ZABURU136wlo_wbt

Kaasina Kawasana Opu to Miana Israel

1Sukurumo i KAWASANA OPU, roonamo Incia amalape,kaasina abakaa saʼumurua.2Sukurumo i Aulataʼalana sagala Aulataʼala,kaasina abakaa saʼumurua.3Sukurumo i Kawasana Opuna sagala opu,kaasina abakaa saʼumurua.
4Incia mopewauna manga giu inda momentela,kaasina abakaa saʼumurua.
5Incia mopadhaangiana laiana tee kalapena budina,kaasina abakaa saʼumurua.6Incia mobhakesakana ati i bhawona uwe,kaasina abakaa saʼumurua.7Incia mopadhaangiana manga kainawa momaogena i laiana,kaasina abakaa saʼumurua;8matanaeo to akuasai eo,kaasina abakaa saʼumurua;9bula tee kalipopo to akuasai malo,kaasina abakaa saʼumurua.
10Incia mopekamatena manga anaana tumpe i Mesir,kaasina abakaa saʼumurua;11tee o miana Israel apalimbaia minaaka i Mesir,kaasina abakaa saʼumurua;12tee limana momakaa tee kuasana momaoge,kaasina abakaa saʼumurua.13Incia aweta Tawo Towu Lambe apaporuawetaia,kaasina abakaa saʼumurua;14tee apapolimba miana Israel adhala i tanga-tangana,kaasina abakaa saʼumurua;15maka Incia apatondu Firaun tee tantarana i nuncana Tawo Towu Lambe,kaasina abakaa saʼumurua.
16Incia akapalai uumatina alaloi tana matuu,kaasina abakaa saʼumurua.17Incia apekatalo manga raja momakaa,kaasina abakaa saʼumurua;18tee apekamate manga raja momulia,kaasina abakaa saʼumurua;19siitumo Sihon, rajana miana Amori,kaasina abakaa saʼumurua;20tee Og, rajana Basan,kaasina abakaa saʼumurua;21tee adhawuakea o lipuna manga incia apamembalia pusakana uumatina,kaasina abakaa saʼumurua;22amembali pusaka to miana Israel o bhatuana sumai,kaasina abakaa saʼumurua.
23Incia inda mangamalinguaka wakutuuna tee masaʼalata,kaasina abakaa saʼumurua;24tee mangarambasaka minaaka i limana musu,kaasina abakaa saʼumurua.25Incia mopakandena bhari-bharia mahaluku,kaasina abakaa saʼumurua.
26Sukurumo i Aulataʼala moparintana i laiana,kaasina abakaa saʼumurua.
expand_more
Search