Same147tte_owb
1Yeoba tatobalan. Inamwanamwa tem tawali-tobali ala Yaubada koina, kaiwena iya tokatekamkamna mwa ilonamwayan tawali-tobali koina.2Yeoba Yelusalema ikabi-walui yoi yo Isileli tomo tomiya-suwala ikalakalaiyoilima.3Siya tonuwanae iyanuwa-daumwalili yo siya silasilaeli kali gai ipanli.4Utu kali baibaiwa Yeoba iloinayanako kabo kaigeda kaigeda esaliyao iyogayagili.5Ala Yeoba tolalakisosi yo ana kaiwe ikaiwesosi yo ana katai nige kana sigasiga ipapagan.6Yeoba siya tonuwalobi ikeleisinagili na toyauyaule igabaegili bwatano mena.7Yeoba koina kwawali me ami kawatoki na ami api kolili kwavenu ala Yaubada koina.8Kaiwena bulibuli mwayagana isuma yaloyaloi kolili, galewa iwolena yanuwa yaulina koina, yo kawasi iyakinli koya kolili.9Yakayakan meuloili kali iwolegili besiele tabe aoao natuliyao kikiuli sivalavalam.10Ana kaba yaliyaya nige osi kaikaiweli kolili, yo tabe nige tokaleyayao kaikaiweli kolili,11na ana kaba yaliyaya ele siya analiyao siyakasisi-yan yo siya analiyao ali meli sipei ana mulolo miyamiya yaina koina.12O Yelusalema, Yeoba kwatobalan. O Saiyon, ami Yaubada kwatobalan.13Ami gana gamwana kana gulu ikabi-yakaiweyako yo ami tomoyao iwalo-muloloili.14Daumwali iyeyawa ami yanuwa koina na kami kaleyao kani nige silalaoma kami sigasiga sililikwai, yo iyakanmiu tano kanna namwanamwasosina koina.15Ana loina ipei yanuwa yaulina mena kabo ana walo iyawatagili mwayamwayau mena.16Yeoba koya isumali sinou koina besiele kabobo, na wabumali iyasululi besiele mayau kaukauna.17Galewa patupatuna tulutuluna igabaen besiele gelegelesa, nige yabo yaiya sowasowana itolo pwatana mena, itulutulu sosi.18Kabo iwalo yoi na siwelo, yaumai sivesivevena iyawasayama na waila sididi.19Ana walo iwolena ana tomoyao Isileli kolili, ana loinao meuloili iwalo-masalagili sibomamo kolili,20nige igiginauli kaba loina uloili kolili kaiwena ana loinao nige sikakataili. Yeoba tatobalan.