Read Guyei Pagai Guyei Pɛ Ba 5

Guyei Pagai Guyei Pɛ Ba5tod_pbt

¹Nà ga lɔ nà-kpelei zu,ee, anzalopoi, ɗɛi è ga ànza ɓeai,gè nà-miilegi ɠula ta tufa maku nɛɛnɛgiti,gè nà-kɔin sɛpɛgi mi, ta ma wulɔi,gè nà-dɔɔi ta nà-nɔnɔi ɓɔle.(Bɔɔlamaiti)Bɔ̀ɔlaiti, à daami wo, wo ɓɔɔle.Nɛɛbɛ nu felegɔiti, à dɔɔi ɓɔle, é wo zo.²Gè ɠɛa ɲiizu, kɛlɛ zìi ɠɛa ɠaazu ɠa,gè nɛ̀ɛbɛ nui woomɛni,é ɗa pɛlɛi laaloɠa, é ɗa ɠɛ mà:«Pɛlɛi laalao, anzalopoi, zìima anzanui,nà-poopo kolegi, ɗɛi è ɠaavɔnigai.Mazɔlɔɔ nɔ̀ungi yɛɓɛa ga duɓui,kpidi ɗɛ ɠilagilagi é ʋilɛsu,naa nɔ̀undeɠaiti zɛɓɛa.»

³Gè nà-seɠei ɠulaa ɠɔba,nà too ɠale ʋolu?Gè kɔ̀ɠɔiti maagbaa,nà ti nɔɠɔzu ɠale ʋolu?

⁴Nɛ̀ɛbɛ nui ɠa yeeleʋesu fenɛtɛlɛ laaʋɛ,kɔɔlɛ ɓooi ɗa yei ga ze.⁵Gè wuzeɠea ga gè pɛlɛi laalao nɛ̀ɛbɛ nui ʋɛ,miile gulɔ maku nɛɛnɛgi yeiɗa zèei ta zèeɓeɠaiti zɔɠɔzuʋɛti,gè ɗa pɛɛ sɔɠɔgi ʋa.⁶Gè pɛlɛi laalaoga nɛ̀ɛbɛ nui luɠɔ,kɛlɛ é lia, é la mɔ ná,gè ɠɛ unga wuulee.Gè ɠulani gaiziɛ vai ma, kɛlɛ gè la kaani.Gè ta nɔ lolini, é la gòoɠaaʋoteni.⁷Gi ɠomini gá taa makɛ nuiti,ti ɗa lati taai ma.Ti dòɠani, ti màawana,ti nà-pɛɛkɔmai ɠula zèa.

⁸Ee, Zeluzalɛme anzalopoiti, nà wo ɠaazaɠasu:Wa nɛ̀ɛbɛ nui ɠaana, leeni ɠa wo bosu ma?À ɠɛ ma nɛɛbɛ zeeɓɛi ɠa é bà.⁹Bo dɛɛ gi ma, ɗɛi è ʋagai anzaa zaama,leeni ɠa é è nɛɛbɛ nui ya, é la taɠili zea?Gaamazu, lee ɓa ka é è nɛɛbɛ nui ya, é la taɠili zea,è gi ɠaazaɠasu ga niima laali?¹⁰Nɛ̀ɛbɛ nui lɔtɔʋɛ, kɛdɛgɛ,ʋili nɔpɛ ge la ma,anɛɛ nu waapuugɔ (10.000) zaama.¹¹Nɔungi ɠulaʋɛ ga zanu kitei,nɔundeɠai ʋɛɛni ma fɛlɛɓɛɓɛ,nɔundeɠa lɛiɗai eɠɛ kalawɔni.¹²Gaazuɠɛzɛiti kulaʋɛ ga poopo kolegiti ti ziɛi laaʋɛ,ti ɗa maagba ga nɔnɔi,ti ɗa ɲi kpɛtɛi zaama.¹³Komagiti kɛɛʋɛ eɠɛ tufa maku nɛɛnɛ kpelei,ti-maku nɛɛnɛgi ɗa ɠula.Dakɔlɔgiti ta ga bulɛgiti,ʋɛ miilegi ɠulazu ná.¹⁴Zeeɓeɠaiti kɛɛʋɛ eɠɛ zanu balaɠaegiti,daavegai ga kɔtu zɔngɔ ɓaagiti.Kpusɛi ɠɛ eɠɛ see ɲiiga zɛpɛgi,nii doungai ga kɔtu ɓiinii.¹⁵Kɔɠɔiti kulaʋɛ ga kɔtu ɠole kpɛdɛgi,nii kpadɔai zanugi ma.Maayikiai eɠɛ Liɓan ɠize ɲɛkpɛi,sulogai eɠɛ sɛdele guluiti.¹⁶Daa ɠoozuʋɛ nɛɛʋɛ gola,kpusɛi pɛ ge ɛ̀nɛkɛga.Ee, Zeluzalɛme anzalopoiti,gaamazu, ʋele ɠana nɛ̀ɛbɛ nui la,ʋele ɠana zìima nui la.

Guyei Pagai Guyei Pɛ Ba 5 / tod_pbt

Guyei Pagai Guyei Pɛ Ba5tod_pbt