Nzabisili2

Muhanda huli Libundu li musyenge a Efeso

1«Sonehele huli pofi a Libundu li musyenge a Efeso:
Mono ma mali mu uleele wuuna wu akaanga bamvwelele tsambu ŋa kaka la nde la mbahala na wu li mu uyene ŋa hati li bisiha tsambu bya wolo bi bubaasuusala minda :
2“Me nzaabi mbiili a we, pasi yi we amono na mukonono a we. Me nzaabi ti we utwala ukuunda banga bukanyi ve. We akete boosi ba bali mu uleele ti bo biluumbi bali, ka bo a bali byo ve. Na we asoolo ti bo banga mapfuta.3We li na mukonono, we amono pasi mu tooni a me, na we a hakolo ve.4Ka me ndi na dyambu limosi li me ndi mu utsyembe we. We a hasaalatondo me we hu mbandu ve.5Yibuhala moonyi mu mutaabu wu we asakuha, sobo mbiili a we, na futahala mavaanga ma we matsomi. Tso a buuna ve, me tsa nziila we, na umaasa isiha hya we hya wolo hi bubaasuusala minda ŋa mbuha a hyo.6Ka bumosi we me, dyambu lilibwe li lili mu we ni linili: we abele mavaanga ma baatu ba Nikola.
7Nyaha pasi muutu nga matswi, ayuha bubwe-bubwe ma Livupu ali mu uleele huli Mabundu!
Huli wu ubiinga, me upa mbutu muti a moonyi mu udya. Muti mo wuuna ni wu li hutso a paradiso a Nzambi.”»

Muhanda huli Libundu la Nzambi li musyenge a Simirine

8«Sonehele huli pofi a Libundu li musyenge a Simirine:
Mono mamali mu uleele wuuna wu li watsomi na watsukusu, wu akwidi na asuuha mu babaakwa:
9“Me nzaabi mapasi ma we na buyaha bwa we. Ka mu mbuli, we isina we li. Me nzaabi makusa ma ba bubaabilumana ti bo Bayudaayo bali, ka bo a bali Bayudaayo ve: bo bali binama bya kabu la Saatana.10A mono tsisu mu tooni a pasi yi we umono ve. Yuha: Saatana ulobese benu, na ubwaha ba balahi mu benu mu kondaayi. Buutsuta benu mu bilumbu kuumi, ka ba ngetetee nate lipfu, na me upa we mutata a moonyi wu bilima na bilima.
11Nyaha pasi muutu nga matswi, ayuha bubwe-bubwe ma Livupu ali mu uleele huli Mabundu!
Wu ubiinga mudiingu, a huuba na boomo bu lipfu la moole ve.”»

Muhanda huli Libundu la Nzambi li musyenge a Perengami

12«Sonehele huli pofi a Libundu li musyenge a Perengami:
Mono ma mali mu uleele wuuna wu li na sabila wu ato, nga a mengo moole:
13“Me nzaabi hu we li mu utsahala. Ni huuna hu huli na kiti-ipfumu hya Saatana. Ka we asinzakangama mu me. We a hatimba imiinu mu me ve, tso mu taangu yi baadubi Antipaasi, mbangi a me wa ngetetee, hu musyenge a benu, huuna hu Saatana ubaatsahala.14Ka me ndi na mwa masyembo ma usa we. Huli we, we na baatu ba baakangama mu ndongisili a Balaami. Nde wunuwu, akasimbalala Balaaki mu utehele baana ba Isereli mweto. Mana bo badya banyama ba baayeholo huli bifwita, na mana bo basalila banzambi bakima.15Ni bumosi, we li kaka na baatu ba baakangama mu ndongisili a Nikola.16Ni mu buuna, sobo mbiili. Tso a buuna ve, me ndi bebele mu uyiila we, na me tsa nza na sabila wu ubaapala mu munywa a me, mu ulwanisa baatu mo baana.
17Nyaha, pasi muutu nga matswi, ayuha bubwe-bubwe ma Livupu ali mu uleele huli Mabundu!
Huli wu ubiinga, me upa nde maane ma masweme. Me upa kaka huli muutu muutu, manya li lifuuka libaasonehe nduhi yi nyatihi yi pasi muutu haveleyaba, ka ndulu muutu wu uyaka lo.”»

Muhanda huli Libundu la Nzambi li musyenge a Tyatire

18«Sonehele huli pofi a Libundu li musyenge a Tyatire:
Mono ma Mwana a Nzambi ali mu uleele, nde wu miisu mali mu ululaha we mbaahu, na wu miilu mili mu umwedeme we itali hi himiibeenge hutso a mbaahu:
19“Me nzaabi mbiili a we, litondo la we, bungetetee bwa we, isalu hya we, na mukami a we. Me nzaabi ti mavaanga ma we ma tsyelele, maalutahala matsomi bulahi.20Ka li me ndi mu utsyembe we ni ti: we li mu uva bunyanga huli Yenzabeli, mukaasu wu li mu ubilumana ti nde mumbihuli a Nzambi. Nde li mu udungasa basalili ba me, mu usimbalala bo mu usambila banzambi bakima na mu udya banyama ba baayeholo huli bifwita.21Me apa nde taangu mu usobo mbiili a nde, ka nde a hanyaha usambila banzambi bakima ve.22Ni mu buuna, me umbwaha nde ŋa yulu a taangi minyongi. Me umbwahila kaka mapasi ma manono huli bambaahi ba nde, ba bali mu usambila banzambi bakima na nde, tso bo a basobi mbiili a bo yimbi ve.23Titswene, me utuma uduba baana ba nde. Buuna, Mabundu moosi muuyaaba ti me ni wu ubaakengese matsimi na manzala ma baatu. Me utsyende muutu muutu we bu hu li mavaanga ma nde.
24Ka uto ti benu bisu musyenge a Tyatire, bakima a baasiinga ndongisili a bo ve. Benu a laasaha uyaaba mambu ma bo bali mu uteele ‘idongi hi matswehi ma Saatana’ ve. Mono ma me ndi mu unzabisa: Me a handi mu ukwiha benu mupfuna mukima ve.25Ndulu, hi benu lili na hyo, kaangaani hyo bubwe-bubwe natee bu me unza.
26Huli wu ubiinga, huli wu usa litondo la me natee hu tsukusu, me upa nde lituma ŋa yulu mabuli.27Nde utuma mabuli mu matwala ma likaanda li itali na upasa mo we lisanga.
28Me mwakulu anzaki matwala mo maana huli Taata a me. Na me upa nde kaka mvwelele a ŋa ngwali.
29Nyaha pasi muutu nga matswi, ayuha bubwe-bubwe mambu ma Livupu ali mu uleele huli Mabundu!”»

Wycliffe Bible Translators, Inc.

https://app.library.bible/content/6e65462278162711