Read Luk 22

Luk22

Sutas akor ya la uk Sisas kai wam a tu wrongmanto la or Sisas

¹Wang aripm ur a wring wris wris pa tu Isrel angklon nok tingklak a ak mprang ap mringen ak oren pa am kul wreren tike. Wang wail pa mentepm namput la Wang wail eng tu akwonalmpen a pikekg Maur Wailen ak awi tu amentepmen aye kul takwleikgen tu Isip pa.²Pa tu tukgunakgen a tu ipma krakgen a ak ak kwap eng al wor uk Maur Wailen pa, nampokgen tu melnum a aroaro wonel tu yangkipm a Moses pa, tu akwonalmpen watipmen akor ya la mpa tu or Sisas pa imo or kol ya a i, eng ntei, tu ngkark eng tu wrong kin kipman ti.

³Atom Satan kil kai kawor Sutas pa, tu namput la Iskariot, pa kil melnum wris ur a tu watnom wampwam yikak wekg a Sisas aroaro wonel pa.⁴Atom Sutas kil wrekg kai akor la anti tu melnum tukgunakg a tu melnum ipma krakgen pa wa tu melnum tukgunakg a tu melnum nepimpalo a ikgalen yalming a Maur Wailen pa, la ya kolai mpa kil uk Sisas pa kai wam atuwen pa.⁵Atom tu melnum pa, tu atopen, eng Sutas kil kai alken ya kolpa, atom tu ipma wris la lkel marpm.⁶Sutas kil awi wor, atom kil akor ya ampen ur la mpa uk Sisas pa kai wam a tu pa, eng ampake tu wrong kin kipman pa riwe.

Tu numprampen la ntokg okipma wail il

⁷Wang wail aripm ur a akangklei wring wris wris men angklon nok tingklak a ak mpim ap mringen ak oren pa am ngkaten ak wang wet tike. Atom ti wang a men alm manto walkg malkgu war ur eng rki ntokg il wor uk Maur Wailen eng ikwonilmpen a pekg Maur Wailen ak awi tu amenen aye kul takuleikgen tu Isip pa rka, ti am wang tike.⁸Atom Sisas kil lanaki Pita ekg Son pa la kolkil la, “Kipmekg kai numprampentilo manto war walkg malkgu kweikwei pa rpmi, mpa men kai pa, mentepm il.”⁹Ari wa tuwekg asentel la, “Ti kitn wasrongen la mpa mentekg numprampen ules pa rpmi kai a i?”¹⁰Ari wa kil la, “Ti kipmekg itning! Kipmekg kai kawor anong wail pa, mpa kipmekg ri melnum ur a aye u kuntuken pa pipa, kipmekg kutnuntel kai kawor wan ur a kil kawore pa.¹¹Atom kipmekg isen melnum yan a wan pa la, 'Melnum a kaling plan men pa lanako, la mentekg isenteitn, la wrik mpa kil numpokgen men watnom alkil pa mpa il manto walkg malkgu war kweikwei rke pa, pa a i?'¹²Atom mpa kil plantepm wan ok okkapmet ur a itna kaino walop ur ai, eng mpa kipmekg numprampentilo kweikwei pa itni pake.”¹³Tuwekg atning plalng pa, tuwekg wrekg kai ari kweikwei wrongkwail pa, am palng katila kolen a wuten Sisas lanaken pake, atom tuwekg numprampen kweikwei pa rpma.

Sisas anti tu watnom alkilen pa al okipma wail

¹⁴Tuwekg numprampen manto walkg malkgu war kweikwei pa elngtirpma pa, pa wang a tu al okipma, atom Sisas kil anti tu wokgen alkil pa kai rpma okg arke tita la il okipma pa.¹⁵Atom kil lanaken la, “Kupm pikekg wasrongen paipm la il okipma ti numpokgentepm wrisen plalng pipa, kupm rki kalkuten.¹⁶Ti kupm lanakepm la, kupm ikgake wa il okipma ur kol ti ntiur kai ngko wang a kweikwei pa palng iklale ik wang a Maur Wailen itni wailen ngko wunong ikglen kweikwei wrongkwail.”

