Nlir aSamuwel Aga aParəm1yer_lis

UDawuda fe ikú aShawulu

1Kà̱ nva̱ngva̱ uShawulu kú chit kang uDawuda le chit ka̱ atak nnəm igwan ká̱ oAmalek te, uza̱ təm nra pa̱ mparəm ka̱ aZiklak.2Kà̱ nra ngga nshatɗing te, unəm fa ka̱ apa̱k aShawulu ká̱ ìlukwan ikankan kang ká̱ mɓwang ka̱ ishi wò. Awalang va̱ uza̱ chu atak aDawuda te, uza̱ ru zəp ká̱ afu kà̱ mbin na ô na ichumchum á na.3UDawuda ɓəp na pa̱, <<U fa ka̱ che yà?>> Uza̱ na ama̱n pa̱, <<N chər ka̱ atak apa̱k oIsa̱rila.>>4UDawuda ɓəp na pa̱, <<Iza̱ ka̱ ngga yà? Là á mi.>> Uza̱ na ama̱n pa̱, <<Oshozha chəng chit ka̱ atak ìkum. Mmá gbá̱ng oza̱ pa̱ makmak, kang uShawulu ká̱ uyəyen ununggwan uJonatan kú kpa.>>5UDawuda ɓəp uyen nza̱m va̱ là iya̱m va̱ ta á na pa̱, <<U nəm sang kang u nyi pa̱ uShawulu ká̱ uyəyen ununggwan uJonatan kú yà?>>6UYən nza̱m va̱ ta là á na pa̱, <<Nva̱ngva̱ na ka̱ n yà ka̱ apal aƁam aGilbowa te, n ya uShawulu kà̱ nda̱r izər ka̱ apal aɓár wò, kang oga akeke ipəri okpa ìkukum kà̱ mɓa ndát ká̱ na.7Awalang va̱ uza̱ ga̱ɓa̱n kang uza̱ ya mi te, uza̱ wór mi, kang m ma̱n pa̱, <Mmami nata̱, anəm uga nzhi.>8<<Uza̱ ɓəp mi pa̱, <Mmaɓu uda yà?> <<N là á na pa̱, <Mmami unəm oAmalek.>9<<Te uza̱ là á mi pa̱, <Ɓa dat na u gbá̱l mi, ka̱kul mmami ka̱ ashe izər nrwa pa̱ gənggəng, ǹnyi te, na n yà ká̱ iriri.>10<<Te m ɓa dat kang n gbá̱l na, ka̱kul uza̱ ru chit kang n nyi pa̱ uza̱ i lár ka̱t. Kang n tur atagya iponzhi va̱ ka̱ ishishi ká̱ nkalɓang ngga ìgwal va̱ ka̱ ìgugwal kang m ɓa ká̱ pa̱ chatchat a ɓu, anəm uga nzhi mi.>>11Te uDawuda ká̱ nkpaktak onunggwan va̱ nzəng ká̱ na kpan ilukwan oza̱ kan.12Oza̱ təm ká̱ aɗor kang oza̱ yə́ng pa̱ gənggəng, oza̱ yar ndəng gbà̱l ga chu arurong ka̱kul aShawulu ká̱ uyəyen ununggwan uJonatan, ká̱ oshozha aYawe, ká̱ nzhi aIsa̱rila, ka̱kul oza̱ kú chit ka̱ atak ndokchi.13UDawuda ɓəp uyen nza̱m va̱ ɓa ka̱ nnap-nlà va̱ ta á na pa̱, <<U fa ka̱ che yà?>> Te uza̱ na ama̱n á na pa̱, <<Mmami uɗyanəm, uya anəm uga aAmalek, va ka̱ ntəm ka̱ ashe mbin ɓu á.>>14UDawuda ɓəp na pa̱, <<Iza̱ nak kang u gha̱p awo ɓu u gbá̱l ugargar àYawe ká̱, ayər nəm ɓu ka̱ ka̱t yà?>>15Te uDawuda là ûro ka̱ ashe onunggwan wò pa̱, <<Ga, gbá̱l na.>> Te uza̱ gəl na ka̱ ndokchi kang uza̱ kú.16UDawuda ka̱ là á na chit pa̱, <<Mpyat akat nchə̀r ɓu i təm ka̱ ishiɓu, ka̱kul mmaɓu na ká̱ anung ɓu, u là ka̱ awalang va̱ u là pa̱, <M gbá̱l uva̱ uYawe gar á.> >>

Nnap nshì aDawuda ngga ǹyə́ng ikú ka̱kul aShawulu ká̱ uJonatan

17UDawuda shì ìpyang va̱ ta̱ ka̱kul ikú aShawulu ká̱ uyiyen uJonatan,18kang uza̱ nak pa̱ mmá ɗyang nnap-nshì va̱ ta ônəm oga aYahuda, aɗiɗin pa̱ nnap-nshì ngga ìjang, nna yà ka̱ ashe nlir aJashar.19<<Mmá gbá̱ng onəm oga mpyal ɓu chit áIsa̱rila,oma kú ra ka̱ apal oga aɗuktum wó, oshozha okamkam tak chit.20Kang mmá shet nnap va̱ ta̱ ka̱ aGat ka̱t,ka̱t te mmá là ka̱ apal oga asa̱l aAshəkelon ka̱t.Le kang ovan ochar oFilisti izər á chàng oza̱ ka̱t,le kang ovan ochar onəm oga ache amulur izər á chàng oza̱ ka̱t.21Óga aɓam aGilbowa,re kang ìmimyang á ra, ka̱t te iva̱r a pəng ka̱ apal wó ka̱t,le kang mbin ndopdop wó a na ìpirkur lap ka̱t.Ka̱kul ka̱ta na nggwanggwang ovan onunggwan okamkam mmá vyap kà̱,nggwanggwang aShawulu mí ɓəl mmì a na lap ka̱t.22Ìjang aJonatan iga ngbá̱ng iriri,ndokchi aShawulu ngga ǹya ká̱ aɗor ka̱t.I gbá̱ng oshozha okamkam,i gbá̱ng okpa ìkum.23Mma ma̱n uShawulu ká̱ uJonatan byet,ká̱ irirì oza̱ nzəng, ká̱ ikú oza̱ kap ka̱t.Kang oza̱ gha̱n ji oga nkumangga̱p ji, oza̱ kam ji oga ilir ji.24Óvanɓyen oga aIsa̱rila, ó yə́ng ka̱kul aShawulu,uva mwak oga ilukwan inəna̱n a wó iga mbwai,uva mwak ilukwan iga iya̱m ìsham iga azənariya a wó.25Ovan onunggwan ìkum okamkam tak chit ka̱ atak ìkum.UJonatan ra chit ukúkú ka̱ apal aɗuktum wó.26Mmami ká̱ nlak ìgwak pa̱ gənggəng ka̱kul ɓu agənang mi, uJonatan, m ma̱n ɓu byet.Mma̱n ɓu ka̱ atak mi a yà ka̱ mmàl ka̱t, a ji mma̱n achar ji ká̱ ununggwan.27Ovan onunggwan ìkum okamkam tak chit,oga iya̱m ìkum zhì chit.>>
expand_more
Search