Read Matwaya 13

Matwaya13wmw_wbt

Insa afunda kwa kinyume cingi

Kinyume kuhusu nvyari

¹Noire suku ire, Insa akilawa nnyumba mure, akuka akikala nanyenje ya tanda.²Makundi ka makundi a wanu wakinzunguriza, ndimana kakwera mungalawa, akikala. Wanu ware piya wémira nanyenje ya tanda rire.³Noparepare, akiwafunda wanu vinu vingi vyawenye kwa kinyume, akamba: “Ákiwepo mwananlume mmoja akipita akivyala.⁴Paakivyala, mbeyu nyengine igwirira munjira, zija nyuni zidodola.⁵Mbeyu nyengine igwirira mmawe, mahala saapana misanga, noure wakati ure iwota konta aíkiwepo misanga mingi.⁶Fala pariwarire juwa, senge ire ifwa, konta aíkiwa na mizipe sana.⁷Mbeyu nyengine igwirira mmiwa, iwota, fala muti unyala.⁸Mbeyu nyengine igwirira munsanga wa rutuba, ipa visumo, muti mmoja miya, nyengine sitini, na nyengine talatini.⁹Basi, mwenyé masikiro, asikire!”

Mana a kinyume

¹⁰Wanafunzi ware wakinfika karibu, wakindairi javi: “Sababuni kuwambira kwa kinyume?”¹¹Iye akiwajibu akamba: “Konta umwe‑po mwijiwisiwa siiri za ufalume wa binguni, fala ewo‑poawejiwisiwe.¹²Kamana mwenyé kuwa na kinu, apewa akuwa na vingi, fala munu saana kinu, aba caári nawo noco anyang'anyiwa.¹³Ndimana niwasowerera kwa kinyume, konta wanang'aniza fala awawona, wasikiriza fala awasikira wala awereriwa.¹⁴Javyo vitimiziwa kwawo vyaâsemire nabii Izaya, akamba:
‘Musikira na masikiro fala amwereriwa anta aba,nakunang'aniza munang'aniza fala amuwona anta aba.¹⁵Konta myoyo ya wanu‑wa migumu.Masikiro awo aasikira sana,maso awo afunga.Siwere javyo,maso awo nanga awona,masikiro awo nanga asikira,myoyo yawo nanga yerériwa,ewo nanga waludi waja kwangu,nomi nanga niwaponesa’ ” amba ndi Mola.

¹⁶Insa akiwambira tena: “Heri maso enu konta muwona, pamoja na masikiro enu konta musikira.¹⁷Nukwambirani kweli kuwa minabii wengi na makamilifu vîwajibu kuwona vyamuwona‑vi fala awawonire, na kusikira vyamusikira‑vi, fala awasikire.”

Mana a kinyume kuhusu nvyari

¹⁸“Sikirizani mana a kinyume kuhusu nvyari:¹⁹Kila mwenyé kusikira usemi wa ufalume akitowa kwereriwa mana ake ndi ire mbeyu igwirire munjira. Akuja Ibilisi anlavya círi mmoyo mwake.²⁰Mbeyu igwirire mmawe ndi mwenyé kusikira usemi, nopo ka nopo kapokerera na furaha,²¹fala aainshi nawo suku nyingi, kwa kuwa aana mizipe nkati yake. Akija akimpata mashaka au kulumbatiwa sababu ya usemi wa Mwenyezimungu, abugudika, akwasa.²²Mbeyu igwirire kati-kati ya miwa ndi mwenyé kusikira usemi, fala kwa sababu ya mashuguli a kila suku, pamoja na udanganyifu wa mali, vikinya usemi, ubaki saupa visumo.²³Na ire mbeyu igwirire munsanga warutuba, ndi mwenyé kusikira usemi, kwereriwa sana-sana, na kweli ukupa visumo: muti mmoja visumo miya, mwengine sitini na mwengine talatini.”

Kinyume kuhusu tirigu na minyani

²⁴Kinyume cengine kawambira, kaamba: “Ufalume wa binguni uwa kamba munu wakuvyala mbeyu ngema mmasamba mwake.²⁵Falakini wanu pawalarire, akija aduwi wake akivyala minyaninkati ya tirigu, akuka vyake.²⁶Paikurire tirigu ire ikitambuluka, na minyani ikanza kuwoneka.²⁷Basi, wakolakazi wa mwenyé-nyumba wakinfika karibu, wakimwambira javi: ‘Mwenye! Mmasamba mwenu mure, amuvyarire mbeyu ngema? Sambi, minyani ire yankulawirira ndepi?’²⁸Iye akijibu: ‘Aduwi mmojawapo ndi atendire javyo.’ Wakolakazi ware wakindairi: ‘Musaka tikadobore minyani ire?’²⁹Fala iye akiwajibu: ‘Musuke kudobola, konta pakudobola musanganya na tirigu.³⁰Asani kwanza ikure na tirigu mpaka wakati wa mavuno. Wakati‑wo ndi panisaka kuwambira wavuni kuwa: “Kwanza lavyani minyani, mufunge vinyang'anya vyociwe moto, fala tirigu‑yo vunani, mutaye nkikuti mwangu.”’ ”

Kinyume kuhusu mbeyu ya mostarda

³¹Insa akiwambira tena kinyume cengine: “Ufalume wa binguni uwa kamba mbeyu ya mostarda, yatwarire munu mmoja akivyala mmasamba mwake.³²Ingawa eyo mbeyu‑yo noto koliko mbeyu piya, fala nrayi ukikula ukuwa nkulu koliko mirayi piya, anta nyuni wakuja wakijenga vitundu nvitambi vyake.”

