LUKA7
1Yesʉ abere amamala ɨnegena ebɨnwa byoshi eby'abwɨraga abandʉ bo bagenda abamʉhʉlɨkɨrɨtsya, mwaya mo muyi w'ɨKaperenaʉmʉ.2Ko muyi oyo kwabyaga mʉkʉlʉ mʉgʉma w'abashirikani b'aBaroma. Omʉkʉlʉ oyo abyaga awithe mʉgombe yo abyaga atsiire kʉtsɨbʉ. Omʉgombe oyo abyaga niathohire.3Omʉkʉlʉ oyo mwonvwa ebyo bandʉ bagenda abanegena kʉ Yesʉ. Aho mwathʉmɨra Yesʉ yo bangʉmwa bagʉma ba Bayuta bamʉshabe ahike alamye omʉgombe ʉwe.4Abangʉmwa abo babere bahika ho Yesʉ abyaga, mobamʉshaba kʉtsɨbʉ n'ɨnegena bathɨ: «Ʉkolere omʉndʉ oyu ebyo akʉshaba, kʉshangwa atholere ɨkolerwabyo.5Kʉshangwa ɨye atsiire ekɨhʉgo kyethʉ, kandɨ nɨ ɨye yo wathuhimbiraga esinakoki ethʉ.»6Aho Yesʉ mwagenda n'abangʉmwa abo. Abere ahika hofɨ n'enyʉmba y'omʉkʉlʉ, omʉkʉlʉ oyo mwathʉma bira bʉwe bamʉbwɨrɨre Yesʉ bathɨ: «Nyinya-kowethʉ, uthayiluhaya ihika, kʉshangwa ingye nyɨthatholere ɨwe wɨngɨre omwaye.7Kyo kɨthaleka nyithayakushondya ngyowene, hewethuwe ɨwe negena kɨnwa kɨgʉma kuroshi omʉgombe aye alama.8Kʉshangwa na ngye nyiwithe bakʉlʉ bo bananyɨthegeka. Na ngye kuthyo, nyiwithe bashirikani bo nyɨnathegeka. Nyamabwɨra mʉgʉma nyɨthɨ: “Genda!” Nɨagenda. Na nyamabwɨra ʉndɨ nyɨthɨ: “Hika!” Naye niahika. Kandɨ, nyamabwɨra omʉgombe aye nyɨthɨ: “Kola kɨno!” Naye nɨakolakyo.»9Yesʉ abere onvwa ebyo mwashweka bʉshana n'omʉkʉlʉ w'abashirikani oyo. Mwabɨndʉkɨra omuhindano w'abandʉ bo babyaga bamukwamire na mwanegena athɨ: «Enyɨbabwɨra, ko mo kɨhʉgo kyoshi ky'iIsiraeli nyithetsi nyashʉnga mʉndʉ wa lwɨkɨrɨtsyo lʉnene ng'oyu.»10Abo bathʉmawa n'omʉkʉlʉ w'abashirikani mobashʉba eka. Mobeya omʉgombe nialamire.11Honyuma kw'aho, Yesʉ mwaya mʉ muyi mʉgʉma ow'agenda ahʉlwamo Naina. Abɨga bʉwe na muhindano mʉnene wa bandʉ mobagendania naye.12Abere ahika hofɨ n'olukyo lw'orʉba lo lwabyaga luthimbire ko muyi, mwahindana na bandʉ bo bagenda abayatha kinda kya mʉtsana. Omʉtsana oyo abyaga mwana kyʉsha kya mʉshʉmbakatsɨ. Bandʉ bangɨ b'omo muyi oyo nɨbaherekeretsye omʉshʉmbakatsɨ oyo.13Nyinya-kowethʉ abere ashʉnga omʉshʉmbakatsɨ oyo, mwamʉfwɨra shashi kʉtsɨbʉ, mwamʉbwɨra athɨ: «Ʉthalɨraga!»14Yesʉ mwayɨfʉnda hofɨ n'esanduku eyo, mwakola kʉro. Abandʉ bo babyaga bahekirero mobimana. Yesʉ mwanegena athɨ: «Mʉtsana, enyɨkʉhamʉla, bʉka!»15Omʉtsana yo wabyaga afwire mwabʉka. Mwikala mwathanga ɨnegena. Yesʉ mwamʉheretsya nyinya ʉwe.16Abandʉ boshi mobafwa bʉba, mobasingya Gongo nɨabanegena bathɨ: «Mʉmɨnyeretsɨ mʉkʉlʉ amahʉlʉka mo kathi kethʉ!» Mobashʉba negena bathɨ: «Gongo mwahika ɨshabʉla abandʉ bʉwe!»17Omwatsɨ w'ebyo Yesʉ akolaga mwagenda mo kɨhʉgo kyoshi ky'iYuteya n'omo bɨndɨ bɨhʉgo byoshi byo byabyaga bithimbire