মর্কুস2
1আসা ইশুহা সাইয়ু-নিহয়ুকো নোইতাহা কোর্ফরনহুম তাওয়া লোইতা লায়োংয়ে, দিংঙাবিহা ইশু সাতা নিনা তামসা সিদা চ্যইয়ে।2আসা আউতা উইসে দিংঙাবি দেরেমকো সোতা, বাইরে লাপুংতারে জাদু-কেদুরে মোতোমি। ইশুহা সেংজাকো নুওয়াং হিংপাদিংনুওয়া3দিচো দিংঙাবিহা ইচো সাঁপে দিংঙাহিং ন্যাগু নিপা পুসপুমসা ইশুকোতা পারায়ে।4আদো আউতা উইসে দিংঙাবি নিমকো সোতা হাইওয়াহিং ইশুকো আবিতা পুরামক্যইতো, আকো সোতা আবিহা ইশুকো জাদিংওয়া সাকো কেংবুহিং য়্যামসা আকো ন্যাগু নিপারাং ইশুকো আবেইতা ধুইপুয়ে।5ইশুহা আবিকোতা আজিপ্পা দেংওয়া তিংমসা, আকু সাঁপে দিংঙাহিং জাংয়ে, “ও চেংওয়া! নাকো পাপ হিনিহসো ছমা জিংপুয়ে।”6আউতাহা তাংজিকো উটকেওয়াবি গাসুদিংমি, আসা আবিহা তাইবিলারাই এপা জাংমসা তুংসিংতা নোসুদিংমি,7ই দিংঙাহা হাংপাসা এপা জাংদিংমে? ই জাংওয়াবিহা সেংজাহিং নিন্দা জোওয়াগা, সেংজা ল্যামসা হাংসুরে পাপ ছমা জোমক্যইরোওয়া।8ইশুহা আবিকো তুংসিংকো নুওয়াং কোইমসা আবিহিংয়া জাংয়ে, “নাবিহা হাংপাসা এপাজিংওয়া নোমগা?9হাইওয়া দিংঙাহিং ‘নাকো পাপ হিনিসো ছমা জিংপুয়ে তাকো’ মোকোনাহা ‘লো, নাকো ন্যাগু পুচামসা হোতু তাকো’ হানি জাংতোংপা নিংগা?”10ইশুহা আকু সাঁপে দিংঙাহিং জাংয়ে, “কা নাতিহিং জাংরোওয়া, ‘লো, নাকো ন্যাগু য়ো, আসা সাতা হোতু’!” ইশুহা দিংঙাবিহিং জাংয়ে, “কা দিংঙাকো চেংওয়াহা বাসিমতিতা পাপ ছমা জোকো ছুমগা তামসা নাবিহা গেকো ছুকো। আকো সোতারাং কা আকুহিংয়া সাংপায়ে।”12আকুহা তাত্রিংপা লোয়ে, আসা ন্যাগু য়োপুমসা তাংসাকো প্যাকোসো হোপুয়ে। আসা আউতা নিওয়া দিংঙাবিহা আকুহিং তিংমসা তাংসা আআংপেপেচপুমসা এপা জাংয়ে, “এপা জোওয়াহা কাবিহা হাত্রংরে মাতিংয়াংতো” তামসা আবিরে সেংজাহিং তাচায়ে।13ইশুহা ন্যাসারাং গালীল দাব্রিকো আরিতা হোনুওয়া উইসে দিংঙাবিহা আউতা দেরেহে, আসা আকুহা আবিহিং ঝিপায়ে।14আউসো হাদাংনুওয়া ইশুহা আল্পাইসকো চেংওয়া তোংক্যা জুওয়া লেবিহিংনে তোংক্যা জুওয়া জায়গাতা গাদিংওয়া তিংয়ে। আসা ইশুহা আকুহিং জাংয়ে, “কুং নুনুই লেই” ই হিংমসা আকুহা ইশুকো নুনুই হুইপুয়ে।15ইশু লেবিকো সাতা য়োংতোংবিহিংপা আমা চাকো গানুওয়া, আকুহিংপা নুনুই হুইমবি উইসে তোংক্যা জুমবি আসা দোসরা পাপি দিংঙাবিরে আকুহিংপারাং চাকো গায়ে।