Read LLUKU 1

LLUKU1ubu_kal

1:1-4 LLukuni Yesusinge Temanemo Kokele Pulu Polopa Tombando Ou Pulu Pulu Boku Torumu Temanemo

¹Ye paa awili Tiopillasi, olio molemolo koleana Yesusi kinie ulu wendo orumume pulu-pulu wendo orumu kinie kanoko, yandopa wendo orumume kanoko andoko moloringi yembomane pe olio temane toko siringi mele, aku temanemo ‘Sike.’ nimbu tondolo mundupu pilimolo kanumu yembo awisilini ‘Aku temanemo bokune kamu molopili tamili.’ ningu boku toringi.³Akumunge pe kelepo nane kepe “Temanemonga pulumu paa pilipu kondambo.’ nimbu ou pulu pulu wendo orumu mele kepe yandopa ulu lupe lupema wendo orumu mele kepe akume pali walsipu pilipu kondopo molorundu-ne nane ‘Aku ulumendo yembo marene Tiopillasi nundu temane toko ungu mane silimele mele aku sipe wendo orumu ulume nu piliéni.’ nimbu, ‘Nane nundu ulumenga pali paa sike wendo orumu mele temane topo nimbu siembo.’ nimbu, boku topo nu simbo kinie papu.’ nimbu pilipulie aku temanemo topo ibokumu tokoro.

1:5-2:52 ILLISAPETENE NO LINDELI JONO MERIMU MELE KINIE MARIANE YESUSI MERIMU MELE KINIE TEMANEMA

1:5-25 Mulu Koleana Angello Tene No Lindeli Jono Menge Mele Kinie Molopa Temba Mele Nimbe Sirimu Temanemo