¹⁷Atom Sisas kil awi kaimung pa aye itna uk wor Maur Wailen plalng pa, kil la, “Kipm uwi ti mpreing il o!¹⁸Kupm lanakepm la, kupm ikgake wa il u wain ti nti ur, kolpa kai ngko wang a Maur Wailen kil itni wailen ikglen kweikwei wrongkwail ti ngko wunong.”¹⁹Atom wa kil awi okipma pa aye itna uk wor Maur Wailen plalng pa, kil kapor alken kolti a kil la, “Kil num akupmen a kupm alkepm la ik ngklinsepm. Ti kipm ik kolpa kai eng ikga kipm ikwonilmpen kupm ti!”²⁰Tu al okipma pa plalng pa, kil awi kaimung pa aye itna ak katila kol a wet ep pa plalng pa, kil la, “U wain kaimungen kil pa pati, pa Maur Wailen lam kla weten nampokgen kipm. Kil walmpopm akupmen a ungkwan eng la ik ngklinsepm.²¹Pake ti kipm itning! Melnum a mpa uk ya kupm ti kai wam a tu wrong manto pa, am antiwo al okipma rpma tike!²²Kol Warim Kipman a Melnum ti ikgam imo kolen pikekg Maur Wailen la pake. Pake woi, arein melnum a uk ya Warim Kipman a Melnum ti kai wam a tu wrong manto pa, kil ikga uwi paipm.”²³Tu atning kolpa, tu asen tita la, “Mla ur amentepm ti, ikga ikwap pa?”

Tu watnom a Sisas tu alilakel tita la mla a i mpa itni wailen eng tu pa

²⁴Tu watnom a Sisas pa alilakel tita la mla a i mpa itni wailen eng tu pa.²⁵Ari Sisas lanaken la, “Tu melnum tukgunakg a kanokg ti pa, tu plan titnongket a tu ti itna wailen ikgalen tu wrong kin kipman alntu, wa tu melnum wail wail pa tu la tu wrong kin kipman pa riwen la tu melnum wailen wor a akwap wor eng ikgalenten.²⁶Pake kipm pa ake mpa ntokg kolpa. Kipm mla ur la palng melnum wailen itni kuin akipmen pa, kil mpa rku kil alkil orngwatneikgen kipm ti, wa mla ur akipmen la palng melnum a itna ep ikglentepm pa, kil mpa palng melnum akwapel wor a angklin kipm ti.²⁷Kipm ikwonilmpen: melnum a rpma la il okipma ti pa melnum wailen aki, melnum a ampreing okipma ti eng kil al ti pa melnum wailen? Melnum a kil rpma la il pa melnum wailen pake. Pake, kupm ti ake kolpa, kupm kolen melnum akwapel orngwatneikgen kipm eng angklinsepm.

²⁸Kipm pikekg antiwopm arki kaikuten ak ai kulngkul kul ti, a ake kipm atnuurngkopm.²⁹Kolpa ti mpa kupm ngkit kipm ti itni melnum tukgunakg ikglen kweikwei wrongkwail, pikekg yan alkupm ngkat kupm ti itna melnum tukgunakg ikgalen kweikwei wrongkwail.³⁰Ti kipm ikga ntiwopm itopen il okipma wail kaino anong wor akupmen pa, a kipm ikga rpmi wrik wor wor eng ikglen tu om wampwam yikakwekg a Isrel.”

Sisas kil la Pita mpa lam nang akilen

³¹Sisas lanaki Saimon la, “Saimon, Saimon! Ti kitn itning! Maur Wailen uk ya Satan la ikga ningkailepm la kipm ngko kai wrisen kolen wit ok plepm a melnum kalkwin pa atom ak wripm awi pa.³²Pake, kupm oklala naki Maur Wailen la kil ngklinseitn eng ikgake kitn ngko kai wrisen. Kitn wa la yaper kul pipa, kitn ik titnongketel tu wail wail a paipm paipm alkitn pa.”

³³Ari wa Pita kil akalmpe la, “Wailen, kupm am numprampen la tu iyeweitn kai rpmi wan tipmining aki, ilmpeitn imo pa, kupm ikga ikilenteitn!”³⁴Ari wa Sisas akalmpentel la, “Pita, kupm lanakeitn la, amti karek ake la pa, mpa kitn lam nang akupmen ti nti wraur la kitn ake ariwe kupm ti.”

