Read Matiuna Yesusmoa. 26

Matiuna Yesusmoa.26wrs_png

Yutanindna Kuwulva Moamba Moakaltheivna, Yesusm Helvakomandhalm.

¹Yesusva hevna aonghal mahalnindmba ishopieinnamba, hev unna, sambla nin vewullava, pimba si os Pasova innemba mendekliva hlavav, wo ungundva si os kamba kikih vrivav Romduangna kuwulna englisramba, wohtvav, lepetheiu hemoa.³Yesusva os ishunna hevna aonghal mahalnindmba, wo nonamba Yerusalemrava sembayang andranindna kuwulva eva mundilva mongawulm kusovna, moam moakalthalm, Yesusm indkokla vrelm. Himba di kusovna sembayang andranindna kuwulna deuvra, hena nihilva Kaiapas.⁴Hev una, pimba si kevrivav Yesusmba poaita, wo Romduangm osihminivav, helvakomandhalmba. Owai, manam pimba honamba osva vivav hona innetihna novrava, si indkumbiva pimba osva nungeilvrava, wo daos uhu wulengavra osangas.

Yesusna Aonghal Mahalnindva Mongo Ungevlirinim Velaipulvo Vinivna Dandwonam, Una, Es Hevpa Himba Welsandava Yesusna Kurava Sovhov?

⁶Yesusva Betani kembella avna Simonna deuvra, no Simonmba nemetva himba doara lombamungil lohna, wo henga doara hoai venana, besal lohvna. Himba inne Yesusmba waihlavna mongawulm, mongo ungevliriniva Yesusindam murapetam provna, hev vena, welsanda botelnahonam longpethana, no welna botelna diva os lohvna i. Hev Yesusna kura sovhomnavna novnavhora.⁸Yesusna aonghal mahalnindva hemba nunglivnamba, himba wuspromana venavna no ungevlirinimba, manaram osva himba hevpa vev, welm ambo eunumbov? Himba doara ata no welva guata maketram, wo di nona dombota, wo pivva ata diva deiswilta nom innehuinindm. Heva os owai, welva doa himba sovhopiai.¹⁰Yesusva helwolnamba, ona, os umniv no ungevlirinimba. Hev unna, manam yimba hona ungevlirinimba okusviv, himba kamba lehra venav besal hevm. Indhanamba innehuiva mindnam angu vev, wo sna indhanamoa yeoa kolvrowol vivm ambo nis pevna undna. Heva os kava si yemba wonavavmoa yunalmba.¹²Ungevliriniva kamba welsandana sovhomni, sewonamba kamindmba indhanamba si osta vinivav, nonamba kamba dahavrava.¹³Temba kamba ungevliriniva venaiva, indhanamba si kana besal nemelmomba wulvahmana vevra indakonda pethara, indhanam ishuvmonalm. Wo os himba si indhanamba owalmba eishorahungu vevra hona ungevlirinina moamba, memba himba kamba venaiva, wo indhanamba si os ningvra, lehra hevm venata.

Yutasva Sembayang Andranindna Kuwulm Ishunna, Kava Si Yesusmba Yena Englisra Bumbrisinvav Sewonamba.

¹⁴Mongo noi Yesusna aonghal mahalnindrini, nihilva Yutas Iskariot, hev ganamba, sembayang andranindna kuwulm unna,¹⁵kam di dembrehu, ka si Yesusmba yemba holvorahunvav. Es ata yimba kamba dembrehuvav? Hev seivileinamba, hev umnina, sen mendekli ata kava yemba dembrehuvav 30pelara, wo os dembrehuna.¹⁶Wo Yutasva os nengvna, es hevpa kava si Yesusmba holvoholothunvav hena englarava?

Yesusva Hevna Aonghal Mahalnindm Eunillam Pasova Inne Wonnena Mongawulm.