⁵Ye Nomi Kingi Erote kolea Judia nokopa molorumu kinie Pulu Yemo popo tondorumu ye te molorumu,yunge imbi Sekaraya. Pulu Yemo popo tondoringi yembomanga talape tenga imbi Apaya, Sekaraya yu kanu talapemonga ye te. Sekaraya menu ambo Illisapete Pulu Yemo popo tondoringi yemanga talape tenga ambo te. Elonga pea pulu-pulu anda kolepamo Pulu Yemo popo tondoringi yemanga pulu-pulu ye nomi awili Erono.⁶Aku ambo yeselo moloringili mele Pulu Yemone kanopa ‘Yembo sumbi niliselo.’ nimbe kanorumu. Elone yunge ungu manema kinie “Yemboma teaa.” nirimu ungume pali pilku liku teko kondoko moloringili.⁷Nalo Illisapete we waengono perimu, ambolango te naa meringili. Elo we ambou anda leko moloringili.⁸Walse Sekarayanga talapemone Pulu Yemo popo toko kaloringi kongono tenderingi kinie yu kepe pea Pulu Yemonga kumbikerena kanu kongonomo tenderingi. Aku tendeko molkolie niringimuni, Pulu Yemo popo tondoringi yemane teringi mele tengendo enonga talapena ye te Pulu Yemo popo toko kaloringi ulke tembele akumunge suluminiana suku ‘Nawe pupe mune tolemo paura kekumu yembomanga nimbe kalondombanje piliemili.’ ningu kou-kate teringi. Aku tekolie ‘Sekaraya yu kanu kongonomo tendemba.’ ningu kanoringi kulu yu ulke tembele suluminiana suku pupe mune toli paura kekumu kalondo-porumu.¹⁰Aku tepa angilierimu kinie ulke tembelena we yemboma maku toko Pulu Yemo popo toringi koleana yembo awisili Pulu Yemo kinie ungu ningu angilieringi.¹¹⸤Sekaraya mune toli paura kekumu kalondopa angilierimu kinie⸥ kanu paura kekumu kalondo-pou-pou teringi polomonga ki-umbukundu Awilimunge angello te omba mona angilierimu kanorumu.¹²Akumu kanopalie pungu pungu nimbe pipili awili tepa kolorumu.¹³Kanu kinie angellomone yundu nimbendo: “Sekaraya, pipili naa kolou.” nirimu. “Nu Pulu Yemo kinie mawa teleno mele Pulu Yemo yuni pilierimu. Nunge ambomo kango te kanopa limbe. Yunge imbi “Jono” ningu leani.¹⁴Yu molombamonga nu konopu awili teko siku kamele akoko moloni. Yu mengele kinie yembo awisili konopu singe.¹⁵Awilimuni yu kanopa ye awili peangamo nimbe kanomba. No waene kinie no tondoloma kinie walsikele kepe paa naa nopili. Anumunge olona we sukundu molomba kinie Pulu Yemonga Mini Kake Telimu omba yunge konopune molopa kapola temba.¹⁶“I sirele yembomane enonga Awili Pulu Yemo liku bulu siringi yembomanga awisili Jonone tembamonga altoko konopu alowa teko Awili Pulu Yemopea altoko pilku kapola kapola molonge.¹⁷⸤Pulu Yemone ungu umbu tondorumume pilipe yemboma nimbe sirimu ye⸥ Illainja tondolo pepili ulume tepa molorumu mele Jono yu aku sipe tondolo pepili ulume tepa molomba. Aku sipe tondolo pepili ulume tepa molombamonga lapalini konopu alowa teko ambolangoma kelko konopu mondongela; Pulu Yemonga ungu manema liku su silimele yembomane konopu alowa teko, konopu sumbi nili yembomane telemele mele ‘Aku sipu teamili.’ ningu molongela; Jono yuni tembamonga Awilimu ombá kinie Awilimu yunge ungumu sumbi siku pilku linge yembo talape te molongela.” nimbe angellomone Sekarayando nirimu.¹⁸Aku nirimu kinie pilipelie Sekarayane angellomondo walsipelie nimbendo: “Aku nikinumu nambepo nane ‘Sike nikinu.’ nimbu pilimboye?” nirimu. “Na anda lepo nanga ambomo ambou lierimu kanumu. Pe inikinumu nambepa wendo ombamondo nikinuye?” nirimu.¹⁹Angellomone topondopa nimbendo: “Nanga imbi Geperiele. Na Pulu Yemonga kumbikerena angilio. Ikinié nundu nikiru mele Pulu Yemone “Aku siku ni-pou.” nimbe lipe mundomu-ne nundu ombo itemane peangamo topo sikiru.²⁰Nalo nane “Kango mengele.” nikirumu ‘Kolo tokomonje?’ ningu pilkinu kene iulumu ou wendo naa opili nu ungu naa nili moloni. Pe “Wendo ombá.” nikiru mele amboma ambolango olona mondokolie melemelemanga walema omba pulimo mele aku sipe walema omba pumbe kinie inikiru ungumu paa sike wendo ombá.” nirimu.²¹Aku siku ungu ningu angiliengili Sekaraya ulke tembelemonga suluminiana sukundu koronga-ou pupe molopa, welea wendo naa orumu kulu yemboma ulsukundu yu nokoko angilieringime konopu awisili liku mundoringi.²²Kanu kinie yu wendo ombalie nirimumuni, ungu te kerena manda naa nimbe kimuni mindi manda manjipe angilierimu kinie kanokolie, ‘Sekaraya yu suluminiana suku molopalie melte omba angilieli none tepa kumbikere lipe pinjemu-ne kanomu.’ konopu lieringi.²³Pe ulke tembelena yunge kongono walema pora nirimu kinie yunge ulkendo purumu.²⁴Ulkendo pupe ⸤ambo Illisapete kinie pekolo moloringili kinie⸥ pe Illisapete ambolango olona mondorumu. Mondopalie oli kise pakera ‘Yembomane yu naa kanangi.’ nimbe lopi tepa molorumu.²⁵Yuni nimbendo: “Kinié na-kinie ulu tekemomo Awilimuni nanga nimbe tendekemo. Na ambolango te naa merindumunge yemboma na kanoko keri kanoringi kinie pipili kolorundumunge Awilimu yuni na kondo kolomu lemo.” nirimu.

