RASUL27
1Yanama gubernur kutu to manau, toapa nari amatapai so Italia. Apa verut pimamuna viarami pasia sesiwi Paulusi tutir siniotu venana bui pa esia maso veveru nana verut pimamuna viosa usari vesanomi na Yuliusi, vieru so rai Roma sesau ve “Verut pimamuna Kaisar pai”.2Amasa na wa pimasa pesi vera nana Adramitium pai, avori amasa na wa pimasa vio viapai jani so aivoi pasi na provinsi Asia. Aristarkhus, siniotu Makedonia pesi verama nana Tesalonika pai, dioto kota tutiri ama.3Nana kausapa pa amasirieu na Sidon. Yulius nienari vava vesie vesiri maso Paulusi e diono kasau maso Paulusi ria e siejo nie maneta pasia nana Sidon. Ave amamo setono pi vitopi Paulusi dio siauwa pa.4Nana jana pa amatapai riwanea, wana pai sio to karakuai nana wa papo pa, apa wa pai diepai rebasa sasidere nu Siprus ave mari so wa pai.5Manau na amatapai tu rawana vetara dopo Kilikia tutir Pamfilia pai, avori amandama so Mira, na uta Likia.6Na jana pa, veveru nana verut pimamuna viosa usari pai siemuai wa pimasa pesi vera nana Aleksandria, dio diepai so Italia. Apa diemias e amasa so wa jani.7Woroi pa raria toi ma amatapai vape amamasiar va, e tutiri marabat vesiri amatapai amasirieu na Knidus. Aso wana pai sio pa kariria rami pavo, diadi so amatapai topo va apa amatapai rebasa sasidere rawa mura nu Kreta, e amandawaini revu Salmone, ave amamo amasamuai uta vemari pa vurusu wana pai.8Tutir marabat vesiri amatapai rawaini revu jani, vepui pa amasierieu na uta pesa, sano pa Aivoi Viate, deriasi bendar Lasea.9Amane raria vepau pasi sinai to manau. Nana amatapai pa, raria jani siniotu Yahudi pa sene raria puasa pai riewai to manau, e kariria so amatapai ea to manau. Apajoma Paulusi diono kavo sanepaja ninei maso sia e diojo,10“Maneta pa mia, isajo toapa masisi tato tatapai vea mamo, nari tanggariria mo. Nari tasamuai kariria pimasa so tane pi tatadu nesi tutir wa nei, vape tane tenam nei kota tanai.”11Vape veveru nana verut pimamuna viosa usari pai sanetiar siniotu verut vosasura pai, tutir kapten vene wa pimasa pai, rawai nana pi vitopi Paulusi kievora pa.12Vape aivoi jani ma diete va so wa pimasa pasi sievoi na jana nana raria veriewas pai, avori siniotu venana wa vepau pasia semajar ave setapai vea e sesasera ria ave senda sesirieu na bendar Feniks ave amamo senana jana nana aja raria veriewas pai. Bendar Feniks i ma aivoi pesi venana nu Kreta vetara rawa matan e vetara rawa dorau.13Nana raria jani ma wana marai pai sioriri to vesie. Apa siniotu venanaripi nana wa pasia semamo ma nari setapai ea. Apa sendaiti kamutu pai, avori setapai rebasa sasidere nu Kreta.14Vape worabua va janama diobara pai viar nana nu jani, sesauwa ve wana “Mura dorau”.15E diobara pai tiere amane wa pimasa pai. Apavo diadi so amatapai sunu wana pai va, apa amanda usara wana pai vea e amatonae wa pai dievariria usara wana pai.16Janama amatavariria rama so sasidere nu katu pesi sano pa Kauda, e na jana tutiri marabat vesiri diadi so amasarapa wa katu pai.17E sesasana wa katu pa ajai so wa pimasa pai to manau, setavit wawariri wa katu pai nana wai pai to karakuai. Aso sematai sesuira na vavotui Sirtis, avori sembiara sarawi pai e setonae wa pimasa pai dievariria usara wana pai.18Diobara pai bieba vesiri apa veito tiere amane wa pai, apa kausapa pa sengge pi saserai venana wa pimasa pai diedu pasi so rawana pai.19Nana raria vesousara pai ea pa siniotu venanaripi na wa pimasa pasia matau sendu pi saserai na sembarami pasi e senggiasi so rawana wa.20Woroi pa raria toi, amatisajo wor pai va e siverere pasi va e wana pai sio pa karakuai vea. Apavo amapir sanetiar va so nari amasamuai vesie pai.21Woroi pa raria toi ma sia vura setapi va. Apa Paulusi diosa na sene kasau rabua pa e kievo e diojo, “Maneta pa mia! Masisi menda usara ine kavo sanepaja pai to manau, e tatapai vurusu Kreta va, kasa tatere vekariria e tane pi ninesi sinai va.22Vape nine