1 Koliito7
Mvutu mu byuhu bi makwele
1Bunuubu, limamonwaani ma benu laasonehele me mu muhanda a benu mu tooni makwele. Benu laafula me tso hwafwana huli bahala buuve mukaasu mu upfuuta taangi .2Ka mu tooni uvelekoto hutso bumbembo, pasi bahala laafwana uba na mukadi a nde, na pasi mukaasu afwana uba na mulumi a nde.3Mulumi afwana ukuhasa manzala ma mukadi a nde, ni bumosi kaka huli mukadi mu mulumi a nde.4Mukadi utwala usa ma nde hatondo mu nyutu a nde mwakulu ve: nyutu a nde yili yi mulumi a nde. Bumosi kaka, mulumi utwala usa ma nde hatondo mu nyutu a nde mwakulu ve: nyutu a nde yili yi mukadi a nde.5A libisa upfuuta taangi ve. Benu utwala usa buuna, tso benu liyuhisini mu itwadi mu uvyoso mwana a tangu mu lisambulu. Titswene, futahalaani mbiili a benu yi makwele we hutsomi. Tso a buuna ve, benu utwala uva Saatana muswa, mu ulobese benu mu tooni a pelili mifudi mi utuma nyutu a benu.6Moosi ma me ndi mu ndeele benu maniima, mali nzila yi benu luutwala usalila, ka a matumili ve.7Me tondi ti baatu boosi baba bapalaata we me. Ka pasi muutu na matwala ma Nzambi haava nde: mumosi matwala mo maniima, mukima matwala makima.8Mono ma me tondi uleele huli bapalaata na huli bakwili: hufwani huli benu mu uhwada mu ubaaba siha we me.9Ka tso benu a litwali ukama mutima mu uba palaata ve, kwelaani: bubwe mu ukwele, mu uvelekwamisa nyutu mu manzala ma musunya.10Huli ba baakwele, me piidi tumili mo yiniiyi, yi yimati huli Pfumu, ka a huli me ve: «Mukadi utwala ukabuha na mulumi a nde ve.»11Tso nde kabuhi na mulumi, nyaha nde abwevelekwele, tso a buuna ve, nde anoongo na mulumi a nde. Mulumi kaka avelebinga mukadi a nde.12Huli bakima, mono ma me undeele — a Pfumu li mu utoyo ve, ka me mwakulu — tso mulumi wu li Mukristo li na mukadi wu avele Mukristo, wu miisiinga utsahala na nde, mulumi anyaha ubinga nde.13Bumosi kaka, tso mukadi wu li Mukristo li na mulumi wu avele Mukristo, na wu miisiinga utsahala na nde, nde anyaha ubinga mulumi a nde.14Ni mu buuna, mulumi wu avele Mukristo uba wa ngidi mu tooni mukadi a nde, na mukadi wu avele Mukristo uba wa ngidi mu tooni itwadi hya na mulumi a nde wu li Mukristo. Tso a buuna ve, baana ba benu buuba ba baaveletsyeme, ka hwande bo ba baatsyeme bali.15Tso wu avele Mukristo tondi ukabuha na mulumi buuve na mukadi a nde wu li Mukristo, nyahaani huba buuna. Umono ti ni buuna, mulumi buuve mukadi wu li Mukristo, li bunyanga mu tooni ati, Nzambi ateele benu mu uba mu hyenze.16We mukadi wa Mukristo, buni we uyaaba tso we ufuuhasa mulumi a we? Buuve, buni we mulumi wa Mukristo, uyaaba tso we ufuuhasa mukadi a we?Ukwilala bu we aba ŋa Nzambi haateeli we
17Ŋa yulu a dyambu mo liniili, nyaha pasi muutu asiinga uba mutso mandilu ma Pfumu haasa mu nde, we bu nde haaba ŋa Nzambi haateeli nde. Maana ni ma me ndi mu utuma mu mabundu moosi.18Tso muutu aba wu baakete ŋa Nzambi haateeli nde, nde a haswehe ketili a nde ve. Tso mukima aba kini a baaketi ve, nde a hatuma bakete nde ve.19Uba wu baakete buuve wu baavelekete, a hu li na tsoongo ve: hi hili na tsoongo, ni ubaasiingala matumili ma Nzambi.20Pasi muutu afwana uba we bu nde haaba ŋa Nzambi haateeli nde.21We aba muviha ŋa Nzambi haateeli we? A haba na boomo, ka tso nzila yidibumi huli we mu uba bunyanga, bingalala ŋaana.22Mu tooni ati, muviha wu Pfumu haateeli, li muutu wu aka bunyanga mu usalila nde. Ni bumosi kaka, muutu wu li bunyanga wu Pfumu haateeli, li muviha a Kristo.23Nzambi asuumbi benu mu talu yinene! Ni mu buuna, a likituha baviha ba baatu ve.24Mu mbuli, baana ba ngu, nyaha pasi muutu aba we bu nde haaba ŋa Nzambi haateeli nde.Byuhu mu tooni a ba baavelekwele na bakwili