1:26-38 Mulu Koleana Angello Tene Mariane Yesusi Memba Mele Nirimu Temanemo

²⁶⸤Illisapete ambolango olona mondopili oli kise pakera kolopa⸥ talo pakera sipemo ke topa angilierimu kinie Pulu Yemone mulu koleana angello Geperiele kolea Gallilli disiriki Nasarete taonona lipe mundorumu.²⁷Kanune ambo wenepo te, ye te kinie ou naa peli we molorumu ambo wenepo te molorumune mundorumu. Kanu ambo wenepomo yunge pulu lierimu yembomane ‘Yu ye te pupili.’ ningu mako toringi yemonga imbi Josepo. Kanu yemo yunge anda kolepa te ⸤ye nomi kingi⸥ Depisi. Ambo wenepomonga imbi Maria.²⁸Maria molorumune angello Geperiele ombalie yundu nimbendo: “Ambomo, nu molonune na okoro. Nu malo. Awilimu nu pea tapu toko molembele.” nirimu.²⁹Nalo kanu ungumu pilipelie yu konopu awisili lipe mundupelie, ‘A! Inikimumu nambolka unguri nimbe nikimunje?’ nimbe pilierimu.³⁰Angellomone yundu nimbendo: “Maria, Pulu Yemone nu kanopa peanga kanokomo kene pipili naa koloyo.³¹Pílie. Nu pe olona kango te mondokolie menimu. Mengolie yunge imbi “Yesusi” ningu leani.³²Yu ye nomi molomba, yu imbi leko ‘Paa Olandopa Molemomonga Malo.’ ningela; Awili Pulu Yemone ‘Yunge anda kolepa Depisi Isirele yembomanga ye nomi kingi tondolomo molorumu mele yu aku sipe molopili.’ nimbéla;³³Enonga anda kolepa Jekopone kalopa lsimu yemboma yuni kamu-kumu nokombala; Yu ye nomi kingi awilimu molopa mindi pumbe.” nirimu.³⁴Mariane angellomondo nimbendo: “I nikinu ulumu nambepa tembamondo nikinuye? Na ye te naa purundu kanumu.” nirimu.³⁵Angellomone yundu nimbendo: “Nu molonine Paa Olandopa Yemonga Mini Kake Telimu omba nunge olona kango te mondondomba. Aku tembamonga kango nuni menimu yu kango kake telimu molomba; yu imbi lekolie ‘Pulu Yemonga Malo’.ningela.³⁶⸤Pulu Yemone nu “Tembo.” nikimu mele sike temba. Ulu tondolo te “Tembo.” nimbelie terimu mele niembo.⸥ Nunge pulu lemo ambo Illisapetendo “Ambo waengono pelemo.” nilimele nalo kinié yu ambo ambou liepili oli kise pakera kolopa talo pakera sipemo ke topa angiliepili yu kango te olona mondokomo kanumu.³⁷Pulu Yemone ulu manda naa temba ulu te paa naa pelemo. Yuni ulume pali kapola telemo kanumu.” nirimu.³⁸⸤Angellomone yundu aku sipe nirimu kinie pilipelie⸥ Mariane nimbendo: “Na Awilimunge kongono kendemande ambomo molio. Nuni nikinu mele Pulu Yemo yuni na-kinie aku sipe tepili.” nirimu. Kanu kinie angellomone Maria mundupe siye kolopa yupurumu.

1:39-45 Maria Yunge Pulu Lierimu Ambo Illisapete Pupe Kano-Porumu Temanemo

³⁹⸤Mulu koleana angellomone Mariando ungu nimbe pora sipelie kelepa purumu kinie⸥ pe Maria kolea Judia disiriki pupe ma pangi tenga ola taono te lierimune purumu.⁴⁰Pupe akune ye Sekarayanga ulkena suku pupelie ambo Illisapete kanopa “Na okoro.” nirimu kinie kanguloringili.⁴¹Illisapetene Marianga ungumu pilierimu kinie Illisapete yunge olona ambolangomo pukue topa ola manie terimu pilierimu. Kanu kinie Pulu Yemonga Mini Kake Telimu Illisapetenga konopune pupe molopa kapola terimu kinie “I siku i siku ni.” nirimu mele⁴²Illisapetene ungu tondolo tepa nimbelie nimbendo: “Ambo molemelemanga pali nu malo. Ambomanga pali Pulu Yemone nu olandopa tepa kondorumu. Ambolango nu olona mondolenomo kepe yuni tepa kondombala.⁴³Na ambo keri te molondune nanga Awilimunge anumu nu onumunge na konopu awisili lipu mundukuru. Aku tenumunge na-kinie teko peanga sikinu.⁴⁴Nu ongolie “Na okoro.” ninu-ne komuni piliendu kinie nanga olona molomu ambolangomo paa konopu sipe pukue topa ola manie temu.⁴⁵Awilimuni nundu nirimu ungumu pilkulie ‘Sike nikimu. Yuni “Tembo.” nikimu mele sike aku temba.’ ningu tondolo munduku pilierinumungeyuni nu tepa kondokomo mele tepa kondomba kene nu konopu siku molani.” nirimu.

