Read Kwap 8

Kwap8

¹Sol pa kil itna ari wulmpa uk wor kolti atom tu or Stipen pa amo. Sol kil uk wleket tu wrong kin kipman a ukipma Sisas
Ak wang pa tu or ungkwan uk wleket tu wrong kin kipman a ukipma Sisas a rka kai Serusalem pa. Atom tu purngprarng or rak kai yela rka tatu palpa a anong kanokg a Sutia a Samaria. Pake tu melnum wokgen akwapel a Sisas pa tu ake ngkark kai tatu a i a i pa, tu am rka pake.²Atom tu melnum ute wor tiur a ukipma Maur Wailen pa tu uwen Stipen pa, a tu akgentel wail manten.³Ari Sol pa kil atn or ungkwan uk wleket anel melkgel tu wrong kin kipman mapming yela a ukipma Sisas pa. Kil kawor wan ur wan ur or talpul kin a kipman pa angkli elng kulor en ti awiyen aye kai rpma wan tipmining ai.

Pilip itna Samaria laron yangkipm wor a la Sisas

⁴Atom tu wrong kin kipman a ukipma Sisas pa a pikekg purngprarng kai rka yela tatu palpa pa, tu kai atn anong ur anong ur laron yangkipm wor a la Sisas.⁵Pilip pa kil melnum wris ur a tu pa kil kaino anong wail ur a anong kanokg Samaria laron yangkipm a la Krais melnum a Maur Wailen ukwa kulnar la ikuwiyo pa naki tu wrong kin kipman a rka kaino pa.⁶Tu itna atning yangkipm a kil laron a ari kweikwei titnongket weten a kil antokg pa, atom tu wrong akwail kulkai elng nungkulkg pa itna atning yangkipm wor a kil angkli pa.⁷Wa tu wa ari a kil ungkwan maur paipm kimpilpet pa kirkar yikakatnen ngkark takwelkgen tu melnum watipmen pa kul or kai en, a kil antokg tu melnum nepmplupmen a numpwam amowe pa palng wor.⁸Kolpa atom tu wrong kin kipman wailet tu atopen wail manten itna kaino anong pa.

Saimon yar mapen kil ukipma katnun yangkipm wor a la Sisas

⁹Melnum ur a rpma kaino anong wail a Samaria pa, nang akilen pa Saimon. Kil pa melnum yar mapen pikekg akwap pa wang watinet antokg kweikwei titnongket tiur itna kaino anong pa laron kil alkil ti la kil melnum wailen ur. Atom ak antokg tu wrong kin kipman wailet a rka yela anong kanokg a Samaria pa tu wrekg paipm eng tu ari pa.¹⁰Atom tu wrongkwail, tu a nang arke, a tu a nang kalpisen pa, tu plalngten aye nungkulkg wulmpa a tu pa aye kai itna wreren ak atning ari ariworwor, a tu la kolpa la, “Melnum pa kil antiwe titnongket a mentepm namput la 'Melnum a arpmen titnongket wail kolen a Maur Wailen' pa am melnum pake.” Pa nikgwalpm a tu wrong ti akwonalmpen la kolti.¹¹Kil pikekg akwap kolpa ak ai kul ai, kolpa atom kil antokg tu wrekg paipm kunturng katnuntel atn la itning a ri kweikwei a kil antokg ak titnongket a maur paipm pa.¹²Pake ak wang ti tu atning yangkipm wor a Pilip laron Sisas pa kil Krais, melnum a Maur Wailen kil ukwa kul nar la ikirmpento, wa kil laron la Maur Wailen kil la itni wailen ikglen nol nikgwalpm atuwen pa naken, tu atning yangkipm pa ukipma atom tu kaluken kimeket, kin kipmanen.¹³Wa Saimon, melnum yar mapen pa yat kil ukipma atom tu kalukel, atom kil katnun Pilip pa atn yela, ari kuina ur a Pilip antokg ak titnongket a Maur Wailen, kweikwei weten a melnum ake antiwe antokg pa. Kolpa atom kil wrekg paipm akwonalmpen watipmen.

