য়োনাকো হিগা4
1ই নুওয়াংতা য়োনাহা আদ্যইসোরাং মিকা মাজাইতো আসা আকুহা সিওপ্পারাং সেদ্রাংপুয়ে।2আসা আকুহা এপা পাচাইয়ে, “ও পরমপ্রভু, নাতিহা এপারাং জোচাংমগা তামসা কা সাসো নোনুরোমা নাগাইসোরাং জাংমকোতা? আকো সোতারাং কা তর্শীশতা ক্যাপুকো চুওয়া সেই কোশিষ জোমগা। নাতিহা লামতুপা জোওয়া, কৃপা জোওয়া, গেরেমদা মেসেদ্রাংওয়া, হাত্রংদো জেজেংওয়া মায়াংওয়া সেংজাগা, নাতিহা আপনিকো তুংসিংহা হুরাপামগা আসা দন্ড মিচামগা তামসা কা গেদিংমগা।3ও পরমপ্রভু, নেহা কাহিংয়া স্যাপু, হাংপাতানাহা কাহিংয়া নেহা ঙাজ্যইং য়ুংওয়ারোমাহা সিওয়ারাং এনতারোওয়া।”4সেংজাহা জাংয়ে, “নাতিহা সেদ্রাংকো হাং অধিকার নিংগা?”5য়োনাহা শহরকো নুব্যা কাটুতা হ্যামসা মোংটোতা গায়ে। আপনিকো সোতা ইচো গ্যই বানাইমসা আকো লিতা আকুহা গায়ে। আসা নিনেবে শহরহিং হাং জিংকোমে তামসা খুইমসা য়ুংয়ে।6আত্রংহা পরমপ্রভু সেংজাহা য়োনাহিংয়া আইংসি আরাম জিংকো তামসা নাঁবুং পিচাকো ইতেং লাউকাসেকো সিংতেং আউতা নিংকো তামসা আজ্ঞা জোয়ে। আকু সিংতেংহিং তিংমসা য়োনাহা সিওপারাং গাগ্রুপুয়ে।7আদো জুকুং হাপকুং জেংদাংনুওয়া আকু সিংতেংহিং চাকো তামসা সেংজাহা ইপু পেতাহিং আজ্ঞা জোয়ে। পেতাহা আকু সিংতেংহিংয়া চাপুয়ে আসা আকু সিংতেংহা য়োংপুমসা সিপুয়ে।8সানি ত্যইনুওয়া সেংজাহা নুব্যাসো লোউচক্যইওয়া বিঙা নিংপুয়ে আসা সিনিহা নাংজ্র্যাপা য়োনাকো পোরোতা হুইয়ে। য়োনাহা বোপুমসা সিকোমে নিকোমে মাইপা জিংপুয়ে। আকুহা সিকো ইচ্ছা জোয়ে। আকুহা জাংয়ে, “কাহা ঙাজ্যইং য়ুংওয়ারোমাহা সিপুওয়ারাং এনতারোওয়া।”9আদো সেংজাহা আকুহিংয়া জাংয়ে, “আকু সিংতেংকো তোইতা সেদ্রাংপাকোহা নাকোহা হাং অধিকার নিংগা?” য়োনাহা জাংয়ে, “কাহিংয়া সেদ্রাংপাকো অধিকার নিও, কাহা এসেপাকো সেদ্রাংদিংয়ো, কি কাহা সিপুকো ত্যাবাপা জিংদিংয়ো।”10পরমপ্রভুহা য়োনাহিংয়া জাংয়ে, “আকু লোউকাসেকো সিংতেংহা লিসুংতারাং নিংয়ো আসা লিসুংতারাং সিপুয়ে। আকো সোতাহা নাতিহা হাইরে জোমঘ্যইতো, আদো নাতিহা আকুহিংয়া লামতুদিংয়ো, নাতিহা আকুহিংয়া তিংকোরে তিংমগ্যইতো নিংপাকোরে নিংপামগ্যইতো। আদো নাতিহা সেদ্রাংপায়ো।11আদো আকুরোমা সিওপারাং লামতুপা কা আকু টেবো শহর নিনেবেহিং মোজোকোগা? আউতা এনতাওয়াসো ধুইওয়াহিং নাইকো মাছুওয়া ১২০,০০০ রোমা সিওপা দিংঙাবি নিও আসা আউসেরাং সেংচেংবিরে নিও।”
The Seed Company