Yoani12
1Bɨro ndathʉ embere y'ePasaka, Yesʉ mwahika ɨBetanɨa muyi wabo Lasaro yo alubukaya ɨthoka mo baholi.2Oko, mobamʉthekera kalyo ka lʉlengero. Marata agenda athekʉlɨrabo, na Lasaro abyaga mʉgʉma wa ko bo balɨraga hagʉma na Yesʉ.3Marɨa mwathola kɨtse kya litere ngʉma ya marasi wa kɨtsɨro kɨnene. Amarasi ayo akomibawa mʉ mʉshanga wa narito mʉsha. Marɨa mwahakawo ko bɨshando bya Yesʉ n'ɨshangʉlabyo mo nzwɨrɨ sɨwe. Enyʉmba yoshi moyotsula akabeho k'amarasi ayo.4Aho, Yuta Isikariote mʉgʉma wa ko bɨga ba Yesʉ, oyo wamʉhothera, mwanegena athɨ:5«Bʉshana na ki mobathalɨ abagʉtsya amarasi aya wo bɨtsere magana ashathʉ bya tinari n'ɨgabɨrabyo abatsene?» 6Anegenaga athyo ɨthalɨ bʉshana n'ɨfwɨra abatsene bo shashi hewethuwe nɨ bʉshana abyaga mwɨtsɨ. N'ɨye yo wagendaga abɨka eshaho y'esofaranga na agenda ashoshola ko sofaranga etho.7Aho Yesʉ mwanegena athɨ: «Mumulike! Akola athyo bʉshana n'ekɨro ky'erɨthabwa lyaye.8Abatsene omunabya nabo ebɨro byoshi, he ingye, muthindabye nangye ebɨro byoshi.»9Muhindano mʉnene wa Bayuta mobonvwa ko Yesʉ alɨ ɨBetanɨa. Mobayayo, ɨthalɨ bʉshana n'ɨlola kʉ Yesʉ kuroshi, hewethuwe na bʉshana n'ɨya lola kʉ Lasaro yo walubukibawa ɨthoka mo baholi.10Aho, abakʉlʉ b'abaheri mobahamʉla ɨthɨsa Lasaro naye,11kʉshangwa nɨ bʉshana naye Bayuta bangɨ mobayɨhɨgʉla kʉbo na mobɨkɨrɨtsya Yesʉ.12Bwabere bwakya, omuhindano mʉnene ow'ahikaga ko linye ly'ePasaka, mobonvwa ko Yesʉ alɨ mo nzɨra aya ɨYerʉsalemʉ.13Mobatsɨmba mɨthahɨ ya mingasi na mobaya mʉlɨndɨrɨra. Bagenda abahambala bathɨ:«Hosana! Agashanɨrwe yo uhika kw'ɨtsɨna lya Nyinya-kowethʉ!Agashanɨrwe omwamɨ w'iIsiraeli.»14Yesʉ mweya kyana kya pʉnda, mwikala kʉkyo nga ko kushakirwe kʉthɨ:15«Mʉthʉbahaga imwe bikalani b'iSayuni!Mʉlole, omwamɨ enyu ahika, ikere kʉ kyana kya pʉnda.» 16Mo kathambi ako abɨga ba Yesʉ mobathonvwa ebyo bɨtsʉka, hewethuwe abere amamala ɨshʉngɨka mo lʉkengerwa mobɨbʉka ko ebɨnwa ebi bishakirwe kw'ɨye na bathyo ko bamamʉkolera.17Omuhindano w'abandʉ bo babyaga hagʉma na Yesʉ mo ndambi abɨrɨkɨraga Lasaro athoke mw'ɨsɨnda n'imulubukya bagenda ababwɨra abandɨ ebyo bithabya.18Bʉshana n'ekyo bandʉ bangɨ mobaya mʉlɨndɨrɨra, kʉshangwa babyaga nɨbamonvwa kw'amakangya ekɨmɨnyɨkalo ekyo.19Aho, aBafarisayo mobabwɨrana bagʉma kʉ bandɨ bathɨ: «Mʉlole, hathalɨ kyo mwangakotsya. Abandʉ boshi bamukwamire!»20Kwabyaga Bakiriki bagʉma bo bɨrʉkɨraga ɨYerʉsalemʉ bʉshana n'ɨya ramya Gongo mo kɨro ky'elinye.21Mobayɨfʉnda ahalɨ Filipo w'oko muyi w'iBetesaita mo kɨhʉgo ky'iNgalilaya n'ɨmʉbwɨra bathɨ: «Nyinya-kowethʉ, othushondya ɨshʉnga Yesʉ.»22Filipo mwayabwɨra Ndereya yo ebɨnwa ebyo, honyuma kw'aho, ababɨrɨ mobayabwɨra Yesʉ.23Yesʉ mwashʉbɨtsyabo athɨ: «Endambi y'erisingya oMʉgala w'oMʉndʉ yamahika.»24Kwenene, kwenene enyɨbabwɨra, embulu y'engano ɨthathogere ahishi na ithafwire inabya yoyene. Hewethuwe yamafwa ɨnaheka mbulu nyɨngɨ.25Yo utsiire obʉyɨngo bʉwe anahetsyabo, hewethuwe yo ubayire obʉyɨngo bʉwe hano ishi andabya nabo ihika ko kɨro andabona obʉyɨngo bw'ekera n'ekera.26Mʉndʉ amashondya ɨnyɨkolera, anyɨkwame. Ahoshi nyandabya, nɨ aho h'omukoli aye naye andabya. Thatha