ma jono sanepaja so mia, ave amamo menggarakuai nana mene sanepaja pasi, aso siniotu pesi kota nana kasau mia nari kasa vioru va, vape wa pimasa nei andi kieriria vea.23Aso radurane pa, siniotu rora pesi riama nana Allah isom pai, andina Allah vene jau paina, diosa siwara jau,24e siniotu rora pai kievo e diojo, ‘Muetai vape moja Paulusi! Aso au ma nari rua e buosa na aropo Kaisar. Allah diono nie sane vesie pai maso au, apa kaiwasa vura vena tutiri au pasia na wa pimasa ninei nari mesamuai vesie pai, aso au.’25Apavo maneta pa mia, menggarakuai mesanemi pasi! Aso isanemitiar maso Allah, toapa nari vava jasi vura sive diadi ariri kievora maso ja pa.26Vape tata ma nari tasuiri na sasidere pa nana nu pesi.”27Nana diru veve sura e at pai amatavavoi e amatavariria vei vea nana Rawana Adria. Vape vare diru rabua pa siniotu venanaripi nana wa pimasa pasia sesanemi riruina toapa, wa pai dieriaisi dorei pa.28Apavo setu rovuki senggasie tutiri wai pai e setato rawana pai nie karija pai. Veruana toapa nie karija pai vare meter siniotu muandu. Manau na setapai topo katu, avori setato ea e veruana nie karija pai vare meter siniotu siri e vemandi sura.29E aso siniotu venanaripi na wa pimasa pasia sematai wa pai tura na rovuki jar pasi, apa sembiara kamutu pa ata nana dopui wa pai ave wa pai dievoi na reu pa. Avori setitanota tutir sanetiar ave saira e sasar.30Vape siniotu venanaripi na wa pimasa pasia sesasera ria ave sembavu vurusu wa pai. Apa sembiara wa katu pai avav so sasi pa, tutiri setawia e seto sembiara kamutu pasi nana wa po pa.31Toapa jana Paulusi kievo maso veveru nana verut pimamuna viosa usari pai tutir nie verut pimamuna pasia e diojo, “Masisi siniotu venanaripi na wa pimasa nesia senana wa nei va, mia vura ma kasa mesamuai vesie pai va.”32Apa verut pimamuna pasia setaratu wai setitavit wa katu pai e setoni dievariria.33Nana aja sasaar mo varami pa, Paulusi tuva sia vura setapi, e diojo, “Woroi pa raria sura e ata to manau, metananota vei vea, tutiri membavisi, e meta piesasi va.34Toapa jana jono kavo sanepaja maso mia, ave amamo metapi katu esa. Vava nine ma vesie so mia ave amamo mepaja ea pa. Aso nari mesamuai vesie pai e sa esi tiera kariria pesa va.”35Paulusi kievo to manau pa, kioro mamami pai avori vie nadi e tiopana vesie pai maso Allah na aropo sia vura. Janama rusasavu mamami pai, avori diani.36Apa sesanemi pa sietate riwanea, e sia vura setapi kota.37Venana wa pimasa pasia, ama vura ama pau pa amambe utin muandu e siniotu toru e vemandi sura e rim e siri.38Manau na ama vura amatapi to amamosir pa, venanaripi na wa pimasa pasia sengge gandum setadu pasi so rawana pa ave wa pimasa pai diadi so tiepisa.39Nanapa sasaar to manau pa, venanaripi na wa pimasa pasia sesajo dorei pa, vape senduin va dorei topi jana. Sesajo raimu pesi tutiri sasidere pai. Apa senggutu ave seto setonae wa pai sirieu na jana.40Apa setaratu wai kamutu pasi, avori setono kamutu pasi e simarutu na rawana pai. Toapa jana kota sendeku wai vekasie vosasuru pasi. Janama setubara sarawi pai na dopo wa pimasa pai, ave amamo wana pai sio pidiar wa pai miesosar so sasidere pa.41Vape wa pimasa pai tura na rubua vetupar pai, apa rawa wa po pai tura veito mienawar va, e wa pui pai ma bata pasi sirorai veito miesasavu.42Nana raria jani verut pimamuna pasia seto semu kaiwasa vesamuai bui pasia vura, ave amamo esia setor arei so dorei pa e setairara sia vape moja.43Vape veveru nana verut pimamuna viosa usari pai dio Paulusi siemuai vesie pai, apa dierandu sene sanepaja pai, e diemiasa siniotu diadi vior pasia senggopa papo, e setor so sasidere pa.44E maso siniotu esi pasia ma ariria nari setor so dorei pa, tutiri sendu wonggia pasi, pivai pi vevesiei vea nana wa pimasa pai. Tutiri vava vetoapa ninei, ama vura tutir vesie ne amasa na dorei wa. Wa pai siesar na diobara pai tutiri siniotu pasia setavavoi
The Seed Company