Tu ukwa Pita ekg Son kaino Samaria

¹⁴Atom tu melnum wokgen akwapel a Sisas tu rka kai Serusalem pa tu atning la, tu a anong kanokg Samaria pa am awi yangkipm wor a Maur Wailen atning atopen ise. Kolpa atom tu ukwa Pita ekg Son pa kainonten.¹⁵Tuwekg kaino palng kaino anong ur a Samaria pa, tuwekg asen Maur Wailen eng la tu uwi Maur Wor.¹⁶Pati atnen Maur Wor ake kul nar rpma tu pa a pa. Tu pa pikekg tu naren Wailen Sisas ti kolti kaluken.¹⁷Atom Pita ekg Son elng wam ele tu pa asen Maur Wailen pa atom tu awi Maur Wor pa.

¹⁸Saimon yar mapen kil ari a tuwekg elng wam ele tu pa asen Maur Wailen pa atom tu awi Maur Wor pa, kolpa atom kil awi marpm pa aye kul uk Pita ekg Son pa, a kil la,¹⁹“Kupm la kipmekg lkopm titnongket pa yat, eng kupm elng wam ele tu melnum pa, mpa wa tu wa uwi Maur Wor pa yat kolpa.”

²⁰Ari Pita pa akalmpe la, “Kitn iye nikgwalpm paipm alkitn a la kolpa nimpokgen marpm pa iye kai anong paipm pawo! Mla lanakeitn la kitn la rmpen kweikwei wor a Maur Wailen uk kalpmlel melnum pa ik marpm pa!²¹Kil ake kwap ur a ak arikgnangkel kitn pa, eng mpa kitn ikwap kil nti mentekg ti. Eng ntei, nol nikgwalpm a kitn pa ake ute wor itna wulmpa a Maur Wailen pa.²²Ti kitn plelng ipma, a ukyirokg nikgwalpm paipm a kitn akwonalmpen pa, atom kitn oklala niki Wailen pa ukwiyen la mpa kil ungkwan nikgwalpm a kitn akwonalmpen kolpa aki kalpis.²³Kupm ari kitn alupm nikgwalpm raimpe paipm kolpa pa, pa kolen tukuk ur a yapo ipmel kitn aye itna, a wa kitn pa kolen wampung a angkowe ampei ngkaten plalplal rka pa.”²⁴Saimon kil atning kolpa atom kil arkolng paipm lanaki Pita ekg Son pa la, “Ti kipmekg oklala niki Wailen eng kil ngklinsopm eng kuina ur kol a wet kipmekg la pa ake mpa wa palng kul kupm ti.”

²⁵Atom Pita ekg Son laron yangkipm a Wailen a pikekg tuwekg atning ari a antiwel akwap pa naken plalng pa, tuwekg wa yaper kinar Serusalem. Tuwekg yaper kinar pa, tuwekg angkli yangkipm wor a la Wailen pa itna wampel kolpa kinar itna tatu anong tiur a Samaria pa kolpa kinar Serusalem pa.

Pilip laron yangkipm wor naki melnum wailen a Itiopia

²⁶Maur akwapel a Wailen pa lanaki Pilip pa kolpa la, “Takgni no pirng pa kitn wrekg i Serusalem ti kinar or ya a wrik wes ningkrapm kalpmilel pa, ya a kinar plalng wa kai kaino palng kaino anong Kasa pa, pa ya mpa kitn ore pa am pake!”²⁷Kil atning kolpa, kil wrekg kinar om. Kil or ya pa kinar ari, kil ansil melnum ur a anong kanokg a Itiopia pa pikekg kaino Serusalem eng ngkat nang a kapor kilko alein Maur Wailen atom wa yaper angkaino ai nar, melnum pa pikekg tu angklo mamrowel. Melnum pa kil alkil mring man wailen a itna ep ikgalen marpm a kweikwei wrongkwail a Kantasi , kin tukgunakg a itna ep a ikgalen tu melnum a Itiopia.²⁸Melnum wailen pa kil rpma nimong a manto nepm watin pa arkolngkel aye nar pa, kil awi wrkapm a melnum okwripm Aisaia pa rpma angkleikg itna wampel wampel kolpa yaper nar la kinar anong alkil.²⁹Atom Maur Wor pa lanaki Pilip pa la, “Kitn kinar ngkom nti nepm wreren nimong a manto nepm watin arkolng ai kolpa kai kinar.”³⁰Pilip kil atning a Maur Wor la kolpa, kil pirng kinar anti nepm wreren nimong a manto nepm watin arkolng pa angkom nar ya yamping nampokgen nimong pa kolpa kai kinar pa, kil atning wrkapm a melnum wailen pa angkleikg. Kil angkleikg wrkapm a melnum okwripm Aisaia pa nira pa. Atom Pilip asentel la, “Kitn angkleikg wor pake, kitn ariwe la wrkapm pa ak la kuina kolai?”³¹Ari melnum wailen pa akalmpe la, “Kol melnum ur ake lakati yiprokgen pa klalen wor pa, mpa wa kupm wa riwe kolai?” Kil lanaki Pilip pa kolpa plalng atom kil lanakel la kil kaino tuwekg rpmi.

