Read 3 Son 1

3 Son1

¹Kupm ti kupm melnum tingklaket itna ep a akwap a Maur Wailen. Kupm nira wrkapm kil eng kitn Kaius, melnum wor yek alkupm. Kupm plan ipma wor wasrongen kitn a mentepm arkul yangkipm aklale a ak la Krais pa.

²Melnum wor yek alkupm, wa kupm oklala naki Maur Wailen eng mpa kil ngklinseitn eng kweikwei wrongkwail a kitn antokg kai pa mpa palng wor, wa ngklinseitn eng ake mpa numpet ur palngteitn, mpa kitn rpmi numpworen wor, kol kupm ariwe la nol nikgwalpm wunen akitnen pa wor itna pa.³Kupm atning a tu melnum tiur akupmen a mentepm ukipma Krais pa, tu yaper wli lakati kitn pa nakopm la, kitn arkul yangkipm aklale pa kolpa itna pa. Pa aklale, kitn am atn a rpma katnun yangkipm aklale kolpa itna pake. Kolpa atom kupm wa atopenteitn wail manten.⁴Ake kweiur manet antokg kupm atopen wail manten kolpa. Am kupm atning a kipm ukipma atom palng kol warim akupmen a katnun yangkipm aklale pa kolpa itna pa, pa antokg ipma akupmen pa atopen wail manten or kai ai.

Kaius kil akwap wor angklin tu a atn akwap a Maur Wailen

⁵Melnum wor yek alkupm, kitn pa melnum nungkulkg wor a katnun yangkipm aklale akwap wor eng ak angklin tu melnum a mentepm ukipma Krais pa, a ak angklin tu melnum tiur manet a kitn ake wa ariwe pa yat.⁶Tu tiur a pikekg atn kai pa kai pa akwap a Maur Wailen atom kai ariwepm pa, tu kul lakati kitn pa naki men a ukipma Krais mapming a kaingkai takwem rka kil la, kitn pa pikekg plan ipma wor wasrongenten a angklinsen. Ti wa kol tu melnum kolpa la kai ikwap a Maur Wailen pa, kitn wa ngklinsen worwor kolen a kitn angklin kil alkil Maur Wailen pa, eng mpa tu iye nukur num kai eng tu ikwap pa. Kitn ik kolpa pa, pa kitn ak wor pake.⁷Eng ntei, tu atn akwap laron nang a Krais pa, atom tu ake wa asen la tu a ake ukipma Krais pa ik ngklinsen kweikwei ur pa.⁸Kolpa ti pa kwap a mentepm a ukipma Krais ti mpa ik titnongketel tu melnum a atn ak ak kwap a Krais pa, eng mpa mentepm kimeket ik titnongketel kwap a laron yangkipm aklale kol a Krais kaling planto pa iye kolpa kai.

Tiotrepes pa kil ak paipm

⁹Kupm pikekg nira wrkapm ur eng kipm melnum alkupm mapming a kaingkai takwem rka wris kai pa, pake Tiotrepes a wasrongen la kil la itni ep ikglen kipm pa, kil ake la itning kutnun kuina ur a kupm la pa.¹⁰Kolpa ti ik wang ur a ikga kupm kaintepm pa, ikga kupm lanikepm itni wulmpa a kipm wrongkwail nikgwalpm kuina ur a kil ak kolpa. Kil arkiwo kalpmilel la paipmel men ti. Ake pa wris pa, wa kil wa ak kolkil: ake kil kapor alei tu melnum amenen a atn ak ak kwap a Krais pa. Wa tu tiur a wasrongen la kipor ilei tu pa, kil wa angketen, a wa ungkwanten kai takwleikgen kipm a ukipma Sisas mapming a kaingkai takwem rka wris kai pa.

Temitrius pa kil ak wor

¹¹Melnum wor yek alkupm, ampur kitn ntokg kitila kuina ur a paipm pa, yaper. Kitn ntokg kitila kuina ur a wor pa kolti. Mla ur kitn a antokg kuina ur a wor pa, kitn pa a Maur Wailen. A mla ur kitn a antokg kuina ur a paipm pa, kitn pa ake kitn ari Maur Wailen pa.

¹²Kupm wa la Temitrius, tu melnum wrongkwail ti tu kaporng yangkipm lakati la kil melnum wor. Wa atn a rpma akilen pa kai katila yangkipm aklale a Maur Wailen kil alkil ai wa planto lala kil pa melnum wor. Ti wa men antimprak la yat la kil pa melnum wor. A kitn ariwe yangkipm a men la kaporng yangkipm kil pa, pa aklale.

Son, melnum tingklaket itna ep a akwap a Maur Wailen pa la kai ri Kaius

¹³Kupm yangkipm watipmen rpma lala kol a kupm niranteitn, pake kupm ake la nira eli wrkapm ti.¹⁴Kupm wasrongen la kupm a kai riweitn, ake a wang watin, wang wreren eng kupm a kai riweitn ntiweitn rpmi mentekg oklala pake.

¹⁵Kupm oklala naki Maur Wailen eng mpa kil ngklinseitn eng mpa ipma akitnen pa rki meen wor kolpa kai. Wa tu workganen alkitnen a rka kul kil pa, tu wa la lanikeitn la tu nikgwalpm arkenteitn rka pa. Kitn ri tu melnum wor alkupmen kai pa pa, kitn laniken wris wris la, alken wor, kupm nikgwalpm arkenten rka pa. Yangkipm a kupm niranteitn kil pa am kai itna kol pake.