1 Timoteya5
1U leke uku jukukilanga unkosi u mukulu, kono u gambange nenja nage sinagwe ndisho. U tende nenja a bankosana sinagwe mbancego.2U tende nenja a banakazi a bakulu sinangwe mbanyoko, u tende nenja a banakazi-gana sinagwe mbanciijako ko mutendelo gu lulikile.3U babalele nenja a bamfwilwa aba ba bulite wawa i bintu.4Kono ati umfwilwa na li kwesi a bana kampa a bewa, babo ba li botele uku li sholeza tanzi i bintu bya Nyambe buti ba zibe uku babalela a maasi gabo no ku tula inzumino jabo mu bitendantu. Ko ku tenda bulyao, ba life a bazazi babo no basukuzabo ko ku ba babalela, mi ceco nce cintu ci jangaza Nyambe.5Umfwilwa uju a bulite i bintu wawa uju a sigele mu bwinke ga sa tula insepo jakwe kwa Nyambe no ku zundamina uku lapela a masiku no kamwi ku kumbila Nyambe buti a mu tuse.6Kono umfwilwa uju a joja mu minyakulo ngwa ku fwa nanga na joja.7U nanguze a bantu bulyao, buti ku bule nanga muntu genke uju a botele uku nyazigwa.8U muntu gense uju ta tusi a bakwakwe, cifwe-cifwe wawa bo luasi lwakwe, ta tendi ko ku ja ko nzumino jakwe, mi ga sa itigwa ku muntu uju ta zumine.9Takuli umfwilwa uju a ñoligwa ku mpalo jo bamfwilwa, mbwita uju sa kwesi i myaka jo makumi ga 6 kame ka sepaala ku nkosi gwakwe.10A li botele uku zibigwa nenja ko bitendantu i bilotu byakwe, uju na ga kulisa nenja a bana, ige na tambula nenja a banyenda, no ku ezulula a bantu ba Nyambe mane no ku tusa a bantu aba ba li mu makababu mane no ku tenda i bitendantu i bilotu byonse.11Ku bamfwilwa aba ba si li baya, aba ba sini uku kwanisa i myaka ja 60, u leke uku ba ñola ku mpalo. Kakuli u lushako lwabo ku minyakulo ndunene ku ita ubu ba shakila Kilesite mi ko ku tenda bulyao, ba si shaka a malugo.12Mi u mulandu gu li ba botele kakuli ta na ba kutika inkuluwizi jabo jetanzi.13Kame, se ba la ba a bantu a bakata aba ba ja bu kuntana mu mibanda. Mi ta li mbakata bulyo kono mba busebe mi mba ku twalikiza ingana ku bintu ba tenda bamwinya na ba gamba i bintu ibi ta bi botele uku gambigwa.14Cwale nda sa laga a bamfwilwa bo banakazi-gana buti ba sesegwe, buti ba bone a bana, ba babalele a majugo gabo, buti ba leke uku wa a kaito kwoju a tu zimbite buti a leke uku tu kwaga.15Mane bamwinya se ba li sigulukite no ku umpilila Satani.16Ati u mwanakazi jumwinya uju a zumine na kwesi a bamfwilwa aba a babalela, a li botele uku zundamina uku ba tusa buti a bazumini ba leke uku lemenwa kebaka lyabo, mi a bazumini ba tuse bulyo a bamfwilwa aba ba bulite i bintu wawa.17A bakulu aba ba jendesa i bintu byo tugugi to bazumini nenja ba li botele uku gajigwanga mwikute no ku wegwa u mupuzo gwa bili, cifwe-cifwe a batandazi no bazigi.18Kakuli a Mañolo mbuti ga co buti, “U leke ku fwinka ku kanwa kepulu aa li kwesi uku sebeza mu lukau,” mi “U mubeleki a li botele u mupuzo gwakwe.”A mapulu ga sebeza mukati ko lukau19U leke uku tambula intaba iji ji shangeza u mukulu go bazumini, mbwita ati jejo intaba na ji pakigwa ku bampaki bo bile kampa bo tatwe.20Kono a bakulu aba ba tenda i bitendantu i bimangoju u li botele uku ba jukukilanga akati ko bantu buti a bantu bamwinya ba joge.21Nda sa ku lugwila mu mensho ga Nyambe no Kilesite Jesu no mañiloi aga na ga shaligwa, uku mamela ibi na nda ku laga mi u zwe ku ku shala a bantu.22U leke uku welangilanga uku shala a bantu buti ba be a bajendesi, mi u leke uku linginikanga mu bitendantu i bimangoju byo bantu bamwinya. U kale bu cenete.23U leke uku nywanga bulyo a menzi, kono u shutagulange utu waine u tuce buti tu ku tuse kebaka lye vumo lyako ili ta li zwite ku ku shishama inako jonse.24I bitendantu i bimangoju byo bantu bamwinya bi la li bonaaza mane inkatulo na ji sini uku sika kwabo. I bitendantu i bimangoju byo bantu bamwinya bi li ba umpilile mwishule lyabo.25Ko mutendelo ugu gu li kozete, i bitendantu i bilotu bi la zibaala, mi i bimangoju nabyo ta bi goli uku bikigwa inako inde.
The Seed Company