Mompal jin Wo’c ’Kwani Is She/ gom To/e kun Thip̱u mo
1Dhali yan’ko’d TAP̱A oki’da Musa gwo mo ki: Yaku/ mo eya P̱irawn mo dhali o a’di gwo mo ki: Yase/ ta gwo jin ona TAP̱A Arumgimis gi ’kwani Ibraniyiin mo ki: Dhalki ’kwanim pem bway mo mmo/ii mo ki uni mini mii mii mmotaḵ aha/ mo.2Waḵki/ /e mini ush mo mmodhal uni bway mo mmo/ii mo dhali di mmonon uni ’kup̱ mo tani3me’d gi TAP̱A midi biṯa p̱o/ to em pini ki ’ba’th jin shi/ashi/ mo e uni ’baar kun ’kon eya pije/ mo, shumarum dhali thuluny dhali kalman dhali bip̱ dhala ma’diny ḵa’bal dhali miya si’da/ mo be.4Hili TAP̱A midi ḵwa’th to e gi ’kwani ma Israyiil mo ’peni bwaman ji gi ’Kwani Masir mo. Wakan ki jin ṯal ’de/ midi diki wu mo ’peni aris uni kun ta ku ma Israyiil mo be.5Dhali TAP̱A karki’da cim ’pen ka pije/ mo dhali o gwo mo ki: Ka’thamoŋ gana/ aha/ TAP̱A mina mii to yansan mo be.6Dhali mon’thamoŋ gana/ mo tani TAP̱A miiki to yansan mo. Aris to e gi ’kwanim Pam Masir wukin mo. Hili to e gi ’kwani ma Israyiil mo tani ṯal ’deŋ kamu/ yisa wu’da.7Dhala P̱irawn hashki’da hash mmo’kar to e gi ’Kwani ma Israyiil mo. Dhali jan ’deŋ kamu/ yisa di’da ’peni ji gi ’kwani ma Israyiiil jin wu’da. Hila P̱irawn ’bi’thki’da dum piti mo dhali a’di diki dhal ’kwani bway mo mmo/ii mo be.
Mompal jin wo’c ’kwani is she/ ki ’Ba’th Jamany Jwa mo
8Dhali TAP̱A oki’da Musa gwo mo dhala Haruun ki: Muthi ’pinyi ’tu’d me’d bum mo ’peni bwam ma gwaṯa/ mo dhali dhalka Musa yeḵ uni i mis mo e jis e ma P̱irawn mo.9Dhali a’di midi war ki bu’da ’cesh gana/ mo ap̱owa ris Pa Masiri ’baar mo. Dhali ’ba’th jamany jwa midi mu/ ’kwani is dhali ki to e ilu/ ki tur mo e Pa Masiri ’baar mo be.10Wakan uni mu’thki ’piny mo ’peni bwam ma gwaṯa/ mo dhali dosh mo ibwambor ma P̱irawn mo. Dhala Musa yeḵki ’piny mo isi mis mo dhali a’di warki’d ki ’ba’th jamany jwa mo ap̱o/ i’kwanim pa ki to e ilu/ mo be.11Dhali ’kwani kun miiki to ki e ma rum thus molki dosh mo ibwambor ma Musa mo gom jamany jwa mo haali/ jamany jwa biṯki’da p̱o/ uni mo dhali ap̱o/ ’kwani Pam Masir i ’baar mo be.12Hili TAP̱A i ’bi’thki’da P̱irawn adum piti is mo. Dhali a’di diki ciḵ gwom buni mo me’d isi gwo jin ṯorkina TAP̱A aMusa mo be.
Mompal jin Wo’c ’Kwani Is She/ ka Wassa/ mo
13Dhali yan’ko’d TAP̱A oki’da Musa gwo mo ki: Cuyi mis mon’thamo/ ka ’tum mo dhali doshi ibwambor ma P̱irawn mo dhali oyi a’di gwo mo ki: Yase/ ta gwo jin ona TAP̱A Arumgimis gi ’kwani ma Ibraniyiin mo ki: Dhalki ’kwanim pem bway mo mmo/ii mo ki uni mini mii mii mmotaḵ aha/ ki momaŋ mo.14Ka tee yansan aha/ mina hash mom’bi’th gi mompal jin wo’c ’kwani is she/ pem ap̱o/ /e mo dhali ap̱owa ris imanmiiya ṯu’c pini mo dhali ap̱o/ aris ’kwanim pini mo, wakan ki /e mini mish mo mo ki wathiŋ kamu/ yisa wa ki aha/ eya ris mony’ceshi ’baar mowah.15Waḵki/ aha/ mina ’taki ’de’k me’d pem mmodor /e mo ki ’kwanim pini ilu/ mo tani um minu ’taki ’ce’d ki sho’k mo ’peni ’dishesan mo ’peni mony’cesh mo ki ’ba’th jin wo’cki ’kwani is she/ ki ra’b ra’b mo.16Hili gom ’kup̱ mii yan mo tani aha/ dhalkina /e mo mmoṯor /e mom’bi’th pem mo, wakan ki gway pem minu bah ki tur mo eya ris mony’ceshi ’baar mo be.17/E din naskina/ mo mmokar is pini ki ca mo ap̱o/ ’kwanim pem mo dhali diki dhal uni bway mo mmo/ii mo be.18Gom kan mo tani ka’thamoŋ gana/ ka tente/ gi wakansan mo tani aha/ mina rasa dhana wassa/ kun diṯadiṯ mo, ji gi wakan yisa mishkunu