Read RUKANU 8

RUKANU8yrb_tbl

Yesuini anebita awetabo

¹Mui kowaro Yesuma Godinu yawotasu orofa kobere sina we inarebi. Danu uwara tueroini (12) Dawaini anitaro Yesuma seitaninu moana siosa imumu bobo ofe woureta ma wiroi awetabo Dawaini anita. Moana awetabonu ifuna eno, Meri, Maderini waita aweta. Yesuma i awetanu neno ubareroma seitaninu siosa imumu nesia seweni (7) we yowerite i aweta ma wiroi.³I awetaini Jusanu aweta Joana, danu awerana Erodinu mui botai mameta amara. I awetaini Susanaini moana awetabo faiyawere anitate Yesuini Danu iwata ueta uwaraba ietaini oi matebita.

I yo saneta amaraba wei kasei sina

⁴Su su uwara faiyawere guruguru utaro Yesuma emaba kasei sinaroma we mawetu uteda eno wei, mui amarama yo waifie waiyaro ani. Ane farite jiru turi. Jiru turi me sinite yo mune sane inarebi. Yo sanebiro moana yo dabaro itataro emema deiro amune adire inarebitaro gasirama itebita.⁶Moana yo gebirowere sakairo itatate sau waratate nasini awewewerero raraka meba yoie yoie uta.⁷Moana yo sinisini bobo orobu ubarero itatate waratate orobuwereba tai uwanawa uta.⁸Moana yo kobere nasiniro itatate waraegou utate tai faiya faiyawere uwata. Yo demurairaturoma mui tai wani aderedi (100) uwani weite wei, i ome bobo uwara Nanu watane sina nauegou uawe wei.

Yesuma iba kasei sina wei

⁹Danu iwata ueta uwarama Yesuma weita, i kasei sinanu ubina ane ari weita?¹⁰Weitaro Yesuma wei, Godinu ununa ya Danu urero yawotasu kiwu sina naufote iwata ufoe utasute nono Dawa unutawa i uwara Danu urero yawotasu kiwu sina nauetaba iba emaba kasei sina torowa ma borobarasuro nautaita. I sinanu ubi iwawa utaitaba iba eraitate bana erawa. Nauetana nautaitate nautawa utaita wei.

Yesuma i yo saneta amaraba wei kasei sina ma boroyari

¹¹Yesuma eno weite nono wei, i kasei sinanu ubina eno, i yona Godinu sina ari.¹²I dabana Godinu sina nautaita uwara ari. I amarama Godinu sina we inarasuro i dabaro inaibeta uwarama Godinu sina nautaitaro seitanima sau farasute sina daido mune ma imutawa utasu, i uwarama imuotote wiroaotoba.¹³Enanari moana uwarana gebirowere sakairo sani, i ari. Godinu sina nautaitate yaru utaitaro Godinu sinaba awe uyareta farasuro i sina nauegou utawa utaitaba emanu nauetana kobererau me. Kobererau meba iba i sina ekodaita.¹⁴Moana uwara emana orobuwere orofa ariba Godinu sia nautaitate aika maika imutaitate emanu unu ibaiabai munaitate emanu unu nesia utaitate i sinanu daba garari utaitaba kobererau uegou utawa utaita.¹⁵Moana uwara emana i yonu itarebasu kobere nasini ari. Godinu sina nautaitate emanu kobere nenoma imuegou uteda kobere sina wegou utaitate kobererau uegou utaitaro emema eraita, Yesuma eno wei.

Okia wowonaro nanefa

¹⁶Yesuma nono eno wei, nanefa mune beafote okiama wotutu ufoita aba warafa wowonaro feare odifoita? Eno ufoita? Me, eno da ufoita. Nanefa mune beafote aiyo oeta kabesiro odiforo eregou ufitaita wei.¹⁷Enanari feareta ememetu nesia, imueta ane ane ma borobafite i kiwuma ueta nesia ma borobafite arioro odifiro efitaita wei.¹⁸Ibago i naueta ibaiabai ane ane naufoitana nauegou uawe wei. Anama nauegou ufisuna mui naueta mafisu. I naueta derawere bobo amaraba mui naueta mafite i deramiratu imutasu amarama we imutasu, nanu nauetana ido we imutasuna danu naueta kikiratu ma dare mubisu wei.

Yesunu danuaini Danu dabuemutu

¹⁹Danu danuaini danu dabuemutuini Yesubai anibitae fata. Fatate uwara faiyawere guruguru ubitaba Yesubai ane farawa uta.²⁰Ane farawa utaba moana uwarama Yesuba weita, Anu anuaini abuemutuini A efitae ido faritate wawaro inaibinita weita.²¹Weitaro Yesuma emaba wei, Nanu bayaini Nanu naburetana Godinu sina nauteda utaita uwara ido eawe wei.

Yesuma i enea ufe bana wei

²²Mui kowaro Yesuini Danu iwata ueta uwaraini boutiro amutaro Yesuma wei, mesau etarafu yofefe wei. Weiba enanari anebita.²³Anebitana Yesu nauta ainibiro oyau derawere fari. Oyau fariba ufe uyariro bouti inufie uiba uifitae uta.²⁴I uwarama Yesu ma uyatate weita, Dera Waria Amara, ya uifene utaisi weita. Weitaro Yesuma diti forateda yare yaurite oyauini ufeba bunawere bana weina oyauini ufeini ido me sinite binono sani.²⁵Yesuma Danu uwaraba wei, Na imuegou utaita aba me? Yanu imueta aboro wei? Eno weiro iyareda neno kirifu utate we mataneda weita, ewa amara abo amararo oyauini ogoini Danu sina nauita weita.

