ṮAKWIIN49udu_sim
1Dhali yan’ko’da Yakuub yuḵki iya/m piti mo dhali o gwo mo ki: Tuli um is bumi monṯal ’de/ mo ki aha/ mina ṯor um to kun mini mii ṯaka p̱o/ um yilin tiya kun mini iiyu/ mo.2Tuli is mo dhali ciḵ gwo mo, ayy um iya/ ma Yakuub modhali ciḵi gwo ma Israyiil jin ta’da babam bum mo.3Ra/ubiin /e tana bwanyaram pem mo,’peni mo ma dem dem pem mo dhali ’peni maman pem kun ṯwa/a/ gi mom’bi’th is modhala liṯgan pem mo e monyca mo dhala liṯgan e mom’bi’th mo.4/E jin gwakalki mii mo me’d yi’de/ mo tani /e mini gam mo jin mina /e idiya liṯgan yisa,haali/ /e sekim ka ci gi cim modhali shi/ a’di is mo dhali /e yakin ki mis mo eya ci ma nyaŋa’b pem mo.5Shim/uun dhala Lawi uni kun ta ikam mo.To gi mo/as gom mo ma bujur mo tani uni ita gandala turgam buni mo.6Ayy aḵashiram pem midi diki ya ’kup̱ ki mo ma tul is buni mo.Ayy shi/in pem midi diki gam dhana ŋul’kup̱ ’kwanim buni is mo.Goma nyor buni mo tani uni ’koshki ’kwani modhali mmocana uni bwa en’dap̱ buni mo tani uni ki ’ciṯẖa morbip̱ buni dugu’b gi ’kup̱a’dup̱un buni mo be.7Monyjee midi di goma nyor buni mo haali/ a’di c̱ithirac̱ithir mo,dhali anyor buni mo tani a’di si’da/ ita ji maṯ mo.Aha/ mina ḵwa/ uni bwa mo e bwaman ma Yakuub modhali c̱eker uni bwa mo e bwaman ma Israyiil mo.8Yahuuda, ikam pini uni imini maŋ /e modhali me’d pini midi di eya aris ’ba/ gi ’kwani kun ta ’kup̱ ki /e mo.Iya/ gi cim uni imini goŋ is ka ’cesh ibwambori /e mo.9Yahuuda a’di ita adhop̱ dhuru’c mo.’Peni mo jin dheru to bwa ka gwap̱i/ mo, ayy ya/m pem, /e yaki bway mis mo.A’di wup̱ki’da ’cesh mo dhali a’di ishki’d ki bara’th me’da dhop̱ modhali me’d kumana dhop̱ mo. Aja a’di iro’dki mii mo mmomer a’di e mo?10Cwa ma maliḵ midi diki p̱i mo ’peni Yahuuda ki sule/ mowalla cwa gi amanjinuwa ji ’peni bwaman sho’k piti montagi a’di midi p̱u’dku/ e a’dim piti jin cila a’di mo,dhali e a’di mo mo jin hanu gwo e ki ’kwani midi mii di mo.11A’di deḵki ari thuluny dhuru’c piti ki cwalmana mura’th modhali ari dhuru’c thuluny piti cwalmana mura’th jin kwanykunu mo gom ’boro’d piti mo tani,a’di wuski burrinyem piti ki yimana mura’th jin ḵa/u ki ŋah ŋah modhali burrinye/ ma p̱om piti eya basa mura’th mo.12Em piti midi c̱a’bki dhir dhir gom yimana mura’th jin ḵa/u ki ŋah ŋah modhali she/ piti midi tagi kush goma ko mo be.13Sabuluun a’di imidi c̱a’b e yana gap̱ gi bwam ma al mo,a’di imidi war ki mo kun min ma risa ḵur yi’de/ ikoḵ ’kup̱i nycine/ mo,dhali bwayam piti midi ya ntagi Pan Sidun mo.14Yassaakar a’di imidi ’bitha’bi’th me’d thuluny mommothum ’kup̱ ka luŋgu’b mo e bwaman ma ma’diny ḵa’bal mo.15A’di p̱arki mo jin sinu is e mo, ki a’di ’bora’bor modhali bampa/ ki a’di ta gi jin ’boru bwa mo.Wakan a’di igoŋkina a’di ’kup̱a bim piti ka ’cesh mo dhali ḵala/ ḵal modhali a’di warki’d ki c̱iŋkina/ jin yolu mo jin miinu ki ’bi’th goma ṯu’c mo.16Daan a’di imidi ta amandwall ’kwanim piti gwo mo,me’d a’din ’de/ e bwaman ma waḵ gi ’Kwani ma Israyiil mo.17Daan a’di imina e i wa ki tasha/ jin ishki’d e shemen bway moa’di jin ta tashan ’thi/ jin ishki’d e bway tur jin iinu mo mmowo’c