2 Timoteho3
Bilumbu bya tsyelele
1Yibwala moonyi mu mambu mo maniima: hu tsukusu a taangu, sa uba na bilumbu bya pasi.2Baatu bu uba na nyinga, na linyungi la mbongo, na nyeme, na isaayi. Basafuli baa bungidi bwa Nzambi, banga kene ŋa busu bu bataata na bangu. Bo bu uba baa buveletwala ufutala matondo, bangoyi.3Baatu bu uba banga kamini mutima, bu ubisa unoongo na bambaahi, banga makusa, ba baavelekuta linyutu, banga a kasa, ba baabelele ma mabwe.4Baatu bu uba basumbisi ba bana, banga mafufu, banga lidadu, ba baafulala utondo makinya ma bo hwavele utondo Nzambi.5Bo sa bayusa Nzambi hutso muwala, ka bo bubaatuna ti matwala ma Nzambi matuma idiingu hya bo. Tahuha na baatu mo baana.6Me nzalusa benu, huli na bakima ŋa hati la bo babali mu utsodomo we miibi mutso manzo na ubaasoho bakaasu babaavele na dyeele, ba baaluula na mipfuna mi masumu, ba baayunga na banga manzala ma pila mu pila.7Bo bali mu ukwilala mu uyiha ndongisili yi nyatihi, hwavele utwala utsikaha imbuli hya Nzambi.8We bu Yanesi na Yambese baatelimini Moose, bumosi kaka, baatu mobaniba, bali mu utuna imbuli. Bo bali baatu banga matsimi ma mamiisahuha na imiinu hya bo hili hya mupu.9Ka bo a bu uto lala ve. Mu tooni ati baatu boosi sa bayaba butsudu bwa bo. We bu hwaba mu Yanesi na Yambese.Mandoongi ma tsukusu
10Ka we, we aduukili me mu ndongisili a me, mu ndyatili a me, mu makani ma me, mu imiinu hya me, mu mukami a me, mu litondo la me, mu mukonono a me, mu usungama tso mu ibahala hya me,11hutso a mbingisili na mapasi ma me. Ki mapasi me avelembwana na mo, hu misyenge mya Antyokya, Ikoniwumi na Lisitele! Ki mbingisili me avelekunda! Ka mu moosi, Pfumu ayobili me.12Boosi ba bali mu utondo udyata bu hwasungama mu Yisu Kristo, bu ubwana mbingisili.13Ka baatu banga mavaanga ma mabi, banga a soho, bu usinzakagama mu bubi bwa bo. Bo bu usoho bakima, na bu udunga bo mwakulu.14Ka we, kangama mu ma we ayiha mu bisu, na ma we ayaka mu mutima mumosi. We yabi huli na we ayiha mo.15Umata hu hati bumwana bwa we, we yabi Mabasonehe ma Ngidi. Maana moosi, ni ma mu utwala hwadisa imiinu hya we na uva we liyobolo mu Yisu Kristo.16Mambu moosi ma baasonehe mu Muhanda a Ngidi, mali mu umata huli Nzambi. Maana moosi mali na tsalu mu ulongese baatu, mu usyembe, mu usuungaha na mu uyihasa bo hutso butsiitsa.17Mono buni hwafwana mu uba, mana musalili a Nzambi aba wu avangama na wu akuha, mu usa pasi isalu hi ibwe.Wycliffe Bible Translators, Inc.