LUKA14
1Kɨro kɨgʉma ky'eSabato Yesʉ mwayalya ku kalyo mo nyʉmba ya mʉgʉma w'oko bakʉlʉ b'aBafarisayo. Abandʉ bo babyaga mo nyʉmba eyo nɨabayɨthegeretsya Yesʉ yo kʉtsɨbʉ bʉshana balole ebyo ashondya ɨkola.2Shʉnga! Embere sa Yesʉ habyaga mʉndʉ mʉgʉma omʉbɨrɨ ʉwe abyaga nɨalwere bukoni bw'ibimbabimba.3Yesʉ mwabʉtsya abakangɨrɨtsya b'oMʉgomba n'aBafarisayo athɨ: «oMʉgomba ethʉ anahamulire kʉtse ahangire ilamya mʉndʉ mo kɨro ky'eSabato?»4Hewethuwe mobayumya. Aho Yesʉ mwakola ko mukoni oyo, mwamulamya n'ɨmʉbwɨra athɨ agende.5Honyuma kw'aho Yesʉ mwashʉba bʉtsyabo athɨ: «Mʉgʉma mw'imwe alɨ awithe mʉgala ʉwe kʉtse ekɨmasa kɨwe kyo kyamathogera mo kyuna kɨrɨmo metsi aho n'aho nɨathɨyɨhʉthe iyathokyakyomo na mokyangabya kɨro ky'eSabato?»6Nabo mobathakotsya ishubya kw'ekyo.7Yesʉ mwayɨthegeretsya bobakokibawa ko abashombola emyanya y'embere. Aho mwahabo amahano ano athɨ:8«Mo ndambi mʉndʉ amakʉbɨrɨkɨra ko linye lya buheruki ʉthagenda ow'ikala ko bifumbi by'embere. Kʉshangwa mo bobathabɨrɨkɨrwa mwanganabya mʉndʉ w'olʉkengerwa kw'ɨkʉlenga.9N'omʉndʉ w'olʉkengerwa oyo amahika, oyo ʉthababɨrɨkɨra imwe babɨrɨ amahika n'ɨkʉbwɨra athɨ: “Shigira oyu y'ekifumbi.” Aho nɨwafwa shoni bʉshana n'iyikala enyuma.10Hewethuwe wamabɨrɨkɨrwa niwayikala enyuma. N'omo ndambi yo ʉthakʉbɨrɨkɨra abya ahika n'ɨkʉbwɨra athɨ: “Mwiraye, hika wikale embere.” Aho abandʉ boshi bomulya nabo bangakushikya.11Kʉshangwa obʉlɨ mʉndʉ yo unayihamya andakehibwa, hewethuwe, yo unayikehya ɨye andahamibwa.»12Honyuma kw'aho Yesʉ mwabwɨra oyo wamʉbɨrɨkɨraga athɨ: «Mo ndambi ogukomya kalyo k'elinye, kangabya k'omo mwɨshɨ kʉtse k'olʉlengero, ʉthagendaga ʉbɨrɨkɨra bira bawe kʉtse bagala b'enyu kʉtse babuthi bawe kʉtse abahimbani bawe bashoki basha, kʉshangwa wetsi ko nabo kuthyo bangakʉbɨrɨkɨra, aho niwabya nga bamakʉfʉha.13Hewethuwe ʉlɨ ogukomya akalyo k'elinye, ʉgende ʉbɨrɨkɨra abatsene, ebɨrema, bobashyonogera n'esombumi.14Aho, wamakola uthyo wandagashanɨrwa, kʉshangwa abandʉ abo bathawithe by'ɨkʉshʉbʉlɨtsya. Gongo yo wandakʉshʉbʉlɨtsya ko ndambi abakolaga ebɨthʉnganene bandalubuka.»15Mʉndʉ mʉgʉma w'oko bobagendaga abalya hagʉma na Yesʉ abere amamala ɨonvwa ebɨnwa ebyo mwabwɨra Yesʉ athɨ: «Agashanirwe omʉndʉ yo wandalya ko kalyo mo Bwamɨ bwa Gongo!»16Yesʉ mwamʉshʉbɨtsya mo mushinga ono athɨ: «Mʉndʉ mʉgʉma mwatheka kalyo kangɨ k'elinye na mwabɨrɨkɨra bandʉ bangɨ.17Endambi y'erirya yabere yahika, mwathʉma omukoli ʉwe ayabwɨre bobathabɨrɨkɨrwa athɨ: “Ewo muhike kʉshangwa ebyoshi byamalire ithegekanibwa.”18Hewethuwe bʉlɨ mʉndʉ, mwathanga