¹⁷Doa Yutanindna Pasova innetihva phunvna, nonamba temba himba hlalvohvnamba rotiva yishuiva. Yesustindiva ambanamba, hev umnina, hi ata kava innemba kokolma vivav, osm pivva ata detiva di hlavav?¹⁸Yesus unna, ango Yerusalemram, wo umnu no indhanarinim, kava nonora lovahv, pina guruva os oi, kanamba doa murapeta vev, yena deuvra ata kava wonnevav Pasova tihinnemba kavtindimba. Yesusva osva ishunnamba hevna aonghal mahalnindmba, doa himba os angana, innemba kokolma velmba.²⁰Okombava doa singvel vevna, Yesusva hevna aonghal mahalnindm wonavhoanamba mongawulm, inne wonnevna. Hev unna, tanamolnam, mongo honi yerini ata kamba ungundna englarava holvorahunvav.²²No moamba hevna aonghal mahalnindva hillivnamba, mindnam duus viwul vevna, Yesusm sah ovruwul vevna, uvna, mendekli, an hevpa ata vevav? Yesus unna, honi mongo yerini, men piv inne hlaim mongawa sospandini, henongas ata honamba kamba venavav.²⁴Kav arana ombol lohv, kava wohengvav doaraminim tombaimom. Wo noindava himba ata os kamba ungundmba holvorahunvav, wo os ata kamba dahavav. Heva os kava no indhanarinimba os omnav, wavrapeta, yenamba si indkoklava mendekli lohvav, eva si bui vera mendekli.²⁵Yutas hona indhanarini ata Yesusmba hevna ungundmba pusvundthueinvav, hev omnana, guru, ata ka vevavma? Yesus omnana, osta pev ten ovm.

Yesusva Rotina Wainna Dahwol Vevna Hevtindim.

²⁶Mendah wonnevna, Yesus roti vranamba, Sesoam omnana, lehra, wo doa popowol venamba, hevna aonghal mahalnindm daswolungu vevna, hlao honaoa, memba kana nihil.²⁷Henga wain moknahonam vra, Sesoam omnana, lehra yimba. Hev ovrahunna hevna aonghal mahalnindm, henoi henoi nevrava, os hlao honaoa, memba kana tovolva.²⁸Memba tovolva moam lehvoh vev, nom ten Sesoa hev ovrahunnam nom pim hevtindinonoam. Kana tovolva ata sovhopevav, indhanam vavawonam kilumb shuawolalm. Wo noinda osva kava si hengava nevavmoa wainmba, heva verava, sewonam kana arana nemeltindiva arana huhmohsingiva avrava, wo os si kava yemba wainmba nemelva wonnevav.

Yesusva Unna, Pitava Ata Kamba Meis Haravhomnavav

³⁰Doa hev wonnepianamba, sangalna Sesoam wonokolavna mongawulmangas, venamba, os wongana oloram, os no olomba ningthiv, oliv denwit olo. Doa di pulvonamba, Yesus unna, sinimba ata yimba kamba undnahonamba ningminivavmoa, manara doaraminimomba os novol velohv men,Sesoava os ona, sipsipna kekalvhonindrinimba si kava helvakomandhavav, wo no sipsippa si os bukethavav. Sekaraia 13:7³²Doa henga si kava beswonam phovav, wo kava si os gavav Galili provinsramba, yeoa dom ambo kaindamoa.³³Pita omnana, Yesus, nomba ata yemba undnahonamba ningminivavmoa, heva os kava owai, osva vevavmoa. Yesus omnana, hona sinim ata yimba samblamongolm osva owovav, kava tit venav Yesusmba, os ayamba ata ophovav.³⁵Pita omnana, owai, eva kamba helvakomandhuwiltava yeimba, kava osva ovovavmoa, kava tit venav hemba. Owalva nomba hevna aonghal mahalnindva osangas mongawamoa ishumnivna Yesusmba.

Yesusva Sembayang Venavna Aralm Sesoam, Omnana, Kana Hona Kinwondaoa Nengas Pipaho, Heva Os Pevna Nengavnangna Veo.

