Read Taitus 2

Taitus2

Taitus mpa kil kiling plan tu kin nangkwor a mel nangkwor pa eng tu rpmi wor

¹Ti yangkipm a kitn Taitus laron pa, mpa kitn laron or yangkipm aklale a Maur Wailen.²Tu mel nangkwor pa kitn kiling planten kolkil: - tu mpa lok ipaar tu alntu pa rki riworwor, - tu mpa rki kol tu wail wail, eng mpa tu ri pa, tu orngwatneikgenten, - tu mpa rki wontrakole, - tu mpa itni titnongket ukipma yangkipm aklale a Maur Wailen, - tu mpa rkul nikgwalpm a plan ipma wor wasrongen tu wrongkwail iklale, - tu mpa wa itni titnongket eng rki kaikuten.
Tu mel nangkwor pa, mpam kitn kiling planten kolpake.

³Wa tu kin nangkwor pa, mpa kitn kiling planten kolpa yat pake: - mpa tu rpmi wor kolen kin wor a ukipma Maur Wailen, - ampake tu la yangkipm elyirokgel mlaur, - ampake tu il u titno pa, atom titno pa. - Ampake tu ntokg kolpa, mpa tu kiling plan kuina ur a wor kolti.

Taitus kil mpa kiling plan tu warimpen pa tu rpmi wor

⁴Atom mpa tu kin nangkwor pa tu irowonel tu kin warimpen - eng mpa tu ntokg nikgwalpm wor kai tu nanwatnom alntuwen, -⁵eng mpa tu rki rukis wor, - eng mpa tu lok ipaar tu alntu, - ampake tu ngkli rkul kipman ur ai. - Tu mpa ikwap timplowis wor kolti, eng ikglen nanwatnom alntu a orngwatneikgen kipman alntu. - Mpa tu kutnun yangkipm a tu kin nangkwor lanaken pa. Kalpis pa, tu mlaur ri kolpa, mpa tu ik nokgel yangkipm a Maur Wailen pa la, palpa ake aklale.

⁶Tu kipman warimpen mpam wa kitn laniken kolpake, la mpa tu lok ipaar tu alntu.

Taitus kil mpa plan mrangkum wor eng tu Krit

⁷Ti kai kweikwei wrongkwail pa, mpam kitn alkitn Taitus ti planten mrangkum wor, eng mpa tu ri kwap wor a kitn ak pa, atom mpa tu kutnun. Yangkipmok a kitn la ngkli pa, kitn ngkli iklale kolti, kolen warim nangkwor.⁸Kai oklala akitnen pa, mpa kitn oklala wontrakole kolti, eng ake mpa melnum ur rkiweitn la oklala akitnen pa kai ar pa. Kil elukgen oklala akitnen pa, ikga kil numpaipm, eng kil lawo kalpmlel kolti.

Tu melnum a akwap kalpmilel orngwatneikgen mring ur pa, tu mpa itning nungkulkg ikwap wor

⁹Tu melnum a akwap kalpmlel orngwatneikgen mring ur pa, mpa kitn kiling planten kolkil: - tu mpa orngwatneikgen mring alntuwen pa eng kweikwei wrongkwail, - tu mpa no worel tu mring alntuwen pa, - ake mpa tu ilmpokel yangkipmok kuina ur a tu la pa. -¹⁰Ake mpa tu ik ikgwam kweikwei a mring alntuwen pa wris a wris pa, - mpa tu ikwap wor ikgilen kweikwei a mring alntuwen pa kol kweikwei alntuwen, - Mpa tu ikwap wor eng mpa tu wrong kin kipman riwen kolpa, mpa tu ikwonilmpen la, yangkipm a Maur Wailen, melnum a pikekg akawiyo pa, pa wor wrisen.

Mentepm mpa kutnun nikgwalpm a Maur Wailen kolti

¹¹Am pikekg ipma wor a Maur Wailen kil alkil planto a angklinso pake, atom ari kil ukwa Sisas Krais pa nar eng akarmpen paipmpaipm a mentepm wrong kin kipman wrongkwail.¹²Ipma arein alkil pa ak lanako la, mentepm elngen kweikwei paipm a mentepm antokg a ake ak noworel Maur Wailen pa. Mpa wa mentepm elngen ipma wasrongen kuinaur a mentepm antokg itna kanokg a ti. Mpa mentepm ilok ipaar mentepm almentepm ti rpmi ute wor, mpa tu wrong kin kipman uwi wor lawo. Rpmi kutnun nikgwalpm a Maur Wailen kolti, eng mpa Maur Wailen uwi wor lawo, kolpa ikngklei wang a rpmi kanokg ti.¹³Eng ntei, mentepm ariwe la Sisas Krais ikga nar nimpokgen klalen wail, ti mentepm ikga itopen paipm. Ti mentepm nungkwangen wang wail alkil pa rpmi. Kil pa Maur Wailen almentepmen a antiwe titnongket, melnum a pikekg amo akawiyo.¹⁴Kil uk num alkil ti akarmpen paipmpaipm wrongkwail amentepmen, ak angklinso, eng ake mpa mentepm ngko kai paipmpaipm, ak klak ipma wunen amentepmen pa palng wriwen wor. Kil takweiyo eng wrong kin kipman alkilen la mentepm ikwap nikgwalpm rkekgen, eng ntokg nikgwalpm wor wor kolti.

¹⁵Am kitn uwi ok a kupm Pol kil ik kiling planten yangkipm kweikwei a kupm niranteitn kil. Kitn ik titnongketel tu eng tu kutnun yangkipm kil a Maur Wailen pikekg alkeitn la kitn laron titnongket naki tu. Wa kitn antiwe la yangkipm kil titnongket, eng iklok tu mlaur a ake katnun yangkipm kil. Mla ur la elukgenteitn pa, kitn ampur atning pa.