andashikya yo ʉnyɨkolera.27Lɨno omʉthɨma aye agangaganga. Nyithetsi nga nyɨnegene nyithi ki. Thatha nyɨshabʉle ko ndambi eno. Hewethuwe nyahikaga bʉshana n'endambi eno.28Thatha, singya erɨtsɨna lyawe. Aho, mʉlenge mwathoka mo lʉbʉla nɨanegena athɨ: «Nyamasingyalyo na nyandashʉba singyalyo.»29Omuhindano w'abandʉ bo babyagaho bo bonvwaga omʉlenge oyo mobanegena bathɨ: «Nɨ muhindo wa buthuku.» N'abandɨ mobanegena bathɨ: «Nɨ malaɨka yo ʉthagenda asɨmola naye.»30Hewethuwe Yesʉ mwabwɨrabo athɨ: «Omʉlenge athathonvwɨka bʉshana nagye, hewethuwe bʉshana nemwe.31Eno yo ndambi ekɨhʉgo kɨno kyasohwamo. Eno yo ndambi omuthegeki w'ekɨhʉgo kɨno ahɨmwa.32Hewethuwe ingye, nyandabya nyashʉmbwa ɨthoka hano ishi, nyandayɨkʉrɨrako abandʉ boshi.»33Ɨtsʉkɨra ebɨnwa ebi Yesʉ akanganaya ng'afwa lʉholo lʉlɨ lʉthɨ.34Omuhindano mwamʉshʉbɨtsya athɨ: «Mothwɨga mo mashako w'oMʉgomba mbʉ Kirisito andabyaho kera n'ekera. Aho, ʉthɨ ko ʉnegena ʉthɨ lɨtholere oMʉgala w'oMʉndʉ nɨashʉmbwa mo kyanya? N'oMʉgala w'oMʉndʉ oyo nɨ ndɨ?»35Yesʉ mwashʉbɨtsyabo athɨ: «Ekyakakala kɨkɨnalɨ mo kathi kenyu kʉ ndambi nge. Ko mʉkɨnalɨ n'ekyakakala, mʉgende nɨmo omwitsimya athabashwɨkaga. Kʉshangwa yo ʉgenda mo mwitsimya athamɨnya eyo aya.36Aho mwɨkɨrɨtsye ekyakakala mo ndambi mʉkɨnalɨ n'ekyakakala, nɨmo mwabya bana b'ekyakakala.» Yesʉ abere amamala ɨbwɨrabo ebɨnwa ebyo, mwayɨgendera n'iyibisha hale n'omuhindano oyo.37Namo Yesʉ anakolaga bɨmɨnyɨkalo bɨngɨ embere sabo, mobathamwɨkɨrɨtsya38bʉshana ebɨnwa byanegenawa n'omʉmɨnyeretsɨ Isaya bɨno bɨbererere:«Nyinya-kowethʉ, nɨ ndɨ yo wɨkɨrɨtsyaga ebyo thwanegenaga?Na nɨ ndɨ yo wakumbulirawa emɨkolano y'amaka wa Nyinya-kowethʉ?» 39Omʉmɨnyeretsɨ Isaya mwashaka ekyangalekire nɨbathɨkɨrɨtsya athɨ:40«Gongo mwatsɨba amesho wabo na mwatsibuhya emɨthɨma yabo,bʉshana bathalolaga n'amesho wabo,n'emɨthɨma yabo ɨthonvwaganɨmo bathɨbɨndʉkenangye nyangalamitsyebo?» 41Isaya anegenaga ebɨnwa ebi, kʉshangwa mwashʉnga olʉkengerwa lwa Yesʉ, na mwasɨmola ko myatsɨ yɨwe.42Hewethuwe bangɨ ba mo bakʉlʉ b'aBayuta mobɨkɨrɨtsya Yesʉ. Bʉshana n'erɨʉbaha aBafarisayo, bathagenda abayikangya ko bamɨkɨrɨtsya, bagenda abʉbaha erɨhɨwa mo sinakoki.43Abakʉlʉ abo babyaga nibatsiire olʉkengerwa lo luthokire ko bandʉ kʉlenga olʉkengerwa lo lʉthoka kʉ Gongo.44Aho Yesʉ mwahambala athɨ: «Oyo wamanyɨkɨrɨtsya, athalɨ ingye amɨkirɨtsya, hewethuwe amɨkɨrɨtsya yo wanyɨthʉmaga.45N'oyo wamanyɨshʉnga nɨamashʉnga na ko yo wanyɨthʉmaga.46Ingye nyahikaga hano ishi nga kyakakala, bʉshana bʉlɨ mʉndʉ yo ʉnyɨkɨrɨtsye athabyaga mu mwitsimya.47Mʉndʉ amonvwa ebɨnwa byaye buthashikyabyo, nyɨthalɨ ingye nyandamʉsoha. Kʉshangwa nyithahikaga ɨsoha ekɨhʉgo hewethuwe nyahikaga bʉshana n'ɨshabʉla ekɨhʉgo.48Yo ʉnyɨthɨnda na athalɨ akokya ebɨnwa byaye andasohwa ɨkwamana nabyo. Ekɨnwa enyɨnegena kyo kyandamʉsoha ekɨro ky'enduli.49Kʉshangwa monyɨthalɨ enyɨnegena kʉ maka aye ngyowene, hewethuwe Thatha yo wanyɨthʉmaga yo wanyɨhamʉlaga ebyo nyanganegena n'ɨkangɨrɨtsya.50Nyetsi kw'oMʉgomba ʉwe analetha obʉyɨngo bw'ekera na kera. Bʉshana n'ekyo, ebɨnwa enyɨnegena, enyɨnegenabyo nga ko Thatha anyɨhamʉlaga.»
The Seed Company