³⁶Yesusva hevna aonghal mahalnindmba wonganamba Getsemani petharam, unna hem, hui yeoa dawonam aevulmanavm kamoa. Ata kava dom gavav, sembayang velm. Samblamong indhanam wongana hevpa nihrava, Pitam Yemsm Yonm, ehallapetam os wongana, mindnam os duus vevna i, kin mendekli plothopiha venavna.³⁸Hev unna no samblamong indhanam, kava mindnam duus vev, os kava nengv, ata kamba dahavav. Yeoa hui novkaka eivvm, kava sembayangmba vevrava. Himba ona gasambaihana, novlomossis pethara lithanamba, ona, ara, hona kinwondaoa kanaminioa nengasvo. Os veo, ten pev nengvm, osva owai, memba kava nengvpa.⁴⁰Yesusva phonamba, henga dom gavna, di hevna aonghal mahalnind samblamong eivvnam, heva os owai, himba doara ninpol kokoral vena. Hev omnana Pitam, yimba hona samblamong indhanamba, owai, es eva yimba novkakava kamongova eivvav dawonampetamba.⁴¹Yeoa novkaka eivvm, Sesoam osihminivm, ata homeis yem plel vevm hona kinda. Pevna undnahonam yimba novkakam aevulalm vev kamongo, heva os owai, nihva yenamba kosksa vilunv.⁴²Yesusva hemba dashalahanganamba, Sesoam henga hevho ishomnavna, omnana, ara, yimba hona kinmba kanaminiva pilpiapahamba owai vetava, memba kamba plothomnavpa, kava ata wohpungavav, os ten pev nengvm.⁴³Hev henga pronamba, no hevna aonghal mahalnindm samblamongom nongalna, henga nin shav himba, hemba gumus vinvna, novkakamba aevulalmba.⁴⁴Yesusva hemba henga dashalahanganamba, Sesoam ishomnavna no mongawamom, seilm hev ten ishoka vaomananam.⁴⁵Hev henga pronamba hevna aonghal mahalnindindam, unna, yimba mendah shavma, indwonam aevulvma? Kamba kevralmba, ata daipota kamba kevrivav. No indhanariniva, himba temba kamba holvorahunilmba vinvpa indhanakoklana englisrava, men wohprov. Pulvorava, pevm beswonam sishona avramana veo, hem nonglalm.

Yutas Holvorahunna Yesusmba Kuwul Mendeklina Englisra.

⁴⁷Yesusva mendah ona ishunna no moamba hevna aonghal mahalnindmba, Yutasva os wonphona no indhanamba. Himba mongo Yesusna aonghal mahalnindrini lohvna. Wo noi wulprovna ovlakas tenga, Yesusm kevralm. Sembayang andranindna kuwul eva mongla kuwul no indhanamba wolanga vina, unna, kevrirava Yesusmoa, hom waiambo.⁴⁸Yutasva doara ishunna no indhanamba, temba hevpa wonganamba, os Yesusiva ata kava mosnin ohovovav, wo ata yimba os osva liheivav, ten dihi Yesusva, tenta himba, os kevru hemoa.⁴⁹Doa Yutasva nungi lelnam Yesusindam pronamba murapetam, omnana, guru, doa mosnin ohovovna, indwonam lohvm. Yesus omnana Yutasm, seh, andramba memba yimba homba proiva, veo. Doa no indhana ten Yutas wonpronam, pulvona, Yesusm kevri.⁵¹Doa nungi lelnam mongo hevna aonghal mahalnindrini phona, hevna ovlakas hevna kellini velavranamba, vuving vrenamba, mendekli sembayang andranindna andranindrinina angol nona singeitpingamnana.⁵²Doa Yesus omnana nom hevna aonghal mahalnindrinim, osoa wuleiho, henga pevna ovlakasoa vilitho hevna kella. No indhanamba temba hevna ovlakasva wulluhpravpa, hevna ungundmba nonamba helvowolalmba, ungundva eva hevna himba ilvahvra, no indhanamba helvakomo velmba ovlakasnamba.⁵³Yimba tit vivma, kava osva otava, ara, kam kolvro, himba ata vengas vevav, hevna ovsongolnindm 1000pelara wolapra vevav, kamba pueil ningimnivav hona ungundnapenamba? Wo heva os owai, kava osva vevmoa, kava temura doaraminimom, ten novol velohvm, nom wohengv. Os novol velohv, kava kinmba si wohpungavav.⁵⁵Doa Yesus unna no indhanam ten kusomnanam hevm, yimba os ningvma, kava daos indhanarini lohvma, wo noinda yimba kamba wulpromnavna ovlakasna tenganamba, nonamba kevralmba? Elsus kava tempellava alohvna, indhanamba numhowol vawovna, wo heva os yimba ambnamoa domba, kamba kevralmba. Manara? Noinda ye ka Sesoana moashulnindna doaraminimomba enginvpa, noinda yena undva luhprinvra, kamba indkokla vrelmba. Doa hevna aonghal mahalnindva nonam wohbukethana pem.

Kuwul Mendekli Sembayang Andranindna Wetatmona Sah Ovravna Yesusm.

