য়হোশু20
1আত্রংহা পরমপ্রভুহা য়হোশুহিং2ই নুওয়াং ইস্রাইলকো দিংঙাবিহিং জাংকো জাংয়ে, “মোসাকোসো কা নাবিহিং জাংওয়া সেই আপনিহিং সুরক্ছা জিংওয়া জায়গাবি জেং।3লেরা দিংঙাবিহা ভুল কিতা মেগেমসা দিংঙা স্যাওয়া দিংঙাহা আউতামি ক্যাপুমসা হোনাহা আকুহিংপা স্যাওয়াকো বাদলা লাংকো কেংওয়া দিংঙাকোসো বাচেমসা য়ুংকো ছুরোওয়া।4আকু শহরবিতাহা লেরা ইচোতা আকু স্যাওয়া দিংঙা ক্যাপুমসা হোমসা, আকু শহরকো লাপুং কাটুতা জাকাকো, আসা আকু শহরকো ন্যায় জোওয়া জায়গাতা দেকামসা ঘটনা জিংপুওয়াকো বিষয়তাহা অগুওয়াবিহিং হিংপাকো। আত্রংহা আবিহা আকু শহরকো নাপোতা হোচাকো পিচারোওয়া আসা আউতা ইচো য়ুংকো জায়গা পিচারোওয়া আসা আকুহা আউতা য়ুংচাকো ছুরোওয়া।5আকুহিং বদলা লাংকো স্যাকো কেংওয়া দিংঙাহা নুনুই হুইপুমসা আকু শহরতামি দেকানাহা, আকো দিংঙাবিহা আকো খুইতা আকুহিং মাত্যইকো। আবিহা আকো রক্ছা জোনেরোওয়া, হাংপাতানাহা আকুহা ভুল আসা মেগাপা স্যাপুমগা, সেদ্রাংমসা মোকো।6দিংঙাবিকো নাগাইতা ফৈসলা মাজিংনু চোইপা আসা আত্রংকো সময়কো টেবো পাউ মাসিনু চোইপা আকুহা আকু শহরতা য়ুংচা মুংরোওয়া। আকো নোইতা হানি শহরসো আকু ক্যাপামসা ওয়াংমমে, আকু শহরতারাং লাকামসা য়ুংকো ছুরোওয়া।”7আকো সোতা য়র্দনকো দিব্যা কাটুতা আবিহা ই শহরবি অলগ জোয়ে। নোপ্তালিকো লাগাকো জায়গাতা গালিলকো কাদেশ, এফ্রাইমকো য়্যাগ্যইকো জায়গাতা শেকেম আসা য়হুদাকো লাগাকো জায়গা কির্য়ত-অর্বাহিং (হানিহিং হেব্রোন তামমে) অর্পন জোয়ে।8য়র্দনকো নুব্যা কাটুকো য়রিহোকো নুব্যাতা নিওয়া চিচ্চোওয়া জায়গাকো ওয়াংবোইতা ই শহরবি অলক জোয়ে: রুবেনকো জায়গাতা বেসের, গাদকো জায়গাতা গিলাদকো রামোত আসা মনশ্শেকো জায়গাতা বাসানকো গোলান।9ইস্রাইলকো তাংসা দিংঙাবি আসা আউতা য়ুংওয়া বিদেশিবিকো সোতা ইরাং সাওয়া জায়গাবি জেংওয়া নিমগা। ভুলসো স্যাসুওয়া বিষয়তাহা আকু স্যাওয়া দিংঙাহা আকুহিংপা বাদলা লাংওয়া দিংঙাকোসো সুরক্ছিত জিংমসা আকু জায়গাতা য়ুংকো ছুমগা। আউতা জোংসুওয়া দিংঙাবিকো নাগাইতা নাগাইহা আকো ফৈসলা মাজিংনু চোইপা আকুহিং স্যাকো মামুংমগা।
The Seed Company