Misebezi ya Baapositola11
1Iino baapositola abamwi basyomi balimucooko ca Judiya coonse bakamvwa kuteeti abo Bamasi bakaatambula majwaa Leza.2Mpoonyina Pita nakainka ku Jelusalemu, basyomi be Cijuda bakatalika kumutongooka3kabateeti, “Walimweenzu mungʼanda ya Bamasi batana palulwa mane wakalya ambabo.”4Mpoonyina Pita wakabalungulwida zyoonse mbuzyakacitika mumundandaanda kateeti,5“Nindalikukomba mutaindi lya Jopa, ndakabona cilengaano. Mucilengaano ndakabona cintu cilimbuli sila pati kaciyoobuselemuka kaciyoobweetwa ansi mumabbazu one kuzwa kujulu okuza kulindime.6Nindakalanga mwateni, ndakabona mwali misyobo yabanyama bajesi maulu one bavubwa abomusaka, bakokoba abayuni.7Mpoonyina ndakamvwa jwi lyalikundaambila kuteeti, ‘Pita, nyamuka, jaya ulye.’8Ndakataba kuteeti, ‘Nee o Mwami, sinabuzuba ndalya cintu Mulawo wa Majuda cewaamba kuteeti tacisalali ape cilisofweede.’9Kono jwi lyalikuzwa kujulu ape lyakateeti, ‘Utaambi cintu Leza caasalazya kuteeti tacisalali.’10Eeci cakacitika tweendo totatwe, mpoonyina zyoonse zyakakwelelwa kujulu ape.11Mpoonyinaawo kwakasika baalumi botatwe angʼanda mpondalikukala , bakatumwa kuzwa ku Sizaliya.12Muuya wa Leza wakandaambila kuteeti ndiinkaabo, nditazumboozyi kaambo kokuteeti mbamasi. Kuzwaawo, ndakainka antoomwi aaba bakwesu bali cisambomwe, mpoonyina twakaakunjila mungʼanda yomwaalumi wakatwiita.13Wakatwaambila mbwaakabona mungelo kaimvwi mungʼanda yakwe okumwaambila kuteeti, ‘Tuma bantu ku Jopa, bakaite mwaalumi uteegwa Saimoni Pita.14Nguuzeeta makani ambomukonzya kufutuka, yebo abengʼanda yako.’15Ndicitalika feela kwaamboola Muuya Uusalala wakabaselukila mboonyina mbuli mbakatuselukila kumatalikilo.16Mpoonyina ndakayeeya majwi ngakaamba Mwami kuteeti, ‘Joni walikubbabbatizya amaanzi kono nywebo muzoobbabbatizigwa o Muuya Uusalala.’17Iino na Leza wakabapa cipego caakatupa nitwakasyoma mu Mwami Jesu Kilisitu, ino mebo ndakalini kuteeti ndisinkilizye Leza?”18Nibakamvwa namu, bakaleka kutongooka okutalika kulumbaizya Leza kabateeti, “Twabona kuteeti Leza a Bamasi wabazumizya kweempwa okuboobuumi butamani.”19Iino basyomi bakasabalangana nako yamapenzi nakajaigwa Sitivini bamwi bakeenda mane kucilalaanda ca Fonisiya, bamwi ku Saipulasi abamwi ku Antiyoki yoku Siliya kabayobukambooka majwaa Leza ku Majuda feela.20Kono akati kabo kwali bamwi baalumi boku Saipulasi okutaindi pati lya Sailini bakeza ku Antiyoki okutalika kukambooka Makani Mabotu o Mwami Jesu ku Magiliki.21Nguzu zyo Mwami zyalaabo. Mpoonyina bantu banji bakasyoma okusandukila ku Mwami.22Bembungano yoku Jelusalemu nibakamvwa zyakacitika, bakatuma Bbanabbasi ku Antiyoki.23Naakasika okubona Leza mbwaakamvwida luzyalo bantu aabo wakabotelwa okubayumya-yumya boonse kuteeti bajatisye mu Mwami emyoyo yoonse.24Bbanabbasi walimwaalumi walikabotu, wazwide Muuya Uusalala olusyomo. Mpoonyina bantu banji bakeetwa ku Mwami.25Mpoonyina Bbanabbasi wakainka ku Tasisi kuyolangoola Saulu.26Naakamujana, wakamweeta ku Antiyoki. Mpoonyina bakakala kwateni mwaaka omwi kababungana abembungano okwiisya bantu banji. Ku Antiyoki basyomi kubakatalikila kwiitwa kuteeti bana Kilisitu.27Muciindi eeco bamwi basinsimi, bakeenda kuzwa ku Jelusalemu kwiinka ku Antiyoki.28Umwi wabo walikwiitwa kuteeti Agabbasi, ooyo wakanyamuka okusinsima kwiinda munguzu zyo Muuya Uusalala kuteeti kuzooba nzala mpati nyika yoonse. Eezi zyakazuzikizigwa mubulelo bwa Kulodiyasi.29Mpoonyina basyomi bakamvwana kuteeti batumizye basyominyina mu Judiya lugwasyo, umwi oumwi mbuli mbwaalikukonzya.30Mpoonyina bakacita namu, bakatumizya Saulu o Bbanabbasi zipego zyabo kubamaalu bembungano yoku Jelusalemu.
The Seed Company