Bahebeleho11
Imiinu
1Usa imiinu mu Nzambi, ni uba na hiitu mu bisiha bi libaatsima uyaka, ni usilasa hu bisiha bi laavelemono.2Ni mu imiinu hya bo, Nzambi haasilisi babahala na bakaasu ba taangu a tsikulu.3Ni mu imiinu, bisu libaayaaba ti tsi yoosi baavaanga mu mambu ma Nzambi, na byosi bi bibaamonehele, baavaangi byo mu bi bibaavelemonehele.4Ni mu imiinu, Abeli haayehuli huli Nzambi bungodu bu bwalutahala bwa Kayini bubwe. Ni mu imiinu Nzambi haatili Abeli imbangi ti nde li muutu wu akuha, bu Nzambi nde mwakulu haasilisi makabu ma nde. Ni mu imiinu hya nde, Abeli akini mu utoyo, tso bu nde haamiikwa.5Ni mu imiinu, Nzambi haavinguli Enooke hu yulu, hwavele umono lipfu. Muutu tso mumosi a haabwemono nde ve, mu tooni ati, Nzambi avinguli nde. Mu mbuli, teehele nde avingula nde, Nzambi asilisi nde bu nde haaba muutu wu mubwe.6Ka hwavele imiinu, muutu utwala uva Nzambi kinya ve. Mu mbuli, woosi wu uyaasusaha huli Nzambi, afwana usa imiinu ti Nzambi li, na ti nde ubaasyende ba bali mu usaha nde.7Ni mu imiinu, Nowa ayuhi makebisili ma Nzambi, mu mambu ma maakiivangama, ma baabeedi kini a baamoni ve. Nowa asiingili Nzambi na atuungi likuumbi li laafuuhisi nde na nzo a nde yoosi. Ni mu buuna mu imiinu, nde haabelisi toto yoosi yi nde haabyalili, na Nzambi amoni nde muutu wu akuha.8Ni mu imiinu, Abrahami haasiingili Nzambi ŋa Nzambi haateeli nde. Nde ayeni hu tsi yi Nzambi haasiidi lahi mu uva nde we mukobe. Nde ayeni hwavele uyaaba hu nde haakayene.9Ni mu imiinu, nde haatsahili we mwenyi hu tsi yi Nzambi haasiidi nde lahi. Nde atsahili hutso a nzo a ngooto, bumosi kaka we Isaki na Yakobi ba baakituhi bo baboole babyalili ba mukobe a lahi ni lo limosi.10Ka Abrahami akakeele musyenge nga bibeene bi byavangama, musyenge wu Nzambi nde mwakulu ali musuundi na mutuungi.11Ni mu imiinu kaka Sara, tso bu haaba inguma na bu haaba haaka inunu mu umene yimi, Nzambi aviidi nde matwala ma ubaha imbisa. Mu mbuli, nde aba na hiitu ti lahi li Nzambi haasiidi nde luuvangama.12Ni mu buuna, mu muutu mumosi, Abrahami inunu wu aba aka hu manili idiingu hya nde ŋa toto, hwapali imbisa hi ilahi, we bamvwelele hu mayulu, baapfunana we musyeŋunyu ŋa simu li mubu, wu buuveletwala utanga.13Ni hutso imiinu, baatu mo baana boosi baakwidi. Bo a baabahi bi Nzambi haasiidi bo lahi ve. Ka bo baatalili byo hu lala na baamoni kinya mu byo. Bo baabanguli ti bo baaba byenyi na bapyohi-nzila ŋa toto.14Bu bo baabanguli buuna, bo bali mu umweese paayalala ti bo bali mu usaha tsi yi yiuba ya bo mwakulu.15Tso bo baanyongi mu tsi yi bo baamati mu yo, bo baakibaha nzila mu ufutaha huuna.16Mu mbuli, bo baaba na nzala a tsi yi yaafulala tsi mo yiniiyi bubwe. Tsi mo, ni tsi ya hu mayulu. Ni mu buuna, Nzambi a hali na tsonyi bu bali mu uteele nde Nzambi a bo ve. Eye, nde aba amiivangimasa bo musyenge.17Ni mu imiinu, Abrahami haayehuli Isaki mu bungodu, ŋa Nzambi haayebi mutima a nde. Eye, nde aba avangama mu uyeholo mwana a nde wu livingu, mu tooni a bu nde haayaki lahi mu nde.18Nzambi aleeli nde:«Ni mu Isaki we ubaha imbisa hi me atsa we lahi.»19Ka Abrahami ayaabi ti Nzambi na matwala ma usuula Isaki mu babaakwa. Ni mu buuna, Nzambi haafutili