ɨyɨhambʉlɨtsya. Omʉmbere mwabwɨra omukoli oyo athɨ: “Monyagulire ɨshwa, enyishondya ɨyalola kʉlyo. Enyɨkʉshaba ʉnyɨshashɨre.”19N'ogʉndɨ mwanegena athɨ: “Monyagulire bɨmasa ikumi by'ɨrɨmamo, enyishondya ɨyalola nga byanganakotsya ɨkola. Enyɨkʉshaba ʉnyɨshashɨre.”20«N'ogʉndɨ mwanegena athɨ: “Nyaherukaya lɨno-lɨno, bʉshana n'ekyo nyithangahika.”21«Honyuma kw'aho omukoli oyo mwashʉba eyo nyinya-kowabo abyaga n'ɨmʉfʉlɨra ebyoshi ebyo. Aho omwenye enyʉmba abere onvwa ebyo, mwatsɨbʉka n'ɨbwɨra omukoli ʉwe athɨ: “Genda tsʉba mo mbʉga n'omo nzɨra s'omo muyi, bʉshana ʉlethe abatsene na bobashyonogera, n'esombumi n'ebɨrema, wɨngɨtsyebo mʉno.”22Honyuma kw'aho omukoli oyo mwashʉbʉla n'ɨnegena athɨ: “Nyinya-kowethʉ, ebyoshi ʉthahamʉla nyɨkole, nyamakolabyo. Hewethuwe hakɨnalɨ mwanya.”23Aho nyinya-kowabo mwabwɨra omukoli ʉwe oyo athɨ: “Genda mo nzɨra s'othʉnzalɨ, n'omo mɨkɨkɨ y'amashwa. Abandʉ bo weyayo uhathikaniebo bɨngɨre omwaye nɨmo enyʉmba aye y'otsula.24Ega! Enyɨbabwɨra hathalɨ mʉndʉ n'omʉgʉma w'oko bobabɨrɨkɨrawa yo wandagetsya ko kalyo kaye.”»25Kɨro kɨgʉma muhindano mʉnene wa bandʉ mwakwama Yesʉ. Mwabɨndʉka n'ɨbwɨrabo athɨ:26«Omʉndʉ yo ushondya ɨnyɨkwama anyɨtsɨɨre kʉlenga ishe, na nyinya, na mʉkatsɨwe, n'abana bʉwe, na bagala babo na balɨ babo. Na kandɨ atholere nɨanyɨtsɨɨra kʉlenga obʉyɨngo bʉwe. Bɨthalɨ bithyo athangabya mwɨga aye.27Omʉndʉ yo uthahekire omʉsalaba ʉwe n'ɨnyɨkwama athangabya mwɨga aye.28«Mo ndambi mʉgʉma wa kw'imwe yo ushondya ihimba nyʉmba ya ngorofa, lɨtholere nɨathanga ikala n'ɨkola emɨganzo ng'anganabona esofaranga sosandamala omʉlɨmo oyo.29He amahimba omʉsɨngɨ, honyuma kw'aho amalemwa iotsutsya enyʉmba eyo, abandʉ boshi bo bandagenda abashʉnga kʉro nɨbandagenda abamʉsheka,30nɨabanegena bathɨ: “Omʉndʉ oyu mwathangɨra ihimba enyʉmba, hewethuwe mwalemwa iotsutsyaro.”31«Mo ndambi mwamɨ mʉlebe ashondya ɨyalwa n'ogʉndɨ mwamɨ, lɨtholere nɨathanga ikala, n'ɨlola nga abashirikani bʉwe bɨhʉmbɨ ikumi nga angana kinda mulikyabo yo uwithe abashirikani bɨhʉmbɨ makumi abɨrɨ?32Amamɨnya kw'athangakotsya, nɨathʉmɨra mulikyabo oyo yo bagendi nɨakɨnalɨ hale bʉshana n'ɨmʉbʉtsya ng'ɨbo babɨrɨ bangabona obʉholo bo bathɨ.33Nemwe kuthyo, hathalɨ mʉndʉ mo kathi kenyu yo wangabya mwɨga aye alɨ athangamika ebyoshi awitheko.»34Yesʉ mwashʉba negena athɨ: «Omunyu anabya kɨndʉ kikwirire. He omunyu amahetsya obʉshɨ bwawo nɨ ki kyo kyangahirwa mʉwo nɨmo ashʉba loka?35Omunyu oyo athakɨtholere ibye ko kɨthaka ibye ko bʉyɨnʉ. Anagʉshwa embʉga. Yo ʉlɨko mathwi w'ɨonvwa onvwe!»
The Seed Company