Sakal a apmnung

³⁵Atom Sisas kil asen tu watnom alkil pa la, “Pikekg ep a kupm ukwawepm kai pa, ake pikekg kipm aye kweikwei a alupme marpm aki, apm kok aki nepm palk kakir pa, kalpis, kipm pikekg angkompwam. Ti pikekg kipm tukwok eng kwei ur aki, kalpis?” Ari wa tu wa la, “Kalpis, men pikekg ake tukwok eng kwei ur.”³⁶Atom Sisas lanaken la, “Pikekg kolpake, kil pa mpa kol kilke, mla ur a antiwe apm kok a kweikwei a alupme marpm pipa, kil mpa uwi iye. A mla ur a kosakal kalpisen pipa, kil uwi apm ur alkil a nowe eng wropuk pa ik uwi marpm pa, atom kil ikrmpen ur iye.³⁷Ti yangkipm ur a la ela kai wrkapm a Maur Wailen pa la kolkil, 'Tu wrongkwail pa la kil melnum trangkowet paipm.' Yangkipm kil am la kupm tike. Ti am palng aklale tike. Yangkipm wrongkwail a pikekg nira akla kupm ti pa, ikgam palng iklale pake.”³⁸Atom tu lanakel la, “Wailen, kitn iri, kosakal wekg men aye itna ti.” Ari wa kil lanaken la, “A pawo! Ampur akor la pa watipmen.”

Sisas kaino wrik nangen Olip oklala naki Maur Wailen

³⁹Sisas kil oklala nampokgen tu watnom alkil pa plalng pipa, kil awiyen anel atnuurng anong pa kai kaino wrik nangen Olip kol a kil ak ak pa.⁴⁰Tu kaino pilng kaino nang pa, Sisas lanaken la, “Kipm oklala niki Maur Wailen eng mpa kil iyewepm ngkom nilokgen kalkuten eng a palng eng ik rkolngkepm pa.”⁴¹Atom kil atnurngken kai watinet ketn ketn kapor kilko alein a, oklala naki Maur Wailen.⁴²Atom kil lanakel kolpa la, “Yaiyai, kol wasrongen alkitn pipa, kitn uwi kaimung kil kai tukuleikgentopm. Pake ampur kitn katnun wasrongen a kupm ti pa, kitn ik ik wasrongen alkitnen pawo!”

⁴³Atom maur akwapel ur a Maur Wailen pa angkaino kitnong ai nar palngtel, ak titnongketelel.⁴⁴Ipma a kil pa alupm wes noros paipm kolti. Kolpa atom wa kil wa oklala naki Maur Wailen titnongket, pa nsam pa namperkgen wom pa wom elng nar kanokg ti kolen walmpopm pa.⁴⁵Kil oklala naki Maur Wailen plalng, kil wrekg kai ari tu watnom alkil pa ari, tu pa ipma kalkut paipm, atom anel okg rka.⁴⁶Atom kil la, “Ei, wa kipm okg okg rka eng na? Ti kipm wrekg oklala niki Maur Wailen ti eng mpa kil iyewepm ngkom nilokgen kalkuten eng a palng eng ik rkolngkepm ti.”

Sutas kil uk Sisas kai wam a tu wrong manto

⁴⁷Atom Sisas kil oklala kolpa itna, ari tu wrong wailet am anel wli wli tike. Melnum ur a tu namput la Sutas pa, kil pa melnum ur a tu watnom wampwam yikakwekg a Sisas aroaro wonel pa, am kil pa awiyen aye wli pake. Kil kai wreren Sisas pa la nikrontel.⁴⁸Ari Sisas asentel la, “Sutas, kitn la nukrontopm kolpa eng uk Warim Kipman a Melnum ti kai wam a tu wrong manto tike?”

⁴⁹Tu watnom a Sisas pa, tu ari kuina ur eng a palng pa, atom tu la, “Wailen, men ik kosakal ti ik wangketen om?”⁵⁰Ari kalpis, wris ur atuwen pa am ak kosakal pa wangket nungkulkg wi a melnum akwapel a melnum tukgunakg a itna ep eng tu ipma krakgen kimeket pa ise.⁵¹Ari, Sisas wa la, “Elngen o!” Kolti kil elng wam pa itna nungkulkg a melnum pa, atom nungkulkg pa wa palng wor itna kati kati.