³²Atom Pilip kil kaino antiwel rpma. Yangkipm a melnum pa angkleikg kai wrkapm pa pati la kolkil, “Kil pa kol manto walkg malkgu a tu awiyel aye kai la ilmpel imo. Wa kil kol manto walkg malkgu war a elngterng rmpa kolti ak wang a tu ukwalng walkg alkil pa, kil am kolpake, kil ake kirkar ur, kil tarng rmpa kolti.³³Tu antokgtel ari paipm. Tu arkuwel, a ake wa tu ur itna yirokgel kil pa antokg yangkipm akilen pa, kolpa atom tu angketen yangkipm akilen pa angko wang ti kolti. Kil alkil yek wrisen, ti mpa mla a i la tu walwalpopm walyaru alkil pa? Ti kil am tu almpel amo kai angket lam takwlelkgen kanokg ti.”

³⁴Melnum wailen pa angkleikg wrkapm pa kolpa, kil asen Pilip pa la, “Kitn nikopm ri, la melnum okwripm a nira wrkapm a kupm angkleikg kil pa kil nira ak la mla? Kil la kil alkil ti aki kil la melnum manet ur ai?”³⁵Atom Pilip kil lanaki melnum wailen pa ariworwor yangkipm yiprokgen a wet melnum wailen angkleikg pa. Kil ngkaten angko yangkipm a ela wrkapm pa atom laron yangkipm wor a la Sisas pa aye a pa kul pake.³⁶Tuwekg nar ya pa kinar pa, tuwekg kai palng kai wrik ur a u arke pa, atom melnum wailen pa lanaki Pilip pa la, “Kitn ri u ur rka ti. Kol a kitn kulukopm itni tiwo! Aki wa kwei ur itna wai?” [³⁷Ari Pilip lanakel la, “Kol kitn ukipma Sisas pa nimpokgen nol nikgwalpm akitnen pa kimeket pa, kupm antiwe kulukeitn pa.” Ari kil akalmpe la, “Ei, kupm ukipma pa. Kupm ukipma la Sisas Krais pa Warim Kipman a Maur Wailen.”]

³⁸Atom melnum wailen pa lanaki melnum a ikgalen manto nepm watin a arkolng nimong pa eng kil itni. Atom manto nepm watin pa kai itna pa, tuwekg yatenen, Pilip a melnum wailen pa, ekg kai kinar itna u pa, atom Pilip kalukel.³⁹Pilip kalukel plalng pa, tuwekg angkinar u pa no pa, Maur Wor a Wailen pa awi Pilip pa titalampen aye kai atn kol ur pa. Atom melnum wailen pa ake wa ari Pilip pa, pake ak wang a kil nar ya pa kinar pa, ipma akilen pa atopen wail manten.⁴⁰Maur Wor awi Pilip pa aye kai titalam atn kolpa, atom wa tu ari kil a palng itna kaino anong Astot ai, atom am kil atn yela tatu anong ulkgung ulkgung pa laron yangkipm wor a la Sisas pa kolpa kaino kaino, kaino palng kai Sisaria ai.