Read Luka 1

Luka1xnj_twf

¹Mkulungu Teofili. Vandu vamahele valingi kuyandika bwina mambu gegahengiki pagati yitu.²Vayandiki ngati chevatijovili vevagaweni penapo pegatumbukini magono ga mumbele mambu genago na kuvakokosela lilovi la Chapanga.³Mewa na Mkulungu Teofili penamali kulolokesa uchakaka waki kwa magono gamahele, nilola mbanga nikuyandikila veve kwa uchakaka waki.⁴Nikiti chenichi muni nigana wamwene umanyayi mambu goha gevakuwulili.

Kuvelekewa kwa Yohani Mbatizaji kukokoswa

⁵Lukumbi Helodi peavi Nkosi wa ku Yudea, ndi pavi na Mteta wa Chapanga mweikemiwa Zakalia wa chikundi cha uteta cha Abiya, na mdala waki avi Elizabeti wa lukolo lwa Aloni.⁶Voha vavili vahenga ga kumganisa Chapanga na kuyidakila mihilu na malagizu ga Bambu changabuda.⁷Vavi lepi na mwana mbaka muugogolo wavi, ndava Elizabeti avi lepi na chiveleku.⁸Ligono limonga, Zakalia peavi mukuhenga lihengu laki la uteta mu Nyumba ya Chapanga,⁹Ngati cheyavili mivelu ya vamteta va Chapanga, Zakalia ahaguliwi kwa gudugudu kuyingila mu Nyumba ya Bambu ndava ya kuhukisa ubani.¹⁰Na lukumbi lwa kuhukisa ubani palwahikili, vala voha vevakonganiki kumuyupa Chapanga vavi cha kuvala vayupayi.¹¹Mtumu wa kunani kwa Bambu, akamuhumila na kuyima upandi wa kulyela wa lusanja lwa luteta lwa kuhukisa ubani.¹²Zakalia peamuweni mtumu wa kunani kwa Chapanga yula, akakenyemuka.¹³Mtumu wa kunani kwa Chapanga akamjovela, “Zakalia, kotoka kuyogopa muni Bambu ayuwini chawamuyupili, ndava mdala waku Elizabeti yati akubabila mwana mgosi na veve walamkemela Yohani.¹⁴Ndi wamwene yati uheka pavaha na vandu vamahele valahekelela ndava ya kuvelekewa kwaki.¹⁵Mwenuyo yati ivya mkulu, pamihu ga Bambu, alanywa lepi divayi wala ugimbi, yati ilongoswa na Mpungu Msopi kuhumila mulileme la nyina waki.¹⁶Yati akuvawuyisa vandu vamahele wa pa Isilaeli, vamuwuyilayi Bambu Chapanga wavi.¹⁷Yati akumlongolela Bambu kuni ilongosiwa na makakala na Mpungu ngati Eliya. Ndava ya kuvatepulanisa vadadi na vana vavi, yati avakita vangamyidakila vavyayi na luhala ngati lwa vala vevakumyidikila, na kumtendelekela Bambu vandu vaki.”¹⁸Zakalia akamkota Mtumu wa kunani kwa Chapanga, “Yati nimanya wuli ngati givya chenicho? Muni nene na mdala wangu tavagogolo.”¹⁹Mtumu wa kunani kwa Chapanga akayangula, “Nene na Gabulieli na mtumisi wa Chapanga. Ndi anitumili nijova na veve nikujovela lilovi la bwina lenili.²⁰Yuwanila, yati wivya ngajova yati nakuhotola kujova, mbaka ligono lila pegihumila ago ndava ubeli kunisadika malovi gangu gene gihumila palukumbi lwaki.”²¹Lukumbi lwenulo vandu vevamulindilayi Zakalia kuvala vakakangasa, muni atamakisi lukumbi lutali mu Nyumba ya Chapanga.²²Peahumili kuvala nakuhotola kujova na vayaki, vayaki vakamanya kuvya mu Nyumba ya Chapanga mula, muyavi agaweni maono ndi akayendelela kulangisa na mawoko muni avi ngajova.²³Lukumbi lwaki lwa kuhenga lihengu la uteta palwamaliki, akawuya kunyumba yaki.²⁴Lukumbi luhupi palwamaliki Elizabeti mdala wa Zakalia yula akavya na ndumbu, akawela munyumba miheyi mhanu,²⁵kuni ajova “Bambu anitangatili na aniloli, hinu cheaniwusili soni pavandu!”