1:46-56 Pulu Yemone “Eno Nokopa Kondomba Ye Te Lipu Mundumbo.” Nimbe Mako Torumu Ye Nomi Kirasimu Mariane Memb Mele Pilipelie Konana Nimbe Pulu Yemo Kapi Nirimu Temanemo

⁴⁶Illisapetene nimbe pora sirimu kinie Mariane nimbendo:“Pulu Yemo nanga Lipe Tapondopa, Mindili NomboMolopo Kenjilio Aulkena Wendo Lipe,Kapola Molopo Kondombo AulkenaLipe Mondomba Yemo kiniena konopu paa awili tepo sikirumungenanga konopumuniAwilimu kapi nimbe imbi lipe ola mundundukumu.⁴⁸Pulu Yemo yuni yunge we ambo kendemande kerimusiye naa kolopa konopu lipe mundorumumungenanga konopumuni aku sipe yu kapi nikimu.Yembomane pe pe kepe kalko linge yembomane nando“Pulu Yemone nu tepa kondokomo. Nu malo.” ninge.⁴⁹Tondolo Pulimuni na ulu tondoloma tenderimumungenando aku siku ninge.Tondolo Pulimu yu ye kake telimu.⁵⁰Yu-kinie pipili kolko pilku limele yembomayu kondo kolopa molemo.Enone pe pe kepe kalko lingema kepekondo kolopa molopa mindi pumbe.⁵¹Yuni yuyu ulu tondoloma terimu.Yembo kara puku enonga konopuneenono kapi ningu molemele yembomayuni anjo anjo topa makoropa mundulimo.⁵²Yemboma nomi molko koleama nokoko molemelemayuni topa manie mundupe,yemboma enonga imbimeeno enono topa manie mundumbemayuni enonga imbime lipe ola mundundulimo.⁵³Engelene kolemele yemboma yuni‘Olo tepili.’ nimbe langi peangama sipe,yembo kamakoma mele teluri kepe naa sipe“We paa.” nimbe makorolemo.⁵⁴Yuni olionga pulu-pulu anda kolepalimendo“Tembo.” nimbe, nimbe panjerimu ungumukomu naa sipe pilipe molopalie,⸤anda kolepa⸥ Eporayamo kinie,Eporayamo yuniyandopa yandopa kalopa lsimu yemboma kinie,enondo “Tembo.” nimbe,nimbe panjerimu mele tembandoolio Pulu Yemo yunge kendemandeIsirele yembo molemolo akume yunikondo kolopa lipe tapondomba tepa molemo.”nirimu.⁵⁶Maria Illisapete kinie pea molangili oli yepoko omba purumu kinie pe Maria yu yunge ulke koleando kelepa purumu.

1:57-66 Illisapetene Kango Jono Merimu Temanemo

⁵⁷Illisapete ambolango memba walemo wendo orumu kinie yuni kango te kanopa lsimu.⁵⁸Yunge ulke kere pongolo yemboma kinie yunge pulu lierimu yemboma kinie Awilimuni yu kondo awili tepa kolorumu mele pilkulie eno yu pea konopu siku moloringi.⁵⁹Wale yepoko pakera kangomo kanopa lipe nosipe molorumu kinie wale engaki sipemonga yemboma sukundu sukundu ongo maku tokolie yunge kangi te kopisiku makaye teko wendo liku ltekolie niringimuni,yunge imbimu yunge lapanga imbi manda manjiku “‘Sekaraya’ niemili.” niringi⁶⁰nalo kangomonga anumuni “Molo.” nimbelie “Yunge imbi ‘Jono’ nimolo.” nirimu.⁶¹Enone yundu ningendo: “Elonga pulu lemo yembo tenga imbi aku sipe naa molemo.” niringi.⁶²Kanu kinie enone “Lapane nambolka konopu lekemone, yunge imbi lepa nawe nimbéne, walsipu piliemili.” ningu lapando kimuni manda manjeringi kinie⁶³yuni topondopa kimuni manda manjipelie “Boku siee.” nimbelie, yuni bokune topalie nimbendo: “Yunge imbi Jono.” nirimu. Akumu kanokolie yembomane paa konopu awisili lieringi.⁶⁴Kanu kinie walsikele Sekaraya yunge kerena kelepa ungu nimbelie Pulu Yemo kapi nirimu.⁶⁵Aku terimu-ne kanokolie yunge ulke kere pongolo yembomane pipili paa koloringi. Kolea Judia disiriki ma pangime polorumu koleamanga pali aku temanemo mindi toliku puringi.⁶⁶Aku ulumu pilieringi kinie yembomane pali konopu liku mundukulie ningendo: “Ulu akumu we naa telemo. Awilimu ikangomo-kinie molombamonga aku tekemo lemo.” ningu pilkulie “I kangomo pe nambepa molombanje?” niringi.

