EXODUS15yap_bsm

Tang rok Moses

1Me yin’ Moses nge piyu Israel e re tang ni ba’aray ngak SOMOL:
“Nggu tangnag SOMOL, ya gel nike tay e rib sorok riy;ke yin’ fapi os nge pi’in ni kar afgad nga daken nga maday.2I SOMOL e ir e yoror rog nib gel;Ir fa’anem nike ayuwegneg ni de buch ban’en rog.Ir e Got rog, ma bay u gog e sorok ngak,ma ir e Got rok e chitamag, bay gu tangnag feni gel gelngin.3I SOMOL e be’ ni girdi’en e mael;I SOMOL fithingan.
4“Ke yin’ e pi chariot nge salthaw rok Farao nga maday;pi tolang ko salthaw rok ni yad ba falu’ e kar limochgad u lan fa gi day ni Red Sea fithingan.5Ke thareyrad e day nib dib’ag;ra ligilgad nga’ar ni bod ba malang.
6“SOMOL, ba’ ni mat’aw i pa’am e rib th’ab feni gel;ke tet’ar e pi to’ogor kar yochyanggad.7Gelngim nib th’abi gel e ir e mu kirebnag ngay e pi’in yad be togopluw ngom;damumuw rom e gabulbul ngalang, me urfiyrad ni bod e ul.8Mu thoy daken e day me mu’ulung nga ta’bang nib tolang ngalang;nge par nib k’iy ngalang ni bod bangi rungrung;gin th’abi to’ar ko fa gi day e el nge par.9Me ga’ar e to’ogor, ‘Nggu lol’ograd nggu kolrad;mu gu tay e f’oth ko machaf rorad nggu fek gubin e tin gu ba’adag;bay gu girengiy e saydon rog nggu fek urngin e tin ni bay rorad.’10SOMOL, ri ta’abyay ni mu pag athon l’ugunam me thareyrad e day;miyad ligil nga’ar ni bod e plomow.
11“SOMOL, i mini’ u fithik’ e pi got e bod gur?I mini’ e bod gur nri gab thothup?I mini’ e rayag ni ngongliy e pi maang’ang me maruwel ni bod gur?12Mu k’iyag e ba’ ni mat’aw i pa’am,me ful’ e but’ e to’ogor romad.13Mu par ni gab yul’yul’ ko tin ni mmicheg, ya mu gafaliy e pi girdi’ ni mu lagrad ko gafgow;gelngim e mu pow’iyrad ngay nga tafnam nib thothup.14Pi nam e rrung’aged murung’agen, miyad t’on ko marus;me m’ag e marus piyu Filistine.15Pi’in yad ma yog e thin u Edom e rrusgad;ma pi pumo’on ni falu’ u Moab e ra t’on gad ko marus;ma fapi girdi’ nu Kanaan e mulan’rad.16Marus nge magar e mul nga dakenrad;bochan feni gel gelngin pa’ammiyad duwgil u luwrad ni gowa ba malang,nge mada’ ko ngiyal’ nike yib e girdi’ rom kar thumurgad a SOMOL,ni fapi girdi’ ni kam pithigrad ko sib ni ur ted.17Bay mu fekrad i yan ngam man mu tayrad ko burey rom,ni fa gin’em ni gur, SOMOL, e mu mel’eg ni tabnaw rom,ni fare Tempel ni ri gur e mu toy.18I gur, SOMOL, e pilung ndariy n’umngin nap’an.”

Tang rok Miriam

19Yu Israel e ranod ngar th’abed e day nga barba’ u daken e but’ nib mlik. Machane nap’an ni yib e pi chariot rok yu Egypt nge pi os rorad nge pi’in yad be yannag nga maday, me fulweg SOMOL e day nge thareyrad.20Mi Miriam, ni be’ ni bpin ni ba profet ni walagen Aron e fek e tambourine, ma urngin e ppin nra leked ni yad be chubeg e tambourine ni yad be churu’.21Me yin’ Miriam e re tang ni ba’aray ngorad,“Ngan tangnag SOMOL, ya gel nike tay e rib sorok riy;ke yin’ fapi os nge pi’in yad be yannag nga maday.”

Ran nib mo’oy

22Moses e gafaliy e girdi’ nu Israel ngar chuwgad ko fare gi day ni Red Sea fithingan ngranod ngalan e ted ni desert u Shur. Dalip e rran ni ur milekaggad u daken e re gi ted nem ni desert, ma dar pir’eged e ran.23Ma fa’anra tawgad nga Marah, ma dabiyag ni ngar unumed e ran riy, ya rib mo’oy, aram fan nni tunguy fithingan e gin’em ni Marah.24Mu ur gun’gun’gad nib togopluw ngak Moses, miyad fith ngak ni lungurad, “Mang e nggu unumed?”25Me meybil Moses ngak SOMOL ni be non ngak nri aram rogon u ngorongoren, me fal SOMOL owchen Moses nga ba ley i gek’iy; me fek Moses fare ley i gek’iy nge yin’ nga fithik’ e ran, me thil fare ran nge fel’ lamen. Me pi’ SOMOL e motochiyel ngorad ni ngar folgad riy, mu rom e ki sikeng nagrad riy.26Me ga’ar, “Fa’an ri gimed ra fol ko thin rog, I gag SOMOL ni Got romed, mi gimed rin’ e tin nib m’agan’ug ngay ni aram e tin nib mat’aw, mi gimed tiyan’med ko tin kugog ni ngam rin’ed, mi gimed tay nga tagil’ urngin e tin kugog ni ngam folgad riy, ma dab gu gechig nagmed nga reb fapi liliy ni gu pag nga daken piyu Egypt. I Gag fare SOMOL, ni gag e ggol nagmed.”27Me migid miyad yib nga Elim, ma bay ragag nge l’agruw i alublub u rom nge medlip i ragag kan e gek’iy ni palm; miyad n’uf e tent rorad u rom u to’oben e ran.
expand_more
Search