Misebezi ya Baapositola14
1Cakacitika mu Antiyoki cintu comwi ecakacitika mu Ikoniyamu Paulu o Bbanabbasi nibakainka ku cikombelo ca Majuda. Bakakambooka cenguzu cokuteeti mbunga mpati ya Majuda a Bamasi bakaba basyomi.2Kono Majuda bakakaka kusyoma bakayunga Bamasi kuteegwa babukile Paulu o Bbanabbasi.3Mpoonyina maapositola bakakala kwateni kwe nako ndamfu, kabakambooka cabusicamba kwiindila mukusepa Mwami. Anguwe Mwami wakatondezya kuteeti Makani ooluzyalo lwakwe ngenconzyo kwiinda mukubapa nguzu zyokucita zitondezyo zyamaleele ezikomosya.4Bantu bomutaindi bakaanzaana mukuteeti bamwi bali kubbazu lya Majuda, bamwi kubbazu lya maapositola.5Mpoonyina Bamasi a Majuda antoomwi abasololi babo bakayeeya kuteeti bapenzye maapositola okubapotoola mabwe.6Kono nibakaimvwa nkani eeyi maapositola, bakacijila kucilalaanda coku Likaniya, mumataindi mapati a Lisitila o Delebbe okucilalaanda caazingulukide.7Ooko kubakaakuzumanana kukambooka Makani Mabotu.8Iino kwakali mwaalumi mu Lisitila walimulema watakeenda kuzwa naakazyalwa.9Walikede kaswiilizya zyaali kwaamba Paulu. Mpoonyina Paulu wakamudongomwena okubona kuteeti waloolusyomo lokuponesigwa.10Kumane, Paulu wakamwaambila atala lye jwi lwakwe kateeti, “Nyamuka, wiime amaulaako.” Mpoonyina ooyo mwaalumi wakasotoka okutalika kweenda.11Mbunga yabantu niyaka bona Paulu caakacita, bakatalika koongolola mucisyobo cabana likaniya kuteeti, “Baleza baba mbuli bantu okutuselukila!”12Bakapa Bbanabbasi izina lya leza wama Giliki lyokuteeti Zeyusi o Paulu lyokuteeti Helemesi kaambo nguwali mwaamboozi mupati .13Mupaizi we ngʼanda ya leza Zeyusi eeyo yakalaanze e taindi, wakeeta bapoho amaluba-luba alukidwe antoomwi kumanjililo, kuteegwa we amabunga abantu bape zituuzyo kumaapositola.14Kono Bbanabbasi o Paulu nibakamvwa zyalikucitika, bakayaola zizwaato zyabo okuzuzila mubantu kaboongolola kuteeti,15“Nobantu, ino niinzi nemulimukucita namu? Aswibo tuli bantu feela mbuli ndinwe! Twakazida kukambooka Makani Mabotu kuteegwa muzwe kuzintu zitakwe ntuso, musandukile kuli Leza upona, wakalenga julu enyika o lwizi ezintu zili mwateni.16Ciindi wakazumizizye nywebo Bamasi boonse kucita zimwalikuyanda,17kono taakwe naakalekede kulitondezya we obubotu bwakwe mbuli kumupa mvula kuzwa kujulu ezisyango muciindi ceelede, kumupa zyokulya okubotezya myoyo yenu.”18Nekuba kuteeti baapositola bakaamba majwi ali namu, cakasyupa ku balesya bantu kupa zituzyo kulimbabo.19Kwakasika Majuda bamwi kuzwida ku Antiyoki yoku Pisidiya oku Ikoniyamu, bakayunga bantu banji okupotoola Paulu mabwe mpoonyina bakamukwelela anze etaindi kubonaanga wafwa.20Kono basyomi nibakamubunganina wakabuka okupiluka mutaindi. Nibwakacha Paulu o Bbanabbasi bakainka ku Delebbe.21Paulu o Bbanabbasi bakakambooka Makani Mabotu mu Delebbe, okupakuteeti bantu banji basanduke kuba basyomi. Mpoonyina bakapiluka ku Lisitila, ku Ikoniyamu oku Antiyoki yoku Pisidiya.22Bakayumya-yumya okukulwaizya basyomi kuteeti bazumanane mulusyomo okubaambila kuteeti, “Tweelede kunjila mu Bwami bwa Leza kwiindila mumapenzi manji.”23Mumbungano zyoonse bakasala bamaalu, bakababika mumaanzaa Leza ngubali kusyoma kwiinda mukukomba okuliimya kulya.24Mpoonyina bakainda mu Pisidiya mane baakusika ku Pamfiliya.25Mu Pelega bakaakukambooka majwaa Leza, mpoonyina bakaselela kwiinka ku Ataliya.26Kuzwaawo bakazubuka kupiluka ku Antiyoki yoku Siliya, kuwakatalikilide musinzo wabo. Kokuko kubakabikilwa muluzyalo lwa Leza kuteeti bacite musebezi ooyu ngubamanisya iino.27Nibakasika ku Antiyoki bakabunganya bantu bembungano antoomwi okubaambila zyoonse Leza zyaakacita kwiinda mulimbabo ape ambwaakajula nzila yolusyomo okuli Bamasi.28Mpoonyina bakakala mu Antiyoki abasyomi kweciindi cilamfu.
The Seed Company