛnwa'a -wɛɛlɛ paan 'nan'waan -tɔa "dɩɛ,'an 'fli kɔɔn -wlɛ.»21'Pian Ezai -a 'vɩ Izraɛl 'nɔn 'le vɛ -a 'nan:«Bali "e 'nan,'an 'pɛ -fʋ 'e 'sʋdɩ "ji minnun nɛno "trɔɛn "yuyu "taan,te waan wei fuimlan 'nan bɛ -wlɛ.»
expand_more
Search