1Ol manmeri i bihainim lo, ol i olsem ol manmeri i mekim ol kain kain ofa. Na ol manmeri i harim tok bilong Bikpela, ol i olsem ol manmeri i mekim ofa bilong kamap wanbel wantaim God.2Na ol manmeri i bekim gutpela pasin bilong ol arapela manmeri, ol i olsem ol manmeri i mekim ofa bilong pikinini wit. Na ol manmeri i givim kaikai samting long ol rabisman ol i olsem ol manmeri i mekim ofa bilong tenkyu long God.3Bikpela i save amamas long ol manmeri i abrusim rot bilong sin. Na em i save rausim sin bilong ol manmeri i lusim pasin i no stret.4I gat lo i tok olsem. Taim yu kam long haus bilong Bikpela, yu mas bringim wanpela ofa i kam.5Ol stretpela manmeri i save ofaim abus i gat planti gris. Na smel bilong dispela ofa i save amamasim Bikpela Antap Tru.6Bikpela i save laikim ol ofa bilong ol gutpela manmeri. Na em i no inap long lusim tingting long en.7Yu mas amamas long litimapim nem bilong Bikpela, na long bringim ol namba wan kaikai bilong gaden i go long em.8Yu no ken pes tudak taim yu bringim takis bilong lotu i kam na yu mekim ofa bilong yu.9Bikpela Antap Tru i bin givim planti samting long yu, olsem na yu mas bekim. Na sapos yu inap, yu mas givim planti samting long em.10Long wanem, Bikpela i save bekim gut ol presen bilong yu. Tru tumas, em bai i bekim planti taim moa.
God em i stretpela jas
11Yu no ken grisim Bikpela. Em i no save laikim kain pasin olsem. Na yu no ken ting bai ol ofa nogut inap helpim yu.12Bikpela em i jas, na em i save skelim pasin bilong ol manmeri, maski ol i gat biknem o nogat.13Bai em i belgut long ol rabisman, na bai em i harim singaut bilong ol manmeri i bagarap long han bilong ol arapela manmeri.14Em bai i no inap givim baksait long krai bilong pikinini i no gat papa. Na bai em i harim ol wari bilong meri, man bilong en i dai pinis.15Dispela meri bai i krai bikpela tru, na bai i kotim ol manmeri i bin rongim em.16Ol manmeri i mekim gut wok bilong Bikpela, Bikpela bai i amamas long ol, na Bikpela bai i harim singaut bilong ol.17Ol prea bilong ol manmeri i no gat save, ol i save go stret long Bikpela, na ol dispela manmeri i no save amamas inap long Bikpela i harim singaut bilong ol.18Ol manmeri i gat nem ol i no ken malolo liklik long prea, inap Bikpela i kam sambai long ol. Na ol i prea inap Bikpela i helpim ol stretpela manmeri long mekim save long ol manmeri nogut.19Na Bikpela i no inap wet. Em bai i kam hariap long ol,20inap em i brukim strong bilong ol manmeri i no save mekim pasin marimari, na em i givim pe nogut long ol manmeri i no bilip long em.21Bikpela bai i pinisim tru ol lain manmeri i bikhet, na bai em i brukim pawa bilong ol manmeri nogut.22Na bai em i skelim ol tingting bilong ol, na bekim ol wok ol i bin mekim.23Na bai em i helpim ol manmeri bilong em long kot, na bai em i mekim ol i amamas long marimari bilong em.24Tru tumas, ol manmeri i amamas long lukim marimari bilong Bikpela i kamap long de nogut, ol i olsem ol manmeri i lukim ol klaut bilong ren long taim bilong biksan.