KURINṮH̱UUS SU/6udu_sim

1Mmonyaḵa um to mii ki a’di mo tani aman malaskina um mo mmo’koki budha ’the ma Arumgimis ki p̱e’th mo.2Haali/ a’di oki gwo mo ki:Ka tee jin budhuwa bu’th mo tani aha/ ciḵkina /e gwo modhali woṯẖ /e mo ka tee gi mowoṯẖ mo be.Dhali hili mo mo ma. Shwane/ a’di ta’da tee jin budhuwa bu’th shwane/ mo. Hili mo mo ma. Shwane/ a’di ta’da tee gi mowoṯẖ mo be.3Aman ’konaki kar toŋ kola kamu/ e bway gi jan ṯal ’deŋ kamu/ mo, wakan ki gwon ṯẖutha kamu/ minu ’koki gam mo ap̱o/ miim bam jin miina am to mo be.4Hili me’d c̱iŋkina/ ma Arumgimis mo tani am dhuna is bam mo ki ku gun ha me’d mo eya ris ’twaŋkal kuku/ mo. E dhan mon’dim ’kup̱ mo, e monṯo’c bwa mo, e miiŋ ḵaḵga/ mo, e mii gun shi/ashi/ mo,5e mondor mo, eya sijin mo, e mo ma dulaṯṯ mo, e mo ma ṯu’c jin caaca mo, e montima tim mo, en ṯe/ mo,6ki mii gun dheleladhelel mo, ki moyuḵ mo, ki mo jin ’kuc̱u bwa ki ’kari’th mo e mo gi isa nyor mo, ki mii jin miinu ki bwaŋkush mo, dhali ki Shi/in Dheleladhelel mo, ki mo/en gana/ mo,7ki gwoŋ gana/ jin onu mo, dhali ki mom’bi’th ma Arumgimis mo, ki to/as gi mii ma ḵar/e mo gom me’da bim poros mo dhali me’da cam mo be,8e montaḵ mo dhali mo jin ushuwa taḵ taḵ mo, e gwonthus jin ṯoruwa p̱o/ mo dhali e gwom ’boro’d jin ṯoruwa p̱o/ mo. Aman miinu me’d ’kwani gun he’kkina he’k e mo tani hili aman tana kuŋ gana/ mo,9me’d uni gun ’konuki mish mo tani hili aman mishu mo ki ’bore/, dhali me’d kun ’kon mo e mowu mo tani dhali hili mo mo ma, aman ’kona ki e mo, me’d uni gun c̱ikunuwa jisa mo tani hili aman ’konuki ’kosh jwa mo be,10me’d kun ’kon ki bwan diṯadiṯ mo tani hili isa yempa/ mmo’kuny bwa mo, me’d uni kun hatha’ko’d ki ha’th mo tani hili aman miikina mii ka ris kun ta pa ki pa mo, me’d uni gun dar gi to mo tani hili aman tana ga ris to ’baar mo be.11’Twam bam ḵa’dkunu mo gom um gi Paŋ Kurinṯẖuus mo. Adum bam waŋgala waŋgal mo be.12Um yisa ’tashu ’twa/ ki aman mo yisa hili um i’tashu ’twa/ ka dum bum kun sicasi’c mo be.13E miim pem jin miga/ kul ’kup̱ ki um mo tani – aha/ mina o um gwo mo me’d um ta uc̱i mo – Waŋgali adum bum si’da/ mo ma.

Um Ta Monyc̱a’b ma Arumgimis jin Di ki E mo

14Dhalku/ ki mash ki uni kun daran gi gwo jin gamu is mo ma. Haali/ mii ma ḵar/e midi nyaḵ to mii ki to shigga/ kata mo? Walla moŋkush midi nyaḵ to mii ki mondhurumi’d kata mo?15Bwa ma Ḵrisṯẖos midi gam me’d ki bwa ma Bali/aal mmana mo? Walla wathi/ jin gam gwo is taki’d gi to jin nyaḵka’d mo ki a’di jin dara’d gi gwo jin gamu is mowa?16Gwo gi wakata mina gu’b gi mondheleladhelel ma Arumgimis gam me’d mo ki ji gi luŋu tomp̱inycon mo? Haali/ ana tana gu’b gi mondheleladhelel ma Arumgimis jin di ki e mo me’d gwo jin on ma Arumgimis mo ki:Aha/ mina di e uni mo dhali nyaḵ shekem ibwaman uni mo,dhali aha/ mina ta uni Arumgimis buni mo,dhali uni mini ta ’kwanim pem mo be.17Gom gwo gi wakan mo tani piyi um ka pije/ mo ’peni uni modhali dhuyi is bum ki she/ ’peni uni mo. A’di ta gwo jin ona Tap̱a mo.Dhali dhalki to nyoggaŋ kamu/ ki ta is ki me’d mo.Yan’ko’d aha/ mina hayy um mo be,18dhali aha/ mina ta um Ababa mo,dhali um mini ta iya/m pem mo dhali i’bwa/m pem mo.A’di ta gwo jin ona Tap̱a mo, a’di jin ta a’di jin Eḵa/ Eḵ mo be.
expand_more
Search