e Pam Masir mo yisa, ’pena cim c̱aan jin ḵa’bkunu Pa Masir mo ntagi shwanesan mo be.19Hashi gwo mo mmotulu to em pini isi ’baar mo uni kun takina /e mo eya pije/ mo ki /e mini dhu uni ki ’danṯar e bwaŋ’kwarany ma darha’da/ mo haala wassa/ mini wolu ka ’cesh mo ap̱o/ ’kwani ’baar mo dhali ap̱o/ to e mo kun ’kokin apije/ mo. Dhali waḵki/ uni ’konuki ’doyu/ pa mo tani uni mini wu mo be.20Dhali yan’ko’d uni kun ḵo/ki gwo gi TAP̱A mo e bwaman ’kwani kun miikina P̱irawn aṯu’c mo tani uni dhuki aris c̱iŋkina/ dhali to em buni mo mmosoyu/ bway bwaŋ gu’b mo be.21Hili gwaṯṯan kun dina gwon TAP̱A ki thoṯẖ ki is mo tani uni dhalki c̱iŋkinam buni kun yola uni mo dhali to em buni eya pije/ mo be.22Dhali TAP̱A oki’da Musa gwo mo ki: Yethi me’d pini ’kup̱ ki momis mo ka wassa/ midi rasu/ ap̱o/ Pam Masiri ’baar mo ap̱o/i ’kwani mo dhali ap̱o/i to e mo dhali eya ris to kun sinu eya pije/ ki tur mo e Bampa/ Masir mo be.23Wakana Musa ’de’kki cwam piti mo ’kup̱ ki mis mo dhali TAP̱A hashki mondor ma sho’k mo dhala wassa/ dhali o’d iikina war war ka ’cesh mo. Wakan TAP̱A a’di i he’thki’da wassa/ mo ap̱o/ Bampa/ Masir mo be.24Awassa/ raski’d, dhali awara sho’k su’kki’d ki dwa/a’d dwa/a’d ki sule/ sule/ mo ’peni bwaman ma wassa/ mo. ’Tham si’da/ bucurki’d ki ’bi’th mo. Ji gi wakansan yisa mishkunu yisa e Bampa/ Masiri ’baar mo ’pena dhamo/ me’dyin dina a’di ki war ki kal mo.25Awassa/ raski’da p̱o/a ’cesh eya ris to kun ’kona pije/ mo uni kun sikunu mo ki tur mo eya ris Bampa/ Masir mo ki ’kwani ilu/ mo dhali to e ilu/ si’da/ mo dhali dhera ris cwa bwa ’baar mo kun ’kokin e bwam bunto si’da/ mo be.26Dhali mon ’de/ jin dina a’di ki ’ce’d sho’k ka wassa/ mo tani ta’da ’cesh gi Pany Jaasaan jin ’kona uc̱i ma Israyiil i cine/ mo be.27Dhali yan’ko’da P̱irawn hashki’da hash mo dhali yuḵa Musa dhala Haruun mo dhali o uni gwo mo ki: Aha/ miikina miinthus ka tee yan mo. TAP̱A a’di i mii’d ki ’bore/ mo dhali aha/ dhali ’kwanim pem mo tani aman a’di i thamkina mii mo be.28’Thoyi TAP̱A mo ma, haali/ a’di ’kosh jwa mo ’peni kon dor ma sho’k yan mo dhala wassa/ mo. Aha/ mina dhal um bway mo mmo/ii mo. Um mini mii dhalku/ ki mii ’ko ki rash rash kan mo.29Musa ki thoḵ a’di gwo mo ki: Ki aha/ mina ya mo ’peni ’peŋkuman bampa/ ki ’ta’b mo tani aha/ mina ṯe’d me’d pem e TAP̱A mo dhali ’tho mo. Dhali mondor ma sho’k midi dosh mo dhala wassa/ si’da/ mini ’koki ’ko mo doḵ e ki /e mini mish gwo ’ban ki mony’cesh ta ji gi TAP̱A mo be.30Hili gom /e mo dhali aris ’kwanim pini kun miiki /eya ṯu’c mo tani, aha/ misha ki um ’koki ḵo/ TAP̱A Arumgimis naskina/ moyi.31Emen to ma yin dhali ḵala uni i’ce’dkunu sho’k mo haali/ ḵala isi’d mo dhali emen to ma yin di’d e pimpal mo be.32Hila gameh yisa i’ce’dkunu sho’k mo haali/ a’di iski’d i ’ko’d mo be.33Wakan aMusa a’di yaki’d ka pije/ mo ’peni ’peŋkuman bampa/ mo ’pena P̱irawn mo dhali ṯe’d me’d piti e TAP̱A mo. Dhali mondor ma sho’k dhala wassa/ uni doshkin mo dhali asho’k yisa doḵ e hethi yi’de/ ap̱o/ mony’cesh mowa.34Hili ka P̱irawn mishki’d ka sho’k dhala wassa/ dhali mondor ma sho’k doshkin mo tani a’di miiki miinthus naskina/ doḵ e mo. Dhali a’di ’bi’thki’da dum piti ki ’bi’th mo, a’di i nyaḵki/ uni kun miiki a’di aṯu’c si’da/ mo be.35Wakan adu ma P̱irawn a’di ’bi’thki’d mo dhali a’di diki dhal ’kwani ma Israyiil bway mo mmo/ii mo me’d gwo jin ṯorkina TAP̱A eya Musa mo be.