shumarum ’pena ṯiŋkilam piti mowakan ka manmer a’di ap̱o/ mo tani a’di imidi biṯ ki tar mo be.18Aha/ c̱orkina mowoṯẖ pini mo ayy Tap̱a.19Iman’ceya/ ’ce ki buw buw mini ’ceya Jaadi is mo,hili a’di imidi ’ce uni ki is eya panyjap̱am buni mo.20Tonṯe/ jin min ma Ashiir ishwa mo tani uni mini ṯawusaṯawus modhali a’di midi dho’th ton ṯawusga/ ma maliḵ mo.21Nap̱taali a’di imina e wa ka yuul jin dhalkunu me’d ki ’kus mojin dho’thki ushana ’borga/ mo.22Yuusup̱ a’di imidi ta abinycwa jin midi dho’th maman moabinycwa jin midi dho’th maman monyjoc̱o/ mo.Abinycwam piti mini so wup̱uni ’kup̱ agangara/ ma goŋ bampa/ mo.23’Kwani kun mishina bwa shin kun c̱ithirac̱ithir mo tani iwup̱kina p̱o/ a’di modhali shin a’di mo dhali ’cwar a’di ki ŋara’d ŋara’d mmobur a’di adu mo.24Baṯẖtho/ abwam piti ṯikir di mo mmo’konu ki joc̱ a’di mo,dhali abim piti dhunu ki mo jin mishu mii moki me’d gi a’din ’de/ jin Eḵa/ Eḵ mo a’di jin ta jima Yakuub mo(ki gway ma Manhil Ḵa’bal mo jin ta Wosh ma Israyiil mo.)25Ka Arumgimis ma babam pini mo a’di jin midi woṯẖ /e mo,a’di jin ta’da Arumgimis jin Eḵa/ Eḵ mo a’di jin midi ’bor /e mii moka ris mom’bor mii gi momis kun ’koni buŋ’kup̱ mo,dhali aris mom’bor mii kun ’kon e moŋ’kulga/ mo kun p̱arashap̱arash e bwaŋ’kwariny mony’cesh modhali aris mom’bor mii ’pena risa bor kun c̱ina ko mmop̱i modhali aris bwama dho’th mo.26Mom’bor mii ma babam pini mouni ita mo ma dem dem jin ’ce’dki gwayu/ ma ris mom’bor mii ma ris wosha turga/ kun ’konu ki sule/ sule/ modhali maman gi wosha turga/ kun ’konu ki sule/ sule/ mo.Dhalki uni ’kon mo e ’kup̱a Yuusup̱ modhali eya mur ’ko’d em piti mo a’di jin karkunu ki she/ ’peni ikam piti mo.27Benyamiin a’di ita awuu jin pitili to ki she/ mo,e mon’thamo/ mo tani a’di midi la shwa ’kwani ki ’ci’d’da/ modhali mom’pimpili/ mo a’di ki pwaḵ to bwa mo uni kun dilina a’di ’kwani mo.28Uni gwansani ’baar mo tani uni itana waḵ ma Israyiil kun ’koni ’kume’d i’ce’dka su/ mo, dhali gwo jin ṯorkin ma babam buni uni anann mo me’d jin ’borkina a’di uni mii mo mmo’bor uni mii ka ’deṯe/ ’deṯe/ mo, mom’bor mii kun ha me’d mo gom a’di mo.29Dhali yan’ko’d a’di ḵanki uni gwo mo dhali o uni gwo mo ki: Aha/ minu mii ’tuma bi is imonṯal ’de/ nyaḵki ’kwanim pem mo. Kanaa/ nyaḵki ibabam pem mo e jurum wosh gi mombunto Ip̱ruun mo, jin ta Wathi/ Hiṯẖṯẖa mo.30E jurum wosh gi mombunto ma Maḵp̱iilah jin diki’d ki mom’pesho’k gi Pa Mamra mo e bampa/ gi Paŋ Kanaan mo a’di jin yolkin ma Ibrahiim ’peni bwam bunto ma Ip̱ruun jin ta ’Kwani Hiṯẖṯẖa mo e mo jin mina a’di imii ta mo gom mo jin kanuwa kan mo.31E mo yan mo tani a’di ikankina uniya Ibrahiim nycine/ mo dhala Saarah jin ta ash mo, dhali imun si’da/ mo tani a’di kankina uniya Is/hak dhala Rip̱ka jin ta ash mo dhali imun si’da/ mo tani a’di ikankika/ aLe/ah mo.32Bwam bunto dhali jurum wosh gwansan mo tani a’di iyolkunu ’peni ’Kwani Hiṯẖṯẖa mo.33Ka Yakuub ’baarki gwo jin ḵankina a’di ya/m piti mo tani a’di dhuki sho’k piti eya ci mo dhali a’di c̱iki shi/in piti jiŋ ’ko’d mo dhali a’di tulkunuwa abi is nyaḵki ’kwanim piti mo be.