Lee Yangkipm Ampen 7

Yangkipm Ampen7

Wrong kin a kipman wailet paipm ai kamel kamel a Isrel (144,000) a Maur Wailen anel kla alkilen ak amprinsen

¹Kupm ari kweikwei pa plalng, wa kupm wa ari maur akwapel wikgwikg a Maur Wailen pa tunteng itna ak awiye tungtangkem wikgwikg a kanokg ti, alok angkeng wripm pa eng ake mpa wripm pa el ilmpen kweikwei itni kanokg ti, a el kai unokg ai, a yo ur pa.²A wa kupm ari maur akwapel ur pa kil itna wrik a takgni no pa, atom kil no. Kil aye kla a Maur Wailen a rpma yongkyong pa aye itna wam pa. Atom kil akwe yikakatnen naki tunteng maur akwapel wikgwikg a Maur Wailen pikekg kil alken wor a alken titnongket, la tunteng ntokg paipm kanokg a unokg ti.³Kil angkengken kolkil la, “Ampur kipmteng antokg paipm yo a kanokg a unokg pa pinterngen! Itni nangkin eng men inel kla ti elngtitni lngkep ik mprin tu melnum akwapel a Maur Wailen amentepmen pa pen!”⁴Tu wrong om ompen a Isrel a tu ak kla a Maur Wailen pa ak amprinsen pa, kupm atning a tu la pa tu wailet paipm ai kamel kamel (144,000).⁵Tu om kil kil pa am Maur Wailen ak kla pa akamprinsen eng alkilen: tu om a Suta pa kamel kamel (12,000). Tu om a Rupen pa kamel kamel (12,000). Tu om a Kat pa kamel kamel (12,000).⁶Tu om a Aser pa kamel kamel (12,000). Tu om a Naptali pa kamel kamel (12,000). Tu om a Manase pa kamel kamel (12,000).⁷Tu om a Simeon pa kamel kamel (12,000). Tu om a Lipai pa kamel kamel (12,000). Tu om a Isakar pa kamel kamel (12,000).⁸Tu om a Sepulun pa kamel kamel (12,000). Tu om a Sosep pa kamel kamel (12,000). Tu om a Pensamin pa kamel kamel (12,000). Am tu om kil kil pa tu ak kla a Maur Wailen pa ak amprinsen pake.

Tu wrong kin a kipman wailet paipm tu ngkat nang a Maur Wailen

⁹Kupm ari pa kai plalng, wa kupm wa ariri, yek ei! Tu wrong kin a kipman wailet paipm wrisen, ake antiwe mpa ngkleikg. Wrong kin a kipman a numpalk manman, a om ompen, a anong kanokg yela, a ok ak manman, tu itna won a wrik tipmakg a melnum tukgunakg a awi nang wailen arpme arpme pa, a Manto Walkg Malkgu War pa. Tu nowe apm tangkoren watin pa kimeket, atom anel aye paimplong ipm pa nar num kimeket ak atopen itna.¹⁰Tu ak atopen la ak ok wail la, “Maur Wailen amentepmen ti kil rpma wrik alkil a awi nang wailen arpme arpme pa, kil pa nampokgen Manto Walkg Malkgu War pa tuwekg pa yiprokgen a akawi mentepm ti.”

¹¹Maur akwapel wrongkwail a Maur Wailen pa tu itna kapringen wrik tipmakg alkilen a awi nang wailen arpme arpme pa, a wa kapringen tu melnum wailen wailen a wa kweikwei malepmen wikgwikg pa. Tu kapor kilko alein elng angko won taipur rmpa won a wrik tipmakg pa kolti a ngkat nang a Maur Wailen la kolkil la,¹²”Aklale wrisen! Maur Wailen amentepmen a ikga itni yongkyong pa wris ata kolti pa antiwe klalen, a nikgwalpm ariwe wor wor, a titnongket, a kalnten, kolpa ti mentepm mpa ukwor a ngkit nang akilen! Aklale.”

Wleket a kalkuten a tu wrong kin a kipman awi pa am kai plalng kolpake

¹³Atom wris ur a tu melnum wailen wailen pa asentopm la, “Tu melnum a nowe apm tangkoren watinet pa tu mla pa? Aki wa tu pa angkai a i wli?”¹⁴Atom wa kupm akalmpe yangkipm akilen pa kolkil la, “Melnum wailen! Kupm ake ariwe pa, kitn alkitn pa ariwe pake.” Atom wa kil akalmpe la, “Tu wrong kin a kipman ari pa, tu pikekg awi wleket wakget wail manten a palng ak wang umpuwen ti pa, ari tu takwlelkgen wleket wakget a awiyen pa kul no. Pikekg tu klak apm watin atuwen pa ak walmpopm a Manto Walkg Malkgu War pa, atom antokg apm a tu pa palng tangkoren wor.¹⁵Kolpa atom ari tu itna won a wrik tipmakg a Maur Wailen awi nang wailen arpme arpme pa. Tu ngkat nang akilen pa itna yalming akilen ti miningkranen kolpa itna pake. Atom Maur Wailen a rpma wrik tipmakg alkilen pa kil arolekg kimplik alkil pa ak auren.¹⁶Tu pa ikgake nikgilmpen aki uwaketen wa nti ur pa. A ikgake takgni ilen aki kwei ur a wakget waiwai pa rawen aki lampulen pa.¹⁷Eng ntei, Manto Walkg Malkgu War a rpma kuin a wrik tipmakg a awi nang wailen arpme arpme pa, kil pa melnum a ikga ikglenten. Ikga kil iyewen kai il u wriwen wor ur a kanokg no a rka yongkyong pa atom ikga tu rki wor yongkyong. Atom Maur Wailen ikga kil lo ikgakg atuwen pa atom tu ikgake akg nti ur.”