nde mwana a nde: Vanga mo liniili, lili ifwaani hya sahu.20Mu imiinu, Isaki asyemi Yakobi na Esawu mu libwe la bo la hu busu.21Ni mu imiinu, Yakobi haasyemi pasi mwana a Yosefi, bu nde haaba bebele mu ukwa. Nde asikimi mu tsoso likaanda la nde na nde akuundi Nzambi.22Ni mu imiinu, Yosefi, hu pedu a tsukusu idiingu hya nde, haayabisi palili a baana ba Isereli mu Ngipiti, na nde aleeli bo bu bo buusa mu mavisi ma nywutu a nde.23Ni mu imiinu, babuti ba Moose baaswehi nde mu batsungi batatu, hu mbisa a mbutili a nde. Bu baamoni ti nde aba mubwe a mwana, bo a baabati boomo mu ubisala tumili a mutumi a tsi ve.24Ni mu imiinu, bu Moose amiibuuha, nde abisi ti bateele nde mwana a mwana a Falahoni wu mukaasu.25Nde asiingi hwa nde umono mapasi itwadi na buli la Nzambi, ka a mu umono makinya ma tsumihili mu mwana a taangu hoole ve.26Nde atsimi ti, tsonyi yi nde haamoni bu nde haasiingi Masiya, yaaba yaafulala tsoongo na busina bwa Ngipiti. Ka nde akatalila musyendo wa hu busu.27Ni mu imiinu, Moose haamati Ngipiti, hwavele ubata boomo bwa kesi a mutumi. Nde amweesi mukami, we nde wu akamono Nzambi wu baavelemono.28Ni mu imiinu, nde haavangimisi mukungi a Paake na haatumi mu ukila makila mu mapatu ma manzo, mana pofi mudubi aveleduba bapasa-mabeelo ba babahala ba bisu Isereli.29Ni mu imiinu, baana ba Isereli baasabuhi mubu wu mubeenge, we ŋa yulu a toto a banga. Ka ŋa masadaadu ma Ngipiti maayehili usa bumosi, bo baadyami.30Ni mu imiinu, bibaha bi byakadiinga musyenge a Yeriko byabwidi, hu mbisa a hu baana ba Isereli baadyengili byo mu bilumbu tsambu.31Ni mu imiinu, Rahabi, imbembo hi mukaasu, hyavelikwa itwadi na ba baakavelesa imiinu mu Nzambi, mu tooni ati, hyo hyaayaki baketi ba musyenge mu hyenze.32Ki lo me umbwendeele? Tangu a yiubweba ve mu utoyele mu Ngedehoni, Barake, Samusoni, Yefite, Davidi, Samweli, na mimbihuli.33Mu tooni imiinu, bo baabiingili matsi ma batumi, bo baasalili butsiitsa, na baayaki bi Nzambi haasiidi lahi. Bo baadibuhi minywa mi bakosi.34Bo baadimisi mambaahu ma mifudi, baafuuhi mu lipfu la sabila. Hu mbisa bubeedu, bo baabahi mifudi; bo baamonihili balwani ba tsisu hutso midiingu na baabingisi makonge ma balwani ma byenyi.35Bakaasu baamoni bamvumbi ba bo mu usuuha mu babaakwa.Baanyongisi bakima mu iteesi hi lipfu. Bo baabisi ti bafuuhasa bo, mana bo basuuha mu babaakwa na babaha idiingu hi hyalutahala bubwe.36Bakima kaka baakuundi mukwede na bikooti, bamosi baahadi mapaanga na baabwahi bo mu kondaayi.37Bamosi baadubi mu mamanya, bakima baatabuli mu bitudu byole mu bikwakwa, buuve baadubi mu sabila. Bakima kaka baakayene mutele-mutele, baalwata bikutu bi baatuunga mu bibaanda bi mandombo, buuve bi bataba. Hutso buyaha, baakatsuta na baakakwamisa bo.38Tsi a yaaba a yaahwama na baatu mo baana ve! Bo baakayene mutele-mutele mu makumu ma nzala na mu yulu bisyelo. Bo baakatsahala mutso mirali, na mutso biyuna bya mu toto.39Nzambi asilisi baatu mo baana boosi mu tooni imiinu hya bo. Ka bo a baayaki bi Nzambi haasiidi bo lahi ve.40Eye, Nzambi ataasili bisu mu bisiha bi byafulala bubwe, na nde a haatoondi ve ti bo bato hu usupaha hwavele a bisu.
Wycliffe Bible Translators, Inc.