kʉkyo.18Ebɨnwa byoshi ebyo abɨga ba Yoani mobamʉfʉlɨrabyo. Bʉshana n'ebyo Yoani mwabɨrɨkɨra mʉbo mo babɨrɨ.19Mwathʉmabo eyɨrɨ Nyinya-kowethʉ bamʉbʉtsye bathɨ: «Ɨwe, we Masia wahikire? Kʉtse thʉlɨnde ʉndɨ?»20Abɨga abo mobahika ho Yesʉ abyaga. Mobamʉbwɨra bathɨ: «Yoani Mubatisya amathʉthʉma yo ʉlɨ thʉkʉbʉtsye thʉthɨ: “Ɨwe, we Masia wahikire? Kʉtse thʉlɨnde ʉndɨ?”»21Mo ndambi eyo Yesʉ mwalamya bandʉ bangɨ bo bagenda abagalwa n'amakoni, n'abo babyaga bɨrema, n'abo babyagako abatsɨmʉ. Na mwaha kuthyo esombumi s'olʉkogo lw'ɨshʉba lola.22Honyuma kw'aho, Yesʉ mwashʉbɨtsya abɨga ba Yoani athɨ: «Mʉgende mʉyabwɨre Yoani ebɨnwa mwamashʉnga n'ebyo mwamwonvwa. Esombumi sahera esɨlola, n'ebɨrema byahera ebɨgenda, n'ababenzɨ abetsɨbwa, n'abathwithwi bahera abonvwa, n'abaholi abalubukibwa, n'abatsene abafʉlɨrwa eNgʉlʉ Mbʉya. 23Agashanɨrwe omʉndʉ yo ʉthɨndahetsye olwɨkɨrɨtsyo lʉwe mw'ingye!»24Abɨga ba Yoani abo mobashʉbʉla. Yesʉ mwathanga ɨbwɨra muhindano w'abandʉ omwatsɨ wa Yoani athɨ: «Mwayaga mo mbwarara nɨomʉyashʉngayo ku ki? Nɨ lʉsheke lo lunathenganibwa n'omʉyaga? Kiro!25Ewono mwayaga lola ku ki? Mʉndʉ ambithe ngɨmba s'ekɨtsɨro kɨnene? Kiro! Abo banagenda abambala esongɨmba s'ekɨtsɨro kɨnene n'ikala mo bushoki, bikere mo manyʉmba w'obwamɨ!26Mwayaga lola ku ki? Mʉmɨnyeretsɨ? Ega, enyɨbabwɨra ɨye alengitsye mʉmɨnyeretsɨ.27Na bʉshana n'oyo, bishakirwe kw'ɨye mo Mashako Abuyirire bɨthɨ:“Mwonvwe! Nyathʉma omugendi aye akʉthange embere,bʉshana akʉkometsye enzɨra. ”28«Enyɨbabwɨra, mo bandʉ boshi b'omo kɨhʉgo kɨno, mʉthalɨ yogulengitsye Yoani. Hewethuwe namo bɨnalɨ bithyo omʉke kʉtsɨbʉ mo Bwamɨ bwa Gongo, oyo nɨ mʉkʉlʉ kw'ɨmʉlenga.»29Abandʉ boshi n'abakarani b'ekoli bo bagenda abahʉlɨkɨrɨtsaga amakangɨrɨtsya wa Yoani, mobamɨnya ko Gongo anagenda akola ebɨthʉnganene ihika ko ndambi mobabatisibwa na Yoani.30Hewethuwe aBafarisayo n'abakangɨrɨtsya b'oMʉgomba ɨbo mobathɨnda ebyoshi Gongo ashondaga ɨkolerabo. Bʉshana n'ekyo mobayɨthɨndɨra ibatisibwa na Yoani.31Yesʉ mwashʉba negena athɨ: «Abandʉ ba munobwire nyangalinganiabo na ndɨ? Na bashoshekanibwe na ndɨ?32Bashoshire ng'abana bikere mo mbʉga nɨabathelemeranako bathɨ:“Mothʉbabʉhɨra akapʉlɨ momʉthalɨ omʉshatha!Mothubwimbira nyimbo sa kɨrɨro momʉthalɨ omʉlɨra!”33«Kʉshangwa Yoani Mubatisya mwahika nianayima akalyo, niayima n'erɨshoma etifayi ngendo nyɨngɨ. He momwagenda omʉnegena mʉthɨ: “Alɨko mʉtsɨmʉ.”34Ingye Mʉgala w'oMʉndʉ nyabere nyahika, enyirya n'ɨshoma, nemwe omʉnegena mʉthɨ: “Shʉnga omʉndʉ oyu! Nɨ wa kahehu kandɨ nɨ mukundirya, kandɨ nɨ mwira w'abakarani b'ekoli n'abandɨ bakoli b'ebɨtsɨbʉ.”35Hewethuwe