25Mu ma mali mu utala banuumba ba baavelekwele, me a handi na tumili a Pfumu ve. Ka me ndi mu upa matsimi ma me, we muutu wu baatu buusiila hiitu, mu tooni a bubwe bwa Pfumu.26Mu tooni munyongi a tangu mo yiniiyi, matsimi ma me ni maniima: hwaafwana huli pasi muutu mu ukwilala we bu nde ali.27We li bahala li laakwele? A ubila utsala kwele ve. We a hali wu akwele ve? Nyaha usaha ukwele.28Ka tso we kweli, we a hasiidi lisumu ve. Na tso nuumba kweli, nde a hasiidi lisumu ve. Ka ba buukwele, buubwana na mapasi mu idiingu hya bo hya pasi ilumbu, na me tondi uyibusa benu mana benu a libwana na mapasi mo maana.29Baana ba ngu, me tondi uleele ti, husaali mwana tangu hoole mu uto mu ilumbu hya Pfumu. Bunuubu, hwafwana ti babahala ba baakwele, baba we ba baavelekwele;30ba bali mu ulila, baba we ba bali mu uvelelila; ba bali mu kinya, baba we ba baavele mu kinya; ba bali mu usuumba bisiha, baba we ba baavele na bisiha;31na ba bali mu usalila bya tsi mo yiniiyi, bavelekangama mu byo. Mu tooni ati, bu tsi mo yiniiyi yili, yo a yuubwediinga bulahi ve.32Me tondi ti benu livele na minyongo. Wu avelekwele ubaasala mu tooni libwe li misamu mya Pfumu. Ma nde matsimi ndulu mu ubaamweese Pfumu kinya.33Ka wu li wu akwele, ubaasala mu tooni libwe li misamu mya tsi mo yiniiyi. Ma nde matsimi ndulu mu ubaamweese mukadi a nde kinya,34na nde li ŋa hati li matsimi moole. Ni bumosi kaka, mukaasu wu avelekwele, buuve nuumba, ubaasala mu tooni libwe li misamu mya Pfumu, mu tooni ati, nde tondi uba wu akangama woosi mu Pfumu, mu moosi ma nde ali mu usa na utsima. Ka mukaasu wu li wu akwele ubaasala mu tooni libwe li misamu mya tsi mo yiniiyi, nde ubaasaha umweese mulumi a nde kinya.35Me ndi mu undeele buuna, mu tooni libwe la benu, ka a mu utehele benu mweto ve. Me tondi ti benu libaasa ma maasinzafulala bubwe, na benu libaasinzakangama mu isalu hya Pfumu Nzambi.36Bunuubu, tso mupfudu-mbahala tsimi ti nde li mu uvyoso mutaangula a nde taangu bu nde havelekwele nde, na tso nde li na peyu makwele, na tondi ti bo bakwelesene, aka ni bakwelesene we bu nde atoondi, nde a husa lisumu ve.37Ka tso mupfudu-mbahala, voli kesili hutso mutima a nde mu uvelekwele, hwavele tooni ukwamisa nde, tso nde twali ukama mutima, na uvolo kesili mu uvelepfuuta taangi na mutaangula a nde, nde li mu usa bubwe.38Ni mu buuna, wu li mu ukwele mutaangula a nde, li mu usa bubwe. Ka wu ubaabisa mu usa buuna, ubaafulala usa bubwe.39Mukaasu akangama na mulumi a nde taangu yi mulumi akini moonyi. Ka tso mulumi a nde kwidi, nde ka bunyanga mu ukwele wu nde atoondi, ka ibiinda ti lo laafwana uba kwele la mu Pfumu Kristo.40Bunuubu, mukaasu mo wunuuwu ufulala uba mu kinya tso nde velibwekwele. Maana ni matsimi ma me, na me tsimi ti me kaka ndi na Livupu la Nzambi.Wycliffe Bible Translators, Inc.