SIRAK17tpi_png

1God i kamapim man na meri long graun, na em i larim ol i go bek gen long en.2Em i givim liklik taim na sampela de tasol long ol. Na em i makim ol bilong bosim ol samting i stap long graun.3Em i strongim ol long pawa bilong em, na em i mekim ol manmeri i kamap olsem piksa bilong em yet.4Bai ol i bosim ol animal na ol pisin tu. Olsem na olgeta samting i gat laip i save pret long ol manmeri.6Ol manmeri i kisim tang na ai na yau na tingting na save bilong skelim ol samting.7Olsem na ol kain kain gutpela save na tingting i pulap long ol. Na ol inap luksave long wanem samting i gutpela na wanem samting i nogut.8Na Bikpela i putim lait bilong em insait long ol manmeri. Olsem na ol yet inap luksave olsem wok bilong Bikpela em i nambawan tru.10Ol manmeri bai i singaut olsem, “Nem bilong Bikpela em i holi.” Olsem na ol arapela manmeri i ken save long ol bikpela wok bilong em.11Bikpela i givim gutpela save long ol manmeri na em i givim lo bilong em long ol, bai ol i ken kisim laip long en.12Bikpela i mekim kontrak bilong i stap oltaim wantaim ol, na em i soim tingting bilong em long ol manmeri.13Ai bilong ol i lukim lait bilong Bikpela, na yau bilong ol i harim strongpela singaut bilong em.14Na Bikpela i skulim ol, bai ol i ken i stap longwe long ol manmeri nogut. Na em i lainim olgeta manmeri long helpim ol brata.15Bikpela i save oltaim long pasin bilong yumi, na i no gat samting i save hait long ai bilong em.Bikpela i makim ol lida bilong ol wan wan lain pipel. Tasol ol Israel ol i lain manmeri bilong em yet.19Olgeta wok bilong yumi i stap ples klia, olsem san. Na oltaim ai bilong Bikpela i save lukim ol wok bilong yumi.20Olgeta rong na sin bilong yumi i no hait long em. Nogat. Em i save pinis long ol.22Sapos ol manmeri i mekim wok marimari, orait Bikpela bai i laikim tumas dispela pasin olsem nambawan bilas tru. Na bai em i tingim oltaim dispela gutpela wok bilong ol.23Tasol Bikpela bai i kirap na mekim save long ol manmeri bilong mekim sin. Na pe nogut bilong sin bai i sutim ol stret.24Na sapos ol manmeri i tanim bel, Bikpela bai i orait long ol i ken kam klostu long em gen. Na em i save holim han bilong ol manmeri i no gat strong moa.

God i singautim ol manmeri long tanim bel

25Yu mas lusim pasin bilong sin na go bek long Bikpela. Mekim prea long ai bilong em, na rausim ol rong bilong yu.26Kam bek long Bikpela na givim baksait long ol pasin nogut, na abrusim tru ol rabis pasin.27Ol manmeri i stap laip, ol inap long litimapim nem bilong Bikpela Antap Tru. Tasol long ples bilong ol man i dai pinis, husat bai inap long mekim dispela singsing amamas?28Ol manmeri i dai pinis, ol i no i stap moa, olsem na ol i no inap givim biknem long Bikpela. Ol manmeri i gat laip na i strong, ol tasol inap givim tenkyu long em.29Tru tumas, Bikpela i save marimari moa yet long ol manmeri, na em i save lusim rong bilong ol manmeri i tanim bel.30Tasol ol manmeri ol i narakain. Ol i no inap i stap oltaim na givim biknem long Bikpela.31Lait bilong san i winim olgeta lait, tasol sampela taim san i save kamap tudak. Ol manmeri bilong graun i narakain na ol i tingting oltaim long pasin tudak.32Strong bilong Bikpela i karamapim ol strongpela samting i stap long skai. Tasol olgeta manmeri i olsem pipia nating bilong graun.
expand_more
Search