Kuvelekewa kwa Yesu kujovekana

²⁶Mu mwehi wa sita, Chapanga amtumili mtumu waki wa kunani Gabulieli kumuji wa Nazaleti, ku Galilaya.²⁷Kwa kamwali mmonga mwavamkemela Maliya, Mwenuyo ahongiwi na mgosi mmonga liina laki Yosefu wa lukolo lwa Daudi.²⁸Mtumu wa kunani kwa Chapanga Akamuhegelela akamjambusa, “Tikuwoni! Bambu avi pamonga na veve kangi akugubiki uganu waki!”²⁹Maliya peayuwini malovi gala, akakenyemuka, akahololela, jambusa yeniyi mana yaki kyani?³⁰Mtumu wa kunani kwa Chapanga akamjovela, “Kotoka kuyogopa Maliya, muni Chapanga aganisiwi na veve.³¹Walavya na ndumbu, walaveleka mwana mgosi, yati ukumkemela liina laki Yesu.³²Mwenuyo yati ivya mkulu, yati ikemelewa Mwana wa Chapanga Mkulu. Bambu Chapanga yati amuvika kuvya Nkosi, ngati cheamuviki Nkosi Daudi mweavi gogo waki.³³Ndi yati ivya Nkosi wa lukolo lwa Yakobo magono goha, na unkosi waki wangali na mwishu!”³⁴Maliya akamyangula, “Genago galavya wuli, muni nene nangammanya mgosi?”³⁵Mtumu wa kunani kwa Chapanga akayangula, “Mpungu Msopi yati ukuhelelela, na uhotola waki Chapanga Mkulu walakugubika ngati chimuwili, muni mwana mweubwela kumveleka uyo, yati ikemelawa msopi na Mwana wa Chapanga.³⁶Hati mlongo waku Elizabeti, agegi ndumbu ya mwana mgosi na hinu mumwehi wa sita, pamonga na ugogolo waki, mweamanyikini na vandu kuvya ngaveleka.³⁷Muni kawaka lilovi langahotoleka kwa Chapanga.”³⁸Maliya akajova, “Nene nivii penapa namvanda wa bambu, nikitiwayi ngati chaukajovili.” Ndi mtumi wa kunani kwa Chapanga akawuka.

Maliya akumgendelela Elizabeti

³⁹Ndi lwapiti lepi lukumbi lutali, Maliya akapanganyika akayumbatika kuhamba kumuji wewavi kuvidunda vya ku Yudea.⁴⁰Kwenuko akayingila munyumba ya Zakalia akamjambusa Elizabeti.⁴¹Bahapo Elizabeti peayuwini jambusa ya Maliya, kamwana kakahumba chaluheku mulileme la Elizabeti. Elizabeti akalongoswa Mpungu Msopi⁴²akajova kwa lwami luvaha, “Umotisiwi kuliku vadala voha, na mweubwela kumveleka huyo amotisiwi!⁴³Nene nayani hati nyina wa Bambu wangu anibwelili?⁴⁴Nikujovela, panayuwini jambusa yaku, kamwana kakahumba mulileme langu chaluheku.⁴⁵Umotisiwi veve mweusadika kuvya yati gihumila gala geakujovili Bambu.”