⁵⁷No indhanamba kevrinamba Yesusmba, os waiangana no sembayang andranindna kuwulna deuvram, Kaiapasindam. Doara heva doa kusoi katekis, mundil mongla, Yesusmba nengvilivna. Pitava ambo wowonam ehallapeta Yesusmba pethamana venavna, wo venamba, no mendekli kuwulna pueilmera siha. Hev sihanamba, di waieivvna kekalvhonind. Himba os nengvna, es hevpa ata Yesusmba vinivav?⁵⁹No sembayang andranindna kuwul eva Yutanindna kuwul mendekli mongla, Yesusm waiishuvna wetatmona, muembnavho ovrivna, helvakomandhalm. Boasna indhanam unvna, ambo hom, wo ishuvm daspolm, Yesus ten indkokla vevnam, os no hevna indkoklarava pivva ata helvakomandhivav hemba.⁶⁰Indkumbi prapia, henoi henoi provna, moangakalamoa ambo ishohalv vevna, Yesusva os vena. Heva os owai, mongawamomba eukw vrivnamoa, osm mundilva uvra, helvakomandhiu. Himba indakonda vilulolohvna. Doa mongo samblaindhana epranamba, moangakalamona Yesusm ohosihavna os,⁶¹hona indhanariniva os ona, kava Sesoana tempelduvpa tupulorava, hengava kava samblamongo okombanam vevav.⁶²Doa no sembayang andranindna kuwul phonamba, hovra lohvhoanamba, omnana, Yesus, hona indhanamba yemba os ishumniv, sahonam vaomana vena, ata yimba es hengava hemba unvav?⁶³Wo heva os owai, Yesusva henga moamba ishonamoa. Henga mendekli kuwul ona, yeoa kamoa tanamolnamoa ishunu Sesoana novra, osm ora yimba Kristusnonoa, Sesoana ombol?⁶⁴Doa Yesus omnana, lehrata os pev ten ovm, wo hello, sewonam si yimba kamba nonglavav, kava Sesoana nihanasisva avrava, Sesoa noi himba hevnapopol wohav. Kava Sesoana ombol, wo yimba si kamba henga nonglavav, kava holopevrava tekomeriniva.⁶⁵Doa no mendekli kuwulva himba mengpoavna hellevnamba Yesusmba, hev dandwonam viliphomna, unna, Yesusva ambo Sesoam moalusna ishomnav. Venamba, hevna kayen popowol ve, manara noinda himba Yesusmba mindnam wuspromnavna. Hev unna, manam hengava eva ata pimba indhanamba monglamba nembavav, homba kusolmba, Yesusna sahoklalva velokusa velmba, owai, pimba doa hillimni Yesusna moamba, no moanamba himba Sesoam opilpihavna.⁶⁶Es yimba ningv? No sembayang andranindna kuwul una, himba doa sahonam ishoi, pioa hemoa helvakomandhalvohra.⁶⁷Doa indhanamba muembkosva wulopravna Yesusna novlomosrava, wo os hilvivna, sang polasopla vrivna,⁶⁸umnina, yimba Kristusva tanamba olohtava, os o, henoi kamba helvav.

Pita Unna, Kava Lihavmoa Yesusmba.

⁶⁹Pitava mendah di avna no pueilmera, mongo andranindrini ungevlirini kuwulna nongla ophona, kava os nengv, yimba Yesusi evevna mongawulm, no Galili tendorini.⁷⁰Pita unna indkumbina novra, owai, kava nomba tit vev, temba yimba ishovpa. Doa Pitava os deuvpultuvrava phona, henga mongo ungevlirini di nongla, wo unna nom indhanam, hona indhanariniva Yesus Nasaretrinii evevna mongawulm.⁷²Pitava henga ophona, kava tit venav hemba. Kava tanam yemba ishunv.⁷³Wo doa no indkumbi prapianamba Pitaindam, umnina, yimba mongo tanam Yesusna aonghal mahalnindrininonoa lohv, manara yena moamba snal, ten Galilinind ishuvm, Yesustindi, kava nonora.⁷⁴Pitava henga ophona, kava tit venav no indhanarinimba. Kava gekalava ollava honamba, Sesoa daha kamoa esesm venavma. Doa henanam ayamba ophovna, wo henga Pitava nengna, nom Yesusva os ona, samblamongolm yimba si osva ovav, kava tit venav Yesusmba, simerava simekumbrava mendah ayamba ophovramoa. Doa Pitava os ambaram pholahanganamba, di wovelohvna mindnam.

Matiuna Yesusmoa. 26 / wrs_png