1 Koliito15
Tsuuhili a Kristo mu babaakwa
1Baana ba ngu, bunuubu me ndi mu unzibuhala benu Musamu wu Mubwe, wu me anzabisa benu, wu benu laayaka, wu benu laakangama mu nde.2Ni mu nde benu luuyoboho, tso benu likaangi nde we bu me anzabisa benu nde. Tso a buuna ve, imiinu hi benu laasa hyuba hya mu pu.3Me ateehili uyaabisa benu ndongisili yi me mwakulu anzaki: Kristo akwa mu tooni masumu ma bisu we bu Mabasonehe ma Ngidi mali mu uyaabisa.4Baasuusi nde hutso a ngila, nde asuuhi mu ilumbu hi bitatu we bu Mabasonehe ma Ngidi mali mu uyabisa.5Nde amonihili na Peetelo, titswene na biluumbi kuumi na byole.6Humbisa, nde amonihili mu tangu mosi na baana ba ngu, litangu uvyoho makama mataanu (500). Ba balahi ŋa hati la bo bakini moonyi, ka mwa bakima baamiikwa.7Titswene nde amonihili na Yaaki, humbisa na biluumbi byosi.8Hu tsitusu, bu haamani umonehele na bo boosi, nde amonihili na me kaka, tso bu me ndi we mwana wu baabuta mu yimi li laaveleyele.9Ni mbuli, me ndi iluumbi hi hyafulala bukenyi ŋa hati li biluumbi. Mu uleele imbuli, me a hapfwana ve ti babaateele me «iluumbi», mu tooni ati, me anyongisi libundu la Nzambi.10Ka mu hyese hya Nzambi, me ndi bu me ndi, na hyese hi nde haava me hili na mifudi. Homo ati, me atsala bele a biluumbi bikima byosi ve, a mu me mwakulu ve, ka ni hyese hya Nzambi hyaakasala mu me.11Buuna, tso hwaba me, tso hwaba biluumbi bina, ni Musamu wu Mubwe wuuna bisu lili mu ulongese, ni nde benu laasa hiitu.12Bisu lili mu uta ibila ti Kristo asuuha mu babaakwa. Buni buuna! Me anzuha ti bakima ŋa hati la benu bali mu uleele ti: «Babaakwa a buufutaha hu moonyi ve.»13Tso babaakwa a buufutaha hu moonyi ve, buuna, Kristo kaka a hasuuha mu babaakwa ve.14Na tso Kristo a hasuuha mu babaakwa ve, ndongisili a bisu yili ya mu pu, na imiinu hya benu kaka hili hya mu pu.15Titswene, bisu lili mu umonehele we bambangi ba mapfuta ŋa busu bwa Nzambi, mu tooni ati, bisu laasilasa ti Nzambi asuula Kristo mu babaakwa. Tso ni mbuli Nzambi a hasuula nde mu babaakwa na ufutala nde hu moonyi ve, buuna, babaakwa a bali mu usuuha ve.16Ka, tso babaakwa a bali mu usuuha ve, Kristo kaka a hasuuha mu babaakwa ve.17Na umono ti Kristo a hasuuha mu babaakwa ve, imiinu hya benu hili hya mu pu: benu likini hutso masumu ma benu.18Buuna, babaakwa mu imiinu mu Kristo, bamiibungana.19Tso bisu laasuusa hiitu hya bisu mu Kristo, ndulu mu idiingu mo hiniihi, buuna bisu ni banga lingebe ufulala baatu boosi.20Ka ni mbuli, Kristo amiisuuha ŋa hati la babaakwa, na uva hiitu hya ti, boosi babaamiikwa kaka sa basuuha mu babaakwa.21Mu tooni ati, we bu lipfu laayidi mu muutu mumosi, bumosi kaka, tsuuhili a mu babaakwa yaayiili mu muutu mumosi.22Baatu boosi bali mu ukwa mu tooni ati, bo baabaambana na Adami. Ni bumosi kaka, baatu boosi buuyaafutaha hu moonyi bu bo babaambana na Kristo.23Ka bo busuuha ilandi-ilandi: Kristo ni watsomi mu boosi, titswene ba baambana na Kristo, mu tangu yi nde huyafutaha.24Titswene, tsukusu sa yiya: Kristo sa asukasa pasi lituma, pasi matwala, pasi mifudi mi livupu, na nde sa afutala Ipfumu huli Taata Nzambi.25Mu tooni ati, Kristo afwana utuma nate bu Nzambi husuusa baboho ba nde boosi hu tsina a miilu mya nde.26Na muboho wa tsyelele wu buusukasa ni lipfu.27Ni mbuli, basonehe: «Nzambi asuusi bisiha byosi hu tsina a miilu mya nde.» Ka nde ubaaleele ti byosi baasuusili nde, bisu liyaabi ti, vengo Nzambi wu asuusili nde byo.28Na ŋa buusuusala nde bisiha byosi, Mwana a Muutu sa aba hu tsina lituma la Nzambi wu asuusala nde bisiha byosi. Buuna, Nzambi sa atuma we bu hwafwana mu byosi.29Tsimaani kaka mu baatu ba bali mu uyaka tondihili mu tooni a babaakwa: hima bo bali mu usaha ubaha? Tso ni mbuli ti babaakwa a bubaasuuha mu babaakwa ve, a hu li na tsoongo huli baatu mu uyaka tondihili mbuha a babaakwa ve.30Na bisu mwakulu, mu hima libaabaani tangu yoosi bebele na lipfu?31Baana ba ngu, pasi ilumbu me umbandyenge na