1:67-80 Sekarayanga Konanamo

⁶⁷Mini Kake Telimu Jono lapa Sekarayanga konopune omba molopa kapola terimu kinie Sekaraya yuni Pulu Yemone ungu umbu tondorumu ungu te pilipe, pe wendo ombá mele yemboma nimbe sipelie nimbendo:⁶⁸“Awilimu, Isirele yembomanga Pulu Yemo,yu kapi nimbu imbi lipu ola mundundemili.Yu omba yunge yemboma lipe tapondopaumbune tene eno ambolorumu-nemindili nongo moloringi kanu umbunemongawendo limu-ne pilipulie aku teamili.⁶⁹Pulu Yemo yuni yunge kendemande⸤olionga ye nomi kingi⸥ Depisinikalopa lsimu yembomanga ye tondolo peli teolio ‘Lipe tapondopa mindili nombomolopo kenjilimolo aulkena wendo lipe,kapola molopo kondomolo aulkenalipe mondopili.’ nimbe simu.⁷⁰(Yuni ungu umbu tondorumume pilkuyando ningu siringi yemane pe tembamondokoronga ou ningendo:)⁷¹“Yuni olio lipe tapondopaolionga opa puluema topa mundundupe,olio kanoko keri kanoko mindili silimele yemboma‘Aku siku naa teangi.Wendo ongo kapola molangi.’ nimbeaku siku telemele aulkena wendo limbe.”niringi mele kinié aku temba tekemo.⁷²Olionga anda kolepalime kondo kolopa,olionga pulu-pulu anda kolepa Eporayamo kinie“Tembo.” nimbe, nimbe panjipe mi lierimu mele“komu naa sipu, nirindu mele teambo.” nimbelieaku temba tekemo.⁷⁴‘Pipili naa kolko, nanga kongonomotondolo munduku tendeko, konopu kake tepili molkonane kanopo peanga kanolio ulume mindimana teko mololiku pangi.’ nimbelieolionga opa puluemane olio toko mindili silimelema‘Naa teangi. Olio we molamili.Lipu tapondopo tokomele aulkena wendo limbo.’nimbe, nimbe panjipe mi lierimu mele‘Teambo.’ nimbelie aku tekemo.”⸤nirimu.⸥⁷⁶“Nanga kango ⸤Jono⸥,nu kumbi leko puku Awilimu ombá aulkemoakisindenímunge pilkulie ningemone,yembomane pe nundu ‘Olandopa Molemomongaungu umbu tondolime pilipeyando nimbe sili yemo.’ ninge.⁷⁷‘Awilimu yunge aulkemo akisindembo.’ ningulienuni yunge yembomando i siku ningu sini:“Awilimu yuni enonga ulu pulu keri telemelema‘Manie pupili.’ nimbe siye kolopalieeno lipe tapondopamindili nolemela aulkena wendo lipe,yu-kinie pea molko kondonge aulkena lipe mondomba.”ningu, aku ungumu enondo ningu sini.⁷⁸Pulu Yemone olio kondo awili tepa kolopalieolio sumbulu toline molopo kololi aulkena molomolomakonopu pe nipili molomolo aulkena‘Manda kanoko pangi.’ nimbe‘Patendepili.’ nimbe olio molemolonapatendelimu lipe mundukumu.”nimbe Sekarayane nirimu.⁸⁰Kango Jono yu awi lepa konopu tondolo pupe kapola molorumu.Yu pe Isirele yembomanga kumbikerena kongono tepa molombando ou kolea ku lieline pupe molorumu.

LLUKU 1 / ubu_kal