Kinyume kuhusu furumento

³³Akiwambira tena kinyume cengine: “Ufalume wa binguni uwa kamba furumento. Mwanamuka atwala furumento aba javi, asanganya na ufu wa tirigu mwingi. Furumento ire ikwingirirana muufu mure piya.”³⁴Evi vinu‑vi piya Insa kawambira wanu kwa kinyume. Aakiwambira kinu bila kutumira kinyume.³⁵Kwa javyo, vikitimu vyaâsemire nabii mmojakuwa:
“Nifungula kanywa,nikwereza kwa kinyume vinu virifisiretangu mwanzo wa ulumwengu.”

Kufafanula ka kinyume kuhusu minyani

³⁶Sambi, Insa paasire junudi ya wanu ire, akuka kwake. Noparepare, wanafunzi wake wakinfika karibu, wakamba: “Tambire mana ake kinyume kuhusu minyani mmasamba.”³⁷Iye akiwajíbu: “Munu avyála mbeyu ngema ndi Binadamu wa Binguni.³⁸Masamba ndi ulumwengu, mbeyu ngemandi wanu wakuwa ufalume ndi wawo. Minyani ndi wanu wári upande wa Ibilisi,³⁹na aduwi avyarire minyani ndi Ibilisi. Mavuno ndi mwinsho wa ulumwengu, na wavuni ndi malaika.⁴⁰Kwa javyo, kamba vyailaviwa minyani ikociwa moto ndi vyavisaka kukuna suku ya Kiyama.⁴¹Binadamu awapereka malaika wake wawakusanye na wawalavye nkati ya ufalume wake piya, wawakóresa dambi wenziwawo na wenye kutenda vitendo vibaya.⁴²Ware wawefya motoni, mahala pawoka kurira na kutafuna meno.⁴³Basi wenye shariya wakuka kung'anira kamba juwa nkati ya ufalume wa Baba yawo. Mwenyé masikiro, asikire.”

Kinyume kuhusu kupata mali a halali

⁴⁴“Ufalume wa binguni ulandana na mali akufisiwa mmasamba. Vyaapita munu akiwonerera na akifisa mmasamba nomo tena. Kwa radi yake yawenye akúka, kuuzanya piya vyaári nawo, ikisa akuza masamba are!”

Kinyume kuhusu ncuruzi wa ambari

⁴⁵“Kinyume cengine, ufalume wa binguni ulandana na ncuruzi mmoja wakusakula ambari yakusitawi pakulu.⁴⁶Paasingana ambari moja ya nzuruku mwingi, alawa akuka kuuzanya vyaári nawo piya, akuka kuuza ambari ire!”

Kinyume kuhusu nyavu mbahari

⁴⁷“Nfano mwengine tena, ufalume wa binguni ulandana na nyavu yakutaiwa mbahari yakukoresa inswi za kila namuna.⁴⁸Pazijala inswi, wavuvi wavutira kungulu, wakwikala, watondola ngema, wakitaya ntenga, sazifãi wakefya.⁴⁹Javyo ndi vyavisaka kuwa suku ya Kiyama: wakuja kulawirira malaika, wawatondola wanu wabaya nkati ya wanu wa shariya,⁵⁰wawefya motoni, mahala pawoka kurira na kutafuna meno.”⁵¹Basi, Insa akiwadairi wanafunzi wake: “Mwereriwa usowezi‑wu piya?” Wakijibu: “He, tereriwa.”⁵²Iye akiwambira akamba: “Kwa javyo, kila mwanlimu wa shariya apinduka kuwa mwanafunzi nkati ya ufalume wa binguni, alandana na mwenyé nyumba wakulavya nkati ya mali zake vinu vipya na vya mida.”⁵³Insa, pesire kuwambira kwa kinyume cire, akilawa akuka vyake.

Insa aainshimiwa kwawo Nazareti

⁵⁴Nakufika kwawo, akiwafunda nsinagoga mwawo, mpaka ewo wakishanga, wakisema: “Wijiwifu‑wu na eya maajuza‑ya vyankunlawirira ndepi?⁵⁵Eyu si mwana wa karipinteru? Mamaye si etiwa Mariyamu? Na noyu si nduyawo Yakobu, Yusufu, Ansumani, na Yuda?⁵⁶Walumbuze piya atíri nawo pamoja? Piya‑vi vyankunlawirira ndepi?”⁵⁷Na wakibugudika naye. Fala Insa akiwambira: “Nabii ainshimiwa kila mahala, ila kwawo na mbere ya jamaa zake aainshimiwa.”⁵⁸Basi, aatendire maajuza mengi kwawo konta awakimwamini.

Matwaya 13 / wmw_wbt