Yesu seitaninu mui imumu siosama rewoeta bobo amara ma wiroi

²⁶Gerasi orofa, mesau etarafu iro ane inata. Gareri orofa mui afu, Gerasi orofa mui afu, mesau abanaro ibi.²⁷Gerasi orofaro ane inataro Yesuma maguaro itarina mui Gadara suro seitaninu moana imumu siosama rewoeta bobo amarama Yesu ido atani. I amara kowa faiyawere wadia barutawa ofe torowa inareda suro ainawa uri oeta gebiro eraboro ainebi. (I seitaninu moana siosa imumuma i amarabai kowa faiyawere ure bonoibiba uwarama i amaranu buri age senima uwane tarita. Eno utaro i amarama aiyoni ma furiariro seitaninu mui siosa imumuma dawa ma berairo yaowere orofaro ani). I amarama Yesubai arebina auboko Yesuma seitaninu mui siosa imumuba ania webina i amarama Yesu ereda Yesunu buri gigirariro arubi uite sina derawere wei, Yesu dera urero ibinu Godinu Amara, kodiate na fanisi da ma wei.³⁰Yesuma i amaranu ifu wenaueriro seitaninu imumu siosa faiyawere i amaranu nenoro itataba i amarama wei, nanu ifuna fefera wei.³¹Weiro seitaninu moana siosa imumuma Yesuba weita, i siosa kabesiro ya siaia da ua weita.³²Weitana borosiri faiyawere i maidaniro ieta gusuna ue itebitaro etate Yesubai nui weita, yanu ununa i borosirinu ubarero anibene waisi weitaro Yesuma wei, aniawego wei.³³Weiba i seitaninu moana siosa imumu i amaranu nenoroma amo fatate anitate i borosirinu ubarero itata. eno utaba i borosiri nesia durami ue anitate maidaniroma mesauro bibu utate imuie me sita.³⁴I borosiri yawoeta uwarama nesia etate suro durami ue anedana i sina weitaro i nesia nauta.³⁵Su uwarama i ueta nesia efitae anita. Ane Yesubai fatana seitaninu moana siosa imumuma ekoita amara, dawa beforo kobererau uiro wadia yuriro wadia bobo yaubiro etate iyata.³⁶I ereta uwarama seitaninu moana siosa imumuini boronu ueta nesia etate i reka fata uwaraba nesia weitaro nauta.³⁷I Gerasi uwara nesia iya derawere uyatate Yesuba weita, yanu orofa kodiate ania weitaba Yesuma boutiro anibie amui.³⁸Amuina i siosa imumu me sini amarama wei, naini anibu. Weina Yesuma me weite wei, anu suro aniate Godinu aba dera neno arama ueta nesia wiaro naufita wei. Weiro i amarama anite i natofo su uwara nesiabai Yesuma dawaba ane ui sina nesia wei.

Jairasinu arumaini Yesunu wadia burite wiroi aweta

⁴⁰Yesuma owerite Gareri afu nono ane inari. Uwara faiyawere Yesu yawotebitana Yesu ido fariro ario sina weita.⁴¹Mui amara, danu ifuna Jairasi, dawa mui Ju uwaranu dubu su yawoeta amara. Dana Yesubai farite Yesunu buri gigirariro arubi ui.⁴²I amaranu aruma demuraina uifie utebiba iba Yesubai farite wei, nanu suro ara wei. Weiba Yesu ido ani. Anebina uwara faiyawere Dawabai deiro deiro ue anita.⁴³Mui awetaini ani. I aweta ofe derawere woureda oya tuero (12) onono munebi. Oya tuero (12) onono munedaba dogetabai inarebe danu oi sane me siniro wirotawa ui.⁴⁴I awetama Yesunu dubena afu farite Danu wadia burina onono ido didi turi.⁴⁵Enoba Yesuma wei, anama Na burisinu wei? Weina i uwara nesia ya me weita. Eno weitaro Fitama wei, Dera Waria Amara, uwara faiyawere Abai deiro deiro utaita ea wei.⁴⁶Weiro Yesuma wei, anama Na burisinu ari. Nanu buna Nabairoma dawabai ainuro Na iwata utatane wei.⁴⁷Eno weiba i awetama we imui, Dawa iwata utasu we imuite iya derawere uyarite iwura mameda Yesubai farite arubi uteda danu ofe woureta sina i uwaraba weite wei, nana Dawa burinena na onono ido didi turinuro wirone wei.⁴⁸Eno weiro Yesuma wei, aruma anu naueta derawereba wirosinu. Aniate merau ibia wei.⁴⁹Yesuma eno webina mui amarama Jairasinu suroma emabai farite Jairasiba wei, anu aruma uisinu. Uisinua tisa amarabai woroworo sina da wia wei.⁵⁰Weiro Yesuma nauite Jairasiba wei, iya da uyate imuegou uaro wirofi wei.⁵¹Suro ane fataro Yesuma i uwara nesia kodite Fitaini Jonini Jeimisini i arumanu danua damamaini suro woure amui.⁵²Amuina suro yaubita uwarama sorara utaro nauite wei, i da wiawe. I aruma me siniro iwata utate iba yo weita.⁵³Eno weiba i uwarama yo weita. I aruma me siniro iwata utate iba yo weita.⁵⁴Yesuma i arumanu agero munite ma uyareda wei, arumaratu, uya wei.⁵⁵Weina i daisinono ui aruma ido neno saneda uyari. Yesuma wei, dawaba ieta maro ifi weiro danua damama neno kirifu uta. Yesuma emaba wei, moana uwarabai i sina da wiawe wei.

RUKANU 8 / yrb_tbl