Maliya akumulumbalila Chapanga

⁴⁶Maliya akajova,“Mtima wangu ukumlumba Bambu,⁴⁷mpungu wangu umhekela Bambu, ndava Msangula wangu.⁴⁸Muni aulolili cha lipyana ungolongondi wa mvanda waki!Kutumbula hinu viveleku vyoha yati vakunikemela mwenisangalwiki,⁴⁹ndava muni Chapanga ana makakala anihengili gakulu,na liina laki ndi msopi⁵⁰Chivelekelu mbaka chivelekelumwene magono goha avi na lipyana kwa vandu vevakumtopesa.⁵¹Alangisi makakala gaki kwa kukita mambu gakulu.Avapechengini vevimeka mumaholo ga mitima yavi.⁵²Avahelisi vankosi vana makakala kuhumila muvigoda vya kulongosa,na avakwesi vevavi ngolongondi.⁵³Vangangu avayukutisi mambu gabwina,na vana vindu vyamahele avalekili vahamba mawoko gawaka.⁵⁴Amtangatili mulima wa Isilaeli mtumi waki.Akumbwiki lipyana laki,⁵⁵Ngati chaajovili kuvya na lipyana kwa Ibulahimuna chivelekelu chaki, magono goha.”⁵⁶Maliya akatama kwa Elizabeti ngati miyehi yidatu, ndi akawuya kunyumba yaki.

Kuvelekewa kwa Yohani Mbatizaji

⁵⁷Palwahiki lukumbi lwa Elizabeti kuveleka ndi akavya na mwana mgosi.⁵⁸Vandu va mu lukolo na veitamanila nawu papipi, pevayuwini Bambu amkitili lipyana neju, voha vakahekelela pamonga nayu.⁵⁹Ligono la nane vakabwela kumdumula jandu mwana, vaganayi kumpela liina Zakalia, liina la dadi waki.⁶⁰Nambu nyina waki akajova, “Lepi, mwenuyu ikemelewa Yohani.”⁶¹Vakamjovela, “Kawaka mu lukolo lwaki mweavi na liina ngati lenili!”⁶²Hinu vakamkota dadi waki chakumlangisa, muni vamanyayi aganili kumpela liina loki.⁶³Zakalia akayupa chibawu cha kuyandikila, akayandika, “Liina laki Yohani.” Vandu voha vakakangasa!⁶⁴Bahapo mlomo wa Zakalia akatumbula kulongela kangi akamulumba Chapanga.⁶⁵Vandu voha veatama nawu vakavya na wogohi, mambu ago gakalongaleka mulima woha wa vidunda vya ku Yudea.⁶⁶Vandu voha vevayuwini mambu genago, vakaholalela mumitima yavi na kukotana vene kwa vene mumitima yavi, “Mwe mwana uyu yati ivya wuli?” Chakaka, makakala ga Bambu gavi pamonga na mwene.

Ulota wa Zakalia

⁶⁷Zakalia dadi mwana yula akalongoswa na Mpungu Msopi akatumbula kulotela ulota uwu.⁶⁸“Ulumbiwa Bambu Chapanga wa Isilaeli!Ndava ubweli kuvatangatila vandu vaki na kuvagombola.⁶⁹Atipeli Msangula mkekesi,mu chiveleku cha Daudi mtumisi waki.⁷⁰Ndi atijovili kadeni munjila ya vamlota vaki va msopi,⁷¹Yati atisangula kuhuma mu mawoko ga makoko gitu,na mumakakala ga voha vavakutihakalila.⁷²Ajovili yati avakitila lipyana vagogo vituna akulihololela lilaganu laki la msopi.⁷³Chilapu alapili kwa dadi witu Ibulahimu, kuvya akutitangatila tete⁷⁴tigomboka kuhuma mu mawoko ga makoko gitu,na timugundamila changali wogohi,⁷⁵muusopi na kukita gegakumganisa Chapanga,magono goha ga wumi witu.”

⁷⁶“Wamwanangu veve, yati ukemelewa, mlota wa Chapanga mkulu,ndava walamlongolela Bambukumkwalila njila yaki,⁷⁷na kuvakokosela vandu kuvya valasanguliwakwa kulekekesewa kumbudila Chapanga wavi.⁷⁸Chapanga witu yati ikita genago ndava lipyana ya mtima waki wa ngolongondi.Usangula waki yati ubwela kuhuma kunani ngati lumuli chelulangasa chelihumila lilanga,⁷⁹na kuvalangasila voha vevitama muchitita chikulu cha lifwa,na kutilongosa titama wumi wa uteke.”⁸⁰Mwana yula akakula, na akakangamala mumpungu waki. Akatama kulugangatu mbaka ligono paajilangisi pavandu va pa Isilaeli.