abandʉ boshi bo bɨkɨrɨtsye Gongo, abanashʉnga k'obwenge bʉwe bʉthʉnganene.»36Kɨro kɨgʉma Mufarisayo mʉgʉma mwabɨrɨkɨra Yesʉ ahike alye ko kalyo mo nyʉmba yɨwe. Yesʉ mwɨngɨra mo nyʉmba y'oMufarisayo oyo mwikala. Na mwathanga irya.37Mo muyi oyo mwabyaga mʉkatsɨ mʉgʉma mukoli w'ebɨtsɨbʉ. Omʉkatsɨ oyo abere onvwa ko Yesʉ alya ko kalyo mo nyʉmba y'oMufarisayo oyo, mwahikamo niahekire murangi wa marasi wa kɨtsɨro kɨnene.38Mwimana enyuma ya Yesʉ hofɨ n'ebɨshando bɨwe nɨanemʉlɨra. Emishonia yɨwe moyathanga ɨgeretsya ebɨshando bya Yesʉ. Honyuma kw'aho mwashangʉlabyo mo nzwɨrɨ sɨwe. Mwafʉmbatha ebɨshando bya Yesʉ n'ihakabyabyo amarasi ayo. Mʉkatsɨ mʉgʉma mukoli w'ebɨtsɨbʉ anabya ebɨsando bya Yesʉ mo mishonia yɨwe39oMufarisayo oyo wabɨrɨkɨraga Yesʉ abere ashʉnga ebyo, mwathanga ɨnegena mo mʉthɨma ʉwe athɨ: «Omʉndʉ oyu angabere mʉmɨnyeretsɨ kundu, angaminyire omʉkatsɨ yo ʉmʉkola-kolako nga alɨ athɨ. Kandɨ angaminyire k'omʉkatsɨ oyu nɨ mukoli w'ebɨtsɨbʉ.»40Yesʉ mwabwɨra oMufarisayo oyo athɨ: «Simoni, nyiwithe kɨnwa ky'ɨkʉbwɨra.» Simoni naye mwashubya athɨ: «Mʉkangɨrɨtsya, negena.»41Yesʉ mwanegena athɨ: «Kwabyaga bandʉ babɨrɨ bo babyagako mwinda wa mʉndʉ mʉgʉma. Mʉgʉma wa kʉbo abyagako mwinda wa tinari magana athano, n'ogʉndɨ abyagako mwinda wa tinari makumi athano.42Abandʉ babɨrɨ abo, ng'oko bathabyaga n'obuthoki bw'erɨfʉha eminda eyo, oyo wabwekagabo mwashashɨra ababɨrɨ abo. Ewono, mo bandʉ babɨrɨ abo, nɨ ndɨ yo watsɨɨraga kʉtsɨbʉ omwindiki?»43Simoni mwashubya athɨ: «Enyɨganɨtsya nyɨthɨ nɨ yo washashɨrawa omwinda mʉnene.» Yesʉ mwamʉbwɨra athɨ: «Wamashubya kʉbʉya.»44Honyuma kw'aho, Yesʉ mwabɨndʉkɨra eyo omʉkatsɨ abyaga, mwabwɨra Simoni athɨ: «Wanamashʉnga omʉkatsɨ oyu? Monyɨngɨra omwawe mogʉthalɨ oʉnyɨha metsi w'ɨnaba ko bɨshando. He omʉkatsɨ oyu ɨye, amanabya ebɨshando byaye mo mishonia yɨwe, na amashangʉlabyo mo nzwɨrɨ sɨwe.45Mogʉthalɨ ʉnyɨfʉmbatha mw'ɨnyɨketsya. He omʉkatsɨ oyu, ho nyithahikira mo nyʉmba eno, athathangire alika ɨfʉmbatha ebɨshando byaye.46Mogʉthalɨ unyihakabya mafʉtha ko muthwe aye, he ɨye mwanyɨhakabya marasi ko bɨshando byaye. 47Bʉshana n'ekyo, enyɨkʉbwɨra nyɨthɨ: namo ebɨtsɨbʉ by'omʉkatsi oyu nɨ bɨngɨ, nyamaganyɨra ebyoshi. Nɨ bʉshana n'ekyo akangya kw'anyanzire kʉtsɨbʉ. Hewethuwe omʉndʉ yo wamalire ɨganyɨrwa kʉke, ananza kʉke.»48Aho Yesʉ mwabwɨra omʉkatsɨ oyo athɨ: «Ebɨtsɨbʉ byawe byamaganyɨrwa.»49Abandɨ bandʉ bo bagenda abalya hagʉma na Yesʉ mobathanga ibutsania ɨbo kw'ɨbo bathɨ: «Oyu nɨ ndɨ yo wangaganyɨra ebɨtsɨbʉ?»50Hewethuwe Yesʉ mwabwɨra omʉkatsɨ oyo athɨ: «Olwɨkɨrɨtsyo lwawe lwamakʉshabʉla. Genda mʉ bʉholo.»
The Seed Company