⁵²Atom kil lanaki tu melnum tukgunakgen a tu ipma krakgen pa, wa tu melnum tukgunakg a tu nepimpalo a ikgalen yalming a Maur Wailen pa, wa tu melnum wailen wailen a wli la rkulel pa la, “Ti kipm aye kosakal a yomis ti wli la rkul kupm ti, eng kupm ti melnum trangkowet ur akipmen tike?⁵³Ti akangklei wang kupm antiwepm rpma kawor yipmingki wunen a yalming a Maur Wailen pa, karken a kipm arkulopm ak wang pa. Pake, wang ketn ti pa, pa wang akipmen, pa wang a miningket, mpa Maur Paipm kil ikwap ik titnongket akilen.”

Pita lam nang a Sisas

⁵⁴Tu arkul Sisas pa aye kai kawor wan a melnum tukgunakg a itna ep eng tu ipma krakgen kimeket pa, Pita pa katnunten kolpa angklokg wang katnukg katnukg kai kawor.⁵⁵Kil kai anti tu arkgin wakg wail ur a tu alile arkgin pa rka mapmingkyun pa wreren wan a tu antokg yangkipm atne pa.⁵⁶Kil arkgin wakg pa rpma ari wakg pa naruk alentel atom kin akwapel ur pa ikg kai ariwel atom kil lala, “Ti melnum ur ari kolen pikekg anti Sisas atn ti pa ti ingkai rpma ti!”⁵⁷Ari Pita kil akalmpe kai kin pa la, “Kupm akwekgel melnum a kitn la pa!”⁵⁸Wa tu wa rka ketn ketn kolpa kai ari, wa melnum ur pa ariwel atom wa la, “Kitn pa melnum ur atuwen am pake!” Ari wa Pita akalmpe la, “Kupm ti kalpis!”⁵⁹Itna watinet ketn ketn ari wa melnum ur pa la titnongket la, “Ti kipm la ntei, melnum a rpma ti pa a Kalili, kil pikekg anti Sisas atn pa.”⁶⁰Ari wa Pita akalmpe la, “Kupm ti ake ariwe kuina ur a kipm la pa!” Pita oklala kolpa itna pa, karek am la ise.⁶¹Atom Wailen kil plelng ikatnen Pita pa kolpa pipa, nol nikgwalpm a Pita pa am plelngen ise, kil akwonalmpen yangkipm a pikekg Wailen kil la kolpa la, “Amti mpa ik mining ti karek ake la wai, kitn mpa lam nang akupmen ti nti wraur, la kitn ake ariwe kupm ti.”⁶²Atom Pita wrekg kawor akg paipm wrisen kawor en ai.

Tu aknokgel Sisas

⁶³Tu melnum a wet arkul Sisas pa, tu anel aknokgelel a, orel.⁶⁴Tu ak apm umpu pa ak yapo wulmpawel plalng pipa, tu orel kai ikgok kil pa, atom asentel la, “Kitn melnum okwripm pa, kitn la ri, la wet mla oreitn?”⁶⁵A wa tu ak nokgelel ak yangkipm paipm paipm tiur ai.

Tu awi Sisas aye kai itna yangkipm kai melnum mring man

⁶⁶Takgni aro pa, tu mring man wailen wailen a ikgalen tu wrong kin kipman pa, pa tu melnum tukgunakgen a tu ipma krakgen pa, a tu melnum a aroaro wonel tu yangkipm a Moses pa, anel ep wli rka wris. Tu pa mring man wailen wailen mapming a rpma eng atning yangkipm ok atom tu aye Sisas pa kai itna antokg yangkipm ok itna tu pake.⁶⁷Atom tu la kolpa la, “Ti kitn laniko ri la, kitn pa Krais?” Ari wa Sisas lanaken la, “Kol kupm lanikepm pa, mpa wa kipm ake ukipma.⁶⁸Wa kol kupm isentepm pa, kipm ampake ikilmpe.⁶⁹Pake kol ak wang ti, wa or pa kai pa, Warim Kipman a Melnum ti pa, kil ikga rpmi kaino wam wi a Maur Wailen a antiwe titnongket wrongkwail.”

⁷⁰Atom wa tu asentel la, “Ti kitn ti kitn Warim Kipman a Maur Wailen?” Ari wa kil akalmpe la, “Am kipm alkipm pa la la kupm tike.”⁷¹Atom tu la kolpa la, “Men ake la itning melnum ur wa laniko or pa kai! Men am wet atning a kil laron kil alkil angko wunong ise, ti a pake!”