1A̱yi nda a̱yi ɗa ili i gbain i na tsaa dansa: Tsu ta̱ na̱ aabara a nan ganu na tsu da̱nu o ukere usaꞌani wa̱ A̱sula̱ Mogono me Ili Suru.2Aabara a nan ganuꞌu u ta yuwusan ulinga u tsuganu uba̱ta̱ wu Upasu u na u Laꞌai Akiza† suru suru, uba̱ta̱ wa amayun wa̱ a̱ga̱nda̱ a na A̱sula̱ a yuwain, agba ama a ɗa a suwa niyi shi.3Aabara a nan ganu suru a̱ ta̱ nu ulinga wu ucasu wu neꞌe nu ucasu u kucci a̱ tyo A̱sula̱. Adama o ndolo aabara a nan ganu tsu fo u ꞌyuwan u ciga u ca A̱sula̱ ili i ro.4Nnu u shi pa o uvaɗi, u shi o oꞌwo ganu shi, ko keꞌen, adama a na nan ganu a̱ ta̱ pa, a na o tonishi Wila̱ a casu A̱sula̱ neꞌe.5A̱ga̱nda̱ a na nan ganu aa yuwusan oroci o ululu wi ili i na i ri zuva ɗa. Una̱ta̱ u ɗa u ri cine u da̱na̱i na̱ Musa. Ana Musa da̱na̱i e ifoɓi i na waa yuwan Oogodo o Ucuwusan, A̱sula̱ a damma yi ta̱, “Vu cuwan ana vu da̱na̱i zuva masasan, n damma wu ta̱ cine vaa yuwan yi. Vu yuwan yi cine n damma nuwu foyi.”6Amma ulinga u tsuganu u na A̱sula̱ a cayi Yesu u laꞌa ta̱ ulinga u na a cayi akapi a nan ganu. Ne ɗa waru, akucunu a saꞌavu a na Yesu ta̱wa̱yi diga a̱ A̱sula̱ a̱ tyo uba̱ta̱ wa ama a̱ yi u laꞌa ta̱ za vu ufaru. Adama a na ana A̱sula̱ a yuwain akucunu a saꞌavu, ili i na u dammai waa yuwan u laꞌa ta̱ ili i na u dammai waa yuwan a akuci a akucunu.†7Nna̱ akuci a akucunu a gura ta̱ yuwan ili suru na wu ntsayi a yuwan, ili yi lo na yaa zuwa a yuwan za ve ire shi.8Amma A̱sula̱ na aciya̱yi, ana we enei amaꞌa a gura kuru akuci a akucunuꞌu mejege shi, ɗaɗa u dammai:“N ta dansaa ɗu, mantsa mo ta̱ lo a̱ ta̱wa̱,ana maa yuwan akucunu a saꞌavu,na ama o uꞌwa wa Israꞌila na ama o uꞌwa wa Yahuza.†9Akucunu a nda a̱a̱ da̱na̱tsu za na n yuwayin nkaya n le shi,ana n guza̱ nle ekerereve mu uta̱a̱ le e iɗa ya Masar.†Amma a ꞌyuwan ta̱ o toni yi,a̱vu n vadalaa le ucina̱.10Amma, apa akucunu a saꞌavu a na maa yuwanna ama a Israꞌila a mantsa ma na ma̱a̱ ta̱wa̱:A̱mu, A̱sulazuva, n ta zuwa wila̱ u va̱ a asuvu e le,adama e reve le,waru n ta ɗana le a̱tsuma̱ o okolo e le,adama a̱ kuru le.N to oꞌwo A̱sula̱ e le,ele waru o to oꞌwo ama a̱ va̱.11Ama a̱a̱ da̱shi rito ama e le, na̱ nron mu nden n le shi,adansa, ‘I reve A̱sulazuva,’adama a na amaꞌa suru e te reve mu,diga a zawaꞌa a̱ tyo a zagbain le suru suru.12N ta yuwaan le gafura vu ili i wuya i na a yuwain,waru ma̱a̱ da̱shi cuwan na̱ nusu le shi, ko keꞌen.”13Ana A̱sula̱ a yuwain adanshi a akucunu a saꞌavu, u to rocosu u yuwan ta̱ ɗe za vu ufaru waru wo oꞌwo ta̱ ili ye pere. Waru ili i na i kutsai ɗe hali u kporoi suru u ta̱ puwa̱n babu usa̱n.