Kolosaayi3
1Mu tooni ati, benu laamiisuha na Kristo ŋa hati la babaakwa, sahaani bisiha bya hu yulu, hu Kristo hatsahala ŋa mbahala a Nzambi.2Baasahaani bisiha bya hu yulu, ka a bi bili ŋa toto ve.3Mu tooni ati benu laamiikwa, na moonyi a benu asweme na Kristo mu Nzambi.4Ŋa Kristo wu li moonyi a benu humonehele, benu kaka sa limonehele na nde hutso muyusu a nde.
Mbiili yi kulu na mbiili yi nyatihi
5Ni mu buuna, dubaani byosi bya toto bi bili mu nyutu a benu: bumbembo, tsumihili, nyinga, manzala ma mabi, nyungu, mu tooni ati, yo yili kaka kuundili bifwita.6Ni bubi bwa pila yiina bubaateele kesi a Nzambi [huli baatu ba bubaavelesiingala nde].7Yiina aba ni mbiili a benu yi kulu, ŋa idiingu hya benu hyaba hutso lituma li masumu mo maana.8Ka bunuubu, benu kaka timbaani maniima moosi: kesi, fwengili, bukanyi, utuha Nzambi. Dyambu tso limosi la tsonyi livelepala mu munywa a benu.9A laabaapfutasana, mu tooni ati, benu laamiisiisa imuutu hi ikulu na bipfu bya hyo.10Benu laamiilwata imuutu hi inyatihi hi Nzambi wu avaanga bisu ubaabwehwadisa tangu yoosi mu ifwafwani hya nde, mana benu liyaaba nde bubwe-bubwe.11A husaali na lisobosono ve, tso we li ngoyi, tso we li Muyudaayo; buuve wu baakete, tso wu baavelekete; buli la baatu ba baavele a nzaabili, tso mubongo; tso muviha, buuve wu li bunyanga. Hya tsoongo ndulu ni Kristo, nde wu li byosi, mutso a baatu boosi.12Nzambi amiisoolo benu mu uba baatu nde, na nde ubaatondo benu. Ni mu buuna, benu laafwana uba na mutima wu litondo li mifudi, wu ukumbasa bana, wa kulimini, wu bulembo, wu mukami.13Benu laafwana ukuunda ndyatili bambaahi. Tso mumosi mu benu li na tooni na mbaahi, hwafwana mu usa bana kolo-kolo, we bu Pfumu haasiidi benu kolo-kolo.14Ka ŋa yulu a maana moosi, baani na litondo, dita mo li luusa ti benu liba mu itwadi hi hyasupaha.15Nyaha hyenze hya Kristo hiba mu mitima mya benu. Ni mu ukuhasa hyenze mo hiina Nzambi hateele benu, mu uba binama bi byabaambana mu nyutu mosi. Nyaha benu libaafutala matondo!16Nyaha mambu ma Kristo mabaha mbuha mu mitima mya benu na busina bwa mo bwosi. Baalongesenaani na baayibusanaani na tsiki yoosi. Yimbalaani Nzambi mu mitima mya benu myosi, na pfutili matondo, mu mikuunga na nyimbu, na nyimbu Livupu.17Byosi bi benu luusa, mu mikuma buuve mu mavaanga, baasaani byosi mu nduhi a Pfumu Yisu mu pfutili matondo mu nde huli Nzambi Taata.Ndongisili yi yitali buli
18Benu bakaasu, baani hu tsina lituma li balumi ba benu, we bu hwafwana mu usa, bu lika itwadi na Pfumu.19Benu balumi, baatondwaani bakadi ba benu, na a liba na mitima mi myapiinda ŋa busu bwa bo ve.20Benu baana, baasiingalaani bangu na bataata ba benu mu pasi dyambu, mu tooni ati, maana ni ma Pfumu ubaasilasa.21Benu bataata, a laabaakwiisa baana ba benu kesi, mu uvelenyongese bo.22Benu basalili, baasiingalaani bapfumu ba benu ba ŋa toto mu myosi. A laabaakuhasa lo ndulu ŋa busu bwa bo, we ba bali mu usaha umweese kinya huli baatu, ka nyaha lisiingala la benu livangama mu mutima a benu woosi, mu tooni a likiinzu la Pfumu.23Pasi isalu hi benu lili mu usa, baasaani hyo mu mutima a benu woosi, mu tooni a Pfumu, ka a mu tooni a baatu ve.24Yibuhalaani moonyi ti, Pfumu uva benu pfuta, ni mukobe wu nde haaswehele buli la nde. Mu tooni ati, Pfumu wa mbuli wu benu lili mu usalila ni Kristo.25Ka pasi muutu wu li mu uvanga bubi, sa ayaka musyendo we bu hu li mavaanga ma nde. Mu tooni ati, Nzambi a hubaasa lisobosono la baatu ve.Wycliffe Bible Translators, Inc.