16আদো ফরিসি তাওয়া তাংজিকো উটকেওয়াবিকো প্যাকোকো ইচো নিহসো দিংঙাবিহা ইশুহিং এপা তোংক্যা জুমবি আসা দোসরা পাপি দিংঙাবিহিংপা গামসা চাদিংওয়া তিংমসা ইশুকো য়োংতোংবিহিংয়া জাংয়ে, “আকুহা তোংক্যা জুমবিহিংপা আসা পাপিবিহিংপা হাংপা গামসা চামগা?”17ই জাংওয়া হিংমসা ইশুহা আবিহিং জাংয়ে, “মাহাইমবিহিংয়া ডাক্তার মোঘ্যইমগা, আদো হাইমবিহিং মেংচে ঘ্যইমগা। কা এনতাওয়া দিংঙাবিহিং মোকো, আদো পাপিবিহিং মোরেকো লেমগা।”18সাইয়ুহা বাপ্তিস্মা পিচাওয়া য়হুন্নাকো য়োংতোংবিসো ফরিসিবিহা উপাস য়ুংদিংমি, আত্রংহা দিংঙাবিহা ইশুকোতা লেমসা ইশুহিং উইয়ে, “য়হুন্নাকো য়োংতোংবি আসা ফরিসিবিহা উপাস য়ুংচাংমগা, আদো নাকো য়োংতোংবিহা হাংপাসা উপাস মায়ুংচাংমগা?”19ইশুহা আবিহিং জাংয়ে, “বিয়ৌতা ওয়াংওয়া দিংঙাবিহা বিয়ৌলা চিত্তা নিনু চোইপা উপাস য়ুংকোগা? আবিহা মায়ুংরোসা!”20আদো সময় ওয়াংরোওয়া, হাত্রং বিয়ৌলাহিং আবিহিংপা ওয়েংপাপুই, আত্রং মেংচে আবিহা উপাস য়ুংরোওয়া।21“হাংসুরে জেবে আংদুংতাহা চুবে আংদুং মাতোরোওয়া, হাংপাতানাহা চুবে আংদুং তোওয়াসোহা জেবে আংদুংহা কোংচপুওয়াকো সোতা ন্যাসারাং উইটে য়্যাইপাপুরোওয়া।22“এপারাং হাংসুরে চুবে আংগুরকো য়ুহিংয়া জেবে বেকোংকো জিয়োতা মাওয়্যাইমগা, মেনাহা আকু য়ুসোহা জেবে জিয়োহিংয়া ওয়্যাপাপুরোওয়া আসা য়ুবিরে ক্যাপুরোওয়া।”23সানুকো দিনতা সাইয়ু ইশুহা লুংনিংসো হোদাংমি। আকু লুংনিংসো হোদাংনুওয়া আকো য়োংতোংবিহা আকু লুংনিংতা সেওয়া মাওংবি পিমসা নিচোইমসা তেইদিংমি।24ই তিংমসা ফরিসিবিহা ইশুহিং জাংয়ে, “সানুকো দিনতাহা লিংপাংতা নিওয়া সেই জোমতুওয়া কাম আবিহা জোদিংয়ো।”25ইশুহা আবিহিং জাংয়ে, “নাবিহা হাত্রংরে মাপাড়াইয়াংগা? দাউদ জাইপুহা আকুসো আকুহিংপা নিওয়া দিংঙাবি হাপাং-পুনুওয়া হাং জোংগা?26উইসে লো নাগাইহা টেবো পাউ আবিয়াতারকো সময়তাহা দাউদহা সেংজাকো সাতা হোয়ে, আসা সেংজাহিং পিচাওয়া কোব্রেং চায়ে। আকু কোব্রেংহা লিংপাংতা নিমবেপা সেংজাকো কাম জোওয়া পাউবি মোকোনাহা হাংসুরে চামতুমি। আদো দাউদহা আপনিরে চায়ে আসা তাতিহিংপা নিওয়া ব্যারোবিহিংনে পিচায়ে।”27আসা ইশুহা জাংয়ে, “সানুকো দিনহা দিংঙাবিকো সোতা দিংমগা, আদো দিংঙাহিংয়া সানুকো দিনকো সোতা দিংওয়া মোকো।28আকো সোতারাং দিংঙাকো চেংওয়াহা সানুকো দিনকোরে গিরিগা।”
The Seed Company