1 SAMUEL10yap_bsm

1Me fek Samuel ba melor i gapgep ko olive nge pu’og nga daken lolugen Saul, me faray owchen me ga’ar, “I SOMOL e ke gapgep nigem ni aram e gur e ngam gagiyegnag e girdi’ rok nu Israel. Bay um par ni gur e ga be gagiyegnag e girdi’ rok ma ga be ayuwegrad rok urngin e pi to’ogor rorad. Mich riy ni SOMOL e ke dugliyem ni ngam gagiyegnag e girdi’ rok e ba’aray:2Nap’an ga ra pageg e daba’ ngam man, ma bay mmada’gow l’agruw i pumo’on u charen e malang rok Rachel ni bay u Zelzah u lan e gin nib mil suwon ngak Benjamin. Ma bay rognew ngom ni fapi dongki ni gimew be gay e ka ni pir’eg, ma chitamam e dakir magafan’ ngorad, i gur e ke magafan’ ngom, ma yugu be fith ni be ga’ar, ‘Mang e nggu rin’ ngak fakag?’3Mi gimew yan u rom ngam marow mmada’gow ko fare ke gek’iy ni oak ni bay u Tabor, mu rom e bay mmada’ nigew dalip i pumo’on riy ni karbad ni ngar pi’ed e maligach ngak Got u Bethel. Bagayad e be fek dalip i kaming ni bitir, ma bagayad e be fek dalip yal’ i flowa ma bagayad e be fek ba tutuw ni keru’ e gamanman ni kan suguy ko wayin.4Bay ra nonod ngom miyad pi’ ngom l’agruw yal’ ko pi flowa nem, yad ra pi’ ngom ma ngam fek.5Ma aram e ngam man ko fare burey rok Got ni bay u lan yu Gibeah, ko gin be par e Filistine riy. Ma bay mmada’nag ba ulung i profet u langan e garog ko binaw ni karbad ko fare altar u daken e burey, ni bay girdi’en e musik nga m’on rorad ni yad be chubeg tatelin e musik ni harp, nge drum, nge ngal, nge lyre. Ma yad be churu’ ma yad be tolul.6Ma gelngin SOMOL e bayib nrib tomgin nga dakenam, ma ga un nga pangirad ko churu’ nge tolul ma bay mu thil ngam bod yugbe’.7Fa’anra yan i yodorom ma ngam rin’ e tin bayi pow’iyem Got ngay ni ngam rin’.8Bay mm’on rog nga Gilgal, mu rom e bay da gakgow ngay, mu gu pi’ e gamanman nga ni urfiy ni maligach, nge maligach nma gapaseg thilin Got nge girdi’. Mu son nigeg u rom ni medlip e rran, ya bay gub mu gog ngom e n’en ni ngam rin’.”9N’apan ni pi’ Saul keru’ ni aram e nge pag Samuel, me pi’ Got reb e tafinay nge reb e pangin ngak nib thil. Ma urngin ban’en ni yog Samuel ngak e go’ yib i m’ug ni riyul’ e rofen nem.10Fa’ani taw Saul nge fare tapigpig rok nga Gibeah, miyad mada’ fare ulung i profet. Me yib fare gelngin Got nga daken nib tomgin, me un ngorad ko churu’ nge tolul.11Ma girdi’ ni yad manang owchen Saul e ra guyed ni be yodorom, miyad fithrad ni lungurad, “Mang e ke rin’ fare mo’on ni fak Kish? Gur ke mang Saul reb e profet?”12Ma bay ba pumo’on nma par u rom ni fith ni ga’ar, “Pi profet ney e mini’ e gimed be leamnag ni pi chitamangirad?” Rogon ni tabab e re thin nem ni lunguy, “Gur ke mang Saul reb e profet?”13Fa’ani mu’ Saul ko churu’ nge tolul, me yan ko fare altar u daken e burey.14Be’ ni walagen e chitamngin Saul e guy Saul nge fare tapigpig rok me fithrow ni ga’ar, “U uw e kambow riy?” Me fulweg Saul ni ga’ar, “Gu warow ni gamow be gay fapi dongki. Ma da gu piri’egew ma gamow yan gguyew Samuel.”15Me fith fa’anem ni ga’ar, “Ere mang e yog ngomew?”16Me fulweg Saul ni ga’ar, “I yog ngomow ni ka ni piri’egrad,” machane de weliy ngak e tin keyog Samuel ni murung’agen ni bayi pilung.

Saul nturguy ni nge mang pilung

17Me yog Samuel ni nge mu’ulung e girdi’ ngak SOMOL nga Mizpah;18me ga’ar ngorad, “SOMOL ni ir e Got nu Israel e be ga’ar, ‘I Gag e gu fekmed nga wuru’ yu Egypt, I Gag e gu chuwegmed u pa’rad nge urngin e pi nam ni ur gafgow niged gimed.19I Gag e Got romed, I Gag e en gu chuwegmed u fithik’ gubin e gafgow nge tin nib mo’maw’ nma yib ngomed, ma chiney e kam pi’ed keru’med ngog ma kamogned ngog ni nggu pi’ be’ ngomed nge mang pilung romed. Ere kefel’, mmu’ulunggad nga p’eowcheg, nra reb e ganong ma nge par nga bang, ma ba kean e girdi’ me par nga bang.’”20Ma aram me yog Samuel ni nge yib reb e ganong nga m’on nge mu’ me yib reb, me mel’eg SOMOL e ganong rok Benjamin.21Me yog Samuel ni nge thay e pi tabinaw ko ganong rok Benjamin nga m’on min turguy girdi’en e tabinaw rok Matri u fithik’. Me yib e pumo’on ko tabinaw rok Matri nga m’on, min turguy Saul ni fak Kish u fithik’rad. Miyad chachangarnag, ma demo’22miyad fith ngak SOMOL ni lungurad, “Gur bay yugu be’ nga bang ni aram e cha’ ni ir?” Me fulweg SOMOL ni ga’ar, “Ba’aram Saul ni be mith u fon e chugum.”23Aram miyad mil ngranod ra feked Saul i yib nga fithik’ e girdi’, ma fa’ani yib i sak’iy nga fithik’rad ma gonpan reb e de’ nib n’uw ngak urngin e girdi’.24Me ga’ar Samuel ngak e girdi’, “Ba’aray fare mo’on ni SOMOL e ke duwgiliy! Dariy be’ u fithik’dad ni bod ir.” Ma urngin e girdi’ nra tolulgad ni be lungurad, “Nge n’uw nap’an ni par e en pilung!”25Me weliy Samuel ngak e girdi’ mat’wun nge maruwel rok e pilung, me yoloy ngalan ba ke babyor, me yan i cha’riy nga bangi n’en nib thothup. Ma aram me yog ngak e girdi’ ni ngar sulod nga taferad.26Ma ku er rogon Saul ni sul nga tafen nga Gibeah nike un boch e pumo’on ngak nib gel, ni Got e ke mithmitheg lanin’rad.27Ma boch e girdi’ ni dariy rograd ngabang e lungrad, “Ra di’in me yag rok e cha’ney ni nge ayuwegdad?” Dar pi’ed e tow’ath ngak Saul ya dubrad daken. Machane de yog Saul ban’en.
expand_more
Search