lipfu: mu mbuli, me ndi na nyeme mu benu mu itwadi hya na Yisu Kristo Pfumu a bisu.32Me ki kaluha akiimbaha mu uyalwana na bibulu bya bwadi hu musyenge a Efeso, kini ndulu mu tooni a mambu ma imuutu? Tso babaakwa a bubaasuuha ve, ka hima bubaaleele: «Lidyaani na linywaani, mu tooni ati, ngwali bisu a benu luukwa.»33A liba hu iliba ve, bambaahi bababi babaabiiyasa bipfu bibibwe bya bana.34Yaafutahalaani hu matsimi mamabwe, we bu hwafwana, na kolwaani usumaha, mu tooni ati, bakima ŋa hati la benu a baayaaba Nzambi ve. Me ndi mu undele buuna mana benu likwa tsonyi.Nyutu a ba baasuuha mu babaakwa
35Ka muutu sa afuula: «Buni babaakwa buusuuha mu babaakwa, na ki linyutu bo buuba na lo?»36Muutu wu iyahudi! Ŋa we ubaakuna libutu, lo libaapanduha humbisa a hu lo limiikwa.37Hi we miikuna hili ndulu libutu, peleve libutu la bele, buuve libutu likima, ka a mutswihala nde mwakulu wu ubuuha ve.38Titswene, Nzambi ubaava huli libutu, nyutu yi nde atondi. Nde ubaava pasi libutu nyutu yi yafwana na lo.39Bivaangu bya moonyi byosi, a bili na nyutu mosi ve. Musunya a baatu asobohono na wu banyama, bumosi kaka musunya a banyunyi asobohono na wu batswi.40Hu li na bisiha bi bibaamonehele hu yulu, na bisiha bi bibaamonehele ŋa toto. Ka bisiha bi bibaamonehele hu yulu, a bibaamwedeme bu hwasobohono na bisiha bi bibaamonehele ŋa toto.41Nyangu li na ya nde pila yi umwedeme, tsuungi kaka na ya nde pila, yi bamvwelele kaka yili kima. Tso ŋa hati li bamvwelele, pasi mvwelele ubaamwedeme na lisobosono na wuna.42Buuba bumosi mu ba baasuuha mu babaakwa. Ŋa bamiidiiha nyutu mu toto, yo yibaabolo. Ŋa yo yuusuuha mu babaakwa, yo yibaaba yi yaavelebolo.43Ŋa bamiidiiha yo, yo yili yi yaatsambama, na yi yaavele mifudi. Ŋa yo yuusuuha mu babaakwa, yo yuuba yi muyusu na mifudi.44Ŋa bamiidiiha mu toto, yo yili nyutu a toto, bu yo yuusuuha mu babaakwa, yo yuuba nyutu yi Livupu la Nzambi. Ni buuna, hu li na nyutu a toto, hu li kaka na nyutu a Livupu.45Mu mbuli, Mabasonehe mali mu huleele: «Muutu wa hati a tsomi, Adami, akituhi ivaangu hya moonyi.» Ka Adami wa tsyelele, aluula mu Livupu li libaava moonyi.46A nyutu livupu yibaateehele ve, ka nyutu a toto. Titswene nyutu livupu yibaaya humbisa.47Adami wa hati a tsomi, baavaangi nde mu mufuundu a toto. Adami waboole amati hu mayulu.48Baatu ba ŋa toto baafwanina na muutu wu Nzambi haavaangi mu mufuundu a toto. Uto ti baatu ba hu yulu, bo baafwanina na muutu wu amati hu mayulu.49Na bu bisu lili mu ifwaani hya muutu wu Nzambi haavaangi mu mufuundu a toto, bumosi kaka bisu sa liba mu ifwaani hya muutu wu amati hu mayulu.Mbiingili ya tsyelele
50Monwaani ma me tondi uleele, baana ba ngu, nyutu yi musunya na makila utwala ubaha mukobe a Ipfumu hya Nzambi ve. Hi hibaabolo, utwala ubaambana na hi hibaavelebolo ve.51Me ndi mu unzabisa benu tswehi a Nzambi: bisu a benu a luukwa boosi ve, ka nyutu a bisu a benu boosi sa yisobo —52mu mwana tangu hoole, we ŋa bubaapyetehe diisu. Buufula kulambeete ya tsyelele. Mu tooni ati, ŋa buufula yo, babaakwa sa basuuha na nyutu yi yukwilala, na bisu luusobo linyutu.53Mu mbuli, hwafwana ti nyutu yi yibaabolo yiniiyi, yulwata nyutu yi yibaavelebolo. Nyutu yi yibaakwa, yulwata nyutu yi yibaavelekwa.54Bu nyutu yi yibaabolo yiniiyi, yulwata yi yibaavelebolo, bu nyutu yi yibaakwa yulwata yi yibaavelekwa, buuna dyambu libaasonehe liniili, sa litswiha:«Nzambi miibiingala lipfu, nde miisukasa lo!55Lipfu, mbiingili a we ka yaayo?Lipfu, matwala ma we ma ubaaduba ka maamo?»56Lipfu ubaabaha matwala ma uduba, mu nzila lisumu, na matwala ma lisumu ubaamata mu Mikele.57Ka lifutalaani matondo huli Nzambi wu ubaava bisu mbiingili mu Pfumu a bisu Yisu Kristo!58Ni mu buuna, baana ba me ba litondo, hwadaani kekete, na a litsula likamba ve. Mwesaani lehemene mu isalu hya Pfumu. Mu tooni ati, benu liyaabi ti pasi yi benu lili mu umono mu isalu hya Pfumu, a yili ya mu pu ve.Wycliffe Bible Translators, Inc.